အဝေရာတော

“အဝေရာတော” (နေ၀င်းမြင့်)
================================================
ကျွန်တော်တို့ အိမ်ရှေ့လမ်းသည် လမ်းတိုကလေးဖြစ်၍ ထိုလမ်းတို၏ တောင်ဘက်တွင် နှစ်ကွက်တွဲ ခေါ်ကြ သည့် ခြံကျယ်ကြီးတစ်ခြံရှိသည်။ ရပ်ကွက်က ထိုခြံကို အဝေရာတောဟူ၍ လည်းကောင်း၊ ပေလေးဆယ် ခြောက်ဆယ်မြေကွက် နှစ်ကွက်စာရှိ၍ နှစ်ကွက်တွဲဟူ၍ လည်းကောင်း ခေါ်ကြသည်။ မြောက်ဘက် လမ်းတိုနှင့် တောင်ဘက်လမ်းရှည် နှစ်လမ်းကို ထိပ်ချင်းတိုက်ကျယ် ပြန့်သော ထိုခြံကြီးက လူသူ လေးပါးနေထိုင်ခဲ့သည်မရှိဘဲ ရပ်ကွက်အတွင်း၌ ပုဆစ်တုပ်ထိုင်နေသည့်နှယ်ရှိ၏။
ခြံ၏အရှေ့ဘက်တွင် ရုံးတစ်ရုံးရှိသည်။ အနောက်ဘက်မှာတော့ လူနေအိမ်တွေရှိသည်။ ထိုရုံနှင့် လူနေအိမ် တွေက ၀ါးထရံကွက် စည်းခြားထားသဖြင့် သပ်သပ်ရပ်ရပ်ရှိသော်ငြား တောင်ဘက်နှင့် မြောက်ဘက် မှာတော့ ကျွဲစည်း နွားတား မရှိ။ တစ်ခါက စည်းရိုးဟောင်းရှိတန်ရာသော်လည်း၊ ခုတော့ ရှေးမြို့ဟောင်း ရာ၏ မြို့ရိုးပြိုသကဲ့သို့ ရေးတေးတေးသာ ရှိတော့သည်။
ခြံ၏မြောက်ဘက်ကျကျ (ကျွန်တော်တို့လမ်းနှင့်နီးနီး)တွင် ဟောင်းမြင်းလှပြီဖြစ်သော အိမ်တစ်လုံးရှိ၏။ အိမ်၏ အလုံးအထည် မယွင်းသေးသော်လည်း ပုစဉ်းပျံဘယ်တိုင်ဖျား နားရပါ့မယ် ဆိုသကဲ့သို့ ပုစဉ်းနား လျှင်ပင် ပြီးတော့လေမလားထင်ရသည့် အိမ်ကလေးဖြစ်သည်။ ဆောက်ကာစတုန်းကတော့ သစ်ကောင်း ၀ါးကောင်း အိမ်ကောင်းရာကောင်းကလေး ဖြစ်ပုံရသည်။ ရေနံရည်ဝအော် သုတ်ထားသဖြင့် ပိုးပုရွက်တို့ မကျူးကျော် နိုင်ကြဘဲ အဝေရာတောကြီးအတွင်း ထီးထီးကြီး ရှိနေနိုင်ခြင်းဖြစ်၏။
ခြံကြီးတစ်ခြံလုံး ပိတ်ပိတ်သည်းသည်း ပေါက်နေကြသော အဝေရာပင်များကြောင့် အဝေရာတော ခေါ်ကြ သကဲ့သို့ ထိုအိမ်ကိုလည်း အဝေရာအိမ်ဟု ခေါ်ကြပါ၏။ အိမ်ကကြီးလှတာတော့မဟုတ်။ ကပ်မိုးထရံကာ ဖြစ်၍ ထူးခြားသည့်အချက်မှာ တောင်လှည့်လား၊ မြောက်လှည့်လား မြေကြီး လက်ပုတ် မပြောနိုင် ကြခြင်း ဖြစ်သည်။
ကျုပ်တို့တွေ့ဖူးသလောက်တော့ တောင်ဘက်နဲ့မြောက်ဘက်မှာတော ဈေးဆိုင်တွေလို မတ်တတ် မြေစိုက် ကဲလားကြီးတွေလို တံခါးတွေဗျ။ တောင်ဘက်မှာ နှစ်ချပ်၊ မြောက်ဘက်မှာ နှစ်ချပ်ရှိသည်။ ကဲလား တံခါး လေးချပ် ကို ၀ါးလုံးလေးလုံးနဲ့ ထောက်လိုက်ရင် ဟာလာဟင်းလင်း ပွင့်သွားတာမျိုး။
သည်ရပ်ကွက်ကို ပန်းသုန်းပင်ပန္နက်စိုက်ကြပြီဆိုကတည်းက ရောက်နှင့်နေသော ကောက်ညှင်းပေါင်း သည်ကြီး ဒေါ်ရွှေက ပြောပြသဖြင့်သာ အနုမာနအားဖြင့် ဆု၍ သိကြရသည် ဖြစ်ရာ ကျွန်တော့် မျက်စိ ထဲတွင် ဆင်တင်းကုပ်ကိုသာ မြင်နေမိလေ၏။
ကျွန်တော်တို့မိသားစု မြို့သစ်ကို ရောက်လာစကတည်းက သည်ခြံကြီးမှာ လူသူ လေးပါး နေထိုင် ကြတာမျိုး မရှိခဲ့။ အိမ်ကလေးသည်လည်း လေးဖက်ချ အလုံပိတ် ငုတ်တုတ်အိပ်တ်သကဲ့သို့ရှိ၏။ အဝေရာ ပင်ကြီးတွေက ကြီးသည်ထက်ကြီးလာကြသည်။ တစ်နှစ်တစ်ခါ အစေ့ကျကြရာက ဖြစ်ရသော နောက်ပွားပင် တွေကလည်း သိပ်သည်းသည်ထက် သိပ်သည်း၊ မြင့်သည်ထက်မြင့် ရင့်သည်ထက် ရင့်ကြရာက အပင်ချင်း နေရောင်လုကြသည့်နှယ် ကောင်းကင် တိမ်ညွန့်ကိုပင် မီလုမီခင်။ တစ်နေရာတည်း ၌ သစ်ပင်တွေက ညွန့်ညွန့်ကြီး သန်ကြလှ၍ အိမ်ကလေးသည် ဟောင်းရာမှဆွေး၊ ဆွေးရာ မှ မြေ့၊ မြေ့ရာမှ ကြွေတော့မလို ရွရွကလေး တည်နေသည်ဖြစ်ရာ တစ်ခါက အားကြီးခဲ့ဖူးသော အကြောင်းသည် ပျောက်လုလုဖြစ်နေသည်။
"နေပါဦးပွဲစားကြီးရဲ့၊ သည်နှစ်ကွက်တွဲကြီးက ဘယ်သူပိုင်တာတုန်း ဘယ်သူမှလည်း ၀င်တာထွက်တာ မတွေ့ရပါလား"
ကျွန်တော်တို့အိမ်ကို အကြောင်းဟိတ်ပေါင်းစုံဖြင့် ရောက်လာကြကုန်သော လူသူတော်ကောင်း များစွာ တို့အနက် အိမ်မြေပွဲစား ဦးသာဂရလည်း တစ်ဦးပါသည်ဖြစ်၍ တစ်ရက်မှာတော့ မှတ်မှတ်ရရ မေးဖြစ် ပါသည်။
ဦးသာဂရသည်လည်း လူပုဂ္ဂိုလ်အားဖြင့် လွန်စွာ အထနှေးလှသူ မင်းသကျ(မင်းသားကျ)ဆိုသော်ငြား မြို့သစ် မြေပုံ နှင့် ပတ်သက်လျှင် သုံးခွက်တစ်ခွက်တင် အနှစ်ကျအောင် သောက်ဖူးသူဖြစ်၏။ အများတကာ အိမ်မြေ ပွဲစားတွေလို လက်ကိုင်ဖုန်း ခါးချိတ်မရှိ၊ တရုတ်ဆိုင်ကယ်မရှိ၊ မြေပုံမိတ္တူမဆောင်၊ မှင်ဂိုက် မကောင်းလှသူ ဆိုသော်လည်း မြို့သစ် ရွှေကြိုးသတ်နယ်အကွင်း မြေအရောင်အဆင်းနှင့်တကွ သိသူ ဖြစ်သည်။ သို့သော် သည်နှစ်ကွက်တွဲခြံနှင့် အိမ်အကြောင်းကိုတော့ အလီမရသော ကျောင်းသားကဲ့သို့ ၀ိုးဝိုးဝါးဝါး ရှိလေ၏။
"ကျုပ်ကဟောဟိုနားက မြေဖြူလို့ မြေပုဏ္ဏား၊ ဟောသည်နားက မြေနီလို့ မင်းမြေ၊ အဲဟိုနားက မြေမည်း လို့ မြေကျွန် စသည်ဖြင့် ပကတိမြေလည်း သိတယ်။ ကေသပံသုသလောက မြေလည်းသိတယ်။ လခြမ်းမြေ၊ အိုးကင်းမှောက်မြေ၊ စည်မျက်နှာမြေ၊ နဂါးကျစ်မြေစသည်ဖြင့် မြေမျက်နှာပြင်ကအစ သိပါရဲ့၏။ နို့ပေမယ့် ဟောသည်အိမ် နဲ့မြေကို မသိဘူးဗျာ။ ငယ်စာရင်းမကောက်နိုင်ဘူး ဖြစ်နေတယ်။
ပွဲစားကြီး ဦးသာဂရက အိမ်လွတ်ခြံလွတ်တွေ ရပ်ကွက်တကာ လိုက်ကြည့်တတ်သူဖြစ်၍ တစ်ရက် ကျွန်တော် တို့ လမ်းတွင်ရောက်သခိုက် ကျွန်တော်မေးကြည့်ခြင်းဖြစ်သည်။ ခင်ကာစက မေးထုးကြာပစ် နှုတ်ဆက်ကြ ရုံသာဖြစ်၍ နောက်တော့လည်း ထီးကောက်ကြီး ပခုံးချိတ်ရင်း ကျွန်တော်တို့အိမ်ကို ရောက်လာလေ့ ရှိသည်။ စာရေးဆရာတို့ကာ အလုပ်မည်မည်ရရ မရှိကြရှာသော လူအားများဟု မြင်ပုံ ရသဖြင့်လည်း ရောက်လာသည့်အခါတိုင်း မြစ်ကမ်းပါးခြေ၌ ကျောက်ချသော နှစ်ပင်တိုင်ရှေးလှေကြီးကဲ့သို့ ရှိလေသည်။
(၂)
တလောက မြေဈေး၊ အိမ်ဈေးတွေ လှုပ်လာသည့်အခါ ကျွန်တော်တို့ လမ်းတိုကလေးထဲမှာ ပွဲစားတို့ စီးလာကြသော တရုတ်ဆိုင်ကယ်တို့ ဒရိန်းပြကြသည့်နှယ် အုတ်အာသောင်းလာ ရှိလာကြသည်။ ပိုင်ရှင် မသိဘဲ အဝေရာတောကို ၀င်တိုးကြသည်။ ဂီလာနအိမ်ကလေးကို မျက်လုံးဖြဲ၊ နှုတ်ခမ်းဖြဲ သမားကြည့် ကြည့်ကြ ကုန်သည်။ မြောက်က၀င်၍ တောင်ကထွက်ကြ၏။ တောင်က၀င်၍ မြောက်ကထွက်ကြ၏။ ပါလာကြ သမျှသော လက်ကိုင်ဖုန်းများဖြင့် အဋ္ဌတိဒိသာ အရပ်ရှစ်မျက်နှာသို့ ဆက်ကြသည်။
အဝေရာတောကို စန္ဒကူးတောနှယ် တပ်မက်သော မျက်လု့းများဖြင့် အနုလုံပဋိလုံ အဖန်ဖန် စောဒနာ ကြသည် လည်းရှိ၏။ ပြိုလုလု အဝေရာအိမ်ကိုလည်း သစ်ထီးသစ်မ၊ သစ်ဘီလူး သစ်နပုန်း ရုန်းရုန်းရင်းရင်း ကိုင်တွယ် ကြည့်ရှု အစစ်အဆေးပြု၍ ကာလတန်ကြေး မှန်းကြလေ၏။
သည့်နောက်တော့ ပြန်လည်ငြိမ်သက်သွားပြန်သည်ဖြစ်၍ အဝေရာတောနှင့် အဝေရာအိမ်သည်လည်း လေသလိပ်၊ သည်းခြေသုံးပါးပေါက်သော တူလာသရောနာ ရောဂါသည်ကဲ့သို့ တစ်ဖန်ရှိပြန်လေသည်။
"အိမ်တို့၊ မြေတို့မှာလည်း ကမ္မဇိဒ္ဓိရှိတာကိုး။ စာရေးဆရာကြီးရဲ့၊ ကမ္မဇကံကြောင့်ဖြစ်သော ဣဒ္ဓိတန်ခိုး ဆိုတာကောခင်ဗျ။ ကမ္မဇနဲ့ ဣဒ္ဓိပေါင်းတော့ ကမ္မဇိဒ္ဓိဖြစ်တယ်။ ကြားဖူးတယ် မဟုတ်လား"
"ကမ္မဇလေ တော့ ကြားဖူးပါတယ် ပွဲစားကြီးရဲ့"
"စာရေးဆရာနှယ် ကမ္မဇလေက သားဖွားအံ့မူးမူး မိခင်များ သားဖွားနိုင်အောင် တွန်းကန်ပေးတဲ့ လေဟာ ကောဗျ။ သည်အိမ်နဲ့ သည်ခြံကတော့ စာရေးဆရာပြောသလို ကမ္မဇလေတွန်းတာတောင် ခေါင်းပြုမည့် ပုံမပေါ်ဘူးဗျို့ ကမ္မဇိဒ္ဓိတော့ ဝေးကရော"
ပွဲစားတကာသို့ လန်ကျလောက်အောင် ငြိမ်သက်ခဲ့သော အဝေရာအိမ်နှင့် အဝေရာခြံကြီး လှုပ်လာသည့် နေ့သည် ၀ါခေါင်လ၏ ရက်တစ်ရက်တွင်ဖြစ်လေသည်။ ပိတ်ဆည်းသောင်းသည်း မျက်မည်း တောကြီး နှယ်ဖြစ်နေသော အဝေရာတောကိုဖြတ်၍ အဝေရာအိမ်တွင်နေထိုင်ကြမည့် လင်မယား တစ်စုံ ရောက်လာ ၍ဖြစ်သည်။ ပိုင်ရှင်မည်သူမည်ဝါ မသိရသော်လည်း သူ့ခြံတွင်း၌ ပွဲစားတကာတို့ တောဆင် ၀ါးတောနင်း သလို နင်းနေကြတာကို ကြားသွားပုံရပါ၏။
သံသေတ္တာတစ်လုံး၊ စားအိုးစားခွက် တစ်ဂျုံအိတ်စာ လက်တွန်းလှည်းတစ်စီးနှင့် ရောက်လာကြသူ တောစောင့်နတ်လင်မယားလည်း အိမ်ကလေး၏ ကဲလားတံခါးတွေကို အဝေရာလေးကိုင်းဖြင့် ထောင်ကာ မြွေခြောက်ခြင်း၊ ကင်းခြောက်ခြင်း ဦးစွာလုပ်ကြရသည်။ အိမ်ငါးပေပတ်လည်လောက်ကို ရှင်းကြရ၏။ ဘုရားစင်ရိုက် လုပ်ကြရ၏။ လက်တွန်းလှည်းက အဝေရာတောထဲတွန်း မရသဖြင့် မြောက်ဘက် လမ်းပေါ်တွင် ထားရသည်။ ကျွန်တော့်အိမ်နှင့်နီးသဖြင့် မနက်ဘက် လှည်းထွက်တိုင်းကျွန်တော်နှင့် ဆုံသည်။ လှည်းက အာတာပူစီလှည်း။ အရောင်းဆိုးထားသည့် သကြားကို အပူပေးကာ မွတ်မွတ် လှည့်ခြင်း ဖြင့် အမျှင်အမျှင်ထသော မုန့်တစ်မျိုးသည် ကမ္ဘာလောကမှ မျိုးတုန်းသွားပြီ ထင်ခဲ့ရာမှ ပြန်ပေါ် လာ သဖြင့် ကျေးဇူးတင် ရသေးသည်။
"နေပါဦး ကိုအာတာပူစီရဲ့ ခင်ဗျားတို့ကို ခြံရှင်သူဌေးက ထားတာလား"
"မဟုတ်ပေါင်ဗျာ။ သူဌေးလက်ခွဲက ထားတာပါ။ မရှိလို့သာ လာနေရတယ်။ ဘယ်အချိန်မြွေဝင်လာမလဲ ကြည့်နေရတာပါ။ လက်စနဲ့ဆရာကြီးရယ် ဆရာကြီးကို ကျွန်တော့်မိန်းမအပ်ခဲ့ပါရစေ။ အထဲမှာရှိပါတယ်"
"အထဲမှာ ဘာလုပ်နေတာလဲ"
"သန်းဥစမ်းနေလေရဲ့"
အာတာပူစီသည် သူ့မယားမနက်တိုင်း အပ်သဖြင့်လည်း ကျွန်တော့်မှာ ကြားထဲက မိန်းမစိုးဖြစ်နေရသည်။ အာတာပူစီသည်။ လင်မယားလည်း သိပ်တော့မကြာလိုက်ပါ။ ဘယ်လိုက ဘယ်လိုဖြစ်သည်မသိ။ အဝေရာတော က စွန့်ခွာကြလေ၏။ ကိုအာတာပူစီမယား အပ်မသွားလို့တော်သေးရဲ့ အောက်မေ့ ရတော့ သည်။
(၃)
ကိုအာတာပူစီမယား ပြောင်းသွားပြီး တစ်လကျော်ကျော်လောက်မှာ ကုလားမိသားစု တစ်စု ထော်လာဂျီ တစ်စီးနှင့် ပြောင်းလာကြပြန်လေသည်။ ထမီလ်နာဒူးပြည်နယ် တစ်ပြည်နယ်လုံး ပြောင်းရွှေ့လာကြသလို ကြီးစွာသော အသံကိုပြု၍ ရောက်လာကြသူများမှာ ပင်မင်းမိသားစုဟု နောင်အခါ သိလာရသည်။ ဆင်တင်းကုပ်နှင့်တူသော တဲကလေးထဲမှာ မြွေပါးကင်းပါး ကြောက်စရာမရှိ၊ ကုလားကြီး လင်မယားနှင့် ကလေး ဒါဇင်ဝက်တို့ အချင်းချင်းအော်ကြ၊ ပြောကြသံတွေကြောင့် မြွေနားပင်းတို့ပင် ပြေးလောက်ပြီ။
အဝေရာပင်အချို့ကို အ၀တ်လှမ်းတန်းပြု၍ တစ်နေ့တစ်နေ့ လှမ်းထားသော အ၀တ်များကလည်း လေသိမ်းတိုင်းလှ ကိန္နရီကသည့်နှယ် ရှိကြလေ၏။ ဇီရာ၊ ကရဝေး၊ ဖာလာ၊ မာလာကျိကျူစသော ဟင်းခတ် အမွှေးအကြိုင် တို့ဖြင့် အဝေရာတောကို ညှော်တိုက်ကြသည်လည်းရှိ၏။ တစ်ခါတစ်ရံ လင်မယား နှစ်ယောက် လျှော်ဖွပ်ရင်း ထသတ်ကြလေရာ ကလေးဒါဇင်ဝက်က နှဲကြီးခရာ တစ်ယောက်လျှင် နှစ်လက်စီ တာဝန်ယူမှုတ်ကြသကဲ့သို့ ချောက်ချားဖွယ်ကောင်းလှသော တောအော်သံကို ပြုကြသည်လည်း လွန်ရော ကျွံရော နှစ်ရက်ခြားတစ်ခါဖြစ်သည်။
မူရင်းနေထိုင်ကြသူ ဌာနေကုလားလင်မယားထံသို့ အခါအားလျော်စွာ စုရုံလာကြသော အာဂန္တုကုလားများ ရောက်လာသည့် အခါ အဝေရာသီးခြောက်များပင် တဖျောဖျောကြွေကြသည်။ အထိ တောကြီးခါလေသည်။
တစ်ရက် မှာတော့ ကျွန်တော်တို့အိမ်ကို မုန့်တွေလာပို့သည်။
"အရာကြီး တို့သည်မှာရှိတာ ၀မ်းသာတယ်။ လူသံသူသံ ကြားရတာပေါ့"
"ကျွန်တော်တို့ပြောင်းတော့မှာ ပွဲစားက အိမ်အကြီးကြီးပြောတယ် တကယ်လာနေတော့ အိမ်က ကလေး တွေ နဲ့ မဆန့်ဘူး"
"အိမ်ရှင်က ငှားတာ မဟုတ်ဘူးလား"
"ပွဲစားလေ သည်ကောင်ညစ်ပတ်တယ်။ ဘာကောင်းသလဲ"
တကယ်လည်း ဒိုဘီမိသားစုနှင့်ဝေးရပြီ။
(၄)
နှစ်လမရှိတရှိမှာ ရောက်လာကြသူတွေကတော့ ဆေးဆိုးပန်းရိုက်သမားတွေ၊ ဆေးပုံးတွေ၊ ဆေးခွက်တွေ၊ ဂျတ်စက္ကူတွေက အရင်ရောက်လာကြခြင်းဖြစ်ပြီး လူတွေက နောက်မှ ရောက်လာကြခြင်းဖြစ်၏။ မိန်းမသား တွေက အဝေရာတောထဲမှာပဲ ချက်ကြ၊ ပြုတ်ကြပြီး ယောက်ျားသားတွေက စွပ်ကျယ်တွေ တံဆိပ်ရိုက်ကြသည်။ ဆရာကြီးသခင်ကိုယ်တော်မှိုင်း ပုံတွေ ပိတ်စမှာ ရိုက်ကြသကဲ့သို့ ချီဂွေဗားရား ပုံ တွေကိုလည်း ရိုက်ကြပါ၏။ ပြည်ထောင်စုမြန်မာနိုင်ငံ တော်အလံ အရွယ်ရွယ် အစားစား ကလည်း အဝေရာ တောထဲမှာ နေ့ကြီးရက်ကြီးလို တလွင့်လွင့်ရှိကြသည်။
ကျွန်တော်ကတော့ ပျင်းလျှင် သူတို့အဖွဲ့အလုပ်လုပ်သည့် နေရာကို ရောက်သွားတတ်သည်။ ကျွန်တော် တို့လမ်းဘက်တွင် ခြံစည်းရိုးမရှိတော့ ၀င်ချင်ထွက်ချင်တိုင်း ၀င်ရုံထွက်ရုံ။
"အလံတွေ တော်တော်ရိုက်ရတယ်နော်"
"ပြည်ထောင်စုနေ့နီးပြီလေဆရာရဲ့။ ဆရာကြီးတစ်လက် ယူသွားပါလား၊ အိမ်မှာ ထူရတာပေါ့။ ဟေ့… ဆရာ့ ကို တစ်လက်ပေးစမ်း"
အလံဆိုတော့လည်း မငြင်းသာ။ တစ်ယောက်က တစ်တောလုံးရဲအောင် လှမ်းထားသော အလံတွေထဲက တစ်လက်သွား ဖြုတ်ပြီး ကျွန်တော့်ကိုပေးသည်။ ကျွန်တော့်အဖို့ ကျွန်တော့်အသက်နှင့်အမျှ အလံ မရှိဘဲ နေခဲ့သူဖြစ်ရာ အလံတစ်လက်ကို ရလိုက်သဖြင့် ၀မ်းသာရသည်။ တံဆိပ်ရိုက်ပြီးသား ဂျပ်စက္ကူချပ် တွေကို အိမ်ကလေးထဲမှာ မိန်းမတွေ ထုပ်ပိုးနေကြသည်။ အချိုရည်တံဆိပ်၊ မန်ကျည်းဖျော်ရည် တံဆိပ်၊ ခေါက်ဆွဲခြောက်တံဆိပ်၊ ကြာဆံတံဆိပ်၊ လက်ဖက်ခြောက်တံဆိပ်၊ ကန်ုအမှာကိုလိုက်၍ အဝေရာတော သည် အလံတော်ဖြစ်လိုက်၊ အချိုရည်တောဖြစ်လိုက်၊ စွပ်ကျယ်တောဖြစ်လိုက် လှပင်လှသေးတော့။
သူ့ကိုလည်း တပေါင်းရယ်မှ တန်ခူးမြေ မနူးခင် မရှိကြပြန်တော့။
(၅)
ခြောက်လလောက်ကြာတော့ အလုပ်သမားအဆိုင်းတစ်ဆိုင်း ပြောင်းလာကြသည်။ သံချောင်းတွေ၊ သံနန်း တွေ၊ သံချည်သံကွေး၊ ခုံတွေ၊ တွင်ခုံတွေပင် ပါသေးသည်။ သည်တစ်ခါ ရောက်လာကြသူများသည် အင်္ကျီပင် မ၀တ်ကြသော လူကြမ်းများဖြစ်၏။ အိမ်ပြတင်းကပ် သံပန်းကွက်မှသည်သူဌေးခြံတံခါး ကနုတ် ကွေး သည်အထိ လုပ်နိုင်ကြသူတွေ ဖြစ်သည်။
ကွမ်းတွေစားကြတာကလည်း စက်နှင့်ကြိတ်နေသလား မှတ်ရသည်။ ဆေးပေါ့လိပ်သောက်ကြတာ ကလည်း သစ်စက်ခေါင်းတိုင်သာ ကြည့်တော့။ တကယ်တမ်း တစ်လက နှစ်လကြာတော့ ရပ်ကွက်နား မခံသာ ကြတော့ပြီ။ လူနေရပ်ကွက်အတွင်း အမိန့်ရ စက်မှုန်ဇုန်ကြီးတည်ထားသလို မီးစက်သံ တချုန်းချုန်း၊ သံပြား ထုသံ တ၀ုန်းဝုန်း၊ သံချောင်းထုသံ၊ တွင်ခုံကြိတ်သံတွေသာမက အတိုင်းအထွာ အဆဲအရေးတွေ များလာ ခဲ့သည်။
အဆိုးဆုံးက မီးစက်ကြီးဖြစ်၏။ ရှေးခေတ်သဘောင်္တစ်စီးစီးက ဖြုတ်လာဟန်ရှိသော မီးစက်ကြီးမှာ အရောင်ပင် မပေါ်တော့။ စက်ခုတ်သံကတော့ တန်တစ်ရာကျ ဆန်စက်လည်သံလောက် ကျယ်သည်။ သည် စက်ကြီး နှိုးပြီဆိုလျှင် တောင်ဘက်လမ်း မြောက်ဘက်ကကို ရွှေ့ခိုင်းကြသည်။ မြောက်ဘက် လမ်းသူလမ်းသား တွေက တောင်ဘက်ရွှေ့ခိုင်းသည်။ ဤသို့ဖြင့် မီးစက်ကြီးခမျာ အရှေ့၊ အနောက်၊ တောင်၊ မြောက် ရပ်တည်ရာမရနိုင်ဘဲ လူအုပ်ကြီးက ၀ိုင်းရိုက်သည့် ခွေးပမာ အော်ရင်းဟစ်ရင်း ပတ်ပြေး နေရလေသည်။
ဘယ်နှယ့်တုန်း သံပန်းဆရာရဲ့။ ခင်ဗျားဝမ်းရေးနဲ့ ကျွန်တော့် ပရိယေသန ဖြောင့်ဖြောင့်ကြီး ဆန့်ကျင် နေပါပကော။ ခင်ဗျားက ဆူပွက်နေမှ ကုန်ချောကျသလို ကျွန်တော့်အလုပ်က ငြိမ်သက်နေမှ ကုန်ချော ကျနေတာလေဗျာ"
သံပန်းစက်မှုလုပ်ငန်းရှင် ကိုသန်းဖေခမျာ တပူပူတဆူဆူ ချွေးတစ်လုံး သံတစ်လုံး လုပ်ကိုင် နေကြသည့် ကြားက ၀မ်းမလှရသည့်ကြား ရပ်ကွက်က တဆူဆူတအောင့်အောင့် ဆိုတော့ ပရိတ်သံ ကြားရသော မြေဖုတ်ပြိတ္တာ ပမာ စကြ၀ဠာအပြင်ထွက်ဖို့ ကြံရလေပြီ။
"ကျွန်တော်လည်း ပြောင်းတော့မှာပါ ဆရာကြီးရယ်။ ခြံငှားခ၊ အိမ်ငှားခက ဈေးတက်ယူ တော့မယ် ဆိုတော့ ကျွန်တော်လည်း မတတ်နိုင်တော့ဘူး"
"ဘယ်သူကလည်း ပိုင်ရှင်ကလား"
"ပိုင်ရှင် ကို မသိဘူး ဆရာကြီးရဲ့။ သူ့တပည့်ပွဲစားတွေနဲ့ တွေ့ရတာ"
သူတို့ ပြောင်းသွားကြတော့ ကိုသန်းဖေ မလွမ်း၊ စက်အိုကြီးကို လွမ်းမိသည်။
(၆)
ဤသို့ဖြင့် ဆင်တင်းကုပ်နှင့်တူသော ကဲလားလေးဖက်ချ အိမ်ကလေးထဲကို ဘ၀ပေါင်းစုံ လူပေါင်းစုံ ရောက်လာခဲ့ ကြလေသည်။ စုတ်စုတ်ကန်းကန်း ပြန်ထွက်သွားကြရသည်။ ကျွန်တော် သိသလောက် ဘယ်သူ မှ အဆင်ပြေရသည်မရှိ။ ပင်ပန်းဆင်းရဲကြခြင်းသာ အဖတ်တင်ကြသည်။ ပဲနှစ်ပြန်ကြော် သမား တွေလည်း ပြေးဖူးပြီ။ ငရုတ်သီးမှုန့်၊ နနွင်းမှုန့်သမားလည်း ပြေးဖူးပြီ။ လက်ဘက်ခြောက်သမားတွေလည်း ပြေးဖူးပြီ။ သည်အိမ်ကိုငှားကာ ကျူရှင်ပြခဲ့သော ကျူရှင်ဆရာသည်ပင် အူမခြောက်ခင် ပြေးခဲ့ရသည်။ ထူးဆန်း တာက အဝေရာတောကြီး ပြုန်းသွားခြင်းဖြစ်၏။ တစ်ဦးလာ တစ်ခါခုတ် ဆိုတော့ တောလည်း မခံသာပြီ။
တစ်ရက်မှာတော့ ပျောက်ချက်သားကောင်းနေသော ပွဲစားကြီး ဦးသာဂရ ချွေးတွေသံတွေနှင့် ရောက်လာသည်။ ရေတစ်ခွက် မက်ရေစက်ရေသောက်ပြီးမှ အသာထိုင်သည်။
"ဘယ်နှယ့်တုံးပွဲစားကြီးရဲ့၊ အဝေရာအိမ်လူမမြဲပါလား၊ ငယ်စာရင်းကောက်လို့ မရသေးဘူးလား"
"ကျုပ်အထင်တော့ အိမ်က သစ်နပုန်းသား၊ သစ်ဘီလူးသားနဲ့ ဆောက်ထားတာ နေမှာပါဗျာ"
"ပိုင်ရှင်က ဘယ်သူတုံး ပွဲစားကြီးရဲ့"
"ပိုင်ရှင်ကလည်း ဘာထူးမှာတုံး စာရေးဆရာကြီးရဲ့ လူ့နပုန်း၊ လူ့ဘီလူးနေမှာပေါ့။ ဥပဒ္ဒ၀ခေါ်တယ် စာရေး ဆရာရဲ့။ ဥပမာ…ကပ်၍ …ဒ၀ ပူလောင်တာကို ပြောတာ။ ဥပါဒ်ပေါ့လေ။ ကြောက်စရာ ကောင်း သဗျ နော်"
ပွဲစားကြီးပင် ငယ်စာရင်းကောက်နိုင်သေးပုံမပေါ်။ ခပ်ဝေ့ဝေ့သာဖြေလေ၏။ တောလည်းပြုန်းပြီ။ အိမ်လည်း ဆွေးပြီ။ ပိုင်ရှင်ကတော့ လက်လွှတ်မည့်ပုံမရှိ။ သည်တစ်ခါ ဘယ်သူတွေ ရောက်လာကြဦးမှာလဲ။ ရပ်ကွက် ကတော့ ပိုင်ရှင်ကို သိချင်ကြသဖြင့် ရှားလော့ဟုမ်းကိုပင် ငှားချင်နေကြသည်။
နေ၀င်းမြင့်
ပေဖူးလွှာမဂ္ဂဇင်း
၂၀၀၉၊ အောက်တိုဘာ