အပင်နှင့်လူ

အပင်နှင့်လူ (ခင်ြမဇင်)
-------------------------
(၁)
လူတစ်ယောက်ဟာ သစ်ပင်တစ်ပင် ဖြစ်သွားဖူးတယ်။ အစကတော့ ရိုးရိုးသာမန်လူပါပဲ။ ရက်ပေါင်း သုံးဆယ် အလုပ်လုပ်ရင် လစာ သုံးရာ ရတယ်။ ချည်ပုဆိုးနွမ်းနဲ့ တိုက်ပုံအင်္ကျီခပ်ဟောင်းဟောင်း ဝတ်တတ်တယ်။ လက်ထဲမှာ ပိုက်ဆံမကပ်ရင် အမြဲဆူပူနေတတ်တဲ့ မိန်းမနဲ့ကလေး သုံးယောက်ရှိတယ်။ သူ့မိန်းမကမှ သူ့ထက်စာရင် အဆင်ပြေအောင် ဟိုသည် လှည့်ပတ်ပြီး ကြံတတ်ဖန်တတ်သေးတယ်။ သူက တကယ့်မှ ထူထူအအ။ မျက်မှန်သာ ပါဝါဒီဂရီတွေ တိုးလာမယ်၊ ခေါင်းပေါ်မှာ ဆံပင်တွေသာ ပိုလို့ ဖြူဖွေးလာမယ်၊ လုပ်ငန်းခွင်ထဲမှာလည်း တက်လမ်း မျှော်လင့်စရာရယ်လို့ မရှိဘူး။ အကြံအဖန်နဲ့ ဖြတ်စားလျှပ်စားလည်း မလုပ်တတ်ဘူး။ ဘယ်ဟာ ရောင်းရင် ဘယ်လို မြတ်ပြီး၊ ဘယ်သူ့ပေါင်းရင် ဘယ်လို အခွင့်အလမ်း ရှိတာလည်း မတွက်တတ်ဘူး။ ငယ်ငယ်ကတော့ ရွှေထီးဆောင်းခဲ့ရတယ် ဆိုသလို ဗိုလ်ကျောင်းမှာ စာကောင်းကောင်း သင်ခဲ့ရတယ်။ ဒါပေမဲ့ အဖေ ဆုံးတော့ ပညာ တစ်ပိုင်းတစ်စနဲ့ အလုပ်ထဲ ရောက်လာတယ်။ ပြီးတော့ သူဟာ စာအုပ်တွေ သိပ်ဖတ်တယ်။ စာအုပ်ထဲက လူတွေကို အားကျတယ်။
‘ဆင်းရဲခြင်းသည် ရှက်စရာ မဟုတ်’ ဆိုတာမျိုးတွေ မှတ်စုစာအုပ်ထဲမှာ ကူးထားခဲ့ဖူးတယ်။ သည်လိုလူ တစ်ယောက်ပါပဲ။ သူဟာ တစ်ပင်တစ်ပင် ဖြစ်သွားခဲ့တယ်။
သူ့အိမ်နဲ့ ခပ်လှမ်းလှမ်းမှာ မီးရထားသံလမ်း ရှိတယ်။ ခုခါမှာ ဘယ်ရထားမှ ဖြတ်သွားဖြတ်လာ မရှိသလောက် ဖြစ်နေတဲ့ လမ်းပဲ။ သည်လမ်း တစ်ဖက်တစ်ချက်မှာ ထူပိန်းတဲ့ ချုံပုတ်တွေနဲ့ တောအုပ်ကလေး ရှိတယ်။ သူ့ကလေးတွေက သည်တောထဲမှာ ထင်းခြောက် ကောက်ကြတယ်။ ငှက် ဖမ်းကြတယ်။
တစ်နေ့တော့ သူဟာ သူ့မိန်းမရဲ့ ဆူဆူပူပူ လုပ်တာကို မခံနိုင်တာနဲ့ တစ်ယောက်တည်း ထွက်လာခဲ့တယ်။ တကယ်ကတော့ ဒီလိုနေ့မျိုးဟာ ကြည်နူးချမ်းမြေ့စရာ နေ့ပဲ ဖြစ်သင့်တယ်။ သို့ပေမယ့် ဒါမျိုး မကြုံမတွေ့ရတာ ကြာပါပြီ။ သူ့လစာကလေးကို မိန်းမ လက်ထဲ ထည့်လိုက်တာနဲ့ ဗုံးပေါက်ကွဲသလို ပေါက်ကွဲတော့တာပဲ။
“ဟင် နှစ်ရာကျော်ရုံလေးပါလား။ ဘယ်မယားငယ်ကို ပေးပစ်ခဲ့လဲဟင်။ ရှင့်ကလေးတွေကို ကျုပ် ဘယ်လို ကျွေးမလဲ”
သူက ဒီလ ဖြတ်တောက်ငွေတွေ များကြောင်း ဖြေရှင်းတယ်။ မရဘူး။ ဒီလို ပြောခဲ့ရတာလည်း လစဉ်လိုလိုပဲ။ မိန်းမက ဆူဆောင့်တယ်။ ကလေးတွေက တစ်ယောက်တစ်ပေါက် ငိုကြတယ်။ ရုံးမှာတုန်းကလည်း သူဟာ အရာရှိရဲ့ အဆူအဟောက်ကို ခံခဲ့ရသေးတယ်။ စာအုပ်ထူထူတွေ ဖတ်ခဲ့ဖူးပေမဲ့ သူဟာ ကြောက်တတ်တယ်။ ကြောက်ကြောက်နဲ့ စွတ်ပြီး လုပ်မိတဲ့ အလုပ်တွေက တော်တော် များများ မှားခဲ့ဖူးတယ်။
“အလုပ်ကို ဒီလောက်မှ စိတ်မဝင်စားရင်လည်း ထွက်တော့ဗျာ။ ဘာလို့ လစာ ယူနေကြသေးတာလဲ”
သားအရွယ် အရာရှိပေါက်စက ဆူတယ်။
ဟုတ်တယ်။ သူဟာ လူ့လောက ထဲမှာတောင်မှ မနေသင့်တဲ့ ဘဝ။ နိမ့်ကျအားငယ်ခြင်း၊ ရှက်ခြင်း၊ ရင်နာခြင်းတွေ ဖိစီး နှိပ်စက်လာကြတယ်။ ရထားတစ်စင်းလောက် ဖြတ်မောင်းလာစမ်း ပါစေဗျာ။ သေပစ်လိုက်ချင်လာတယ်။
သူဟာ သံလမ်းပေါင်ပေါ်မှာ ထိုင်နေတယ်။ ဝင်လုဆဲ နေလုံးက နောက်ဆုံး ရွှေရည်တွေ သွန်ချပေးနေလို့ လမ်းဘေး တောအုပ်ကလေးဟာ လှနေတယ်။ သစ်ပင်တွေ ချုံပုတ်တွေကလည်း ရွက်နုတွေ ဝေပြီး နေခြည်ထဲမှာ ရွှေရောင် လွင်နေတယ်။ ရွက်စိမ်းရင့်မှောင်တွေ ကလည်း မှောင်တစ်ဝက် လင်းတစ်ဝက်နဲ့ အစိမ်းရောင် ကျောက်မျက်တွေလိုပဲ။ ပြီးတော့ နီကြင်ကြင် အဖူးကလေးတွေ၊ ဖြူဆွတ်ဆွတ် အပွင့်ကလေးတွေ။ သူ့ခြေဖမိုးပေါ်မှာတော့ ခရမ်းပြာရောင် ပန်းကလေးတစ်ပွင့် တင်လာတယ်။ သူဟာ ကြည့်မိကြည့်ရာ ကြောင်ပြီး ပန်းကလေးကို ငေးစိုက်ကြည့်တယ်။
“ကြည့်စမ်း၊ ဘာမဟုတ်တဲ့ အလေ့ကျ အပင်ကလေး တစ်ပင်မှာတောင် သူ့အပွင့် သူ့အဖူးနဲ့ တင့်တယ်နေသေးတာပဲ၊ လူ့ဘဝထက်စာရင် သစ်ပင်ဖြစ်ရတာမှ ပျော်စရာကောင်းဦးမယ်”
သည်အတွေးက လေးလံနေတဲ့ စိတ်ကို ပေါ့ပါးစေတယ်။ သည်လိုနဲ့ သူဟာ စိတ်ညစ်ညူးစရာတွေ ကြုံတိုင်း ဘယ်သူနဲ့မှ စကားမပြောဘဲ တိတ်တိတ်ကလေး ထွက်သွားပြီးသည်နေရာမှာ လာလာထိုင်တတ် လာတယ်။
* * *
(၂)
အိမ်နဲ့ ရုံးမှာ ပြောရေးဆိုခွင့် မရှိတဲ့ သူ့ခမျာ သစ်ပင်တွေနဲ့ စကားပြောတတ် လာတယ်။ သူ့ဘဝမှာ အခက်အခဲတွေ၊ ဘဝပြဿနာတွေနဲ့ ကြုံလာတိုင်း သစ်ပင်တွေကြားမှာ သွားပြီး ငြိမ်ငြိမ်ကြီး ထိုင်ရင်း စိတ်ထဲက ပြောတော့တာပဲတဲ့။
“ငါ သစ်ပင် ဖြစ်ချင်လိုက်တာ၊ သစ်ပင် ဖြစ်ချင်လိုက်တာ” တဲ့။
သစ်ပင်တွေက အရွက်စိမ်းစိမ်းတွေ ခါပြပြီး
“ကျုပ်တို့ ဘဝက မရွေ့နိုင်၊ မလျားနိုင်ပါဗျာ၊ အားမကျစမ်းပါနဲ့” တဲ့။
ဒါပေမဲ့ သစ်ပင်တွေရဲ့စကားကို မကြားနိုင် မသိတတ်သေးတဲ့ ဒီလူကတော့ သစ်ပင်ပဲ ဖြစ်ချင်မြဲ ဖြစ်ချင်နေရဲ့။ မိုးစက်ကလေးတွေ ထိရင် လန်းဆန်း သစ်လွင်လာတတ်တဲ့၊ လေနုအေးကလေး နော့ရင် ကြော့ကြော့မော့မော့နဲ့ ကခုန်ကစားတတ်တဲ့ သစ်ပင်ဘဝပဲ အားကျသတဲ့။
“ကြည့်စမ်းပါ၊ သူတို့ကတော့ အပူအပင် မရှိဘူးဗျာ” တဲ့။ နာရီရဲ့ ခြိမ်းခြောက်မှုကိုလည်း သူတို့ မခံကြရဘူးလေ။ ငှက်တွေ သီချင်းဆိုသံက လွဲရင် အိမ်က မိန်းမရဲ့ဆူသံ ပွက်သံနဲ့ ပိုက်ဆံစကားလည်း သူတို့ မကြားရဘူးလား။
မနက် မိုးလင်းတာနဲ့ ဖူးပွင့်ဝေဆာပြီး ခေါင်းကလေးတွေ မော့နေလိုက်ကြတာ တစ်ကမ္ဘာလုံးမှာ သူတို့ အားမာန် အရှိဆုံး၊ ငြိမ်းချမ်းပျော်ရွှင်ဆုံး ဆိုတာ ပြနေသလိုပဲ။ သူတို့မှာက ဗြုတ်စဗျင်းတောင်းတွေ ထည့်ထားတဲ့ လက်ဆွဲအိတ်လည်း မရှိဘူး။ ရုံးက ပြန်လာရင် တိုင်မှာ စွပ်ထားတတ်တဲ့ ကြေးအထပ်ထပ်နဲ့ တိုက်ပုံအင်္ကျီကိုလည်း ဝတ်စရာ မလိုဘူးလေ။ နေသာရင် နိုးထလာမယ်။ နေညိုရင် အရွက်ကလေးတွေ လိပ်ပြီး အိပ်နေရုံပဲ။ အင်းပေါ့။
သူလည်း သစ်ပင်တွေကြားမှာပဲ နေတော့တယ်။
သူ သိခွင့် မရလို့သာ။ သစ်ပင်တွေကတော့ သူ့ဘဝကို အားကျနေကြတယ်။ သူက ရွေ့လျားနိုင်တယ်၊ သန်မာတယ်။ ပေါင်းမြက်တွေ ဆင်ငိုမြက်တွေကို ဘယ်လောက်ပဲ ကြီးမား ကြီးမား အင်နဲ့ အားနဲ့ ဆွဲကိုင် နုတ်ပစ်နိုင်တယ်။ ပြီးတော့ သူ့မှာ အရာရာကို ကြည့်နိုင် မြင်နိုင်တတ်တဲ့ မျက်စိဆိုတာ ရှိတယ်။
သစ်ပင်တွေ ဘဝမှာတော့ သူ့လို ကြောင့်ကြပူပန်စရာ မရှိပါဘူး။ တာဝန်ဝတ္တရားလည်း နည်းပါးပါတယ်။ နေ့ဖို့ ညစာ အစာချက်ဖို့ နေရောင်ထဲမှာ သူတို့ အရွက်တွေ လှမ်းကြရတယ်။ နေရောင် ရဖို့ တစ်ပင်ထက် တစ်ပင် အလုအယက် အကိုင်းတွေ ရှည်ထွက်ပြီး မိုးကောင်းကင်ဆီ အပြိုင်တက်ရပေမဲ့လည်း မစ္ဆေရစိတ်တွေ အဘိဇ္ဇာ မောဟတွေနဲ့ မလိုတမာ မရှိကြပါဘူး။ သန်မာထွားကျိုင်းတဲ့ အပင်တွေ ဖြစ်ဖို့ဆိုတာက ကိုယ်တည်မှီတဲ့ မြေဆီပေါ်မှာပဲ တည်တာကလား။ ရေကြည်ရရင် မြေဆီရရင် ရှင်ချင်သလောက် ရှင်နိုင်တယ်။ ကိုင်းခက်တွေ ဖြာချင်သလောက် ဖြာပြီး နေရောင်ခြည်ကို ရှာဖွေနိုင်တယ်။ ရွက်အိုရွက်ဝါတွေ မြေမှာကျပြီး ဆွေးသွားရင်လည်း ဘာအရေးလဲ။ မြေထဲမှာ ဆွေးလေ မြေဆီမြေသား တက်လေမို့ အမြစ်ကနေ အာဟာရ ပြန်ယူ၊ ကိုယ့်အပင် ကိုယ်ပဲ ပြန်ပြီး ဝေစည်စေတာ မဟုတ်လား။ တကယ်လို့များ အပင်တစ်ပင် သေသွားပြီ ဆိုပါစို့။ သူ့မျိုးဆက်ကတော့ ဘယ်တော့မှ ပျက်သုဉ်း မသွားဘူး။ မြေမှာ နစ်ဝင်နေတဲ့ မမြင်နိုင်တဲ့ အစေ့အသီးတွေက တောင်မှ မြေမှာ ပြန်ပြီး တောထအောင် မျိုးဆက်သစ်တွေ ပေါက်ဖွားလာစေတော့တာပဲ။
သူက သစ်ပင်ဘဝကို သိပ်အားကျနေတယ်။
အပင်တွေမှာက တုံ့ပြန်သတ္တိရှိတာကလွဲလို့ သူ နေ့စဉ် ရေရွတ်နေတဲ့ ဖရုဿဝါစာ စကားတွေ ခံစားနေရတဲ့ လောကဓံ အညစ်အကြေးတွေ သိမှ မသိကြတာပဲ။ တစ်နေ့တော့ သူဟာ ရထား သံလမ်းဟောင်းကနေ ဖယ်ခွာပြီး တောနက်နက်ထဲထိ တိုးဝင်လာတယ်။
“အဖေရေ၊ အဖေ”
လို့ အော်ခေါ်နေကြတဲ့ သူ့ကလေးတွေ အသံကြားတော့ သူဟာ ချုံတစ်ချုံထဲ တိုးဝင်ပြီး နားတွေကို လက်နှစ်ဖက်နဲ့ ပိတ်ထားလိုက်တယ်။ သူတို့ အသံ မကြားချင်ဘူး။ အနှောင်အဖွဲ့တွေက လွတ်ချင်ပြီ။ ဘဝရဲ့ ဝန်ထုပ်ဝန်ပိုးတွေကြောင့် ကြောက်ရွံ့ချောက်ချားနေတဲ့ သူဟာ တွယ်တာမှု ကြိုးမျှင်တွေကိုလည်း ရင်နာနာနဲ့ပဲ ဖြတ်တောက်ပစ်ချင်ပြီ။ သည်တစ်ခါမှ လွတ်အောင်မရုန်းရင် ဘယ်တော့မှ ရုန်းထွက် နိုင်တော့မယ် မဟုတ်ဘူး။ ဘဝရဲ့ချည်တိုင်မှာ ပြန်ပြီး ခိုင်ခိုင်ကြီး ချည်မိတော့မှာပဲ။ သူ မုန်းတီးရွံရွာတဲ့ ကမ္ဘာကြီးကို ကြောက်လန့်လာတယ်။
ကမ္ဘာက သူ့ကို သမုဒယ မာယာတွေနဲ့ လှည့်စားလာတာ ကြာပြီ။ တရားရတာ မဟုတ်ဘဲ လောကကို ကြောက်ရွံ့နေတဲ့ သူဟာ ချုံကွယ်ထဲမှာ တုတ်တုတ်မှ မလှုပ်ရဲဘဲ ငြိမ်ကုပ်နေလိုက်တယ်။ သူ့ကို လိုက်ရှာနေကြတဲ့ သားတွေရဲ့ အသံဟာ ဝေးဝေးသွားတယ်။ သူက မျက်ရည် လည်နေတယ်။ သက်ပြင်းချလိုက်တယ်။ သားတွေကို သူက ချစ်ပေမယ့် သူတို့တစ်တွေကလည်း စားဖို့ ကစားဖို့က လွဲရင် အဖေ့ကို ခင်တွယ်ရကောင်း သိတာ မဟုတ်ဘူးလို့ ရင်နာနာနဲ့ တွေးတယ်။ အရွယ်မှ မရောက်သေးဘူး။ သူ့အပေါ်မှာ မအေ့ လေသံနဲ့ ဆက်ဆံတတ်ကြပြီ။
* * *
(၃)
တောနက်ထဲကို ရောက်တာနဲ့ သူဟာ နေရောင် ကောင်းကောင်းရမယ့် နေရာမှာ လက်နဲ့ယက်၊ တုတ်နဲ့ တူးဆွပြီး မြေကျင်း တူးတယ်။ သစ်ပင်အုပ်တွေ ကြားထဲမို့ မြေဟာ အပေါ်ယံ တင်းမာပေမယ့် အောက်မှာ ပျော့ပျောင်းနေတယ်။ ကြာရှည် မတူးလိုက်ရပါဘူး။ ဒူးဆစ်လောက် အနက် ရောက်တာနဲ့ သူဟာ ခြေထောက်တွေကို မြေထဲမှာ မြှပ်ထားလိုက်တယ်။ သူ့လက်တွေကို နေရောင်မှာ ဆန့်တန်းလို့ အရွက်တွေကို နေလှန်းသလို လှန်းတယ်။
မြေအစိုဓာတ်ကြောင့် သူ့ခြေထောက်တွေ ရောင်ကိုင်းလာတာကို သူက အမြစ်တွေ ကြွလာပြီမို့ ဖူးဖူးရောင်လာတာ ထင်နေတယ်။ လေး ငါးရက် ကြာတော့ သူ့အသားအရေတွေလည်း နေလောင်လို့ ခြောက်သွေ့ ညိုမည်းလာတယ်။ သူ့နှုတ်ခမ်းတွေလည်း ဖူးရောင်အက်ကွဲ ကုန်တယ်။ လက်တွေ ခြေတွေလည်း လှုပ်ရှား မရတော့ဘူး။ ဗိုက်ထဲက အူအသည်း ကလီစာတွေတောင် ဆာလွန်းလို့ ခြောက်ကပ် တွန့်လိပ် သွားလောက်ပြီ။ ဒါပေမဲ့ သစ်ပင်ဘဝလည်း မရောက်သေးဘူးလေ။ ခြေက အမြစ်တွေ ဖြာထွက်မလာဘဲ ကျဉ်ကောင်နဲ့ ပုရွက်ဆိတ်တွေ ဝိုင်းခဲတာပဲ ခံရတယ်။
ဒီတော့မှ သူက တွေးတယ်။
“သစ်ပင်ဘဝက မစားသာပါကလား” လို့။
သူ့ကလေးတွေ ခေါ်သံလည်း သူ မကြားရတော့ဘူး။
သူ့မိန်းမ အော်ငေါက် ဆူပူသံလည်း သူ နားမထောင်ရတော့ဘူး။ သူ ဝမ်းနည်းလာတယ်။ ဒီအသံတွေကို အောက်မေ့တသမိ ပြန်တယ်။ ခုတော့ အထီးကျန်ပဲ။
အပင်တွေကလည်း ကိုင်းခက် လက်တံရှည်တွေနဲ့ နေခြည်ကို အလုအယက် သောက်ဖို့ ကြိုးစား နေကြတယ်။ နေ့ရက်တွေ ကြာလာတာနဲ့အမျှ သူ့မှာလည်း ကြားခြင်း၊ မြင်ခြင်းတွေ တဖြည်းဖြည်း ဆုတ်ယုတ် ချို့တဲ့ခဲ့ပြီ။ သစ်ပင်တွေ ဖုံးအုပ်နေတဲ့ ကြားထဲမှာမို့ သူ့ကို ဘယ်သူကမှလည်း မမြင်ကြဘူး။သူ ရှိနေတာလည်း သတိမပြုမိကြဘူးလေ။ အငယ်အနှောင်း ယူသွားပြီလို့ ထင်နေတဲ့ သူ့မိန်းမကလည်း သူ့ကို ရှာမှာ မဟုတ်ဘူး။ သူ့ ပတ်ဝန်းကျင်မှာလည်း မရှိရင်လည်း ဖြစ်တဲ့၊ ဘာမှ အရေးမပါတဲ့ သာမန် စာရေးကလေး တစ်ယောက်ကြောင့် နှောင့်နှေးမှု တစ်စုံတစ်ရာလည်း ဖြစ်ပေါ်လာမှာ မဟုတ်ဘူးလေ။ ကြာရင် သေသလို မေ့တော့မှာပဲလို့ သူ တွေးမိတယ်။ သည်အတွေးက သူ့ရင်ကို တင်းကျပ် ပူလောင်စေတယ်။ ငှက်ကလေးတွေကတော့ အင်္ကျီစုတ်နဲ့ စာခြောက်ရုပ် မှတ်လို့ အနားမကပ်ကြဘူး။
နေကလည်း ပူလွန်းမက ပူလှတော့ သူက အသံနက်နက်ကြီးနဲ့ အော်လိုက်တယ်။ လည်ချောင်းထဲက အက်ကွဲ ထွက်လာတဲ့ အသံနက်ကြီးနဲ့ နာနာကြည်းကြည်း အော်လိုက်တာကတော့
“ငါ သစ်ပင် မဖြစ်ချင်တော့ဘူး ဟေ့”
* * *
(၄)
သစ်ပင်တွေက သူ့ကို ကရုဏာနဲ့ ဝိုင်းကြည့်နေကြတယ်။
“ခုမှတော့ မရတော့ဘူးလေ”
သူ ခြေကို ကြွကြည့်တယ်။ မရဘူး။ သူ့ခြေထောက်တွေ မလှုပ်နိုင်တာ ကြာပြီပဲ။ လက်ကို ရုပ်ကြည့်တယ်။ ပြတ်ကျမလာဘူး။ သူ အော်ငိုတယ်။
“ငါ လှုပ်ရှားချင်တယ်၊ သွားချင် လာချင်တယ်၊ ကစားနေတဲ့ ငါ့ကလေးတွေ ရယ်သံ ကြားချင်တယ်”
မရတော့ဘူး။ သစ်ပင်တွေက လွဲလို့ သူ့အသံကို ဘယ်သူမှ မကြားနိုင်တော့ ဘူးလေ။ သူ့စကားကိုလည်း သစ်ပင်တွေက လွဲလို့ ဘယ်သူမှ နားမလည်နိုင်ကြတော့ဘူး။ ဒါကြောင့် သူ့ကို ဝိုင်းပြောကြတယ်။
“ဘာကြောင့် အချိန်တွေ ဖြုန်းနေတာလဲ၊ ကိုယ့်အလုပ်ကိုယ် လုပ်ပါတော့လား” တဲ့။
* * *
(၅)
နောက်တစ်နေ့ကျ မိုးကြီး ရွာချတယ်။
မိုးစက်တွေကြားမှာ သူ မေ့မြောသွားတယ်။
ခုတော့ သူ ဘာမှ သတိမရတော့ဘူး။
သူ နိုးလာတော့ သူ့နားရွက်ထဲက အတက် တစ်တက် ထွက်နေတယ်။
ခက်ညွန့်ကလေး စီလို့။
သူ့ ခြေဖဝါးတွေလည်း ရှည်လျားလာပြီး အမြွှာမြွှာ ဖြာထွက်သွားကြပြီ။ သူ့လက် သူ့ခြေ သူ့ကိုယ်ခန္ဓာ အားလုံး အစိမ်းရောင် ဖုံးသွားပြီ။
ပေါက်ဖတ် တစ်ကောင်က သူ့ရွက်ညွန့်ကို လာဆိတ်တော့ သူ ထိတ်လန့်သွားတယ်။
တစ်ခါက သူ့လက်ညှိုးနဲ့ လက်မကြားမှာ ဖျစ်ညှစ် သတ်ပစ်နိုင်တဲ့ ပေါက်ဖတ်ကိုတောင်မှ သူ ကြောက်နေရပြီ။
အခြားအပင်တွေရဲ့ သစ်မြစ်တွေက ရေကြောရှိရာ တရွေ့ရွေ့ လိုက်ရှာ နေကြခိုက်မှာ သူကတော့ ဘာကိုမှ မကြိုးစားနိုင်အားဘဲ …
“ငါ့ဖိုင်တွဲတွေ ဘယ်မှာလဲ၊ ရုံးအိတ်ကော၊ ဒီနေ့ ငါ ထမင်းဘူး မယူဘူးဟေ့”
ကယောင်ချောက်ချား ပြောနေတယ်။ ပေါက်ဖတ်က ရယ်ရင်း သူ့ အရွက်တွေကို အကုန် စားပစ်လိုက်တယ်။
ညမှောင်ရီစမှာ လ ထွက်ပြူလာတော့ ပင်စည် အဖုအထစ်တွေ ဖြစ်သွားတဲ့ သူ့မျက်လုံးတွေက လကို မော့ကြည့်တယ်။ သစ်စိမ်းရည် တလက်လက် စိမ့်ယိုရင်း လမင်းကို မလိုတမာ ကြည့်တယ်။
“မင်း ဒီလိုသာ တစ်ညလုံး ထွန်းနေရင် မီတာခတွေ သိပ်ကျတော့မှာ ပါလား” တဲ့။ ဒေါသနဲ့ ပြောတယ်။
လ ကတော့ မကြားဘူး။ တိမ်ကြားထဲကို ရွေ့သွားပြီ။
သူက မိုးသားနဲ့ မည်းမှောင်နေတဲ့ ကောင်းကင်ကို မမြင်နိုင်တော့သလို ဝမ်းပန်းတနည်း စိုက်ကြည့်တယ်။ သူ မသိလိုက်ခင်မှာပဲ သစ်ပင်တစ်ပင် ဖြစ်သွားတယ်။
အစကတော့ သာမန် ရိုးရိုးလူပါပဲ။
----------
ခင်မြဇင်
သည်းဦးပန်း မဂ္ဂဇင်း၊ ​မေ၊ ၁၉၈၆။

မြေခွေး

မြေခွေး (နေဝင်းမြင့်)
------------------------
(၁)
ကိုကျောက်စီ ဆိုတဲ့လူကို တစ်နယ်လုံးက သိကြတာတော့ မဟုတ်ဘူး။ သူနေတဲ့ တဲကလေးနဲ့ တော်တော်လေး လှမ်းတဲ့ တန်းလျား လေးငါးလုံးက လူတွေ (မသကာ ရှိလှရင် လူခြောက်ဆယ်လောက်) ကပဲ သိတာပါ။
ကျောက်စီ ဆိုတဲ့ နာမည်ကိုလည်း တချို့က ကျောက်စိ တဲ့၊ တချို့က ကျောက်စီ တဲ့။ ကိုကျောက်စီကလည်း ထူးလိုက်တာပါပဲ။ သူ့ဟာသူတောင် ကျောက်စိ လား၊ ကျောက်စီ လား၊ ကျောက်စည် လား သိတာ မဟုတ်ဘူး။
သူ့ပုံက ကျောက်ပွင့်ကလေးတွေ စီထားတဲ့ ကျောက်စီတော့ မဖြစ်နိုင်ဘူး။ ဘုန်းကြီးကျောင်းတွေက အင်ကြင်းပင်ကြီးတွေ သိပ်ကြီးသွားလို့ ကျောက်ဖြစ်သွားတဲ့ အခါ လုပ်လေ့ရှိတဲ့ ကျောက်စည် ထိုးတဲ့ ကျောက်တုံးကြီး တစ်တုံးနဲ့ တူလို့ ဖြစ်ချင်းဖြစ်ရင် ကျောက်စည် ဆိုတဲ့ နာမည်နဲ့က ပိုလိုက်တယ်။
ထားပါတော့၊ ကျောက်စီ ပဲ။ လူက မည်းလိုက်တာ သပိတ်ကိုသာ ကြည့်တော့။ ခေါင်းတုံးကလည်း အမြဲရိတ်တော့ ဦးပြည်းဟာ ဘယ်တော့မဆို ပြောင်နေလေ့ ရှိတယ်။ ရုပ်ကလည်း ဇာတ်ထဲက ဘီလူးခေါင်းစွပ်ကို တွေ့ဖူးတယ် မဟုတ်လား၊ အဲဒီ ရုပ်မျိုး။ မျက်ခုံးနဲ့ မျက်လုံးတွေက အပေါ်ကို ထောင်တက်နေတော့ အမြဲတမ်း ရန်လိုနေတဲ့ မျက်နှာပေးက ထင်းခနဲ ပေါ်နေတတ်တယ်။
ရင်ဘတ်မှာက မင်ကြောင်ထိုး နဂါးတစ်ကောင် ရှိတယ်။ မည်းနေတဲ့ အသားပေါ်က စိမ်းဖန့်ဖန့် ဆေးမင်ရယ်၊ နဂါးအကြေးနဲ့ ဟင်္သပြဒါး အနီရယ်ဟာ ရုတ်တရက် ကြည့်ရင် မပေါ်ချင်ဘူး။ ဒါပေမဲ့ နဂါးခေါင်းကတော့ သေသေချာချာ ကြည့်ရင် သိပ်အနုစိတ်တဲ့ ခေါင်းမျိုး ဗမာနဂါးလည်း မဟုတ်ဘူး။ အကွေးအတွန့်တွေနဲ့ အမွေးအမှင်တွေများတဲ့ စိန့်တိုင်းက နဂါးရုပ်မျိုး။
အကြေးခွံတွေ အထပ်ထပ်နဲ့ နဂါးကိုယ်လုံးဟာ သူ့ ရင်ဘတ်ကတစ်ဆင့် ညာဘက် လက်မောင်းကနေ ဆင်းသွားလိုက်တာ ညာဘက် လက်ခုံပေါ်မှာ ဆုံးတယ်။ ရင်ဘတ်က နဂါးခေါင်းက အောက်ဘက်ကို ပါးစပ်ဖြဲ လှည့်ထားတော့ ဝမ်းဗိုက်တစ်ခုလုံး နီးပါးဟာ နဂါးခေါင်းနဲ့ ပြည့်နေလေရဲ့။
“ကျောက်စီတို့ကတော့ ‘နတ်၊ ပြာ၊ တွဲ - တောင်’ တို့၊ ‘တော်၊ ကျွတ်၊ မုန်း - ရှေ့’ တို့ မဟုတ်ဘူးဗျ။ အမြဲတမ်း နဂါးခေါင်း အောက်ကို လှည့်တယ်”
လို့ မူးလာရင် အမြဲ ပြောတတ်တယ်။ အမြဲ ပြောနိုင်ဖို့ကလည်း အမြဲ မူးနေဖို့ လိုတယ်လို့လည်း တွက်ထားဟန်တူပါရဲ့။ အရက်နဲ့ မျက်နှာသစ်၊ အရက်နဲ့ ပလုတ်ကျင်း၊ အရက်နဲ့ပဲ ထမင်းစား၊ အရက်နဲ့ပဲ ခြေဆေးတယ် ဆိုတဲ့လူ။
လောလောဆယ်တော့ သူဟာ လူသူနဲ့ဝေးဝေး တောအုပ် ညို့ညို့ကြီးထဲက တဲကလေး တစ်လုံးမှာ နေတယ်။ သူ့ပတ်ဝန်းကျင်မှာ အင်မတန် နက်ရှိုင်းတဲ့ ကျင်းကြီး၊ ချိုင့်ကြီးတွေ ရှိတယ်။ အတော်အတန် ကြီးတဲ့ သစ်ပင်ကြီးတွေ ရှိတယ်။ တောင်ကုန်း မြင့်မြင့်ကြီးတွေ ရှိတယ်။ ပြီးတော့ သူ တာဝန်ယူ စောင့်ရတဲ့ မြေကော်တဲ့ ယန္တရားကြီး တစ်လုံးလည်း ရှိတယ်။
ဒီ ယန္တရားကြီးဟာ အဲသည် ပတ်ဝန်းကျင်က တောတွေ၊ တောင်ကုန်းတွေကို ဖြိုတဲ့ ယန္တရားကြီးပဲ။ ကျင်းတွေ၊ ချိုင့်တွေဟာ အဲသည် ယန္တရားကြီးရဲ့ လက်ချက်ပဲ။ အမြဲတမ်းတော့ မဟုတ်ဘူး၊ လိုအပ်တဲ့အခါ ယန္တရား မောင်းတဲ့လူ ရောက်လာပြီး ကော်တော့တာပဲ၊ ဖြိုတော့တာပဲ၊ တူးတော့တာပဲ။
မလိုအပ်တဲ့အခါ သုံးလေးလ မလာပြန်ဘူး။
ဘာပဲဖြစ်ဖြစ် ကိုကျောက်စီက ပစ္စည်းတွေ မပျောက်ပျက်အောင် စောင့်ရတယ်။ စက်ကြီးက တောထဲမှာ နှစ်ပေါက်အောင် ရှိနေတတ်တော့ သူကလည်း နှစ်ပေါက် နေနေရ တော့တယ်။ သည်တောထဲမှာကိုပဲ သူနေရတာ ရှစ်နှစ် ပြည့်တော့မယ်။ သောက်ရေအိုး အညှိတက် တစ်လုံး၊ သင်ဖြူးဟောင်း တစ်ချပ်နဲ့ မီးဖိုချောင် ပစ္စည်းလေး အနည်းအကျဉ်းက လွဲရင် တဲထဲမှာလည်း ဘာမှ မရှိဘူး။
ယန္တရားကြီး အလုပ်ရှိတဲ့အခါ သူ အူစိုတယ်၊ ဆီလေး ဘာလေးလည်း ရတယ်၊ ပိုက်ဆံလေး ဘာလေးလည်း ရတယ်။ ကျန်တဲ့ အချိန်ကတော့ ကလေးတွေ ပြောသလို လက်ချည်းပဲ။ ရတဲ့ လခကလေးနဲ့ စားရတာပဲ။ တစ်လ တစ်လ ရတဲ့ လခကလေးဟာ မနီးမဝေး တန်းလျားက အိမ်ဆိုင်ကလေးကို အရက်ဖိုး ဆပ်တာနဲ့ ကုန်တာပါပဲ။ လဆန်းရင် ပြန်စ၊ လကုန်ရင် အတိုးဆပ် … သည်လိုနဲ့ လည်ပတ် နေတာပါပဲ။
အိမ်ဆိုင်ကလေး ကလည်း အရက်ကောင်းကောင်း ရောင်းတာ မဟုတ်ဘူး၊ တာဇံလို့ ခေါ်တဲ့ ကောက်ညှင်းအရက် ခေါ်မလား၊ ထန်းလျက်အရက် ခေါ်မလား၊ အဲဒါပဲ ရတာ။ ဘာပဲဖြစ်ဖြစ် သူ့အတွက်တော့ ညနေစောင်းရင် သူ့တဲကလေးကနေ နာရီဝက် မရှိတရှိလောက် လျှောက်လာ၊ တန်းလျားခန်းတွေ ထဲကို ဝင်၊ တစ်ခွက် တစ်ဖလား သောက်၊ ပြီးရင် ပြန် … ဒါဟာ နေ့စဉ် သူလုပ်နေကျပဲ။
အရင်တုန်းကတော့ (သည် ယန္တရားကြီးကို လုံခြုံရေး မစောင့်ရခင်တုန်း ကတော့) ဘဝ တော်တော် များများမှာ ကျင်လည်ခဲ့တာ ထားပါတော့၊ အခု ဒီဘက် ရှစ်နှစ်လောက်ကတော့ သူ့မှာ မနက်-ည သည် တန်းလျားလေးကို လာပြီး အရက်သောက်၊ ပြီးရင် ပြန်ပဲ။ တောထဲက တဲကလေးထဲမှာ ညဘက် ဒီဇယ်ဆီ မီးခွက်ကလေးနဲ့ မှိတ်တုတ်မှိတ်တုတ် နေတော့တာပါပဲ။
ခက်တာက ယန္တရားကြီး မလည်ရတာ ကြာပြန်ပြီ။ ယန္တရားမောင်းတဲ့လူ ကလည်း ယန္တရား မလည်တော့ မလာတော့ဘူး။ သည်တော့ သူ့မှာ တခြား ဝင်ငွေလည်း မရှိဘူး။
အစားမှန်မှန် မစားတာရော၊ အရက်တွေ ထောင်းထအောင် သောက်တာရောကြောင့် သူလည်း တစ်စတစ်စ ပိန်ချုံးသထက် ပိန်ချုံးလာတယ်။
သူ ပိန်ချုံးလာတော့ သူ့ရင်ဘတ်က နဂါးကြီးကလည်း ပိန်ချုံး လာတော့တာပဲ။ လက်တွေ ခြေတွေလည်း တုန်လာတယ်။ မကြာမကြာလည်း အအေးမိတယ်။ အဆုတ်ကလည်း ပွချင်တယ်။ ခြင်တွေ၊ ဖြုတ်တွေကလည်း သီးနေအောင် ကိုက်ထားတော့ အရေပြားတွေမှာလည်း အနာ့ပဆုပ်တွေ၊ ပွေးတွေ၊ ဝဲစိုတွေ၊ ညှင်းကြီးကွက်တွေနဲ့ အပြည့်ပဲ။
ရေ ဆိုတာကလည်း တူးထားတဲ့ ချိုင့်တွေထဲက တင်နေတဲ့ မိုးရေကို ချိုးရင် ချိုး၊ သောက်ရင် သောက်၊ ဒါပဲ။ ဘယ်ကမှ ရေသန့်သန့် မရနိုင်ဘူး။
အဲသလိုနဲ့ …
အဝါရင့်ရောင် ယန္တရားကြီးရယ်၊ တဲကလေးတစ်လုံးရယ်၊ သူရယ်၊ သူ့ရင်ဘတ်က နဂါးတစ်ကောင်ရယ်၊ ကျင်းတွေ ချိုင့်တွေရယ်၊
သစ်တော ညို့ညို့ရယ်၊ ဖျာတစ်ချပ် ရေအိုးတစ်လုံးရယ်၊ တာဇံထည့်တဲ့ ပုလင်းလွတ် လေးငါးလုံးရယ်က လွဲရင် သူ့မှာ တွယ်တာစရာ ဘာ သံယောဇဉ်မှ မရှိဘဲ နေလာတာကိုက ပြောခဲ့ပါပြီကော၊ ရှစ်နှစ်လောက် ရှိပြီလို့။
* * *
(၂)
ရေတမာရွက် ကြမ်းကြမ်းတွေ ကြားက နှင်းဆီပွင့်တွေဟာ ရောင်စုံပဲ။ လှလိုက်တာလည်း မပြောနဲ့တော့။
အဝါလည်း ပါတယ်၊ ပန်းသွေး နုနုတွေလည်း ပါရဲ့၊ ကြက်သွေးရောင် စိုစိုဖတ်ဖတ်ကြီးတွေ ဆိုတာကလည်း မနည်းဘူး၊ နှင်းဆီရနံ့တွေ ကလည်း သူ့တဲကလေးထဲမှာ ကြိုင်လို့ လှိုင်လို့။
လှချင်တိုင်း လှနေတဲ့ နှင်းဆီပွင့်တွေကို ကိုကျောက်စီ ငေးတောင် နေမိတယ်။ အပွင့် ရောင်စုံတွေကိုလည်း သူ့လက် ကြမ်းကြမ်းကြီးတွေနဲ့ တယုတယ ပွတ်သပ် ကြည့်မိသေးတယ်။
ကိုကျောက်စီက သူ့ရဲ့ ကတုန်ကယင် လက်တွေနဲ့ နှင်းဆီပွင့်ကလေးတွေကို အသာအယာ ဆွဲနုတ်တယ်။ အဝါတွေကို သတ်သတ် ဖယ်တယ်၊
ပန်းရောင် အဖူးကလေးတွေကို သီးသန့် ထားတယ်။ ကြက်သွေးရောင် နီညိုညို အပွင့်ကြီးတွေကိုတော့ များလွန်းလို့ နှီးစမျှင်မျှင်ကလေးတွေနဲ့ အရင် စည်းတယ်။ ငါးပွင့် တစ်စည်း၊ လေးပွင့် တစ်စည်း စည်းတယ်။ ဖြစ်သင့်တာက ဆန်ကောလို၊ လင်ပန်းလို အချပ်ကြီးထဲမှာ စီပြီး ထည့်ထားရမှာ။
သူ့မှာ ဆန်ကော မရှိဘူး။ သည်တော့ တောငှက်ပျောရွက်ကြီးတွေနဲ့ တစ်ရောင်စီ ခွဲထုတ်တယ်။
ရေညှိတက်နေတဲ့ သောက်ရေအိုးက ရေတစ်ခွက် ခပ်တယ်။ တစ်ဝက်ကို သောက်တယ်။ တစ်ဝက်ကို ပန်းတွေအပေါ် ဖျန်းတယ်။
တဲအပြင်ထွက်ပြီး အလင်းရောင်ကို ကြည့်တယ်။ အချိန် ရှိသေးတယ်၊ ရှိလှမှ သုံးနာရီခွဲပဲ။
သူ နှစ်နှစ်ခြိုက်ခြိုက် ပြုံးလိုက်တယ်။ တာဇံနည်းနည်း သောက်လိုက်တယ်။ ပြီးတော့ တန်းလျားဘက်ကို နှင်းဆီဖက်တွေ ပိုက်ပြီး ထွက်လာခဲ့တယ်။
တစ်သက်နဲ့ တစ်ကိုယ် ကိုကျောက်စီ ပန်းရောင်းတာ မတွေ့ဖူးကြတဲ့ တန်းလျားထဲက လူတွေ ကိုကျောက်စီ ပန်းလာရောင်းတယ် ဆိုတော့ အထူးအဆန်းကို ဖြစ်လို့။ ဘယ်လို ဖြစ်တာလဲ၊ ဘာသဘောလဲ၊ ဘယ်လို ရည်ရွယ်ချက်နဲ့ ပန်းရောင်း ဖြစ်သွားတာလဲ … အဲသလို တွေးကြတယ်။
“ကိုင်း … ပန်းတွေဗျို့ … ခြံပန်း လတ်လတ်ဆတ်ဆတ်တွေ၊ နှင်းဆီတွေ … ”
တချို့ကလည်း ရယ်ကြတယ်၊ တချို့ကလည်း သနားကြတယ်၊ တချို့ကလည်း ဒီကောင် လုပ်လာ ပြန်ပြီလို့ တွက်ကြဟန် တူပါရဲ့ ခပ်တည်တည်ပဲ။
မည်းချိပ်နေတဲ့ အသား၊ အင်္ကျီမပါ၊ ဖိနပ်မပါ၊ ပုဆိုးတိုတို (အဲဒီ ပုဆိုးကလည်း နှစ်ပေါက် ပုဆိုးပဲ) နဲ့ နှင်းဆီပန်း ရောင်စုံနဲ့က ဘယ်လိုမှကို ဆက်စပ် ကြည့်လို့ မရဘူး မဟုတ်လား။
တန်းလျား ဟိုဘက်ထိပ်က ဒီဘက်ထိပ်ကို တစ်ခေါက်ပဲ လျှောက်ရတယ်၊ နှင်းဆီပန်းတွေ လုယူလိုက်သလို ကုန်သွားတယ်။
အဲသည် ဝယ်ကြတဲ့ မိန်းမတွေထဲမှာ သူ လာသောက်နေကျ တာဇံ ရောင်းတဲ့ဆိုင်က မိန်းမကိုတော့ သူ မရောင်းဘူး။ အဲဒီမိန်းမက နှင်းဆီအဝါ တစ်စည်းကို လာကိုင်တယ်။ သူက အတင်း ပြန်ယူလိုက်တယ်။ ဘာမှတော့ မပြောဘူး။
အဲသည် မိန်းမက “ရှင့် အရက်ကြွေးနဲ့ မနှိမ်ပါဘူး၊ ပိုက်ဆံ ပေးမှာပါ” လို့ ပြောတဲ့ကြားကကို သူ မရောင်းတာ။ “ခင်ဗျားကို သတ်သတ် အလကား ပေးပါ့မယ်၊ နောက်မှ ယူပါဗျာ” လို့ပဲ ပြောတယ်။
အဲသည် မိန်းမလည်း စိတ်ဆိုး သွားတယ်နဲ့ တူပါတယ်၊ “သောက်ကြီး သောက်ကျယ်” လို့ တစ်ခွန်းပဲ ပြောပြီး ပြန်သွားတယ်။ ဒါပါပဲ။
ကျန်တဲ့ မိန်းမတွေ အားလုံးကို ရောင်းလိုက်တာပါပဲ။ ဈေးထဲမှာ တစ်စည်းကို ခုနစ်ကျပ် ရှစ်ကျပ် ပေးရမယ့် အစည်းတွေကို လေးကျပ် ငါးကျပ်နဲ့ ရောင်းတော့ နှင်းဆီပန်းတွေ အားလုံးဟာ ခဏကလေးနဲ့ ကုန်သွားတယ်။
ကိုကျောက်စီရဲ့ စိတ်တွေဟာလည်း ပေါ့ပါးလွတ်လပ် သွားတယ်။ အဘွားကြီး တစ်ယောက်ကတော့ လူကြီး မဟုတ်လား၊ ကိုကျောက်စီ ပန်းရောင်းတယ် ဆိုတော့ ဝမ်းသာလို့ အားပေးတဲ့ အနေနဲ့ တစ်စည်း ဝယ်တယ်။
“ငါ့တူ ကျောက်စီလည်း မရောင်းစဖူး ပန်းတွေ ဘာတွေ ရောင်းလို့ပါလား။ သာဓုတော် … သာဓု … ကိုယ်တော်လေး ဆက်ရမယ် … မှန်း … တစ်စည်းကို ဘယ်လို ရောင်းတုံး”
လို့လည်း ပြောတယ်။ မရောင်းစဖူး ဆိုတာ အဓိပ္ပါယ် ရှိတယ်။ ကောင်းရောင်း ကောင်းဝယ် လုပ်စား နေပါရောလားလို့ ပြောလိုက်တာလည်း ဖြစ်တယ်။
သူတို့ သိထားတဲ့ ကျောက်စီဟာ ဘယ်တုန်းကမှ ကောင်းရောင်း ကောင်းဝယ် ရှိခဲ့တာမှ မဟုတ်တာကိုး။
မနက် မိုးလင်းအောင် သောက်ပြီးရင် စရိုက်ကြမ်းကြမ်းနဲ့ ရိုက်ဖို့နှက်ဖို့လောက် စဉ်းစားနေတဲ့လူ၊ ခိုးဖို့ဝှက်ဖို့ ကြည့်နေတဲ့လူ မဟုတ်လား။ သူ့တဲနဲ့ မနီးမဝေး တောထဲမှာ ကိုးကျင်းကိုးကြောင်း လျှောက်သွားနေတဲ့ နွားတစ်ကောင်ရဲ့ တင်ပါးသားတွေချည်းပဲ ရဲတင်းနဲ့ ခုတ်ယူရင် ယူလိုက်တဲ့လူ မဟုတ်လား။ တင်းပါးဆုံသား အိအိကြီးတွေ ပါမလာတဲ့ နွားတွေဟာ နည်းတာမှ မဟုတ်တာ။ ပိုင်ရှင်တွေက ကိုကျောက်စီ လက်ချက်မှန်းလည်း သိပါတယ်၊ ခက်တာက ကိုယ်တိုင် မမြင်ဘူးလေ၊ ပြောလည်း မပြောရဲဘူးလေ။
နောက် လုပ်နေကျ ရှိသေးတယ်။ ဟိုဘက်ထိပ် ဒီဘက်ထိပ် ငုတ်ရိုက်၊ လေးခွသားရေ တင်းတင်းဆွဲချည်၊ ပြီးရင် ထစ်ကလေးတစ်ခု ခံပြီး ကြိုးနဲ့
ခပ်ဝေးဝေးကို ဆွဲထား၊ သားရေကြိုး ပတ်လည်မှာ ဆန်စေ့တွေ ကြဲထား၊ စာကလေးတွေက အုပ်လိုက် ဝင်စားပြီ ဆိုတော့မှ ကြိုးနဲ့ ခလုတ်ကို ဖြုတ်လိုက်ရင် စာကလေး ဆယ်ကောင်လောက်ဟာ တုံးလုံးပက်လက် ကျန်ရစ်ခဲ့ရော။ ဒါဟာ ကိုကျောက်စီအတွက် အမြည်းပဲ။ အဲသည် ညနေဟာ တာဇံနဲ့ စာကလေးကင် ညနေပဲ။
သည့်အရင်ကလည်း ပန်းရန်နောက်လိုက် ဆိုပြီး တစ်ရက် နှစ်ရက် ပန်းရန် လိုက်လုပ်ဖူးတယ်။ နောက်တစ်နေ့ မလိုက်ရတော့ဘူး။
ပန်းရန်ဆရာ ခေါင်းဆောင်ရဲ့ ညို့သကျည်းကို ခုတ်တူနဲ့ ခုတ်ပစ်ခဲ့လို့ တဲ့။
ကိုကျောက်စီအတွက် တစ်ခု ကောင်းတာက သူ့မိခင်ဌာနက သူရှိနေတဲ့ တဲကလေးနဲ့ တော်တော်ကြီး ဝေးတဲ့ နေရာမှာ ရှိနေတာပဲ။ သည် ယန္တရားကြီးနဲ့ ကိုကျောက်စီ ရှိတဲ့ နေရာကို တော်ရုံတန်ရုံ တာဝန်ရှိတဲ့ လူကလည်း ရောက်လာလေ့ မရှိဘူး။ ယန္တရားကြီးက ပစ္စည်း မပျောက်သရွေ့ ကိုကျောက်စီဟာ ယန္တရားနဲ့အတူ ရှိသလား မရှိဘူးလား၊ ဂရုတစိုက် စောင့်ကြည့်သလား မစောင့်ကြပ်ဘူးလားလည်း သိပ်စစ်ဆေးလေ့ မရှိဘူး။
သည်တော့ သူ စိတ်ကူးတည့်ရာ လုပ်လေ့ရှိတယ်။ ယန္တရားကြီးကို ပစ်ထားလေ့ ရှိတယ်။ ယန္တရားကြီးကို ပစ်ထားပြီး သွားချင်ရာ သွားနေတာပဲ။
လုပ်ချင်တဲ့အလုပ် ထွက်လုပ်နေတာပဲ။ လုပ်တိုင်းလည်း ဇာတ်သိမ်းက မကောင်းဘူး။ ပြဿနာနဲ့ ဆုံးတာချည်းပဲ။
တော်ရုံတန်ရုံလည်း ကိုကျောက်စီရဲ့ ပုံပန်းသဏ္ဌာန်နဲ့ သူ့ရင်ဘတ်က နဂါးကြီးကို ကြောက်လို့ မပြောဖြစ်ကြတော့ဘူး။ နောက်တစ်ခါ မဆက်ဆံတာပဲ ရှိတယ်။ သူကတော့ စုံတယ်။ မိန်းမပျက် တချို့ကို ဆက်သွယ်ပေးတဲ့ အလုပ်လည်း လုပ်တယ်၊ ဝက်သေးအိမ်နဲ့ တာဇံ သယ်ပေးတာလည်း လုပ်တယ်၊ အငှား ဝက်ပေါ် နွားပေါ်ဖို့ ရဲတင်း တစ်လက်နဲ့ အသင့် စောင့်နေတတ်တာလည်း ရှိတယ်၊ ခပ်တည်တည်နဲ့ မိုက်ကြေး ခွဲတတ်တာလည်း ရှိတယ်၊ တာဇံ ဆိုင်လေးမှာ ခွက်တစ်လုံးနဲ့ လိုက်တောင်းပြီး သူများ သောက်စားနေတဲ့ အထဲက ဆိုးခနဲ ဆတ်ခနဲ နှိုက်စား လိုက်တာလည်း ရှိတယ်။
တန်းလျားထဲက လူတွေ သိတဲ့ ကိုကျောက်စီက အဲသလို ကိုကျောက်စီကိုး … အခု ပန်းရောင်းတယ် ဆိုတော့ နားမလည်နိုင်ကြဘူး။ ဘာပဲဖြစ်ဖြစ် ပန်းရောင်းတာဟာ ကောင်းတဲ့ အလုပ်ပဲ။ နူးညံ့ပျော့ပျောင်း လာတဲ့ သဘောပဲ။
ကိုကျောက်စီဟာ သည်လိုနည်းနဲ့ သူ့ဘဝကို ပြုပြင်လာတယ် ဆိုရင် ပြီးတာပဲ။ လူဆိုတာ မှားတုန်းက မှားခဲ့တာပဲ။ ကောင်းလာပြီ ဆိုရင်လည်း ဘာပြောစရာ ရှိမလဲ ခွင့်လွှတ်လိုက်ကြ ရတာပဲ မဟုတ်လား။
အဲသည် ညနေက ကိုကျောက်စီ အဘွားကြီးကို ပန်းတစ်စည်း အပိုပေးတယ်။ အဘွားကြီးကို မူးမူးနဲ့ ထိုင်လည်း ကန်တော့လိုက် သေးတယ်။
သူ့အတွက်ပါ ပန်းကပ်ပေးပါ ဆိုပြီး တစ်စည်းသတ်သတ် ပေးလိုက်သေးတယ်။ အဘွားကြီး ဆိုတာ သာဓုချင်း မိုးမွှန်သွားတာပဲ။
ကိုကျောက်စီ ပြန်လာတော့ လက်ထဲမှာ ငွေလေးဆယ်ကျော်ကျော် ပါလာတယ်။ တာဇံရောင်းတဲ့ အိမ်ကလေးဆီကို သွားတယ်။
တာဇံရောင်းတဲ့ မိန်းမက သူ့ကို ပန်းမရောင်းလို့ မကျေနပ်ပေမယ့် လက်ငင်းပေး သောက်တော့ ရောင်းတာပါပဲ။ တစ်ပိုင်း သောက်တယ်၊ တစ်ပိုင်းကို ပုလင်းငှား ထည့်လာပြီး ယူလာခဲ့တယ်။ သူ့တဲကလေးထဲ ရောက်တော့ ထပ်သောက်တယ်။ အူလည်း မြူးနေတယ်။ ပျော်လည်း ပျော်နေတယ်။
အဲသည် ညက ကိုကျောက်စီ နှစ်နှစ်ခြိုက်ခြိုက်ကြီး အိပ်ပျော်တယ်။ ခြင်တွေ ဖြုတ်တွေ တစ်ကိုယ်လုံးမှာ သီးနေတဲ့ကြားက အိပ်မက်တွေတောင် မက်နေလိုက်သေးတယ်။
* * *
(၃)
နောက်တစ်ရက်မှာတော့ နှင်းဆီပန်းတွေ မဟုတ်ပြန်ဘူး၊ ပန်းတော့ ပန်းပဲ။ ဂန္ဓမာတွေ … ရောင်စုံလည်း မဟုတ်ဘူး၊ အဖြူတွေချည်း သန့်သန့်။
ဂန္ဓမာဖြူ ပွင့်တွေဟာလည်း အပွင့် ထွားထွားကြီးတွေ ပါပဲ။ လှနေတာပါပဲ။
ဂန္ဓမာပွင့်တွေ ကိုလည်း တောငှက်ပျောဖက်နဲ့ သေသေသပ်သပ် ထုပ်တယ်။ ရေဖျန်းတယ်။ တန်းလျားဘက်ကို ထွက်ရောင်းတယ်။
“ဟော … ကိုကျောက်စီကြီး … နှင်းဆီပန်း မရတော့ဘူးလား”
“အင်း … ကနေ့ ဂန္ဓမာပဲ ရလာလို့ … ကောင်းလိုက်တာ၊ ဂန္ဓမာတွေ ယူပါဦး”
“နေပါဦး … ဘယ်ကယူရောင်းတာလဲ”
“ခြံက … သူငယ်ချင်းခြံက … အဝေးကြီးပါဗျာ။ မတတ်နိုင်ဘူးဗျာ၊ တစ်နေ့ နှစ်ဆယ်ကျန်ကျန် အစိတ်ကျန်ကျန် လုပ်ရတော့တာပဲ”
“ကောင်းတာပေါ့ … ဒီအစည်းကြီးက ဘယ်လိုရောင်းတုံး”
“ငါးကျပ်နဲ့ပဲ ယူ”
သည်လိုနဲ့ ဂန္ဓမာတွေလည်း ကုန်သွားတာပဲ။
အဲသည် နေ့ကလည်း ကိုကျောက်စီ မြက်မြက်ကလေး ရတယ်။ ငါးဆယ်ကျော်ကျော် ရတယ်။ သည်ကနေ့ တန်းလျားက မိန်းမဆိုင်မှာ သွားမသောက်တော့ဘူး။ ကိုမောင်ကွန့် ဘီအီးဆိုင်ဘက်ကို သွားတယ်။ ပဲခြမ်းသုပ်ကလေးနဲ့ ဘီအီးတစ်ပိုင်းနဲ့ ထိုင်နေလိုက်တာ ညနေ ခြောက်နာရီ ကပ်နေပြီ ဆိုတော့မှ ထတယ်။
အဲသည် ညက ဘီအီး သောက်လာပေမယ့် တဲကိုရောက်တော့ တာဇံနဲ့ ပိတ်တယ်။ တော်တော်လေး မူးတော့မှ ရပ်တယ်။
သူ့မျက်နှာကြီးဟာ အဲသည်ညက တော်တော် ကြောက်စရာ ကောင်းနေတယ်။ အရက်မူးနေတဲ့ ဘီလူးတစ်ကောင်နဲ့လည်း တူနေတယ်။
အဲသည်ညက တဲအပြင်မှာ ထိုင်နေရင်းက ပန်းရောင်းရတဲ့ ငွေတွေကို ရေတယ်။ တဲခေါင်မိုးမှာ ပိုက်ဆံခေါက်ကို ညှပ်တယ်။
ဘာစိတ်ကူးပေါက်လို့လဲ မသိဘူး၊ ကိုကျောက်စီ တဲရှေ့က ကွင်းပြင်ကို ကြည့်ရင်း ရယ်တယ်။ အားရပါးရကို ရယ်တာ။
တောတွေ၊ တောင်ကမူတွေ၊ ချိုင့်ဝှမ်းတွေ ကြားမှာ အဲသည်ညက ကိုကျောက်စီရဲ့ ရယ်သံဟာ ချောက်ချားစရာ ကောင်းနေတယ်။
ကိုကျောက်စီရဲ့ ဝမ်းဗိုက်ပေါ်က နဂါးကြီးဟာလည်း အဲသည်ညက မာန်စွယ် တဖွေးဖွေးနဲ့ … တလှုပ်လှုပ်နဲ့ … ထိလိုက်ရင် ပေါက်လိုက်မယ့် အစွယ်တွေနဲ့ … မျက်စောင်းတစ်ချက် ထိုးလိုက်ရင် ပြာဖြစ်သွားလောက်တဲ့ မျက်လုံးတွေနဲ့ …
နောက်နေ့တွေ နောက်နေ့တွေမှာလည်း ကိုကျောက်စီ ပန်းရောင်း ထွက်တာပါပဲ။ ညနေတိုင်း တောငှက်ပျောရွက်ကလေးနဲ့ စည်းလာတဲ့ အစည်းထဲမှာ ပန်းတွေသာ ပြောင်းသွားတယ်၊ ပန်းတွေတော့ ပါတာချည်းပဲ။
တစ်ခါတစ်ခေါက်တော့လည်း ပန်းပြတ်သွားတာလည်း ပါတယ်။ မလာဖြစ်ဘူး။ တစ်ခါတစ်ခေါက်လည်း ဆက်တိုက် ရောင်းဖြစ် နေပြန်ရော။
ပန်းရရင် ရသလို ဆိုပါတော့။
ပန်းတွေကတော့ အမျိုးမျိုးပေါ့လေ။
တစ်ခါတစ်ခါ နှင်းဆီ၊ တစ်ခါတစ်ခါ ဂန္ဓမာ၊ တစ်ခါတစ်ခါ ဖယောင်းပန်း ရိုးတံရှည် အနီ-အဖြူ၊ တစ်ခါတစ်ခါ ဟော်လန်ဒေစီ၊ တစ်ခါတစ်ခါ အာဖရိကန်ဒေစီ …။
* * *
(၄)
ပထမတော့ ကိုကျောက်စီ ပန်းလာမရောင်းတဲ့ နှစ်ရက်လောက်ကို တန်းလျားစုက လူတွေက သတိမထားမိကြဘူး။ ပန်းမရတဲ့ နေ့တွေမှာ ကိုကျောက်စီ လာလေ့မှ မရှိတာကိုး။
ကိုကျောက်စီ သောက်နေကျ တာဇံဆိုင်ကလေးကိုလည်း နှစ်ရက်လောက် မရောက်ဖြစ်ဘူး။ ဒါလည်း ကိုမောင်ကွန့် ဆိုင်ဘက် လှည့်နေတာ ဖြစ်မှာပဲ လို့ တွက်လို့ ရနိုင်တာကိုး။
ကိုကျောက်စီ နှစ်ရက်လောက် ပန်းလာမရောင်းတာဟာ ဘာမှလည်း ထူးဆန်းတာ မဟုတ်ဘူး။ ဒါပေမဲ့ မဟုတ်ဘူး … အဲသည်ညနေမှာပဲ ချောက်ချားဖွယ် သတင်းတစ်ခုက တန်းလျားခန်းကလေးတွေ ဆီကို ရောက်လာတယ်။
ကိုကျောက်စီဟာ သူ့တဲကလေးထဲမှာ သေနေတာ နှစ်ရက်ရှိပြီ ဆိုတဲ့ သတင်းပဲ။ တိုက်တိုက်ဆိုင်ဆိုင် ယန္တရားကြီးကို စက်နှိုးဖို့ ရောက်လာတဲ့ အော်ပရေတာက အလောင်းကို တွေ့တာလို့လည်း ဆိုတယ်။ မြေကော် ယန္တရားကြီးကို စက်နှိုးဖို့များ မရှိရင် ကိုကျောက်စီရဲ့ ရုပ်အလောင်းဟာ ဘယ်လောက်အထိ လူမသိ သူမသိ ရှိနေမလဲတောင် မသိနိုင်ဘူး။
သည်သတင်းကို ကြားစက တန်းလျားက လူတွေဟာ ငြိမ်သက် သွားကြတယ်။ အင်္ကျီမပါ ဘာမပါနဲ့ မိုးကလေး တဖြောက်ဖြောက် ကြားမှာ ပုဆိုးကြမ်းကလေး ခြုံပြီး တင်းတင်းတောင့်တောင့် သေနေတဲ့ ကိုကျောက်စီကိုလည်း သွားကြည့်ကြဖို့ စိုင်းပြင်းကြတယ်။ ကိုကျောက်စီရဲ့ မိခင်ဌာနက တာဝန်ရှိတဲ့ လူတွေလည်း ရောက်နေကြတယ်။
ဝမ်းဗိုက်ကြီးဟာ ကျောက်ပျဉ် တစ်ချပ်လို မာကျော စူထွက်နေတဲ့ ကိုကျောက်စီရဲ့ ရုပ်အလောင်းကိုလည်း သယ်ဆောင် သွားကြတယ်။
တန်းလျားကလူ တော်တော် များများဟာ ကိုကျောက်စီရဲ့ တဲကလေးရှိရာ ရောက်နေကြချိန်မှာတော့ အလောင်း မရှိတော့ဘူး။ ဒါပေမဲ့ လူ တော်တော်များများရဲ့ မျက်လုံးတွေက ကိုကျောက်စီရဲ့ တဲကလေးနဲ့ ပတ်ဝန်းကျင်ကို အကဲခတ်မိသွားကြတယ်။
ဘာမှတော့ မဟုတ်ပါဘူး၊ ပန်းခြောက်တွေ …
နှင်းဆီပန်းခြောက်တွေ၊ ဂန္ဓမာပန်းခြောက်တွေ၊ ဟော်လန်ဒေစီ ပန်းခြောက်တွေ၊ ဒေလီယာပန်းခြောက်တွေ၊ အင်မတန် များပြားတဲ့ ရေတမာ ရွက်ခြောက်တွေ၊ လွမ်းသူ့ပန်းခွေ လုပ်တဲ့ ဝါးစ အဟောင်းတွေ၊ ကြိမ်ခွေတွေ၊ နှီးစတွေ၊ စက္ကူရောင်စုံ အစတွေ၊ ဖဲပြား အနက်စတွေ …
အဲသည်မှာတင် လူတွေဟာ ကိုယ့်အခန်းကို ကိုယ် လေရဲ့ပြင်းထန်တဲ့ အဟုန်မျိုးနဲ့ ပြန်လာကြတယ်။ ဘုရားစင်ပေါ်က ပန်းတွေ၊ နတ်စင်ပေါ်က ပန်းတွေကို ဆွဲချကြတယ်။
ဘုရားစင်၊ နတ်စင်တွေကို ရေဆေးကြတယ်။ အမွှေးနံ့သာတွေ ပက်ကြတယ်။ တောင်းပန် တိုးလျှိုးကြတယ်။ ကန်တော့ပွဲတွေ ထိုးကြတယ်။
ရေစင်အိုးတွေ၊ နတ်အုန်းသီးတွေ လဲကြတယ်။ တချို့မိန်းမတွေက ကျိန်ဆဲကြတယ်၊ တချို့မိန်းမတွေက ငိုကြတယ်၊ တချို့မိန်းမတွေက ဒေါသအမျက် ချောင်းချောင်း ထွက်ကြတယ်၊ တချို့မိန်းမတွေက နံ့သာဖြူ ကရမက် သွေးရင်း ပါးစပ်က တတွတ်တွတ် ရွတ်ကြတယ်။
အဲသည် ညနေက တန်းလျားကလေးမှာ ဆူညံပွက်ထ သွားတာ အမှန်ပဲ။
ကိုကျောက်စီ ပန်းမရောင်းလို့ မဝယ်ဖြစ်တဲ့ တာဇံရောင်းတဲ့ မိန်းမက လွဲလို့ ကျန်တဲ့မိန်းမတွေဟာ ကြက်သီးမွေးညင်း ထကုန်ကြတယ်။
တာဇံရောင်းတဲ့ မိန်းမက သူ့ဆီမှာ အရက်အကြွေး သောက်နိုင်ဖို့ အတွက် မသန့်တဲ့ ပန်းတွေကို မရောင်းဘဲ ကျေးဇူးသိသွားရှာတဲ့ ကိုကျောက်စီရဲ့ စေတနာကို အခုမှ သဘောပေါက်သွားတယ်။
ကျန်တဲ့ မိန်းမတွေညအားလုံးကတော့ စောစောကများ သိရင် ကိုကျောက်စီရဲ့ အလောင်းကိုတောင် တစ်စစီ ဆုတ်ဖြဲ ပစ်ကြတော့မလား မှတ်ရအောင် ဒေါသတွေဖြစ်နေကြတယ်။ အဲဒီအကြောင်းကို ရက် တော်တော်ကြာတဲ့အထိ တချို့က ကြေကြေကွဲကွဲ ပြောကြတယ်။
* * *
(၅)တန်းလျားခန်းကလေးက လူတွေဟာ သည်ဖြစ်ရပ်ကို မမေ့နိုင်ကြဘူး။
လူဆိုတာကလည်း ခက်သားပဲ။ ဘယ်လောက်ပဲ ကြာကြာ ကောင်းတဲ့ လူတွေကိုလည်း အောက်မေ့ သတိရနေတတ်တယ်၊ ကောက်ကျစ် စဉ်းလဲတဲ့ လူတွေကိုလည်း အောက်မေ့ သတိရနေတယ် မဟုတ်လား။ တန်းလျားက လူတွေ အားလုံးဟာ ကိုကျောက်စီကို သတိရနေကြတုန်းပဲ။
------------
နေဝင်းမြင့်
မဟေသီ၊ ဩဂုတ်၊ ၁၉၉၁။

စိတ်ဈေး

စိတ်ဈေး
========
ရူးတယ်ဆိုတာ တကယ်တော့ နာမည်သာဆိုးတာ ဘယ်လောက် အနေအထိုင် လွတ်လပ်တယ် မှတ်သလဲ။ တကယ်တော့ ခုချိန်မှာ ရူးနေတာ အကောင်းဆုံးပဲ။ ရူးရတဲ့ဘဝလောက် ပျော်စရာကောင်းတာ ရှိဦးမလား။
လောကမှာ အဓိကကျတာက အမြဲတမ်း စိတ်ချမ်းသာပြီး ပျော်ရွှင်နေဖို့ပဲ မဟုတ်လား။
ဒီတော့ ရူးတယ် အပြောခံရတာ နာစရာမှ မဟုတ်ဘဲ။ ငါ့ဘဝကြီး လွတ်လပ်တော့မယ်၊ ပျော်ပျော်ရွှင်ရွှင် နေရတော့မယ် ဆိုတဲ့ နိမိတ်လက္ခဏာ ပဲလို့ သဘောထားလိုက် ပါတယ်။ ဒါပေမယ့် တစ်ခု စိတ်မကောင်းစရာ ကောင်းတာက ကျွန်မ အမှန်တကယ် မရူးသေးတဲ့ အဖြစ်ပါပဲ။
ကိုယ်ရည်သွေး တီးလုံးတွေ ကြားမှာ ကိုယ်ပိုင်သံစဉ် ရှာနေခဲ့တာ ဒီဆိုင်ကို စရောက်ကတည်းက ဆိုပါတော့။ မိသားစုရဲ့ ရုတ်ခြည်း ပြောင်းလဲသွားတဲ့ မွန်းကြပ်မှုတွေကြောင့် တစ်ထောင့် တစ်နေရာက လိုအပ်တဲ့ ကွက်လပ်ကို ဖြည့်ဆည်းဖို့ ဈေးထဲမှာ သည်ဆိုင်ကလေးကို စဖွင့်မိတဲ့ နေ့ကစလို့ စ်ိတ်အကျဉ်း ကျခဲ့ရတာ ပါပဲ။
ဖေဖေ ရုတ်တရက် ကျန်းမာရေး ချို့ယွင်းလာလို့ စီးပွားရေး ကျပ်တည်းတဲ့ မိသားစုကို ဖေ့ဖေ့အစ်မ သုံးလေးဝမ်းကွဲ တော်တဲ့ ဒေါ်လေးရီက ဈေးထဲက သူ့ရဲ့သုံးခန်းတွဲ ဆိုင်ကြီးရဲ့ ထောင့်တစ်နေရာမှာ ဈေးလာရောင်းဖို့ ခေါ်တုန်းက မျက်ရည်လည်အောင် တုန်ယင်လှိုက်လှဲစွာ ဝမ်းသာခဲ့ရပါတယ်။ မိတ်ဟောင်း ဆွေဟောင်း တချို့နဲ့ ရပ်ဆွေရပ်မျိုးတွေ ကတော့ ငယ်စဉ်က ဖေဖေတို့ မိသားစုရဲ့ ဆပ်မကုန်တဲ့ ကျေးဇူးတွေ ရှိတဲ့ ဒေါ်လေးရီ တစ်ယောက် သည့်ထက်မက ကူညီသင့်တယ်လို့ ဝေဖန် ပြောဆိုကြပေမယ့် ကျွန်မတို့ မိသားစု အတွက်ကတော့ ဒေါ်လေးရီဟာ ရှာမှ ရှားတဲ့ မဟာ ကယ်တင်ရှင်ကြီးလို့ မှတ်ယူပြီး ကျေးဇူး အထပ်ထပ် တင်နေမိတာ အမှန် ….။
အထိအတွေ့ နည်းပါးလွန်းသဖြင့် စိမ်းနေသော အဒေါ် လုပ်သူ၏ ပထမဆုံး ဈေးနေ့က နှုတ်ဆက်စကားကို ကျွန်မ ဘယ်တော့မှ မေ့နိုင်တော့မည် မဟုတ်ပါ။
"နို့ ... နေပါဦး၊ ညည်းက ကဗျာဆိုလား ဝတ္တုဆိုလား ရေးသေးဆို"
"ဟုတ်ကဲ့ ... ဝါသနာပါလို့ နည်းနည်းပါးပါး ရေးစမ်း ကြည့်တာပါ"
"ပုိုက်ဆံကော ရရဲ့လား"
"နောက်တော့ နည်းနည်းပါးပါး ရမယ် ထင်တာပါပဲ"
"ညည်းဟာကလဲ နည်းနည်းပါးပါးချည်း ပါလား။ အေးလေ ညည်းအဖေကြောင့် ငါက ညည်းတို့ သားအမိတွေ သနားလို့ ဈေး ပေးရောင်းထားတာ၊ ဈေးသည်နဲ့ တူအောင်တော့ နေပေါ့အေ၊ ရုံးစာရေးမ လိုလို၊ စာရေးဆရာမ လိုလို၊ ကောလိပ်ကျောင်းသူ လိုလို ဟန်ကြီး တစ်ခွဲသားနဲ့ သူများ အမြင်ကတ်အောင်တော့ လုပ်မနေနဲ့ပေါ့၊ နောက်ပြီး အဲဒီစာတွေ၊ ကဗျာတွေကိုလည်း စိတ်ကူးယဉ်ပြီး ရူးနေရမယ့် အချိန် မဟုတ်တော့ဘူး။ ငါ့ မျက်စိနောက် နေရင်တော့ ငါ့စည်းကမ်းအတိုင်း နေရမှာနော်။ ညည်းအမေ ကြည့်ရတာလဲ သားသမီးတွေကို နိုင်နင်းမယ့်ပုံ မပေါ်ပါဘူး"
မြတ်စွာဘုရား မြင်မြင်ချင်း ဆောက်နဲ့ ထွင်းသလို ဆွေမျိုးသားချင်း တစ်ယောက်ရဲ့ ကြိုဆိုမှုက ​နွေးထွေး လှချည်လား။
* * *
ဈေးမှာ အနေကြာလာတော့ သူများ အမြင်ကတ်အောင် မနေနဲ့ဟု ကျွန်မကို ဆုံးမခဲ့သော ဒေါ်လေးရီမှာ ဆိုင်ပတ်ဝန်းကျင်တွင် မည်သူနှင့်မျှ မသင့်မြတ်ကြောင်း သိထားရခြင်းအတွက် ကျွန်မ ထူးပြီး အံ့ဩ မနေတော့ပါ။
အများအမြင်တွင် ကြွားလုံး ကြီးတတ်သူ၊ ကိုယ်ရည်သွေးလွန်းသူ ဖြစ်နေသော ဒေါ်လေးရီနှင့် အနီးကပ် နေရသော ကျွန်မသည်ပင် အနေကြာလာမှ ဆိုင်နီးချင်းများ၏ ပကတိ ခင်မင်မှုကို ရရှိကာ ဘဝတူ ဈေးသည်များနှင့် ထိတွေ့ခွင့် ရပါတော့သည်။
"မ​ဝေက ကျွန်မတို့ ဈေးမှာ မိသားစုလို ဖြစ်နေပြီ ဆိုတော့ ဈေးသူ ဈေးသားတွေ စုပေါင်းပြီး လုပ်တဲ့ ဘုံကထိန်မှာ အမာခံ အလှူရှင် ဝင်လုိုက်ပါလားဟင်"
တစ်နေ့ ဆိုင်နီးချင်း အချို့နှင့်အတူ မျက်နှာစိမ်း သုံးလေးယောက် ကျွန်မဆိုင်သို့ လာ၍ စည်းရုံးကြခြင်း ဖြစ်သည်။
"အမာခံ အလှူရှင် ဝင်တော့ ဘယ်လို လှူရမလဲ"
"ဒီလိုပါ … ကျွန်မတို့ ဈေးမှာ အမာခံ အလှူရှင်အဖြစ် ရပ်တည်နေကြတဲ့ ဈေးသူဈေးသား ငါးရာကျော် ရှိပါတယ်၊ တချို့ကလဲ ကထိန်ရာသီ ရောက်မှ သင်္ကန်း၊ ထီး၊ ဖိနပ် စသည်ဖြင့် တတ်နိုင်သလောက် လှူကြပါတယ်။ အမာခံတွေကတော့ နေ့စဉ် ချွေးနည်းစာထဲက တစ်နေ့ကို တစ်ကျပ် တစ်ကျပ် လှူပြီး တစ်နှစ်ပြည့်တော့ အဲဒီ ငွေတွေနဲ့ မတည်ပြီး အလှူခံမဏ္ဍပ်က ထပ်ပြီး ကောက်ခံရရှိတဲ့ ငွေတွေနဲ့ စုပေါင်းပြီး မြို့နယ်ထဲက စာသင်သံဃာ အများဆုံးရှိတဲ့ ကျောင်းမှာ စုပေါင်း ဘုံကထိန် ခင်းကြတာပါ"
"အလှူငွေတွေ အများကြီး ရမှာပဲနော်"
"နှစ်စဉ် တစ်သိန်း ပတ်ဝန်းကျင်လောက်ကို လှူရပါတယ်၊ အမာခံ အလှူရှင်တွေ အားလုံးဆီက နေ့စဉ် တစ်ကျပ် တစ်ကျပ်ကို ဆိုင်တိုင်ရာရောက် လိုက်ကောက်ခံပေးတဲ့ လုပ်အား ကုသုိုလ်ရှင်လဲ ရှိပါတယ်၊ ဒီငွေတွေကို ဘဏ္ဍာရေးမှူးက စနစ်တကျ ဘဏ်မှာ အပ်နှံပြီး ထိန်းသိမ်းပေးပါတယ်၊ ဒါကြောင့် မ​ဝေလဲ ပါဝင်ပါလို့ မေတ္တာရပ်ခံတာပါ"
"အို … ပါရမှာပေါ့ရှင်၊ ဒါ ဝန်လေးတဲ့ ကိစ္စမှ မဟုတ်ဘဲ ... ကျွန်မကတောင် ကျေးဇူး တင်ရဦးမှာပါ"
အမှန်တကယ်လည်း ကျွန်မ ကျေးဇူး တင်မိပါသည်။ တစ်ချိန်တည်း တစ်ပြိုင်တည်း အလုံးအရင်းနှင့် လှူနိုင်ရန် ခက်ခဲသော ကျွန်မအတွက် ဤကုသိုလ်သည် ရတောင့်ရခဲပင်။ "မလှူတတ်ရင် ဈေးရောင်း" ဆိုသကဲ့သို့ပင် ဆိုင်ခုံပေါ်မှ တစ်ကျပ်တစ်ပြား လက်လှမ်း လိုက်ရုံမျှဖြင့် ကထိန်ဒါယိကာမ အမည်ခံရ ပေတော့မည်။ သို့ဖြင့် ကျွန်မ၏ အမည်နှင့် နေရပ် လိပ်စာများကို ရေးယူနေစဉ် အသက် လေးဆယ်ကျော်ခန့် မျက်နှာစိမ်း တစ်ဦးဖြစ်သော
"ဟေ့ ... ညည်းက မြရွက်ဝေ ဆိုပြီး စာရေးနေတာ မဟုတ်လား"
"ရှင် …"
ကျွန်မ အံ့အားသင့်သွားသည်။ အလွန် ကျဲပါးလွန်းသော ကျွန်မ၏ ကလောင် အမည်ကို ပြောနိုင်သောသူက ပြုံး၍ ...
"ဟုတ်ပါတယ် ညည်း မြရွက်ဝေပါ၊ ကျုပ်တို့ မြို့နယ်က ထုတ်တဲ့ အောင်မြေ မဂ္ဂဇင်းထဲမှာ `အမေ´ ဆိုတဲ့ ဝတ္တုလေးကို ညည်းရေးခဲ့တာ မဟုတ်လား၊ မြမြ​ဝေဆိုတဲ့ ညည်းနာမည် အရင်းရယ်၊ နေရပ်လိပ်စာ ရယ်ကြောင့် ကျုပ် သိလိုက်တာပေါ့၊ အဲဒီ မဂ္ဂဇင်းက ကျုပ်တို့ အပေါင်းအသင်း မြို့ခံလူတွေ လုပ်ကြတာလေ၊ ဒါကြောင့် ကျုပ်မှတ်မိ နေတာပေါ့၊ ကျုပ်က စာမရေးတတ်ပေမယ့် စာဖတ်ပါတယ်၊ စာရေးဆရာတွေကိုလည်း လေးစားပါတယ်၊ အတော်ပဲ ညည်းလဲ ကျုပ်တို့ဈေးမှာ စာပေသမား တစ်ယောက်၊ လူမှုရေးကိစ္စ၊ ဘာသာရေးကိစ္စ တွေမှာ တတ်နိုင်သလောက် ဝိုင်းကူဖို့ တိုက်တွန်းရမှာပဲ"
ထိုအချိန်မှ စ၍ စိတ်ရင်း ကောင်းသလောက် စည်းရုံးရေး ထက်မြက်သော ကထိန် အတွင်းရေးမှူး ဦးမြတ်ငြိမ်းတို့ မိသားစုသည် နောက်သောအခါ ကျွန်မနှင့် စိတ်တူကိုယ်တူ လေးစား အားထားဖွယ် လူမှုရေး လုပ်ဖော်ကိုင်ဖက် တစ်ယောက်အဖြစ် ရင်းနှီးကျွမ်းဝင် လာခဲ့ပါတော့သည်။
လက်ရှိ ရောင်းနေသော ဆိုင်လေးအား ပေါက်ဈေးဖြင့် ဝယ်ယူလိုက်နိုင်သော နောက်ပိုင်းတွင် ဒေါ်လေးရီ၏ လောင်းရိပ်အောက်မှ လွတ်မြောက်ခဲ့သော်လည်း သူ၏ မြင်ကွင်းစိမ်းထဲတွင်တော့ ကျွန်မမှာ အများနှင့်အတူ ရော​နှော စီးမျောဆဲ …။
"အခုမှ ဘုန်းကြီးရူးနဲ့ လှေလူး တွေ့နေကြတာလေ၊ ငါတို့ သားသမီးများတော့ ပညာကြိုးစား၊ ကိုယ့်တက်လမ်း ကိုယ်ရှာ၊ ပြီးတော့ အဆင့်မြင့်မြင့်နေ၊ ကိုယ့်ထမင်း ကိုယ်စားပြီး ကြီးတော်နွား ကျောင်းတဲ့ ဝါသနာမျိုး ပါလာလို့ကတော့ ရိုက်သတ်ပစ်မယ် မှတ်"
"ခုဆို သားအလတ် အင်ဂျင်နီယာက ဆောက်လုပ်ရေးမှာ အလုပ်ဝင်နေပြီလေ"
"သမီး ဆရာဝန်က ကချင်ပြည်နယ်ဘက် သွားရမှာမို့ မနေ့တုန်းက အ​နွေးထည်ချည်းပဲ ဗိုလ်ချုပ်အောင်ဆန်း ဈေးက ရှစ်ထည် ဝယ်ခဲ့ရတယ်၊ ဒါတောင် အများကြီး သယ်မသွားနိုင်လို့"
"အငယ်ဆုံးကောင်က ဒီနှစ် ကောလိပ်တက်ရမှာ ဆိုပြီး ဟမ်း(န်)ချိန်း ပူဆာလုို့ သွားဝယ်ပေးပါတယ်၊ မြို့ထဲ ရောက်တော့ နာရီကိုပါ နောက်ဆုံးပေါ်နဲ့ လဲပေးမှ ပြန်မယ်ဆိုလို့ ဝင်လဲပေးလိုက်ရ ပါရောလား"
"အံမယ်လေး … ပြော … မပြောချင်ဘူး၊ နေ့ခင်း နေ့လယ် ဈေးကွဲတုန်းများ တစ်ရေးတစ်မောလောက် မှေးရမလား မှတ်တယ်၊ ဝိုင်းကြီးဝိုင်းငယ် ဖွဲ့ပြီး ဟီလာတိုက်နေ လိုက်ကြတာ တန်း ပုလိပ်​ ရိုက်တာ ကျနေတာပဲ၊ ဆူညံနေတာပဲ၊ ဟင်း အပျိုမတွေမို့သာပဲ"
ဆိုသည့် ဒေါ်လေးရီ၏ ပီယဝါစာများကတော့ ပတ်ဝန်းကျင်တစ်ဝိုက် ပျံ့လွင့်ရိုက်ခတ်ပြီ …။
* * *
"လူကြည့်တော့ စိန်နားကပ်နဲ့၊ ဈေးဝယ်တော့ စီးစီးပိုးပိုး သူပိုင်းခိုင်းလို့လဲ ပိုင်းရသေးတယ်၊ အခု ရှင်ယူမလား၊ မယူဘူးလား ချက်ချင်းပြော"
"ယူမှာပေါ့၊ နှစ်ယောက်တည်း စားတာ ဆယ့်ငါးကျပ်သားဆို တော်ပြီ၊ ဒီလောက်ကြီးတော့ မယူနိုင်ဘူး"
"ဟင် … နှစ်ဆယ်သားတည်း ရှိတာ၊ ဒါကို ထပ်ပိုင်းတော့ အတုံးအတစ်ကလေးတွေ ဖြစ်ပြီး ဘယ်သူက ဝယ်တော့မှာလဲ …"
"ဒါတော့ မသိဘူး၊ နှစ်ဆယ်သားတောင် မကုန်နိုင်၊ မခမ်းနိုင်ကြီးတော့ မဝယ်နိုင်ဘူး"
"မကုန်ရင် နေ့ဖို့ ညစာ ထားပေါ့၊ ငါးကျပ်သားလေး ပိုရမှာများ၊ ကပ်စေးနှဲလိုက်တာ၊ နှမ်းစေ့လောက် စားမှာလား၊ နားဖာကလော်နဲ့ စားမှာလား"
"အဲဒါ ညည်းအပူ မပါဘူး၊ ပိုက်ဆံပေး ဝယ်တာ၊ ငါ ဝယ်ချင်သလောက် ဝယ်မယ်၊ အဲဒီ အတုံးကို ထပ်မပိုင်းနိုင်ရင် ဟော့ဟိုထဲက အသေးလေးတစ်တုံး ပိုင်းလိုက်"
"အံမယ် - အံမယ် … သဘောကျ … ကျသေးတော့၊ လက်ညှိုးလေး တထိုးထိုးနဲ့ ဟိုဟာပိုင်းလိုက် ဒီဟာပိုင်းလိုက်နဲ့၊ ပြီးရင် ကကျီကကြောင် လုပ်ဦးမယ်၊ ဟိုဟာတော့ မရဘူး၊ ဒါပဲရမယ်"
နံနက်ပိုင်း ဈေးစည်ချိန် ခြံစည်းရိုး သံဆန်ခါ တစ်ချပ်သာ ခြားသော ကျောကပ်လျက် ငါးတန်းမှ ဆူဆူညံညံ အသံကြောင့် လှမ်းအကြည့် -
"ဟာ"
မျက်နှာကို ကပျာကယာ ပြန်လွှဲလိုက်ရသည်။ မိတုတ်တို့ကတော့ လုပ်ပြီ။ မိတုတ် ဆိုတာက ဈေးထဲမှာ နာမည်တစ်လုံးနဲ့ နေတာ၊ ဗြန်းဗြန်းကွဲ မိတုတ်တဲ့။ မိတုတ် စကားသုံးခွန်း ပြောရင် တစ်ခွန်းက သူ့ကိုယ်တွင်းကိုယ်ပ ကြေညာစာတမ်း တစ်ခု ပါတတ်စမြဲ။ လူချင်း ယှဉ်ပြီဆို ထဘီကို အလျင် ဆွဲလှန်ပြီး ပါးစပ်ထဲ တွေ့သမျှ ဖရုဿဝါစာတွေ တန်းစီ ရွတ်တော့သည်။
သည်လို မိန်းမမျိုးတွေကြောင့် ဈေးသည်ကို လူအထင်သေးပြီး ဈေးသည်အစ … ဇာတ်သမအလယ်၊ …သည် အဆုံးဆုိုတဲ့ အသုံးအနှုန်းမျိုးတွေ ပေါ်ပေါက်လာတာ ဖြစ်မှာ။ အခုနောက်ပိုင်း ဈေးမိဈေးဖများက ဆုံးမထား၍ မိတုတ် နည်းနည်း ငြိမ်နေရာမှ ယခု တစ်စခန်း ထလာပြန်ပြီ။
"ဟင် - မိုက်ရိုင်းလိုက်တာ၊ မရောင်းနိုင်ရင် ကောင်းကောင်း ပြောပါလား"
"ကောင်းကောင်း ပြောလို့ မတန်တဲ့ ဟာမျိုးကို ဒီလိုပဲ ပြောရတယ်ဟေ့၊ ကဲ - ညည်းလို ကောင်မမျိုးကို မရောင်းဘူး၊ မရောင်းဘူး၊ ကဲ - မှတ်ပြီလား"
"မရောင်း နေပေါ့၊ ပိုက်ဆံပေး ဝယ်တာ၊ ဘယ်မှာ ဝယ်ဝယ်၊ ပါးရိုက်ဝယ်လို့ ရတယ်၊ နင့် တစ်ဆိုင်တည်း ရှိတာ မဟုတ်ဘူး"
"ဟုတ်လား၊ ဘယ်မှာရလဲ ပြောစမ်းပါ၊ ငါလိုက်ပြီး ရိုက်ဝယ်ချင်လို့၊ ငါတုို့ ဈေးမှာတော့ ဘယ်ဆိုင်မှ ဒါမျိုးမရဘူး၊ နင့်လို ကောင်မမျိုး နင်းပြီးတော့တောင် ဆွဲဖြဲပစ်လိုက်ဦးမယ်"
"စကားပြောတာ တရားမလွန်နဲ့နော်၊ ငြိမ်နေလို့ အကောင်းမမှတ်နဲ့"
"မခံလုို့ ညည်းက ဘာလုပ်ချင်တုန်း၊ ကဲ - လာခဲ့လေ"
မိတုတ်က ဆိုင်ပေါ်က ခုန်ဆင်းဟန် ပြင်တော့၊ ဘေးချင်း ကပ်လျက်က ကန်စွန်းရွက်သည် မိစိန်က လှမ်းဆွဲထားလိုက်ပြီး -
"ဟာ တော်ကြပါတော့၊ အစ်မတို့ ရန်ဖြစ်နေတာနဲ့ သူများတွေပါ အရောင်းအဝယ် ပျက်တယ်၊ ဟိုအစ်မကြီး ကလဲ မဝယ်နိုင်လဲ ပြန်ပါတော့၊ တောင်းပန်ပါတယ်၊ အစ်မတို့ ဖြစ်တာ ကျွန်မဗန်းရှေ့ လူတွေ အုံနေတော့ ကျွန်မလဲ မရောင်းရတော့ဘူး၊ စိတ်ညစ်ပါတယ်"
"မဝယ်နိုင်တာ မဟုတ်ဘူးဟေ့၊ မဝယ်ချင်တာ၊ ဈေးထဲ လာရတာလဲ ငါးစိမ်းသည် ကြောက်ရ၊ ကန်စွန်းရွက်သည် ကြောက်ရနဲ့၊ ကန်စွန်းရွက်ကလေး ဝယ်မလား မှတ်ပါတယ်၊ တော်ပြီ၊ ဒီနားက ပစ္စည်းတော့ မစားချင်တော့ပါဘူး၊ တကတည်းတော်၊ အသီးအရွက်တို့ သားငါးတို့ ရောင်းကြပေလို့ပဲ၊ စိန်ရွှေများ ရောင်းနိုင်ရင် ဘယ်လို နေကြမလဲ မသိဘူး"
ဝယ်သူ မိန်းမက မကျေမနပ်နှင့် စူပွစူပွ လုပ်ရင်း ထွက်သွားတော့၊ နောက်မှ ကန်စွန်းရွက်သည် မိစိန်က လှမ်းအော်သည်။
"အေးဟေ့ - ငါတို့က ကန်စွန်းရွက် ရောင်းပေမယ့် ကြက်သား စားနိုင်တယ်၊ နင်တို့လို စိန်နားကပ် ပန်ပြီး ကန်စွန်းရွက် စားတာ မဟုတ်ဘူးဟေ့"
ရှုပ်ကုန်ပြီ။ စကားတွေ တောင်ရောက် မြောက်ရောက်နှင့် ပြောချင်ရာတွေ စွတ်ပြောကုန်ကြသည်။ ထိုမိန်းမက ခပ်လှမ်းလှမ်း ရောက်မှ -
"အဲဒါကြောင့် စုတ်ပြတ်သတ် နေကြတာပေါ့"
ဟု ပြန်ပြောသွားတာ သူတို့ ကြားလိုက်ဟန် မတူ။ ပြီးတော့ ဆက်ပြောသွားလေသည် -
"ဈေးသည်ပီပီ အရှက်ကို မရှိကြဘူး" တဲ့။
သည်လို သိမ်းကြုံး အပြောခံလိုက် ရတော့။ ကျွန်မရင်ထဲ ကျဉ်သွားသည်။ သည်စကားလေး တစ်ခွန်းကို ခင်​နှောင်း တစ်ယောက်များ ကြားလိုက်ရရင် ငိုချလိုက်မည် ထင်သည်။
"အရှက်ကြီးတဲ့ ဈေးသည်မျိုး ရှင် မမြင်ဖူးသေးလို့ပါ"
ဟု ရင်ထဲက ပြန်ပြောရင်း၊ တစ်နေ့က ခင်​နှောင်း ဖြစ်ပုံကို ပြန်မြင်ယောင် လာသည်။
သူ့ညီမလေး မိခက် အပြင်ထွက်သွားလို့ ခင်​နှောင်း တစ်ယောက်တည်း ဆိုင်မှာ ရှိနေတဲ့အချိန် ကောင်လေး တစ်ယောက် ဈေးလာဝယ်သည်။
"ပုဇွန်ခြောက် ဘယ်ဈေးလဲ"
လို့ ကောင်လေးက မေးတော့ ခင်နှောင်းက -
"နှစ်ဆယ်ပါ"
လို့ ပြန်ဖြေတယ်။
ကောင်လေးက ပုဇွန်ခြောက်တစ်ကောင်ကို မြည်းကြည့်ရင်း …
"တစ်ပိဿာ ပေးပါ"
ဆိုတော့ ခင်​နှောင်းက တစ်ပိဿာ ကောက်ချိန်တာပေါ့။ ချိန်နေတုန်းမှာ ကောင်လေးက သူ့အိတ်ထဲက ဆယ်တန် နှစ်ရွက်ကို ထုတ်ပြီး ကိုင်ထားတယ်။ သည်ပိုက်ဆံဟာ သူ့ကိုပေးဖို့ ဆိုတာ သိလိုက်တော့ ခင်​နှောင်း အကြီးအကျယ် တုန်လှုပ်သွားတယ်။
သူပြောတဲ့ နှစ်ဆယ်ဆိုတာက တစ်ဆယ်သား ဈေးကို ပြောတာ။ ကောင်လေးက တစ်ပိဿာ ဈေးနဲ့ မှားပြီး ဝယ်နေပြီ ဆိုတာ သူသိလိုက်တယ်။ သည်မှာတင် သူမရဲ့ မပြတ်သားတဲ့ အပြောအဆို မှားယွင်းမှုအတွက် သူမ အားနာရှက်ရွံ့ နေပြီ။ တစ်ချိန်တည်းမှာပဲ ဝယ်သူကောင်လေး ရှက်သွားမှာကိုလဲ အားနာတဲ့အတွက် ပြန်ပြင်ပြီး ပြောမထွက်ဘဲ လက်ထဲက ပုဇွန်ခြောက်ထုပ်ကြီး ကိုပဲ ကြိုးနဲ့ အထပ်ထပ် ရစ်ပတ်နေပြီး ဘာဆက်လုပ်ရမှန်း မသိ ဖြစ်နေတုန်း သူ့ညီမလေး ပြန်ရောက်လာတယ်။
လိုတာထက် ပိုပြီး ကြိုးတွေ ရစ်ပတ်နေတဲ့ အစ်မ လက်ထဲက တစ်ပိဿာ ထုပ်ကြီးရယ်၊ ဝယ်သူ လှမ်းပေးနေတဲ့ ငွေနှစ်ဆယ်ရယ်ကို အကဲခတ်မိတော့ မိခက်က …
"အစ်ကို နားကြားလွဲပြီနဲ့ တူတယ်၊ တစ်ဆယ်သားကို နှစ်ဆယ်၊ တစ်ပိဿာကို နှစ်ရာပါ" ဆိုတော့ ကောင်လေးက …
"ဟာ ... ဒုက္ခပါပဲဗျာ၊ ကျွန်တော် ဈေးဝယ်ကျင့် မရှိလို့ပါ၊ တောင်းပန်ပါတယ်နော် အားလဲ နာပါတယ်၊ ဒါဆို အစိတ်သားလောက်ပဲ ယူပါရစေနော်၊ ပိုက်ဆံ မလောက်တော့လို့ပါ"
လို့ ပျာပျာသလဲ တောင်းပန်တော့ ...
"ရပါတယ်အစ်ကိုရယ်၊ ကြိုက်သလောက် ယူပါ၊ ကျွန်မ ပြန်ပြင် ထုပ်ပေးပါ့မယ်၊ မမ​နှောင်း ပေး ဒီကို"
ဆိုပြီး မိခက်က ပေါ့ပေါ့ပါးပါးလေးပဲ အိတ်ကိုသွန်ပြီး အစိတ်သား ပြန်ချိန်ပေးလိုက်တယ်။ အဲသည် အချိန်မှာ ခင်​နှောင်းက အားနာပြီး ဆိုင်ခုံထဲ ဝင်သွားတာ ပြန်ထွက်မလာတော့ဘူး။ လူရှင်းမှ မိခက်က အထဲကို ငုံ့ကြည့်တော့ မျက်ရည်တွေ ဝိုင်းပြီး တုန်တုန်ယင်ယင်နဲ့ …
"ရှက်လိုက်တာ ရှက်လိုက်တာ"
လို့ နှုတ်ခမ်း လှုပ်ရုံလေး အသံမထွက်ဘဲ ရေရွတ်နေတာ တွေ့ရတယ်။ အဲသည်တော့ ညီမလုပ်သူက …
"ရှက်ရမှာက မမ​နှောင်း မဟုတ်ဘူး သူ"
လို့ ဆိုတော့ …
"သူ ရှက်သွားရင်လဲ ငါ့အပြစ်ပဲပေါ့၊ သိပ်အားနာစရာ ကောင်းတာပဲ၊ သူနောက်နေ့ ဈေးလာဝယ်ရင် အဲဒီ မျက်နှာကို ငါကြည့်ရဲတော့မှာ မဟုတ်ဘူး၊ နင်ပဲ ရောင်းနော်"
ကဲ … ခင်​နှောင်းက အဲသည်လောက်ကို ရှက်တတ်၊ အားနာတတ်တာ၊ သူ့အမေကို သူပြောပြောနေတဲ့ စကားတစ်ခွန်း ရှိတယ်။
"အမေရယ်၊ မိ​နှောင်းလေ အလကား နေရင်း ရှက်နေတာပဲ၊ဘာမှန်းလဲ မသိဘူး၊ လူတိုင်းကို ရှက်တယ်၊ စကားလဲ မပြောရဲဘူး" တဲ့။
အဲဒါ သူ့အမေက ကျွန်မကို ပြန်ပြောပြတာ။
ပြီးတော့ …
"သမီး ညီမလေးက သိပ် အရှက်အကြောက် ကြီးလွန်းတော့ လူရာလဲ မဝင်ဘူးပေါ့ကွယ်၊ ဈေးရောင်းတာတောင် မိရိုးဖလာ လုပ်ငန်းမို့ အိမ်မှာလဲ (သူ)တို့ညီအစ်မ နှစ်ယောက်တည်းမို့ အဒေါ့်ကိုလဲ ရောဂါသည်မို့ မအေကိုညှာပြီး လာရောင်းကြတာ၊ သမီးတို့က ပျော်တတ်ပါးတတ်၊ ဗဟုသုတ ကလဲ စုံတော့ ခင်​နှောင်းကို လူမကြောက်အောင်၊ လူတောထဲ ဝင်အောင်၊ ပြောရဲဆိုရဲ ရှိအောင် သွန်သင် ကြစမ်းပါ၊ စီးပွါးရေး လုပ်နေတာ ဒီလောက်ရှက်တတ် ကြောက်တတ်နေလို့ ဘယ်ဖြစ်ပါ့မလဲကွယ်"
တဲ့။ အဲသည်လုို ကျွန်မကို ခင်​နှောင်းအမေက လိုလိုချင်ချင် တိုင်ပင် အပ်နှံတော့ ကျွန်မကလဲ ခင်​နှောင်းကို ရင်းနှီးအောင်ပေါင်းပြီး တတ်သမျှ မှတ်သမျှလေးတွေနဲ့ သွန်သင်ရတာပေါ့။ ဒါကို ဒေါ်လေးရီက ဘာပြောတယ် မှတ်သလဲ …
"နောက်မှပေါ်တဲ့ ရွှေကြာပင်ကလဲ လူကြီးရောဂါ ထနေပြန်ပြီ၊ ဒါလဲ အရူးတစ်မျိုးပဲ"
တဲ့။ ဟုတ်ပါတယ် ကျွန်မ ရူးနေတယ်ပဲ ထားပါ။ အရူး စိတ်ချမ်းသာတော့ ကမ္ဘာလောကကြီး ငြိမ်းချမ်းတာပေ့ါ။
* * *
အသားဖြူဖြူ၊ နှာတံပေါ်ပေါ်၊ မျက်လုံးပြူးပြူး၊ ဆံရှည်ဖားလျား၊ နားဆွဲလှလှနှင့် ဆိုင်ရှေ့မှာ ရပ်ပြီး ဈေးဝယ်နေတဲ့ ခေတ်ရှေ့ ပြေးနေတဲ့ ကောင်မလေး တစ်ယောက်နဲ့ မျက်နှာချင်းဆိုင်၊ ထိုင်ခုံပေါ်က ညိုသော်လည်း ဝါဝင်းနေသော အသားအရေ၊ မျက်ခုံး ထူထူစိမ်းစိမ်း၊ မျက်ဝန်းတောက်တောက်၊ နှာတံစင်းစင်းနှင့် ဆံပင် နောက်တွဲလေး ထုံးထားသော ခင်​နှောင်းတို့ နှစ်ယောက်ကို ဘေးတိုက် မြင်နေရတဲ့ မြင်ကွင်းက လက်ရာမြောက်သည့် ပန်းချီကား တစ်ချပ်ကို ကြည့်နေရသည့်နှယ်။ သည်လိုတော့လဲ ခင်​နှောင်း မျက်နှာလေးက ပြုံးလို့၊ တည်ငြိမ် ရင့်ကျက်တဲ့ မြန်မာမိန်းကလေး နှစ်(တစ်?)ယောက်ရဲ့ကျက်သရေအပြည့် …
ဒါပေမယ့် တကယ်လို့များ သူ့ကို တစ်ယောက်က စေ့စေ့စပ်စပ် ကြည့်နေမှန်း သိရင် ရှက်နေဦးမှာ အသေအချာ။
ခဏကြာတော့ ဆွဲခြင်းတစ်ဖက်၊ ကြွပ်ကြွပ်အိတ်တစ်ဖက် ပိုက်ဆံအိတ်ကလေး ချိုင်းကြားညှပ်ပြီး ဒေါက်မြင့်ဖိနပ်နဲ့ မော်ဒန်ကောင်မလေး မနိုင်မနင်းနဲ့ ပေါက်ဆတ် ပေါက်ဆတ် ထွက်လာတာကို ခင်​နှောင်းငေးပြီး ကျန်ရစ်ခဲ့တယ်။ သူနဲ့ မျက်စောင်းထိုးလောက်က သရက်သီးမှည့်ဆိုင် ရှေ့ရောက်တော့ ကောင်မလေး ချိုင်းကြားက ပိုက်ဆံအိတ် လျှောပြီး ကျရစ်ခဲ့တာကို အော်မပြောရဲတာနဲ့ သူတစ်ယောက်တည်း ဟိုကြည့်သည်ကြည့် ဖြစ်နေတုန်း သရက်သီးမှည့်ဆိုင်က ဆယ်နှစ်သားလောက်ပဲ ရှိဦးမယ့် ဖိုးချိုက ဆတ်ခနဲဆို ပြေးကောက်ပြီး သူ့အမေ မချောမြကို လှမ်းပေးတော့ မအေလုပ်သူက ဖျတ်ခနဲ သရက်သီး ဗန်းအောက်ထဲ ထိုးထည့်ထားလိုက်ပါရော။
အဲဒါကို အစအဆုံး မြင်လိုက်ရတဲ့ ခင်​နှောင်းတင် မဟုတ်၊ ကျွန်မပါ ဘာလုပ်လို့ ဘာကိုင်ရမှန်း မသိဘဲ တွေဝေနေတုန်း -
"ဟေ့ … မိန်းကလေး၊ မင်း ပိုက်ဆံအိတ် ကျန်တာ သိရဲ့လား"
ဆိုင်ရှေ့က ဦးလေးထွန်းက လှမ်းပြောလိုက်လို့ ကောင်မလေး ထိတ်ထိတ်ပျာပျာ ဟိုရှာသည်ရှာ လုပ်မှ သည်အဖြစ်အပျက်ကို ခင်​နှောင်းနဲ့ ကျွန်မအပြင် ဦးလေးထွန်းပါ မြင်လိုက်ပါလားလုို့ သိလိုက်လို့ နည်းနည်း စိတ်သက်သာရာ ရသွားတယ်။
"ဟေ့ … ဖိုးချို၊ လာဦးကွ"
ဦးလေးထွန်းက သရက်သီးမှည့်ဆိုင်က ကောင်လေးကို လှမ်းခေါ်တော့ ရွံ့တွန့်တွန့်နဲ့ ရောက်လာတယ်။ ဦးလေးထွန်း ဆိုင်ရှေ့က ပစ္စည်းရှင် ကောင်မလေးကို လှမ်းမြင်တော့ သားအမိ နှစ်ယောက်လုံး မျက်နှာ ပျက်နေကြပြီ။
"ဖိုးချို၊ စောစောက မင်းတို့ သိမ်းပေးထားတဲ့ ပိုက်ဆံအိတ်က ဒီမမရဲ့ အိတ်ကွ၊ မင်းအမေ ချောမြကို ပြောလိုက် ဒီမမရဲ့ ပိုက်ဆံအိတ် ဖြစ်ကြောင်း၊ ဘဘကြီး အာမခံတယ်လို့၊ သူကျခဲ့တာလဲ အစအဆုံး မြင်လိုက်တယ်လို့ ဟုတ်လား၊ ကဲ … လိုက်သွား ကလေးမ၊ ကိုယ့်ပစ္စည်းကိုယ် ဂရုစိုက်မှပေါ့ကွယ်၊ သူတို့သားအမိ ထိန်းထားပေးလို့သာပေ့ါ"
ကဲ … ဦလေးထွန်း ကိုင်တွယ် ဖြေရှင်းပေးလိုက်ပုံက ဘယ်လောက် ပညာသား ပါလိုက်သလဲ။ ကောင်မလေးက ကျေးဇူးတင်ပြီး ကလေးကို မုန့်ဖိုးပေးတော့ ချောမြက အတင်း ငြင်းနေတာနဲ့ ကလေးအိတ်ထဲ အတင်းထိုးထည့် ပေးခဲ့ရတာ မြင်တော့ ကျွန်မ ရယ်ချင်လိုက်တာ။
အကြောင်းသိ ဓာတ်သိတွေက ပြောကြတော့ ချောမြမှာ မွေးကတည်းက စောရနက္ခတ် ပါလာတယ်တဲ့။ ကျွမ်းကျင်ရာ လိမ္မာပဲ၊ သံပုရာသီး တစ်လုံးလောက်ကို လူမမြင်အောင် လက်ဖမိုးအောက်မှာ ကွယ်ပြီး ယူသွား တတ်တာတို့၊ ခပ်ပွပွ ဝတ်ထားတဲ့ ထဘီ အထက်ဆင် ကြားထဲ အချိုမှုန့်ထုပ်ကို အသာလေး ထိုးသွင်းပြီး လိမ်ထားလိုက်တာ မျိုးတို့၊ နေ့ခင်းနေ့လယ် ခေါင်းခုစုတ်ကလေး ချိုင်းကြားညှပ်ပြီး လျှောက်လည်နေရာက တွေ့တဲ့ပစ္စည်း တိုလီမုတ်စ ကလေးတွေက စပြီး အဖိုးတန်ပစ္စည်းအထိ မှင်သေသေနဲ့ ကောက်ပြီး ခေါင်းခုစုတ်နဲ့ ရစ်ပတ်ပြီး ယူလာတာမျိုးတို့ကို သေသေချာချာ လိုက်ကြည့်မှ မြင်ရတတ်တာ။
တော်ရုံတန်ရုံပဲ လူတွေက ကိုယ်နဲ့ မဆိုင်တော့ အချင်းချင်း လက်တ်ို့တာကလွဲလို့ အမုန်းခံပြီးတော့ ဘယ်သူမှ ထိပ်တိုက် မပြောကြဘူး။ ဒါပေမယ့် လင်စာသားစာအတွက် မဖွယ်မရာရှာပြီး တစ်ယောက်တည်း ခါးစည်းခံသွားရှာမယ့် သူ့ကိုတော့ အားလုံးက သနားနေကြတာ အမှန်။ ခုကိစ္စမှာလဲ ဦးလေးထွန်းကို သူကြိတ်ပြီး ကျိန်ဆဲနေဦးမှာ သေချာတယ်။
* * *
ငယ်ငယ်တုန်းက ငါ့ဆရာဘုန်းကြီးက ဆုံးမဖူးတယ်၊ အခါအခွင့်ကြုံလို့ လူတစ်ဖက်သားကို ကိုယ်က ကူညီလိုက်ရတဲ့ အခါမျိုးမှာ ပြီးတာနဲ့ အဲဒီကိစ္စကို ချက်ချင်း မေ့ပစ်လိုက်တဲ့။ အဲ … သူများက ကိုယ့်ကို နှုတ်၏ စောင်မခြင်းနဲ့ တစ်ကြိမ်တစ်ခါ ကျေးဇူးပြုခဲ့ဖူးရင် အဲဒီ ကျေးဇူးကို တစ်သက်လုံး တသသ သတိရနေပြီး အခွင့်သာတာနဲ့ ကျေးဇူးပြန်ဆပ်ဖို့ မမေ့ပါနဲ့တဲ့။
အဲဒါ ဦးလေးထွန်း နှုတ်က အမြဲရွတ်နေကျ ဖြစ်တဲ့ သူ့ရဲ့ အရိုးစွဲနေတဲ့ ယုံကြည်ချက်ဘဲ။ ဦးလေးထွန်းလို လူမျိုးနဲ့ အနီးကပ် နေရတော့မှ လောကမှာ အမှန်ကန်ဆုံး လူသားကို ရှာဖွေတွေ့ရှိခဲ့ရသည်။ လောကမှာ တရားမျှတပြီး သစ္စာရှိသော ရိုးသား၍ သိက္ခာရှိသည် ဆိုသော လူကြီးလူကောင်းတွေကို ဘယ်ပေတံနှင့် စံထားပြီး တိုင်းတာကြသည်မှန်း ကျွန်မ မခန့်မှန်းတတ်သော်လည်း ဦးလေးထွန်းကို ကျတော့ ကျွန်မ တိုင်းတာနားလည် နိုင်ခဲ့သည်။
အဲသည် စံပေတံကတော့ အလွန်ရိုးစင်းလှသော ဗုဒ္ဓဘာသာ တစ်ယောက်၏ သက်ဝင်ယုံကြည်မှုပါပဲ။
ဦးလေးထွန်း ဆိုတဲ့ ဗုဒ္ဓဘာသာဝင် တစ်ယောက်က ငရဲ သိပ်ကြောက်တယ်၊ ပြီးတော့ ကိုယ်ချင်းစာစိတ် ရှိတယ်။ ငရဲကြောက်တဲ့ လူဟာ နည်းနည်းမှ အမှားမခံဘူး။ ကိုယ့်ကိုယ်ကိုလည်း မလှည့်စားဘူး၊ အမြဲတမ်း လိပ်ပြာ သန့်နေရမယ်လို့ ဦးလေးထွန်းက ဆိုတယ်။ ငရဲကြောက်တဲ့ လူဟာ မရိုးသားတာ ဘာမှ မလုပ်ရဲဘူး ဆိုတာ ဦးလေးထွန်းက သက်သေခံနေတယ်။
ငရဲဆိုတာ ကျွန်မ ငယ်စဉ်ကတည်းက နားယဉ်နေတဲ့ စကားတစ်လုံး ဖြစ်ခဲ့ပေမယ့် ခုချိန်ထိ အရာရာမှာ ရှေ့တန်းတင်ပြီး လေးနက်နေတဲ့ ဦးလေးထွန်းရဲ့ ရိုးသားမှုမျိုးကိုတော့ ကျွန်မ မတွေ့မိခဲ့ဖူးသေးတာ အမှန်။ ဒါဟာ မြန်မာတစ်ယောက် အနေနဲ့ အတုယူစရာပါပဲ။
အဲသည် ဦးလေးထွန်းနဲ့ ပတ်သက်ပြီး တစ်ခါတလေ စိတ်ညစ်ရတတ်တာတော့ ရှိတယ်။ အဲဒါ အရောင်းအဝယ် ကိစ္စပါ။ ဦးလေးထွန်းဆိုင်က ကုန်ခြောက်ဆိုင်။ ကုန်ပစ္စည်း အရောင်းအဝယ် ဆိုတာ ဈေး အနိမ့်အမြင့် အတက်အကျ ရှိစမြဲပဲ။ သည်အပေါ်မှာ တည်မှီပြီး အရှုံးအမြတ်ဆိုတာ ဖြစ်လာကြတာ မဟုတ်လား။ ဈေးသည်ရဲ့ ဘဝရပ်တည်မှုဟာလည်း အဲသည် အပေါ်မှာပဲ တည်နေတာကလား။ သည်နေရာမှာ ဦးလေးထွန်းက တရားသဖြင့် အမြတ်အစွန်းကိုပဲ ယူမှာဆိုပြီး သတ်မှတ်ထားတဲ့ ရာနှုန်းထက်ပိုပြီး ဘယ်တော့မှ ဈေးမမြင့်ဘူး။
အဲဒါတော့ ထားပါတော့။ တစ်ခါတလေ ကုန်စည်စီးဆင်းမှု ရပ်တန့်နေ၍ ပစ္စည်းတွေ ဈေးတက်ပြီလားဆို လက်ကျန်ကုန်တွေကို အဲသည်ဈေးနဲ့အညီ အားလုံးညှိပြီး လိုက်မြှင့်ကြရတယ်။ အဲသည်အချိန်မှာ လက်ကျန်ပစ္စည်းတွေဟာ ကိုယ့်အတွက် အမြတ်များသွားတာပေါ့။ အဲသည်လို အချိန်ကျရင် ဦးလေးထွန်းက အညှိမခံဘူး။
"အဲဒါ အလျင်ဈေးနဲ့ ဝယ်ထားတာပဲ၊ တကယ်မှ ဈေးကြီး မမိဘဲကွ၊ မမြှင့်နိုင်ပါဘူး။ နောက် ဝယ်တာတော့ နောက်ဈေးပေ့ါ"
ဆိုပြီး နဂိုအတိုင်းပဲ ဆက်ရောင်းတော့၊ ကျန်တဲ့လူတွေ ကသိကအောက် ဖြစ်ကြရတာပေါ့။ "ဘုရားဖြစ်မယ့် အုတ်နီခဲကြီး" လို့ ထောပနာ ပြုကြရုံကလွဲလို့ ဘာများ တတ်နိုင်ဦးမှာလဲ။
အဲဒါမျိုးကျတော့း ဦးလေးထွန်းရဲ့ လေးနက်တဲ့ ရိုးသားမှုဟာ ကောင်းလဲ ကောင်းပြီး၊ မကောင်းလဲ မကောင်းဘူးပေါ့။
* * *
"တတိယ ကမ္ဘာစစ်ဟာ မင်းနဲ့ ငါက စ, ဖြစ်လိမ့်မယ် ထင်တယ်"
အဲသည်လို မတန်တရာ စကားတွေနဲ့ အစချီပြီး ရန်ဖြစ်တတ်ကြတဲ့ လင်မယား နှစ်ယောက်ကလဲ ဈေးထဲမှာ တစ်နေ့တစ်မျိုး မရိုးရအောင် တစ်ခန်းရပ် ပြဇာတ်တွေ တင်ဆက်နေတဲ့အတိုင်း -
"ရှင့်ကိုလဲ ကျွန်မက ဖြစ်ချင်လွန်းလို့ အကြောင်းရှာနေတယ်များ မှတ်သလား၊ မလွှဲသာလွန်းလို့ ပြောရတာ။ တော်တော် အကြင်နာ ကင်းမဲ့တဲ့ ယောက်ျား၊ ရုံးကအပြန် ဈေးတန်းဆင်းပြီး ကုန်လေး ကြိုခဲ့ပေးပါ ဆိုတာ ဒီအတိုင်း ပြန်လာတယ်၊ ဘာလဲ ကျုပ်ကို တွက်ကတ်တာလား"
"မဟုတ်ပါဘူးကွာ၊ ဒီအချိန် ကားကျပ်တယ်၊ ခရမ်းချဉ်သီး သေတ္တာတွေ တင်လို့မရဘူး"
"ဘာကျပ်ရမှာလဲ၊ နည်းနည်းလေး စောပြီး ထွက်လိုက်ရင် ကားတွေမှ ချောင်လွန်းလို့ ဆင်နှစ်ကောင် ဖင်ထောင်အောင် ကလို့ရတယ်"
"မင်းမှားနေပြီ ရွှေမိရဲ့၊ အိမ်မြှောင်နှစ်ကောင် ဖြစ်ပါလိမ့်မယ်"
"ကိုစံအေး"
စိတ်ဆိုးမာန်ဆိုး အော်လိုက်တဲ့ သူ့မိန်းမ ရွှေမိရဲ့ အသံဟာ ဈေးတန်းထဲ ဟိန်းထွက်လာတယ်။ ကိုယ့်အတွေးနဲ့ကိုယ် ရှိနေကြတဲ့ လူတွေရဲ့ အာရုံဟာ သူတို့လင်မယားဆီ မတိုင်ပင်ဘဲ ပြိုင်တူလာမိကြတယ်။
"ဟေ လကွာ"
"ရှင် ဘာ အူကြောင်ကြောင် လုပ်နေတာလဲ၊ ရုပ်ကိုက အရှက်မရှိတဲ့ရုပ်၊ မိန်းမထဘီနား ခိုစားချင်တဲ့ရုပ်"
"ဘာကွ၊ မင်းနော် … ငါ အေးအေးနေလို့ စော်ကား မလာနဲ့၊ မိန်းမထဘီနား ခိုစားရအောင် ငါက သောက်လုပ် မရှိတဲ့ ကောင်မို့လား"
"ဟင် … ရှင့်လုပ်စာ တစ်ပဲခြောက်ပြားကိုများ စကားထဲ ထည့်ပြောတာ အံ့ပါရဲ့။ ရှင့်ဘက်က အစွယ်အပွားတွေ တသွတ်သွတ် လာစားနေကြတာလဲ ပြောပါဦး"
"မင်းက တစ်ဆိတ်ရှိ ဒါပဲ၊ အစကတည်းက ငါ့မှာ မောင်နှမများမှန်း မင်းမသိလို့လား၊ ဒါတောင် တစ်ယောက်မှ မင်းအိမ်ပေါ် ခေါ်တင် မထားသေးဘူး၊ တင်များ ကျွေးထားရရင် မင်းခက်မယ်"
"ခုတော့ ဘာထူးလို့လည်း၊ တစ်ခါတစ်ခါ လာရင် အဖေ့ဆေးဖိုး၊ အမေ့မျက်မှန် အတွက်နဲ့ ရှင် ကျိတ်ကျိတ် ပေးနေတာ မသိဘူးများ မှတ်နေလား"
"မင်းလခထဲက ဘယ်နှစ်ပြား လျော့လို့လဲ"
"လာပြန်ပြီ ဒီလခ၊ ဒီလခပဲ ရှင့် စကားထဲ ထည့်ပြောနေတာပဲ၊ ဘယ်လျော့မလဲ၊ ကျုပ်ဆိုင်ခွက်ထဲက ခိုးပေးနေတာကိုး …"
စကားအဆုံးမှာ အသားကုန် အော်လိုက်တော့ ကိုစံအေး မလုံမလဲနှင့် ပတ်ဝန်းကျင်ကို ဝေ့ကြည့်ပြီး …
"ဟာ … ဒီမိန်းမ"
"ဘာ ဒီမိန်းမလဲ၊ မိန်းမက ဈေးထဲမှာ နေကုန်နေခန်း နေပူမရှောင် မိုးရွာမရှောင် လုပ်ကိုင်ရတာ လူရုပ်တောင် မပေါက်တော့ဘူး။ ဈေးလေး ကြိုပါဆိုတာ ကားကျပ်သလေး ဘာလေးနဲ့ ရှိုးပျက်မှာ ကြောက် ကြောက်တယ်ပေါ့။ တော့်ကလေး တစ်ပြုံတစ်မကြီးနဲ့ ကုန်းရုန်း ရှာနေတဲ့ ဒီကောင်မကိုလဲ သနားပါဦးတော့"
"သနားလို့ပဲ တစ်ဖက်တစ်လမ်းက အပိုဝင်ငွေ ထပ်ရှာရအောင် ပွဲစားလေး ဘာလေး လိုက်လုပ်တော့လဲ မင်းပဲ ဟိုလူနဲ့ သဝန်တိုလိုက်၊ ဒီလူနဲ့ ပေးစားလိုက်နဲ့"
"ဟုတ်တယ်၊ သဝန်တိုရအောင် ရှင်က ချောသကိုး၊ တော်တော် ချောရှာတယ်၊ ခြင် ချော်လဲ၊ ကြမ်းပိုး ပက်လက်လန်"
"နို့ … မဟုတ်လို့လား၊ မင်းပဲ ရှင့်မျက်လုံးက ဘယ်သူ့ဆီမှာ၊ ဘယ်သူကဖြင့် ပြည်တီတီနဲ့ ရှင့်ကို ဆိုပြီး မဟုတ်က ဟုတ်ကတွေ လျှောက်ပြောနေတာကော"
ဒီနေရာရောက်တော့ ဆိုင်နီးချင်းတွေ အကဲခတ်နေမှန်း သိလို့ မရွှေမိ ရှက်သွားပုံရသည်။
"တော် … တော်၊ ရှင့်ပါးစပ်ပိတ်"
"အရပ်ထဲလဲ အရပ်ထဲမို့၊ ဈေးထဲလဲ ဈေးထဲမို့"
"တော်တော့ဆို"
"ကိုယ့်ဆိုင်မှာ ဈေးလာဝယ်တဲ့ သူနဲ့လဲ"
"ဟင် … ပြောလေ ကဲလေပါလား၊ ကဲဟာ … ကဲဟာ"
"ဟေ့ … ခရမ်းချဉ်သီး ပုပ်ကြီးနဲ့ဟာ၊ အင်္ကျီတွေ ပစ်ရကုန်ပြီ၊ မလုပ်ပါနဲ့ဟ၊ ဟေ့ … ရွှေမိ"
အဲဒါမျိုးက တစ်နေ့မဟုတ်၊ တစ်ကြိမ်မဟုတ်၊ တစ်နေ့ကို ခေါင်းစဉ်တစ်မျိုးနဲ့ ဆိုတော့ သူတို့မိသားစုရဲ့ စရိုက်တွေက ဘယ်သူမှ လိုက်မစစ်ရဘဲနဲ့ ဟိုးလေး တကျော်ကျော်။
* * *
သီတင်းကျွတ် လဆန်းကတည်းက ကထိန် အလုပ်အမှုဆောင် အဖွဲ့မှ လူကြီးတွေ ဆိုင်မကပ်နိုင်ကြတော့။ တန်ဆောင်းမုန်းလ ထဲတွင် ကျင်းပမည့် စုပေါင်း မဟာဘုံကထိန် အတွက် အားကုန် သွန်နေကြရပြီး သည်လူကြီးတွေ ကြားထဲ ကျွန်မပါ ကန့်လန့်ကန့်လန့်နှင့် ဖိတ်စာဝိုင်းရေး၊ သွားရိုက်၊ ကထိန်အတွက် သင်္ကန်းလိုက်ကြ၊ အလှူခံ အဖွဲ့တွေ ဖွဲ့ကြ၊ ပဒေသာပင် ခေါင်းဆောင်တွေ ကြိုတင် ပြင်ဆင်ကြ၊ မဏ္ဍပ်အသံချဲ့စက်၊ အကျွေးအမွေးအတွက် ပြေးကြလွှားကြ၊ ဝယ်ကြခြမ်းကြ၊ ငြင်းကြခုံကြ၊ အော်ကြဟစ်ကြ။
"အများနဲ့ လုပ်တဲ့အခါ အနည်းအပါးတော့ ချွတ်ယွင်းမှုတွေ၊ လွဲမှားမှုတွေ ရှိကောင်း ရှိလာနိုင်တယ်။ အဲဒီအခါ အချင်းချင်း သည်းခံပြီး တတ်နိုင်သမျှ ခွင့်လွှတ်ကြပါ။ ကျွန်တော်တို့အတွက် အရေးအကြီးဆုံးက အများပိုင် ငွေကြေးကို အလွဲသုံးစား မလုပ်မိဖို့ရယ်၊ လူမှုရေး ဖောက်ပြန်မှုတွေကို ရှောင်ကြဉ်ကြဖို့ရယ်ဆိုတဲ့ အဓိက နှစ်ချက်ကို လိုက်နာနိုင်ရင် ဘယ်တော့မှ မျက်နှာပျက်စရာ အမှားမျိုး မလာနိုင်ဘူး။ အဲ … စောစောက ပြောတဲ့ အမှားတွေကို ကျူးလွန်လို့ကတော့ ဘယ်လိုလူမျိုး ဖြစ်ဖြစ် ခွင့်မလွှတ်နိုင်ဘူး။ ဘာသာရေးကို လိပ်ပြာသန့်သန့်နဲ့ လုပ်ကြစေချင်တယ်"
ဆိုတဲ့ ကထိန်ခေါင်းဆောင်တွေရဲ့ အဆုံးအမအောက်မှာ အားလုံးဟာ ရဲရင့်ဖျတ်လတ် နေကြတယ်။
ပတ်မနဲ့ ဗျောသံ
မိုးထံသို့ ဖောက်
ဝတ်စုံညီ ဆင်တူနဲ့
ပဒေသာပင် စည်ဝေပွားတယ်
လုပ်အားအမောက် …။
ဈေးရုံ ပတ်ပတ်လည်မှာ အရောင်စုံ၊ အသွေးစုံ၊ အဆင်စုံနဲ့ ပဒေသာ အဖွဲ့တွေ ဟိုတစ်စု သည်တစ်စု။
မိတုတ်တို့ မိစိန်တို့ အပြင်တန်းအုပ်စု ပဒေသာပင် အဖွဲ့က ခရမ်းရောင် မှန်ဇာနဲ့ ချိတ်ထဘီ၊ ခရမ်းဝမ်းဆက်နှင့် သူတို့ ပဒေသာပင် အနားမှာ တပြုံးပြုံး။
ကုမ္မာရီ အလှလေးတွေကလည်း လိပ်ပြာတောင်ပံ ခတ်သလို တဖျတ်ဖျတ် တလတ်လတ်။
ကွမ်းတောင်ကိုင် အုပ်စုထဲမှာ ရှင်​(ခင်?)နှောင်းလေးတောင် ပါနေပါရောလား၊ မျက်လွှာလေး ချလို့ ရှက်နေပြန်ပြီ ထင်ပါရဲ့။
ချောမြနဲ့ ရွှေမိက ကွမ်းတောင် ပန်းတောင်ကိုင် မိန်းကလေးတွေကို မမောမပန်း၊ မအိုက် မလှောင်ရအောင် ယပ်တောင်ကလေးတွေ တဖျတ်ဖျတ်ခတ်ပြီး ဘေးကနေ လိုလေသေး မရှိအောင် စောင့်ရှောက်ပြုစု နေကြလေရဲ့။ သူတို့မျက်နှာလည်း ကာလာရောင်စုံ ပြေးလို့၊ အမယ် … ကိုယ်ပေါ်မှာလည်း ဘူးပါတိတ် ဝမ်းဆက်တွေ ဆင်တူနဲ့ပါလား။ ဟိုနား သည်နား မလှမ်မကမ်းမှာ ဒိုးဝိုင်းတွေကလည်း တစ်ဝိုင်းနှင့်တစ်ဝိုင်း အပြိုင်အဆိုင် တီးမှုတ် ကခုန်လျက်။
"ရှာပုံတော်" သီချင်းနဲ့ ကနေတဲ့ ဆင်ကြီး ဘေးမှာလည်း ဖိုးချိုတို့အရွယ် ကလေးတွေ ကြိတ်ကြိတ်တိုးလို့။
အပျိုတွေကလည်း သူ့ထက်ငါ အလှချင်းပြိုင်၊ အစ်ကို ကာလသားတွေကလည်း ပျားပိတုန်းတွေလို တရစ်ဝဲဝဲ။
ကိုတင်ဝင်း၊ ကိုမျိုးသိမ်း၊ ကိုစံအေး ခေါင်းဆောင်တဲ့ ပဒေသာပင် ကြီးကြပ်ရေး အဖွဲ့ကလဲ တာဝန်ကျေကျေ။
ဘယ်သူ့ကိုမှ အကောင်း မမြင်စတမ်း၊ မျက်မှန်စိမ်း ပိုင်ရှင် ဒေါ်လေးရီက သည်တစ်ခါတော့ ပဝါ စွယ်စုံချလို့။ ငွေဖလားကြီး တပိုက်ပိုက်နဲ့၊ ရွှေမိုး ငွေမိုးရွာဖို့ ဟန်တပြင်ပြင်။
ဦးဘိုဘို၊ ဦးအေးထွန်း၊ အဘ ဦးတင်ညွှန့်၊ ဦးမြတ်ကျော်၊ ဦးတင်အောင် စတဲ့ လူကြီးပိုင်းတွေက ကထိန်ညှပ်သင်္ကန်းကြီး တင်ထားတဲ့ ကားပေါ်မှာ ခေါင်းပေါင်းစ တလူလူနဲ့။
အတွင်းရေးမှူးကတော့ လွယ်အိတ်တစ်လုံးနဲ့ လူးလားခေါက်လို့။
ရှေ့ဆုံးက ပွိုင့်ကားပေါ်မှာ တာဝန်ကျသူက ကျွန်မ။
ရှိရှိသမျှ ဈေးသူ ဈေးသားတွေရဲ့ ချွေးနှဲစာနဲ့ သိန်းချီပြီးလှူရတဲ့ သည်ကထိန် အလှူမင်္ဂလာပွဲဟာ သည်ဈေးရဲ့ ဘာသာရေး အသက်သွေးကြောပါပဲ။
သည်အချိန် ရောက်ရင် အားလုံးဟာ ပျော်ရွှင်ချမ်းမြေ့ပြီး ရှိခဲ့ဖူးတဲ့ အာဃာတတွေ၊ အမုန်းတရားတွေ၊ အငြိုးအတေးတွေလည်း ကျေပြီး၊ သည်အလှူပွဲ အထမြောက်အောင် နွှဲကြဖို့သာ၊ ဝီရိယထားပြီး အားသွန်ကြတာ ကျွန်မတို့ ဈေးရဲ့ ချစ်စရာ အကောင်းဆုံး လှုပ်ရှားမှုပါပဲ။
* * *
ဈေးကနေ ကျောင်းအရောက် လမ်းတစ်လျှောက် လှည့်လည်ပြီး၊ ပဒေသာပင်တွေ ကျောင်းဝင်းထဲ နေသားတကျ ထားပြီးတော့မှ ဈေးသူ ဈေးသားတွေလည်း မောပြီး ပြန်ကုန်ကြပြီ။ မနက်ဖြန် ဧည့်ခံကျွေးမွေးမယ့် အလှူရက်မှာ ထပ်နွှဲကြဦးမှာမို့ အိမ်ပြန် အနားယူပြီလေ။
အနားမယူနိုင်ဘဲ ဘုန်းကြီးကျောင်းမှာပင် နောက်တစ်နေ့ ကူးကြရမှာက ကျွန်မတို့အုပ်စု။
"ဆာလိုက်တာ ဟယ်၊ ထမင်းလေး ဘာလေး လုပ်ကြစမ်းပါဦး၊ ခုထိ မနက်စာ မစားရသေးဘူး"
တစ်ယောက်က စ, လိုက်သည်။ တစ်နေကုန် ပီတိနှင့် ဝ, နေသော ကျွန်မတို့ အဖွဲ့က ယခုမှ ဆာလောင် လာကြသည်။ မနက်ဖြန်မှာ အလှူဆိုတော့၊ ယခုညစာ ဟင်းမရှိ။ တိုက်အုပ် ကိုယ်တော်က ဘုန်းကြီးကျောင်းသားလေးနှင့် ဟင်းတစ်အိုး လာပို့သည်။ "ဟင်းလေး" ဟု ဆိုသည်။ ထမင်းတစ်အိုး အမြန်ချက်ပြီး၊ ဟင်းလေးအိုးကို မီးဖိုပေါ် တင်နွှေးပြီး မွှေလိုက်စဉ် ထွက်ပေါ်လာသော ဟင်းနံ့က ပါးစောင်များပင် ကျဉ်သွားပြီး၊ သွားရည် ကျချင်လာသည်။ သို့နှင့် မနေနိုင်တော့ဘဲ ဟင်းရည်နည်းနည်း ခပ်မြည်းကြည့်လိုက်မိသည်။
"အား … ကောင်းလိုက်တာ"
ပါးစပ်က လွှတ်ခနဲ ထွက်သွားသည်။ အရသာရှိလိုက်သည့် ဖြစ်ခြင်း။ ထမင်းပင် ပိုဆာလာတော့သည်။
"ဟင်းလေးဆိုတာ သပိတ်ထဲ ပါလာသမျှ ဟင်းခွက်တွေ အားလုံးကို ရောစပ်ပြီး ကျိုထားတာပေါ့၊ ဟင်းပေါင်းလို့လည်း ခေါ်တယ်။ ဝက်သားရော၊ ကြက်သားရော၊ ငါးရော၊ ပဲပင်ပေါက်ရော၊ ကန်စွန်းရွက်ရော၊ ပဲပြုတ်ရော၊ အစုံအစုံ ဘယ်ဟင်းကိုဖြင့် ထည့်မပေါင်းရဘူး ဆိုတာ မရှိဘူး။ အားလုံးပေါင်းပြီး မွှေပစ်လိုက်တာပဲ။ ဒီတော့ အရသာတွေ မျှပြီး ကောင်းသွားတာပေါ့"
တိုက်အုပ်ဘုန်းကြီး ပြောပြသည်ကို နားထောင်ရင်း ဟင်းအိုး မွှေလိုက်တိုင်း လည်လည်ပြီး တက်လာသည့် မျှစ်ဖတ်ကလေးတွေ၊ ပဲပင်ပေါက်မျှင်ကလေးတွေ၊ ကန်စွန်းရိုးကလေးတွေကို စားကြည့်နေရင်း စိတ်ကူးထဲမှာ -
ဈေးထဲက ဒေါ်လေးရီတို့၊ ဦးလေးထွန်းတို့၊ ဦးမြတ်ငြိမ်းတို့၊ မိတုတ်တို့၊ ရှင်​(ခင်?)နှောင်းတို့၊ ချောမြတို့၊ ကိုစံအေးတို့၊ မရွှေမိတို့တွေရဲ့ စိတ်ဓာတ်ကလေးတွေ အားလုံးကိုစုပြီး ဟင်းပေါင်းအိုးကြီးလို မွှေပစ်လိုက်လို့ရရင် ဘယ်လောက်များ ပျော်စရာကောင်းလိုက်မလဲလို့ တွေးနေမိတာကို ဒေါ်လေးရီများ သိသွားရင် ရူးတယ်လို့ ထင်ဦးမှာလားဟင် …။
-----------
သန်းမြင့်အောင်
ရင်ခုန်ပွင့်၊ အမှတ် ၈၃၊ ၁၉၉၃။

လရောင်ကို ကြောက်သူ

လရောင်ကို ကြောက်သူ (ဂျူး)
--------------------------------
ကျွန်မက လရောင်သည် အလွန် စိတ်ကြည်နူး နှစ်သက်စရာ ကောင်းသည်ဟု ထင်သည်။ ည၏ အရိပ်အရောင် များသည် လရောင် အောက်မှာမှ ပိုမို ပီပြင်ထင်ရှား သည်ဟု ထင်သည်။ နောက်ပြီး လရောင်မှာ လန်းဆန်းစေသော မွှေးရနံ့တစ်မျိုး ပါဝင်နေသည် ဟုပင် ထင်၏။ လ၏ ဆွဲငင်အားကိုလည်း ကျွန်မသိထား၊ လက်ခံထားသည်။ လရောင်၏ စွမ်းအား အလွန် ကြီးမားလှသည်ဟု ကျွန်မ ထင်၏။ သို့သော် ထိုမျှ အေးချမ်း ဆိတ်ငြိမ်သော လရောင်ကိုမှ မုန်းတီး ကြောက်ရွံ့သူ တစ်ဦးကိုလည်း ကျွန်မ သိခဲ့ဖူးပါသည်။ အဖြစ်အပျက်သည် ထူးဆန်း အံ့ဩစရာဟု ထင်ရသော်လည်း တကယ်တော့ အလွန် ရိုးစင်းသော ဖြစ်ရိုးဖြစ်စဉ် တစ်ခုသာ ဖြစ်သည်။ ကာလကတော့ တော်တော်လေး ကြာမြင့်ခဲ့ပါပြီ။ ကျွန်မ အလုပ်သင် ဆရာဝန် ဘဝမှာ မန္တလေး ပြည်သူ့ ဆေးရုံကြီး၏ ဌာနခွဲတစ်ခု ဖြစ်သော မန္တလေး စိတ်ရောဂါ အထူးကု ဆေးရုံသို့ သုံးပတ်ကြာမျှ တာဝန် ထမ်းဆောင်ရန် သွားခဲ့ရဖူးသည်။ ဖျားနာဆောင် (Medical Ward) များတွင် တာဝန်ကျသော အလုပ်သင် ဆရာဝန်တိုင်း ကြုံတွေ့ဖြတ်ကျော်ရသည့် တာဝန်များသာဖြစ်ပြီး ကျွန်မတို့၏ အလုပ်တာဝန်များကလည်း သိပ် ထူးထူးဆန်းဆန်းကြီး မဟုတ်ပါ။
နံနက် (၈) နာရီ မှာ စိတ်ရောဂါကု ဆေးရုံသို့သွား၊ လူနာများကို ကိုယ်ရေးရာဇဝင် မေးမြန်း၊ လူနာဆောင်များသို့ ဆရာနှင့် အတူလိုက်၍ ကြည့်ရှုလေ့လာရင်း ဆရာ စာသင်သည်ကို နားထောင် ရေးမှတ်။ နေ့လည် ၁၂နာရီမှာ အဆောင်ပြန်၍ နေ့လည်စာကိုစား၊ နေ့လည် ၂ နာရီမှာ ဆေးရုံပြန်ဝင်၊ လူနာသစ်များကို ကိုယ်ရေး ရာဇဝင်မေးမြန်း၊ လူနာမှတ်တမ်းများကို ဆရာထံပို့၍ ရောဂါ ရာဇဝင်နှင့် ကုသမှုများကို ဆရာနှင့် ဆွေးနွေးမေးမြန်း။ ဤအဖြစ်အပျက်များသည် နေ့စဉ်လိုလို ကြုံတွေ့ရသော အဖြစ်အပျက်များသာ ဖြစ်၏။ လူနာများသာ တစ်ယောက်ပြီး တစ်ယောက် ပြောင်းသွားသော်လည်း ရောဂါရာဇဝင်များက ဆင်တူရိုးမှားတွေချည်း ဖြစ်သည်။ စိတ်ကစဥ့်ကလျား ရောဂါ၊ စိတ်ကျ ရောဂါ၊ စိတ်ကြွ ရောဂါ၊ မိမိကိုယ်ကို သေကြောင်း ကြံစည်သည့် ရောဂါ၊ ဝက်ရူးပြန်ရောဂါတို့ ဖြစ်သည်။ မိမိကိုယ်ကို သေကြောင်း ကြံစည်သူများ ကိစ္စမှာတော့ ရဲနှင့် သက်ဆိုင်သောအမှု ဖြစ်သဖြင့် ကျွန်မတို့ အလုပ်သင် ဆရာဝန်များ မှတ်ချက် ရေးပြီးတိုင်း ဆရာ့ထံသို့ လွှဲပြောင်း ပေးအပ်ရလေ့ ရှိသည်။ ဆရာက ထပ်မံ စစ်ဆေး မေးမြန်းပြီးမှ စိတ်ရောဂါ ရှိမရှိ အတည်ပြု သတ်မှတ်ပေးလေ့ ရှိသည်။
ကျွန်မ ကြုံတွေ့ရသော ကျွန်မ မမေ့နိုင်သည့် လရောင်ကြောက်သူ တစ်ဦးမှာ မိမိကိုယ်မိမိ သေကြောင်း ကြံစည်မှုဖြင့် ကျွန်မတို့ ဆေးရုံသို့ စိတ်အခြေအနေ စစ်ဆေးခံရန် ဖျားနာဆောင်တစ်ခုမှ လွှတ်လိုက်သော လူနာတစ်ဦး ဖြစ်သည်။ လူနာသည် အမျိုးသမီးတစ်ဦ ဖြစ်သည်။ ထူးဆန်းသည်မှာ ပိုးသတ်ဆေး သောက်၍ မိမိကိုယ်ကို သေကြောင်း ကြံစည်သူ တော်တော်များများနှင့် မတူဘဲ အမှန်ကို ဝန်ခံရဲသော သတ်္တိရှိသူ ဖြစ်နေ၏။ ရေနံဆီ၊ ပိုးသတ်ဆေး စသည်တို့ကို သောက်ပြီး ဆေးရုံသို့ ရောက်လာသော လူနာ အတော် များများသည် မှားသောက်မိလို့ပါ ဟူသော ဆင်ခြေကို ပေးတတ်ကြ၏။ ဤအမျိုးသမီးကတော့ တည်ငြိမ်သော မျက်ဝန်းများဖြင့် "သေချင်လို့ သောက်တာပါ " ဟု ဖြေခဲ့သည်။ "ဘာဖြစ်လို့ သေချင်တာလဲ" ဟု ကျွန်မက ထပ်မေးတော့ အမျိုးသမီး မျက်နှာ အနည်းငယ် တင်းသွားပါသည်။ ထိုစဉ်က ကျွန်မ၏ အသက်မှာ ၂၄နှစ်သာ ရှိသေး၏။ အမျိုးသမီးကတော့ အသက် ၃၅နှစ် ရှိနေပြီ။ ကျွန်မက သိပ်ငယ်ရွယ်နေလို့များ သူမက မလေးမစား ဆက်ဆံ နေတာလားဟု ထင်ရအောင်ကလည်း သူမ၏ ဟန်ပန်က ရိုကျိုးမှုအပြည့် ဖြစ်၏။ ပထမတော့ လူနာချင်း လွှဲပြောင်းရလျှင် ကောင်းမလားဟု တစ်ဖက်ခန်းရှိ သူငယ်ချင်း အမျိုးသား ဆရာဝန်ထံ လှမ်း အကဲခတ်မိသေး၏။ သို့သော် သူက ယောက်ျားလူနာ တစ်ဦးကို မေးမြန်းနေသည်။ တမင် မျှမျှတတ ဖြစ်အောင် လူနာကို ခွဲဝေပေးထားခြင်းပဲဟု ကျွန်မ နားလည်သွားကာ ရင့်ကျက်သော ဟန်အမူအရာ ဖြစ်အောင် အားတင်း ထိန်းချုပ်၍ ဆက်လက် မေးမြန်းရပါသည်။
"ဟုတ်ပါတယ်၊ ဒါကိုတော့ ကျွန်မ နားလည်ပါတယ် အစ်မရယ် ... ဒါပေမယ့် လူ တော်တော်များများက မသေချင်ဘူး၊ သေရမှာ ကြောက်လို့ နည်းမျိုးစုံနဲ့ ကာကွယ်တားမြစ် နေတယ်၊ အစ်မကတော့ တခြားသူတွေနဲ့ မတူဘူး၊ ဒီတော့ တခြားသူတွေရဲ့ ခံစားချက်နဲ့ မတူတဲ့ သီးသန့် ခံစားချက် တစ်ခုခု ရှိနေသလား ဆိုတာ ကျွန်မ သိချင်လို့ပါ၊ ကျွန်မကို ယုံယုံကြည်ကြည် ဖွင့်ပြောပါ"
သူမက မတုန်မလှုပ်။ ချော့မော့ဖျောင်းဖျ မေးမြန်း၍ မရသောအခါ ကျွန်မအနည်းငယ် စိတ်တိုသွား၏။ ကျွန်မ နောက်ထပ် ကြည့်ရမည့် လူနာတွေက ရှိသေးသည်။
"အစ်မ ဆေးရုံက ဆင်းတဲ့အခါ ကိုယ့်ကိုကိုယ် သေကြောင်းကြံမှုနဲ့ ထောင်ကျရဦးမယ် ဆိုတာ အစ်မ မသိသေးဘူး ထင်တယ်"
အမျိုးသမီး မျက်နှာမှာ တုန်လှုပ်မှုကို သိသိသာသာ တွေ့ရ၏။ ကျွန်မ တိတ်တိတ်ကလေး ကျိတ်ပြုံးလိုက်မိပါသည်။
"အစ်မ ထောင်ကျတာ မကျတာဟာ ကျွန်မတို့ ဆေးရုံက မှတ်ချက်အပေါ်မှာ လုံးဝ မူတည်နေတယ်"
သူမမျက်လုံးမှာ ကျွန်မကို အားကိုးလိုဟန် အနည်းအကျဉ်း တွေ့ရ၏။
"လူနာတွေ ဒုက္ခရောက်အောင်ကျွန်မတို့ ဘယ်တော့မှ မလုပ်ပါဘူး၊ ပျော်ပျော်ရွှင်ရွှင် အိမ်ပြန် သွားကြတာကို ကျွန်မတို့ မြင်ချင်တယ်၊ အဲဒီအတွက်ပဲ အစ်မတို့ကို စိတ်အခြေအနေ စစ်ဆေးပေးနေ ရတာပါ၊ အမှန်အတိုင်း ဖွင့်ပြောပါ၊ ကျွန်မတို့က လူနာရဲ့ လျှို့ဝှက်ချက်တွေကို ကိုယ်သေတဲ့အထိ သိမ်းသွားမယ့် ဆရာဝန်တွေပါ"
သူမသည် အခန်း ပတ်ဝန်းကျင်ကို မသင်္ကာသည့် မျက်လုံးများဖြင့် အကဲခတ်လိုက်ပြီးနောက် "ဒီနားမှာ ကျွန်မယောက်ျား ရှိနေသလား " ဟုမေး၏။
"မရှိဘူး၊ ဒီအခန်းရဲ့ အပြင်ဘက်မှာ ဆရာမကြီး တစ်ယောက် လာစောင့်ပေးနေတယ်၊ လိုအပ်လို့ မခေါ်မချင်း လူနာရဲ့ အဖေလည်း မဝင်ရဘူး၊ အမေလည်း မဝင်ရဘူး၊ အစ်မယောက်ျားလည်း မဝင်ရပါဘူး"
ထို့နောက် အမျိုးသမီးက သူ၏ အဖြစ်အပျက်ကို ကျွန်မအား အားလုံး ဖွင့်ပြောပြပါသည်။ "ကျွန်မ ယောက်ျားနဲ့ ကျွန်မနဲ့က တစ်မြို့တည်းသားတွေ မဟုတ်ဘူး၊ သူက ကျွန်မတို့မြို့နဲ့ မိုင်၁၀၀ လောက်ဝေးတဲ့ မြို့ကြီးတစ်မြို့ကပါ၊ မြို့ကြီးသားစရိုက် အပြည့်ရှိတယ်၊ ဝတ်ပုံစားပုံ သေသပ်ကျနတယ်၊ မျက်နှာထားကလည်း ဣနြေ္ဒရရ၊ စကားပြော သိမ်မွေ့တယ်၊ ကြင်နာတတ်တယ်၊ ကျွန်မတို့ အိမ်နဲ့ နှစ်အိမ်ကျော်လောက်က ဆီစက်တစ်ခုမှာ မန်နေဂျာပေါ့၊ ပညာတတ် ဘွဲ့ရ တစ်ယောက်ပဲ၊ ကျွန်မတို့ အိမ်ကတော့ အလတ်စား ဂျုံစက်ရုံကလေးပဲ ဆိုပါတော့လေ၊ အိမ်မှာတော့ မန်နေဂျာရယ်လို့ မရှိပါဘူး၊ အဖေနဲ့ ကျွန်မနဲ့ ဂျုံစက်ကို တစ်လှည့်စီ စောင့်ကြပ် အုပ်ချုပ်ကြတာပဲ၊ ကျွန်မက ဆယ်တန်း အောင်ရုံပဲ၊ ဒါပေမယ့် အဖေက စာရင်းအင်းပညာ ကျွန်မကို သင်ပေးထားလို့ ကျွန်မကောင်းကောင်း စာရင်း ကိုင်တတ်ပါတယ်၊ ကျွန်မနဲ့ သူနဲ့ မျက်မှန်တန်းမိ သွားကတည်းက တစ်ယောက်ကို တစ်ယောက် ချစ်ခင် သွားကြတယ်လို့ ပြောရမလား မသိဘူး၊ ကျွန်မကတော့ တကယ့်ကို သူ့ကို မြတ်မြတ်နိုးနိုး စုံမက် ခဲ့တာပါ။
"ကျွန်မတို့ မြို့က ခပ်သေးသေး ဆိုတော့ အဖြစ်အပျက် တစ်ခု ဆိုရင် တစ်ရပ်ကွက်လုံး တစ်မြို့လုံး ပျံ့နှံ့သိသွား တတ်ကြတယ်၊ ကျွန်မနဲ့ သူနဲ့ ဘာလိုလို ဖြစ်နေတာကို အဖေတို့ သိသွားတာပေါ့၊ အဖေက ကျွန်မကို သတိပေး သလိုလိုနဲ့ တားမြစ်တယ်၊ တစ်မြို့တည်းသားချင်း မဟုတ်လို့ သူ့အကြောင်းကို ကျွန်မတို့ အမှန်အတိုင်း သိဖို့ ခဲယဉ်းတယ်ပေါ့လေ၊ သူ့မြို့မှာ သူဟာ မယားကြီးတွေ ဘာတွေ ရှိနေနိုင်တယ်၊ ဘာပြဿနာတွေ ရှိခဲ့မယ်ဆိုတာ ကျွန်မ မသိနိုင်ဘူး ... တဲ့၊ အဖေက တစ်မြို့တည်းသား အတွင်းသိ၊ အစင်းသိ လူငယ် တစ်ယောက်ယောက်ကိုပဲ လက်ထပ်စေချင်တယ်၊ ကျွန်မကတော့ သူ့ကို ယုံတယ်၊ သူ့မှာ ဘာအရှုပ်အထွေးမှ မရှိနိုင်ဘူး၊ သူဟာ ရိုးသားသိမ်မွေ့တယ် ဆိုတာ အလိုလို သိနေပါတယ်။
"ဒီလိုနဲ့ တစ်နေ့မှာတော့ အင်းလေ ... တစ်ညမှာပေါ့၊ ကျွန်မတို့နှစ်ယောက် တော်တော်ရင်းနှီးတဲ့ အခြေအနေကို ရောက်သွားရော ဆိုပါတော့၊ နေဦး ... အဲဒီည အကြောင်းကို ဒေါက်တာသိမှ ဖြစ်မယ် ထင်တယ်၊ နောက်ပိုင်း သူဆီစက်မှာပဲ ညအိပ်လေ့ ရှိတယ်လေ၊ ကျွန်မနဲ့ နီးနီး နေချင်လို့တဲ့၊ ညတွေမှာ ရပ်ကွက်ထဲက လူတစ်ချို့နဲ့ သူလမ်းလျှောက်ပြီး ဂစ်တာ တီးတတ်တယ်၊ အိုး ... ဂစ်တာတီးလဲ တော်တော်ကို ကောင်းတဲ့လူပဲ၊ သူ့ဂစ်တာသံ ကြားရင် ကျွန်မ အခန်းပြတင်းကို ဖွင့်ပြီး နားထောင်နေမိ တတ်တယ်၊ လသာဆောင် ဘက်တော့ မထွက်ရဲပါဘူး၊ ကျွန်မကို သူတို့ မြင်သွားမှာပေါ့၊ အဲဒီညကတော့ လကလဲ အရမ်းကို သာနေတယ်၊ လပြည့်ခါနီး ည တစ်ညပဲ၊ ကျွန်မတို့အိမ်က ခြံဝိုင်းအကျယ်ကြီး ဒေါက်တာရဲ့၊ ခြံဝိုင်းထောင့်အိမ်နဲ့ တော်တော်ဝေးတဲ့ နေရာမှာ မြတ်လေးပန်းရုံကြီး ရှိတယ်၊ အိမ်မကြီးကနေ လှမ်းကြည့်ရင် မမြင်ရဘူး၊ ကြားမှာ ဂျုံစက် အဆောက်အဦက ကွယ်နေတယ်လေ။
"အဲဒီညက ကျွန်မ မြတ်လေးပန်း သွားခူးမိတယ်၊ ပန်းကို အိမ်ကလူတွေ သိပ်ဂရုစိုက်နိုင်တာ မဟုတ်ပါဘူး၊ ကျွန်မလဲ ခါတိုင်းတော့ မခူးမိပါဘူး၊ အဲဒီညကတော့ နောက်နေ့မနက် ဘုရားပွဲ လှည့်မှာမို့ ပန်းကုံးအကြီးကြီး ရအောင်သီမယ် ဆိုတဲ့ စိတ်နဲ့ ညနှစ်နာရီခွဲ လောက်မှာ ပန်းထခူးမိတာ၊ ခြံစည်းရိုး အပြင်ဘက်မှာ သူရောက်လာပြီး ကျွန်မနဲ့ စကားခဏ ပြောနေသေးတာ၊ နောက်တော့ ကျွန်မတားတဲ့ ကြားကနေ သူခြံထဲကို ဇွတ်ကျော် ဝင်လာတော့တာပါပဲ၊ မြတ်လေးရုံဘေးက ကုန်းမြင့်တလင်းပြင် ကလေးဟာ လရောင်နဲ့ ဆိုတော့ သိပ်လှနေတာပဲ၊ အရောင်တောင် လက်နေတယ်၊ ပြာလဲ့လို့ပေါ့၊ ငှက်တွေလဲ အိပ်ချိန် လူခြေလဲတိတ်ချိန် တစ်လောကလုံး တိတ်ဆိတ် ပြာလဲ့နေတာပဲ၊ ကျွန်မ ဘဝမှာ အဲဒီညကို ဘယ်တော့မှ မမေ့နိုင်တော့ပါဘူး၊ သူ့ကို ချစ်တဲ့စိတ်၊ သူ့ကို ကြောက်တဲ့စိတ်၊ သူ့ကိုပဲ ရှက်တဲ့စိတ်၊ အိုး ... တော်တော် အံ့ဩစရာ ကောင်းတဲ့ ညပါပဲ၊ နောက်တော့ ရက်ခြား ဆိုသလို ကျွန်မ ပန်းခူးထွက်ရတော့ တာပေ့ါ၊ ချစ်သူ့ မျက်နှာညှိုးမှာကို စိုးရိမ်ရတာလောက် လှိုက်လှဲကြေကွဲတဲ့ ခံစားချက်မျိုး ရှိမှာတောင် မဟုတ်ဘူးလို့ ထင်ခဲ့မိတယ်။
"နောက်ဆုံးတော့ ကျွန်မတို့ အကြောင်းကို အမေသိရော ဆိုပါတော့၊ အမေက ကျွန်မကို ဆူလိုက်တာ၊ သူ မယူဘဲ ပစ်သွားမှာကို စိုးရိမ်နေမိတဲ့ ကျွန်မတို့ မိသားစုဟာ သူက မိသားဖသားပီပီ တောင်းရမ်းယူတော့ တော်တော် စိတ်အေးသွားရ ပါတယ်၊ ကျွန်မတို့ နှစ်ယောက် မင်္ဂလာပွဲကို ဘယ်မယားကြီးမှလဲ လာမဖျက်ပါဘူး၊ သူ့မှာလဲ ကျွန်မကလွဲလို့ ဘာအနှောင်အဖွဲ့မှ မရှိပါဘူး၊ ကျွန်မတို့ နှစ်ယောက် နေဖို့အခန်းကို သူကိုယ်တိုင် ရွေးပေးတာပါ၊ ကျွန်မတို့ အိမ်ကြီးက ပျဉ်ထောင်အိမ် အမြင့်ကြီး ဒေါက်တာရဲ့၊ အခန်းတွေ အခန်းတွေမှ အများကြီးပဲ၊ တစ်ခန်း တစ်ခန်းကလည်း အကျယ်ကြီးပါပဲ၊ လသာဆောင်နဲ့ ကပ်လျက် ဘေးအစွန်ဆုံး အခန်းကို သူရွေးလိုက်တယ်၊ အဲဒီ အခန်း ပြတင်းပေါက် နှစ်ခုကလဲ အမြင့်ကြီးတွေ၊ နဂိုကတော့ ပြတင်းအမိုးခုံး တစ်ခုပဲ မှန် ပါတာ၊ တံခါးရွက်တွေက သစ်သားတွေ၊ အဲဒါကို ကျွန်မယောက်ျားက ပြင်ယူလိုက်တယ်၊ တံခါးရွက်တွေ အားလုံး မှန်တပ် လိုက်တယ်၊ လသာတဲ့ ညတွေမှာဆို လရောင်က တံခါးရွက် မှန်ချပ်တွေကို ဖြတ်ပြီး အခန်းထဲကို ဖြာကျနေတတ်တယ်၊ အခန်းနံရံ၊ စားပွဲ၊ ခုတင်၊ မွေ့ရာ အားလုံးဟာ လရောင် တစ်ဝက်တစ်ပျက်နဲ့ ဆိုတော့ အပြာလဲ့လဲ့ကလေးပေါ့၊ သူက ကျွန်မကို ခဏခဏ ပြောလေ့ရှိတယ်၊ ဝေ့မျက်နှာဟာ လရောင်အောက်မှာ သိပ်လှတာပဲတဲ့၊ ဝေ့ ခန္ဓာကိုယ် နွဲ့နွဲ့ကလေးကလဲ လရောင်က အလင်းတင်လိုက်တဲ့အခါ ပိုမိုပီပြင် သွားတယ်တဲ့၊ အလင်းအမှောင်ကို အချိုးညီညီ ရောပြီး ပြထားတဲ့ ပန်းပုရုပ်လိုပဲတဲ့ ဒေါက်တာရယ်၊ သူပြောတတ်တဲ့ စကားလုံးလေးတွေက သိပ်နားထောင်လို့ ကောင်းတာ၊ ပညာတွေလဲ တော်တော်တတ်ပြီး စာတွေဘာတွေလဲ တော်တော်ဖတ်ခဲ့တဲ့ ပုံပဲ ၊ ကျွန်မမှာတော့ သူ့ကို ချစ်တာအပြင် ကျေနပ်တာ၊ လေးစားတာ၊ ဂုဏ်ယူတာတွေ အမျိုးမျိုး စုပေါင်းပြီး သူ့တစ်ယောက်သာ တစ်ကမ္ဘာလို့ ထင်ခဲ့ပါတယ်။
"ကျွန်မမှာ ကံဆိုးချင်တော့ သားသမီး လုံးဝ မရခဲ့ဘူး ဒေါက်တာရယ်၊ အိမ်ထောင်သက် ငါးနှစ်အရမှာ အဖေ ဆုံးသွားတယ်၊ ဂျုံစက်ကို ကျွန်မယောက်ျားပဲ ဦးစီးခဲ့တာပဲ၊ သူက စီးပွားရေး အမြင်လဲ ရှိပါတယ်၊ လုပ်ငန်းက သူ့လက်ထက်မှာ ပိုပြီး ကျယ်ပြန့်လာတယ်၊ သူ့အနေအထိုင် အပြုအမူ၊ အလုပ်သမ ကောင်မလေးတွေ အပေါ်ဆက်ဆံရေး ... အားလုံးဟာ ပုံမှန်ပဲ၊ ဘာမှ ချို့ယွင်းချက် မရှိဘူး၊ ဒါပေမယ့် ကျွန်မမှာ သံသယတစ်ခု ဝင်လာခဲ့ရတယ်၊ ဘေးစကား ဆိုတာကို ကျွန်မ နဂိုကတည်းက ယုံခဲ့တာ မဟုတ်တော့ သတင်းကြားကြားချင်း စိတ်ဆိုး ဒေါသထွက်ဖို့ သတိမရဘဲ အံဩတုန်လှုပ် သွားခဲ့တယ်၊ သူနဲ့ အလုပ်သမကလေး တစ်ယောက် တိတ်တိတ်ပုန်း ညားနေကြတယ် ဆိုတဲ့ သတင်းပေါ့၊ ကျွန်မတို့ ရပ်ကွက် အစွန်က ချောင်းစပ်မှာ သဲသောင်ပြင် အပြန့်ကလေး တစ်ခုရှိတယ်၊ ကြက်သွန်ခင်းတွေနဲ့ ချောင်းရေ စပ်စပ်ကလေးနဲ့ ညတွေမှာ ဆည်းဆာနေရောင် အောက်မှာတော့ တော်တော် သာယာတဲ့ နေရာကလေးပါ၊ အဲဒီ ချောင်းစပ်ကလေးမှာ ကျွန်မယောက်ျားနဲ့ သူ့ကောင်မလေးနဲ့ ညညမှာ ချိန်းတွေ့ကြတယ် ဆိုတဲ့ သတင်းက ကျွန်မနားကို ရောက်လာတယ်၊ သူ့ကိုရန်တွေ့ပြီး စွပ်စွဲမေးမြန်းတော့ သူက ရယ်လိုက်တာ၊ ကိုယ့်ယောက်ျားကိုယ် ဒီလောက်မှ အကဲမခတ်တတ်ဘူးလား၊ ကိုယ့်ယောက်ျား ဒီလိုလူစားမျိုး ဟုတ်မဟုတ် ဝေ အသိဆုံး ဖြစ်မှာပေါ့တဲ့၊ သူပြောတော့ ကျွန်မ သူ့ကိုတောင် အားနာသွားရတယ်၊ တကယ်လဲ သူဟာ အိမ်ကို ညကိုးနာရီအရောက် အမြဲပြန်တဲ့လူ၊ ကျွန်မထက်လဲ အရင်အိပ်ပျော်တဲ့လူ၊ မနာလိုတဲ့ လူတွေက တမင် နာမည်ဖျက်တာလို့ ကျွန်မ ယူဆရတော့တာ ပေါ့လေ၊ ဒါပေမယ့် ကျွန်မ သတိရှိပါတယ်၊ ကျွန်မ ည ည တစ်ရေးနိုးရင် သူ့ကို စမ်းသပ် ကြည့်ရတယ်၊ ကျွန်မ ဘေးနားမှာ သူရှိနေတဲ့အခါ ကျွန်မဘာသာ မလုံမလဲ ပြုံးမိပြီး ပြန်အိပ်ပျော်သွားတာပေါ့။
"ဒါပေမယ့် တစ်ညမှာတော့ သံသယက တော်တော် ခိုင်လုံသွားရတယ် ဒေါက်တာရဲ့၊ ကျွန်မ တစ်ရေးနိုးလို့ သူ့ကို စမ်းကြည့်တော့ သူ့ကို မတွေ့ဘူး၊ အိမ်သာ သွားတက်နေတာ ဖြစ်နေမလား ဆိုပြီး ကျွန်မ ခဏ စောင့်နေတယ်၊ သူမလာဘူး၊ နာရီပြန် နှစ်ချက်လောက် ရှိပြီ၊ ဒါနဲ့ ကျွန်မ တစ်အိမ်လုံး တစ်ခန်းဝင် တစ်ခန်းထွက် လိုက်ရှာတယ်၊ သူ့ကို မတွေ့ဘူး၊ အောက်ထပ် အခန်းတွေ လိုက်ရှာ မီးတွေဖွင့်တော့ အမေ နိုးသွားတယ်၊ အမေ မေးတော့ ကျွန်မ အမှန်အတိုင်းပဲ ပြောလိုက်တယ်၊ အမေက ပြန်အိပ်ခိုင်းတယ်၊ ဘယ့်နှယ်လုပ်ပြီး ကျွန်မ အိပ်နိုင်ပါ့မလဲ ... မဟုတ်ဘူးလား၊ လကလဲ လပြည့်လ ဆိုတော့ တစ်လောကလုံး လရောင်နဲ့ လင်းနေတာ၊ ကျွန်မ ကြောက်စိတ်လဲ မရှိဘူး၊ ခြံဝန်းတစ်လျှောက် သူ့ကို လိုက်ရှာမိတယ်၊ ဘာဖြစ်လို့မှန်း မသိဘူး၊ သူခြံဝန်းထဲမှာ ရှိမနေနိုင်ဘူးလို့တော့ ထင်သား၊ ဒါနဲ့ ကျွန်မ လမ်းဘက် ထွက်ရှာမယ် လုပ်တော့ အမေက ဆွဲထားတယ်၊ ကျွန်မက ခေါင်းမာတယ်လေ၊ ဒီည ဒီအကြောင်းကို သိရမှဖြစ်မယ်၊ အမေ မလိုက်ချင်နေ ကျွန်မ သွားရှာမယ် ဆိုတော့မှ အမေက ကျွန်မနဲ့ လိုက်လာတယ်၊ ကျွန်မတို့ လမ်းတစ်လျှောက်မှာ သက်ရှိဆိုလို့ ခွေးတစ်ကောင် ကြောင်တစ်မြီးမှ မတွေ့ရဘူး၊ ဒါပေမယ့် ကျွန်မ မကြောက်ဘူး၊ စိုးရိမ်ပူပန်စိတ်နဲ့ နာကြည်းတဲ့ ဒေါသ ပေါင်းစပ်ပြီး ကျွန်မ တစ်ကိုယ်လုံးကို လောင်နေတာလေ၊ နောက်တော့ သိပ်မကြာခင်မှာပဲ ချောင်းစပ်ကို ကျွန်မတို့ ရောက်သွားရော၊ လရောင် ဖွေးနေတဲ့ သောင်ပြင်အစပ်ဆီကို လှမ်းကြည့်လိုက်တဲ့အခါ ကျွန်မတစ်ကိုယ်လုံး ပျော့ခွေသွားတော့တာပါပဲ၊
"လရောင်အောက်မှာ လူနှစ်ယောက်မှန်း သိသာတဲ့ အရိပ်သဏ္ဌာန်နှစ်ခု တစ်ခုနဲ့တစ်ခု ပူးကပ်နေတယ်၊ တစ်ခုက မြင့်မြင့်၊ တစ်ခုက နိမ့်နိမ့်၊ သူတို့ လှုပ်ရှားမှုတွေကို မသဲမကွဲ မြင်နေရပေမယ့် ဘယ်သူတွေလဲ ဆိုတာ ကျွန်မ မသိဘူး၊ ဒါပေမယ့် ရှေ့လဲ မတိုးရဲဘူး၊ ရှေ့တိုးလို့ တစ်ခုခုကို အတိအကျ လက်ခံသွားရမှာကိုလဲ ကျွန်မ ကြောက်နေတယ်၊ တစ်ယောက်က ဝတ်ထားတဲ့ အရောင်ဟာ စိမ်းမလို ပြာမလိုလို၊ ကျွန်မယောက်ျားကလည်း အစိမ်းနုရောင် အင်္ကျီ ဝတ်ထားတယ် ဆိုတာ ကျွန်မ သတိရသွားတယ်၊ ကျွန်မမှာ ကြည့်ရင်းကြည့်ရင်း တစ်ကိုယ်လုံး အေးစက်ပြီး မျက်ရည်တွေ ကျလာတော့တာပဲ၊ အမေက ကျွန်မအရိပ်အကဲ မဟန်မှန်းသိလို့ ဖက်တွဲပြီး အိမ်ပြန် ခေါ်လာတယ်။
" 'သမီး ပြန်အိပ်၊ အဲဒီကို အမေတစ်ခေါက် သွားကြည့်ပေးမယ်၊ သမီး ဦးကြီးကို နှိုးပြီး အမေ သွားကြည့်မယ်' တဲ့။
"ဦးကြီးဆိုတာ တကယ်တော့ ကျွန်မတို့နဲ့ ဘာမှ မတော်ပါဘူး၊ ခြံစောင့်သဘောမျိုးပေါ့၊ ဂျုံစက်ထဲမှာ စောင့်အိပ်တဲ့ ဂိုဒေါင်စောင့်ဆိုလဲ ဟုတ်တယ်၊ တကယ်လဲ အဲဒီညက အမေနဲ့ ဦးကြီးနဲ့ သွားကြတယ်၊ အမေတို့ ပြန်လာတော့ အမေ့မျက်နှာကို ကျွန်မ ချက်ချင်း မကြည့်ရဲဘူး၊ အမေက ပြုံးရယ်ပြီး ကျွန်မကို နှစ်သိမ့်တယ်။
" 'မိဝေနှယ် အစိုးရိမ် လွန်ရန်ကော၊ အဲဒီ ကောင်ကလေးက ဟိုဘက်ရပ်ကွက်က မြင်းလှည်းသမားကလေး ပါဟယ်၊ ငါတို့မှာ သူတို့ မမြင်အောင် ပုန်းလျှိုးကွယ်လျှိုး ပြန်ပြေးခဲ့ရတယ်၊ ညည်းယောက်ျား ခြံဝန်း တစ်နေရာရာမှာ ရှိချင်ရှိမှာပေါ့၊ ဒါမှမဟုတ် လသာသာနဲ့ လမ်းထွက်လျှောက်တာ ဖြစ်မှာပေါ့'
"အမေ့အပြုံးက တစ်မျိုးပဲလို့ ထင်ပေမယ့် ကျွန်မ ယုံလိုက်ပါတယ်၊ အဲဒီညက သူပြန်မလာမချင်း ဧည့်ခန်းထဲမှာ ထိုင်စောင့်နေခဲ့တယ်၊ သိပ်မကြာခင်မှာ သူပြန်လာရော၊ သူ့ဟန်အမူအရာက ကျွန်မယောက်ျားနဲ့လဲ မတူဘူး၊ လေးလေးကန်ကန်နဲ့၊ ဘေးဘီကိုလည်း မကြည့်ဘူး၊ တံခါးပေါက် တည့်တည့်ကို ဝင်လာတယ်၊ ဧည့်ခန်းမှာ မီးလင်းနေတာ ကျွန်မ ထိုင်နေတာ အားလုံးကို သူဂရုမစိုက်ဘူး၊ သူ့မျက်နှာကလဲ မျက်နှာသေနဲ့၊ ကျွန်မကို ကျော်ပြီး လှေကားဆီ လျှောက်သွားတော့ ကျွန်မ ငိုချင်လိုက်တာ၊ ဒါနဲ့ သူ့ကိုပြေးဖက်တော့မှ သူက ဗြုန်းဆို လှည့်ကြည့်တယ်။
" 'ဟင် ... ဝေ ... ဘာလုပ်နေတာလဲ' တဲ့၊ သူ့အသံက သိပ်အိပ်ချင်မူးတူး အသံ၊ ကျွန်မ ဒေါသထွက်လွန်းလို့ သူ့တစ်ကိုယ်လုံး ထုနှက် ရိုက်ပုတ်မိတယ်၊ သူက ဘာမှ နားမလည်တဲ့ ပုံစံနဲ့ ကျွန်မကို ဆွဲဖယ်တယ်လေ။
" 'ကောင်မလေး ဘယ်ကျန်ခဲ့လဲ' ဆိုတော့ သူက မျက်နှာမပျက်ဘူး၊ ကျွန်မကို ဘာတွေ လာပြောနေပါလိမ့် ဆိုတဲ့၊ ဇဝေဇဝါ အကြည့်မျိုးနဲ့ ကြည့်လို့၊ ဘယ်က ကောင်မလေးလဲတဲ့၊ သူ့အမူအရာဟာ ဟန်ဆောင်နေတဲ့ အမူအရာ မဟုတ်ဘူး ဒေါက်တာရယ်၊ လူတစ်ယောက် အထူးသဖြင့် ကိုယ့်ယောက်ျား ဟန်ဆောင်နေတာလား တကယ့်မျက်နှာလား ဆိုတာ ကျွန်မ သိပါတယ်၊ ဒီလောက်တော့ ကျွန်မ သိပါတယ်၊ ဒါနဲ့ သူ့ကို သွားနေတာလဲလို့ အသံမာမာနဲ့ပဲ မေးမိတယ်၊ သူက သူ့ဟာသူ လမ်းထလျှောက်မိတာကို အမှတ်မရဘူးနဲ့ တူတယ်၊ အိမ်သာသွားတာ ဖြစ်လိမ့်မယ်တဲ့၊ သူ ကောင်းကောင်း မမှတ်မိဘူးတဲ့၊ သူ တကယ်နိုးသွားတဲ့အခါ ကျွန်မက သူ့ဘေးမှာ ရပ်ပြီး ငိုနေပြီတဲ့၊ ဖြစ်နိုင်ပါ့မလား ဒေါက်တာရယ်၊ လူတစ်ယောက်ဟာ အိပ်ရာက နိုးလို့ လမ်းလျှောက်တာတောင် သူ့ဟာသူ မသိဘူးဆိုတာ ဖြစ်နိုင်ပါ့မလား၊ အိပ်မက်မက်ရင်း လမ်းထလျှောက်တတ်တဲ့ လူတို့ဘာတို့ ကျွန်မ ကြားဖူးပါတယ်၊ ညီမဝမ်းကွဲ တစ်ယောက်တောင် အဲဒီအကျင့် ရှိသေးတယ်၊ သူကတော့ အိပ်ရာပေါ်က လိမ့်ကျတတ်တယ်၊ အခန်းထဲက ထွက်သွားတတ်တယ်၊ ဒါပေမယ့် အိမ်ထောင်ပရိဘောဂ တစ်ခုခု ဒါမှမဟုတ် နံရံ တစ်ခုခုနဲ့ တိုက်မိပြီး နိုးသွားတတ်တာပါပဲ၊ ငါးမိနစ်တောင် မကြာဘူး နိုးလာတတ်တာပဲ၊ သူ့အိပ်ရာ သူပြန်ရောက်တတ်တာပဲ၊ ကျွန်မယောက်ျား အဖြစ်က ဒါမျိုးမှ မဟုတ်ဘဲ နောက်ပြီး အိမ်ထောင်သက် ဒီလောက် ကြာခဲ့ပြီပဲ၊ သူသာ အဲဒီအကျင့်ရှိရင် ကျွန်မက အသိဆုံးလူ ဖြစ်မှာပေါ့။
"ကျွန်မမှာ လက်ခံရအခက်၊ လက်မခံရ အခက်နဲ့၊ မနက်လင်းလို့ ညက ပြဿနာကို မေးကြည့်တော့ သူဘာမှ မမှတ်မိဘူးတဲ့၊ ဒီလိုနဲ့ ကျွန်မ ညညမှာ တစ်ရေးမနိုးမှာ ကြောက်လို့ သတိထား အိပ်လာရတာ အိပ်ရေးတွေလဲ ပျက်လို့၊ သူက အိပ်ရာဘေးမှာ ရှိတတ်ပြန်ရော၊ ကျွန်မ ခဏခဏ ထစမ်းကြည့်လွန်းလို့ သူနိုးလာရင် ကျွန်မကို ငေါက်တတ်သေးတယ်၊ ကျွန်မရဲ့ သံသယတွေက သူ့ကို တစ်နေ့တစ်ခြား စော်ကားနေတာတဲ့၊ ကျွန်မတို့ ခဏခဏ ရန်ဖြစ်ရတယ်၊ အထူးသဖြင့် သူပျောက်ပျောက် သွားတတ်တဲ့ ညတွေမှာပေါ့၊ လေးငါးဆယ်ရက်လောက် မပျောက်ဘဲရှိချင် ရှိတတ်တယ်၊ ပျောက်တဲ့ ညကျပြန်တော့ ပျောက်မှန်း ကျွန်မသိလို့ လိုက်ရှာဖို့ ဟန်ပြင် ခြံထဲဆင်းတော့မယ် ဆိုရင် သူပြန်ပြန် ရောက်လာတတ်တယ်၊ နောက်ပိုင်းတွေမှာတော့ သတိထားမိတာ တစ်ခုရှိတယ် ဒေါက်တာရဲ့၊ သူက လသာတဲ့ညတွေဆို ပျောက်ပျောက် သွားတတ်တာကိုး၊ သမန်းကျားတို့ ဘာတို့ ယုံတမ်းစကားတွေလိုမျိုး ဖြစ်နေမလားလို့ ကျွန်မ ပူပင်လွန်းလို့ အမေနဲ့ တိုင်ပင်ကြည့်တော့ အမေက အဲဒါမျိုး တကယ် မရှိပါဘူးတဲ့၊ မစိုးရိမ်ပါနဲ့တဲ့။
"ကျွန်မမှာ စက်ထဲက အလုပ်သမကလေးတွေကို အကဲခတ်ရပါ များလို့ သူတို့ကရော၊ ကျွန်မယောက်ျားကပါ မကြည်မလင်တွေ ဖြစ်လာတယ်၊ ဒါပေမယ့် ဘာပြဿနာမှ မပေါ်လာဘူး၊ ဥပမာ တစ်ယောက်ယောက် ထွက်သွားတာတို့၊ ကိုယ်ဝန်ပျက်ကျတာတို့၊ ကျွန်မကလဲ ဒီလောက်ပဲ အကဲခတ်တတ်တာကိုး၊ နောက်တော့ စက်ရုံက အလုပ်သမကလေးတွေကို လစာကြိုထုတ်ပေးပြီး အလုပ်ဖြုတ်ပစ် လိုက်တယ်၊ သူတို့နဲ့ ကျွန်မယောက်ျား နီးစပ်နေမှာကို ကျွန်မ ကြောက်တယ်လေ၊ နောက်ပြီး ခြံဝင်းတံခါးသော့ကို အခန်းနံရံမှာ မချိတ်ထားတော့ဘဲ ကျွန်မ ညတိုင်း ဝှက်ထားတော့တယ်၊ ဝှက်တဲ့ နေရာကလည်း တစ်နေရာနဲ့ တစ်နေရာ မတူအောင် ထားရတာပေါ့၊ အဲဒီလောက်တော့ ကျွန်မလည်း ဥာဏ်သွားပါသေးတယ်။
"ဒီလိုနဲ့ နောက်တစ်နှစ်လောက် သံသယဖြစ်လိုက် မဖြစ်လိုက်နဲ့ အခြေအနေမပျက် အမူအရာမပျက် ရှိခဲ့ရာက ကျွန်မမှာ ကိုယ်ဝန် ရှိလာတယ်၊ ကျွန်မတို့ နှစ်ယောက်စလုံး တော်တော် ကြည်နူးခဲ့ရတယ်၊ ကိုယ်ဝန်နဲ့ ပတ်သက်လို့ သူကျွန်မကို တော်တော်လေး ဂရုစိုက်ခဲ့တာကို ကျွန်မ ဝန်ခံရမှာပဲ၊ ကျွန်မ မပင်ပန်းအောင် ကျွန်မအလုပ် တော်တော်များများကို သူကူပေးခဲ့တယ်၊ ဒါ့အပြင် ကျွန်မတို့နဲ့ ဆွေမျိုးနီးစပ် မကင်းတဲ့ တစ်ယောက်ယောက်ကို ကူဖော်လောင်ဘက် ခေါ်ဖို့ အကြံပေးတယ်၊ ကျွန်မတို့ အမျိုးတွေ အနီးအနားရွာမှာ ရှိတယ်လေ၊ဒါနဲ့ ကျွန်မ ကလေးမလေး တစ်ယောက်ကို ခေါ်လိုက်တယ်၊ ရုပ်ကတော့ မလှဘူး၊ ကျွန်မက ရုပ်လှတဲ့ မိန်းကလေးငယ်ငယ် တစ်ယောက်ကို ကျွန်မတို့အိမ်မှာ မထားရဲဘူးလေ၊ ဒါပေမယ့် ဒီကိစ္စမျိုးက ရုပ်လှတာ မလှတာနဲ့ မဆိုင်ဘူးဆိုတာ နောက်မှ သိရတယ်။
"ကျွန်မမှာ ရှိသမျှ မျှော်လင့်ချက်တွေ ပျော်ရွှင်မှုတွေ အားလုံး ပျက်စီးကုန်တဲ့ ညကို ကျွန်မကောင်းကောင်း မှတ်မိနေပါတယ် ဒေါက်တာရယ်၊ အဲဒီရက်က ကျွန်မ မီးမဖွားမီ ငါးရက် အလိုမှာပဲ၊ အဲဒီညက လပြည့်ည၊ ကျွန်မ နိုးလာတဲ့အခါ ကျွန်မတို့ အခန်းထဲမှာ ကျွန်မယောက်ျား မရှိဘူး၊ ကျွန်မရဲ့ ကိုယ်ဝန်ကို ဖိမိမှာစိုးလို့ ဆိုပြီး သူခွဲအိပ်တာ ကြာပြီလေ၊ နိုးလာတော့ အခန်းထဲကို တစ်ပိုင်းတစ်စ ကျနေတဲ့ လရောင်ကို သတိထားမိတယ်၊ တော်တော်ကို တောက်ပတဲ့ လရောင်ပဲ၊ လရောင်ကို မြင်လိုက်ရတဲ့အခါ ကျွန်မ ဗြုန်းခနဲ စိုးရိမ်သောကနဲ့ ပူပန်သွားတယ်၊ စိတ်ထဲမှာ ထင့်ခနဲ လေးသွားတယ်၊ အဲဒီလို တစ်ခါမှ မခံစားရဖူးဘူး၊ တစ်ခုခုကို ကြိုသိနေတဲ့ ခံစားမှုမျိုးပါပဲ၊ ဘယ်လိုပြောရမှာလဲ ... အဖေ မမာနေတုန်းက အဖေသေခါနီး သုံးလေးရက် အလိုမှာ ကြိုသိနေတဲ့ ကြေကွဲမှုမျိုးနဲ့ တူတယ် ဒေါက်တာ၊ ကျွန်မ တော်တော်ကို စိတ်တွေ ထိုင်းမှိုင်းသွားတာပါ၊ ဒါပေမယ့် ကျွန်မ အခန်းတစ်ခုချင်း လိုက်ရှာမိတယ်၊ မတွေ့နိုင်ဘူး ဆိုတာလဲ သိနေပါတယ်၊ တကယ်လဲ မတွေ့ပါဘူး၊ ကောင်မလေးအခန်း ကြည့်တော့လဲ ကောင်မလေးကို မတွေ့ရဘူး၊ ဒါနဲ့ပဲ ကျွန်မခြံထဲကို ဆင်းလာခဲ့တော့တယ်၊
အမေ နိုးသွားမှာ စိုးလို့ တံခါးဖွင့်တာ ပိတ်တာ ခြေလှမ်းလှမ်းတာ အားလုံး သာသာလေးပဲ လုပ်ခဲ့တယ်၊ ထူးဆန်းတာ အဲဒီအချိန်မှာ ဒေါသ မရှိဘူး၊ မမြင်အပ်တဲ့ အရာတစ်ခုကို မြင်ရမှာ စိုးရိမ်နေတဲ့ ခံစားမှုပဲ ရှိတယ်။
"ဂျုံစက်ကို ကွေ့ပတ်ပြီး ခြံထောင့်ဘက်ကို လျှောက်သွားလိုက်တဲ့ အခါမှာတော့ ကာလ တော်တော်ကြာအောင် ရှိခဲ့တဲ့ သံသယတစ်ခုဟာ တကယ်ဖြစ်နေတာ တွေ့လိုက်ရတော့တာပါပဲ၊ မြတ်လေးပန်းရုံမှာ ပန်းတွေမှ ဖွေးဖွေးလှုပ်နေတာပဲ၊ ပန်းရုံဘေးက ကုန်းမြင့်ကလေးမှာတော့ ယောက်ျားတစ်ယောက်နဲ့ မိန်းမတစ်ယောက်၊ ဘယ်သူတွေလဲဆိုတာ ကျွန်မချက်ချင်း သိလိုက်တယ်၊ အရင်တစ်ခါတုန်းက သောင်စပ်မှာလို အကွာအဝေမျိုးမှ မဟုတ်ဘဲ ဒေါက်တာရဲ့၊ သိပ်ကိုနီးတဲ့ အကွာအဝေးလေးပဲ၊ သူတို့ ခန္ဓာကိုယ်ပေါ်မှာ ဖြာကျနေတဲ့ လရောင်ကြောင့် အားလုံးကို ထင်ထင်ရှားရှားကြီး မြင်ရပါတယ်၊ ထူးဆန်းလိုက်တာ ကျွန်မမှာ ဒေါသမရှိဘူး၊ သူတို့ လှုပ်ရှားမှုတွေကို အနီးကပ် ရုပ်ရှင်ပြကွက်လိုပဲ ငေးမောကြည့်ပြီး ရပ်ကြည့်နေမိတယ်၊ ကျွန်မယောက်ျားရဲ့ ကိုယ်ခန္ဓာကို အဲဒီတစ်ခါလောက် ဘယ်တုန်းကမှ ထင်ထင်ရှားရှား ကွဲကွဲပြားပြား မမြင်ဖူးပါဘူး၊ နောက်ပြီး သူ့မျက်နှာ၊ ကျွန်မ တစ်ခါမှ ဂရုစိုက် မကြည့်ဘူးတဲ့ အဲဒီမျက်နှာထားကို ကျွန်မ ရွံ့မုန်းလိုက်တာ၊ သူတို့ ကျွန်မကို မမြင်ဘူး၊ ကျွန်မကတော့ သူတို့ကိုသာမက သူတို့ အနီးအနားမှာ မှောက်ကျနေတဲ့ ပန်းခူးတဲ့ ပလတ်စတစ်ဆန်ခါ အနီရောင်လေးကိုတောင် မြင်ရပါတယ်၊ ကောင်မလေး ပုခုံးအောက်မှာ ပိပြားနေတဲ့ ပန်းပွင့်အစုကလေးကိုတောင် မြင်ရပါသေးတယ်၊ ကျွန်မ ရင်ထဲမှာ ရောဂါတစ်ခု ကင်းစင်သွားသလို ဟာခနဲ ပေါ့ပါးသွားတယ်၊ တစ်ချိန်တည်းမှာပဲ အလွန်ရွံရှာစရာကောင်းတဲ့ လောက်ကောင်တွေကို မြင်ရသလို၊ ခွေးအန်တာ ကြောင်အန်တာကို စောင့်ကြည့်နေရသလို သန်ကောင်တွေ ရွစိရွစိဖြစ်နေတာကို မြင်ရသလို အော်ဂလီဆန်လာတယ်၊ ဒါနဲ့ပဲ အိမ်ဘက်ကို ပြန်လှည့်ခဲ့မိတော့တယ်၊
"အဲဒီညက စပြီး ကျွန်မယောက်ျားကို ကျွန်မ စကားမပြောတော့ဘူး၊ ဘယ်သူ့ကိုမှ စကားမပြောတော့ဘူး၊ ဒါပေမယ့် အခန်းပြတင်းပေါက်တွေ ကိုတော့ တူနဲ့ထုပြီး ရိုက်ခွဲပစ်လိုက်တယ်၊ မှန်တွေ အစိတ်စိတ် အမြွှာမြွှာ ကြေကွဲသွားသည်အထိ စိတ်ရှည်လက်ရှည် ခွဲလိုက်တယ်၊ ကျွန်မယောက်ျားက အလွန်အပြစ်ကင်းတဲ့ မျက်နှာနဲ့ ကျွန်မကို ဆွဲဖက်ပြီး နှစ်သိမ့်တယ်၊ ဆရာဝန်ကို အိမ်ပင့်ပြီး ကျွန်မ ရုတ်တရက် စိတ်ဖောက်ပြန်သွားတဲ့ ပုံစံမျိုးနဲ့ ဆေးကုပေးတယ်၊ ကျွန်မကို အရူးတစ်ယောက်လို အနားမှာ အရိပ်တစ်ကြည့်ကြည့် စောင့်နေခဲ့တယ်လေ၊ ဘယ်လောက်များ ရယ်စရာ ကောင်းလိုက်သလဲနော် ဒေါက်တာ၊ ကျွန်မရူးသလား သူရူးသလား အသိသာကြီးပါ၊ ကျွန်မ စကားတစ်ခွန်းမှ မဟဘဲ ကိုယ်ဝန်ကြီးနဲ့ပဲ ပြတင်းပေါက်ကို သစ်သားချပ်တွေနဲ့ ကိုယ်တိုင်ပြန်ရိုက်ဖို့ ကြိုးစားတယ်၊ အမေက ကမန်းကတန်း ကျွန်မကို ချော့မော့ပြီး မေးတယ်၊ 'ဒီပျဉ်ချပ်တွေနဲ ပြန်ကာစေချင်သလား သမီး' တဲ့၊ ကျွန်မက သဘောတူတဲ့ အမူအရာ တွေ့သွားတော့ အမေကိုယ်တိုင် လက်သမားဆရာ ခေါ် ချက်ချင်း ပြင်တော့တာပဲ၊ ပြတင်းပေါက်မှာ ဘာလရောင် ဘာအလင်းရောင်မှ ဖြတ်သန်းလို့ မရအောင် ပိတ်ဆီးနေတာကို ကြည့်ပြီးမှ ကျွန်မစိတ်ချမ်းသာသွားတယ်။ နောက်ညလဲ လသာချင် သာမှာပေါ့၊ ဒါပေမယ့် ကျွန်မမသိဘူး၊ လရောင်ကို ကျွန်မ မမြင်ရဘူးလေ၊ ဒီယောက်ျားအကြောင်း အမေနဲ့ ရပ်ကွက်လူကြီးတွေကို သက်သေပြပြီး ကျွန်မ ကွာရှင်းမယ်လို့ စိတ်ကူးပေမယ့် အကောင်အထည် မဖော်လိုက်ရဘူး၊ ကျွန်မမီးဖွားဖို့ ဝေဒနာကို စပြီး ခံစားလိုက်ရလို့ပေါ့၊ ကျွန်မ အိမ်မှာပဲ မီးဖွားဖို့ကို နဂိုက စီစဉ်တယ်၊ ဒါပေမယ့် ကလေးက အပြင်ကို တော်တော်နဲ့ အပြင်ကို ရောက်မလာဘူး၊ ကျွန်မမှာ ရှိသမျှ အင်အားတွေလဲ ကုန်ဆုံးခဲ့တာ ကြာပါပြီ၊ နောက်ဆုံးတော့ သတိလစ်လုနီးပါး အခြေအနေအထိ ရောက်သွားတယ်၊ ကျွန်မ ဆေးရုံကို ဘယ်လို ရောက်လာသလဲ မသိပါဘူး၊ ကျွန်မ ဘာဒုက္ခဝေဒနာ ကြုံခဲ့တယ် ဆိုတာလဲ ကျွန်မ မသိတော့ပါဘူး၊ ကျွန်မ အာရုံထဲမှာ ပေါ်နေတာ တစ်ခုတည်းပဲ ရှိတယ်၊ လရောင်အောက်က မြတ်လေးပန်းပွင့်တွေနဲ့ ကုန်းမြင့်ပေါ်က လူနှစ်ယောက်ပေါ့။
"ကျွန်မ သမီးလေးဟာ အသက်ပါမလာဘူး ဒေါက်တာ၊ သမီးမျက်နှာကို ဖြတ်ခနဲ ကျွန်မ မြင်လိုက်ရပါတယ်၊ သိပ်ချစ်စရာကောင်းတဲ့ ကလေးပဲ သမီးကို ကျွန်မ ကိုင်ကြည့်ပါရစေ ဆိုတာတောင် ဆရာမတွေက ခွင့်မပေးဘူး၊ ဒါပေမယ့် ကျွန်မ သိပါတယ်၊ သမီးရဲ့ ပါးပြင်ကလေးတွေ ပြာနှမ်းနေပေမယ့် ပန်းပွင့်ချပ်ကလေးတွေလို နူးညံ့နေမယ် ဆိုတာ ကျွန်မ သိပါတယ်။
"သမီးကလေးဟာ ကျွန်မ ရင်ခွင်ထဲကို ရောက်ဖို့ ကြိုးစားလျက်သားနဲ့ မရောက်လိုက်ရ ရှာဘူးလို့ ကျွန်မ ဝမ်းနည်းနေတယ်၊ ကျွန်မရဲ့ ကြေကွဲမှုတွေကြောင့် ကျွန်မဟာ ကိုယ်ကိုယ်တိုင်ကိုတောင် မေ့လျော့နေခဲ့တယ်၊ ကျွန်မ ထမင်းစား ပြီးပြီလား၊ အိပ်ပြီးပြီလား ဆိုတာ ဘာမှမသိဘူး၊ အချိန် ဘယ်လောက် ကြာအောင် ကျွန်မကိုယ်ကျွန်မ မေ့နေမိတယ် ဆိုတာလဲ ကျွန်မ မသိပါဘူး ဒေါက်တာရယ်၊ ပထမဆုံး အကြိမ် ကျွန်မ ရေချိုးခွင့်ရတဲ့နေ့ ခြံထဲဆင်း လမ်းလျှောက်ခွင့်ရတဲ့ နေ့မှာပဲ သစ်ပင်က ပိုးတွေကို သတ်တဲ့ ပိုးသတ်ဆေးဘူး တစ်ဘူး တွေ့တာနဲ့ အကုန် သောက်ပစ်လိုက်မိတာ ပါဘဲ၊ ကျွန်မ ဘာဖြစ်လို့ သေချင်တာလဲလို့ ဒေါက်တာ သိသွားပြီလား ဒေါက်တာ၊ သိရင် ကျွန်မကို ပြောပြပါဦး၊ ကျွန်မ ဘာဖြစ်လို့ သေချင်ခဲ့တာလဲ၊ သမီးကြောင့်လား၊ ကျွန်မယောက်ျား ကြောင့်လား"
အမျိုးသမီးသည် မနားမနေ တတွတ်တွတ် ပြောနေရာမှ ကျွန်မကို ဖျတ်ခနဲ မော့ကြည့်ကာ မေးခွန်း မေးလိုက်၏။ ရုတ်တရက် ဘာပြန်ပြောရမှန်း မသိသောကြောင့် အနည်းငယ်ပြုံး၍ နှစ်သိမ့်လိုက်မိပါသည်။
"သေတယ်ဆိုတာ ကျွန်မတို့အလုပ် မဟုတ်ဘူး၊ သဘာဝရဲ့ အလုပ်ပဲ၊ နောက်ပြီး သေသွားလို့ ဘယ်သူ့ကိုမှ အစ်မ မနိုင်နိုင်ဘူး၊ အစ်မ အသက်ရှင်နေမှ နိုင်မှာ၊ နိုင်အောင် ကြိုးစားနိုင်မှာ"
ကျွန်မ တတ်သလောက် မှတ်သလောက် အားပေးလိုက်တော့ အမျိုးသမီးက တောက်ပသော မျက်လုံးများဖြင့် ကျွန်မကို ကြည့်ကာ ခေါင်းညိတ်လိုက်၏။ အမျိုးသမီး၏ မျက်လုံးများမှာ စိတ်ဖောက်ပြန်သူ၏ မျက်လုံး မဟုတ်တာ သေချာပါသည်။
"ကျွန်မ ဆေးရုံပေါ်မှာ သတိရရချင်း ကျွန်မကိုယ်ကျွန်မ ဘာဖြစ်သွားတယ် ဆိုတာ သိလိုက်ရင် သိလိုက်ချင်း ပထမဦးဆုံး ခံစားချက်ကတော့ အတိုင်းအဆမရှိ ဝမ်းသာသွားတဲ့ ခံစားချက်ပါပဲ၊ ကျွန်မ မသေဘူးလို့ သိလိုက်ရတဲ့အခါ ကျွန်မ ဆေးရုံက ဆရာဝန်တွေ အားလုံးကို ကျေးဇူးတင်သွားတယ်၊ နောက် ကျွန်မကို ဆေးရုံပို့ပေးတဲ့ အမေ့ကိုရောပေါ့၊ ကျွန်မသေလို့မှ မဖြစ်ဘဲ ဒေါက်တာရယ်၊ ကျွန်မယောက်ျားနဲ့ ကျွန်မ မကွာရှင်းရသေးသမျှ ကျွန်မသေလို့ မဖြစ်သေးဘူး၊ ကျွန်မရဲ့ စည်းစိမ်ချမ်းသာ ပေါ်မှာ သူဆက်လက် ခံစားနေမှာကို ကျွန်မ မမြင်နိုင်ဘူး၊ ဒီအကြောင်းကို ဘာဖြစ်လို့ ကျွန်မ မတွေးမိခဲ့သလဲ ကျွန်မ တော်တော်တုံးတဲ့ မိန်းမပဲ၊ ကျွန်မနားမှာ သမီး မရှိပေမယ့် အမေ ရှိတယ်လေ၊ တော်ပြီပေါ့ ... ဘာများ လိုဦးမှာလဲ။
"ဒါပေမယ့် ကျွန်မ အာရုံထဲမှာ အမြဲလွှမ်းမိုးနေတဲ့ မြင်ကွင်း တစ်ခုတော့ ရှိတယ် ဒေါက်တာ၊ အဲဒီမြင်ကွင်း ပျောက်သွားအောင် ကျွန်မကို ကုပေးပါ၊ လရောင်အောက်က ပြာလဲ့နေတဲ့ ကုန်းမြင့်လွင်ပြင်လေး ပေါ်က ပူးကပ်နေတဲ့ ကိုယ်ခန္ဓာနှစ်ခုကို ကျွန်မ ဘယ်လိုမှ မဖျောက်နိုင်ဘူး ဖြစ်နေတယ်၊ အဲဒီ လရောင်အောက်က ကျွန်မ မြင်လိုက်ရတဲ့ ကျွန်မယောက်ျားရဲ့ မျက်နှာဟန်ပန်ကို ကျွန်မ အမြဲသတိရနေတယ်၊ မသတီစရာ တစ်ခုခုကို အော်ဂလီဆန်ဆန် သတိရနေတဲ့ ခံစားချက်မျိုးပါ၊ တစ်ချိန်တည်းမှာပဲ အဲဒီ ကိုယ်ခန္ဓာနှစ်ခုတည်းက တစ်ခုဟာ ကျွန်မ ဖြစ်ဖြစ်သွားတယ်၊ အဲဒီအခါမှာ ကျွန်မ သိပ်မုန်းတာပဲ ဒေါက်တာ၊ ကျွန်မ မှားခဲ့တယ်၊ သိပ်ကို မှားခဲ့ပါတယ်၊ အဲဒီညက မြတ်လေးပန်း သွားခူးခဲ့မိတာကိုက ကျွန်မ အမှားပါ၊ အဲဒီတုန်းကသာ ကျွန်မ ပန်းမခူးမိခဲ့ရင် ဒီလို အဖြစ်အပျက်တွေ ဆက်တိုက် ဖြစ်လာမှာ မဟုတ်ဘူး၊ နောက်ပြီး ကျွန်မ ပန်းခူးတဲ့ညမှာ လသာမနေခဲ့ရင်လဲ ဒီအဖြစ်အပျက်တွေ ဖြစ်လာမှာ မဟုတ်ဘူးလို့ ကျွန်မထင်တယ်။
"အခုတော့ ကျွန်မ လရောင်ကိုလဲ မမြင်ချင်ပါဘူး၊ လရောင်ကို ကျွန်မ ကြာကြာမြင်ရရင် ရူးမှာပဲ၊ ဘာဖြစ်လို့လဲဆိုတော့ ဒီကိစ္စမှာ လရောင်က တရားခံ ဖြစ်နေလို့ပဲ"
အမျိုးသမီး၏ မျက်နှာကို ကျွန်မ ငေးမောကြည့်မိသည်။ ကျွန်မ ခေါင်းယမ်းလိုက်ချင်သည်။ သို့သော် ကျွန်မ ငြိမ်သက်စွာ နေခဲ့ပါသည်။
လူတစ်ယောက်၏ ဖောက်ပြန်မှုသည် လရောင်နှင့် မည်သို့မျှ မသက်ဆိုင်ကြောင်း သူမ သိလာလိမ့်မည်။ သို့သော် ထိုကဲ့သို့ သိခွင့် ရသွားမှာကိုလည်း ကျွန်မ စိုးရိမ်မိပါသည်။
"တကယ်တမ်းကျတော့ ဒေါက်တာရေ၊ ဒေါက်တာတို့ ဆေးကုပေးရမှာက ကျွန်မ မဟုတ်ဘူး၊ လသာတဲ့ညတိုင်း ဖောက်ပြန်တတ်တဲ့ ကျွန်မယောက်ျားကိုသာ ဆေးကုပေးရမှာပါ၊ ဒေါက်တာတို့ ကုပေးလို့ ရမယ် မဟုတ်ဘူးလား"
သူမမျက်ဝန်းများ ငြိမ်သက်နေပါသည်။ ရူးသွပ်မှုမျိုး မတွေ့ရပါ။ သူမ တကယ်ပင် အကြံဥာဏ် တောင်းနေခြင်း ဖြစ်ပါသည်။ သူမ၏ ယောက်ျားကို သူမ မုန်းတီးစက်ဆုတ်သည် ဆိုခြင်းမှာ တကယ်မှ ဟုတ်ရဲ့လားဟု ကျွန်မ သံသယ ဖြစ်မိသည်။ သို့သော် ထိုသံသယ မှန်မမှန်ကိုတော့ ကျွန်မ သိခွင့်မရလိုက်ပါ။ သူမကို ကျွန်မ နောက်တစ်ကြိမ် ပြန်မတွေ့ ရတော့သောကြောင့် ဖြစ်သည်။
ထိုနေ့ညက ဆေးရုံအထွက်တွင် သူမအား ကြင်နာစွာ ဖေးမ ခေါ်ဆောင်သွားသော သူမ၏ ခင်ပွန်းကို သူမ ကြည့်လိုက်သော မျက်လုံးများကိုတော့ ကျွန်မ မကြာခဏ သတိရနေမိသည်။ ထိုမျက်လုံးများသည် လှောင်အိမ်တစ်ခုကို ကြည့်သော သားကောင်၏ မျက်လုံးမျိုး ဖြစ်သည်။
---------------
ဂျူး
ဟန်သစ်၊ ဩဂုတ်၊ ၁၉၉၄။

တောပွဲ

တောပွဲ (နုနုရည်​ (အင်းဝ))
-------------------------------
ဟဲ့ ဟဲ့ ဘီးဆံပတ်မတို့၊ အမယ်ကြီးအိုမတို့ ဘယ်ရောက်ကုန်ကြပလဲ၊ လာကြစမ်းပါဦးဟဲ့ ငါ့နားကို။ ငါ့ဘော်လီအင်္ကျီချိတ် တပ်ပေးစမ်း၊ ညည်းတို့မလည်း အံ့တာပဲ။ လင်တွေကိုယ်စီ ပါရက်သားနဲ့လည်း ကောင်လေးတွေနား သွားဟီလာ တိုက်နေတာပဲ၊ ညည်းတို့ဟာ တောသားလည်း မရှောင်၊ မြို့သားလည်း လာခဲ့၊ အဝီစိက ငရဲသားတောင် အလွတ်ပေးမယ့် မိန်းမလျာတွေ မဟုတ်ဘူး။
ဘော်လီချိတ်ကို အတွင်းချိတ် တပ်နော်၊ ဒါမှ ကျပ်ကျပ်ကလေးမှ ရှေ့ ဘော်လီခွက်ထဲကို ရေမြှုပ်ထိုးထည့်လို့ ကောင်းတာ၊ ဘယ်သူ ... ညည်းက ... ဘီးဆံပတ်မပဲ ငါတော့ လွယ်လွယ် ခေါ်လိုက်တော့တာပဲ။ အသက်ကြီးပဟဲ့၊ ခြောက်ဆယ်ကျော်၊ ဖောက်သည်မျှော်လို့ မရတော့တဲ့အရွယ်၊ သတိက မေ့တယ်၊ ညည်းတို့က ဒီတောပွဲကျမှ ချီကောက်ခေါ်ရတဲ့ မင်းသမီးတွေ၊ ငါ့တပည့်ရင်းတွေ နာမည်တွေတောင် အကုန်မှတ်မိတာ မဟုတ်ဘူး။
ဟဲ့- ဟိုဟာမ၊ အမယ်ကြီးအိုမ၊ သေတ္တာထဲက ထိုင်မသိမ်း အစိမ်းထုတ်၊ ညည်းမျက်နှာကလေ တကယ်ရှုံ့တွတွ၊ လုံးတုံးတုံးလေး၊ အမယ်ကြီးအိုမျက်နှာ အတိုင်းပဲ၊ ဟို ဘီးဆံပတ်မကတော့ ဆံပင်ရှည်ကို မိန်းမနဲ့တူအောင် ပတ်လိုက်ရတဲ့ ဘီးဆံပတ်။ အင်း ဝဋ်တွေဟဲ့၊ ဝဋ်တွေ၊ ဘုရားဆုပန် ယောက်ျားစင်စစ် ဧကန်ဖြစ်လျက်နဲ့ မိန်းမစိတ်တွေ ဝင်၊ မိန်းမပုံတွေ ဖမ်းပြီး မိန်းမယောင်တွေ ဆောင်နေကြတာ။ မိန်းမနဲ့ မတူတူအောင် ဝတ်၊ မတူတူအောင် နေ၊ အို ဘယ်လိုနေနေ၊ မိန်းမလျာဟာ မိန်းမလျာပဲ၊ မိန်းမအစစ်မှ မဟုတ်တာ။
ဪ- သူတို့တွေလည်း အပြစ်မပြောဘူး၊ ငယ်ရွယ်သူတွေကိုး။ ကိုယ် ငယ်ငယ်တုန်းကလည်း ဒီလိုပဲဥစ္စာ၊ သူ့ထက်ကဲ၊ ရွှေပြည်စိုးချင်တောင် စိုးဦးမယ်။ အသက် ဆယ့်ရှစ် ဆယ့်ကိုး နတ် စကတော့ ဒီလိုတောပွဲတွေ စ ကရတာပေါ့၊ လှည်းကြီးတွေနဲ့ တစ်ရွာဝင် တစ်ရွာထွက် လျှောက်ကရတာ၊ ဒီလို မော်တော်ကားတွေ ဘာတွေနဲ့ မဟုတ်သေးဘူး။ အို- လှည်းကြီးပေါ်မှာ မှန်ကြီးထောင်ပြီး မိတ်ကပ်တွေ လိမ်းတာ၊ လှည်းဘေးနားမှာ လူတွေက ဝိုင်းလို့၊ အဲဒါကို အဟုတ်ကြီး မှတ်လို့၊ အမယ်လေး ငါ့ကို ချောလို့ လှလို့ ဝိုင်းအုံကြည့်ကြတာပေါ့၊ မပြီးဘူး၊ မိတ်ကပ် လိမ်းနေတာ၊ မှန်ကြီးတစ်ချပ်နဲ့။ ခုပြန်တွေးကြည့်၊ ဘယ်လောက်များ ကြိမ်သုံး​ချောင်းပူး လောက်နဲ့ စရနယ်ဖို့ ကောင်းသလဲ။
ဟဲ့- ဘီးဆံပတ်မ၊ ခြေအိတ်သုံးရက် ကနားတွေ မဟုတ်ဘူး၊ တစ်ညနဲ့ တစ်ရက်ပဲ၊ ဒီလို အင်းပိတ်ချိန်ဆို နတ်ကမယ့် အိမ်တွေက ကိုယ့်အိမ်ရှေ့တွေမှာ ကနားတဲတွေ ကိုယ်စီ ထိုးထားကြ၊ ပြီးတော့ နတ်ကတော်ခေါ်၊ တစ်အိမ်ကစပြီး တစ်ည၊ တစ်ရက်၊ တစ်ည၊ တစ်ရက်၊ ဆက်တိုက် ပြောင်းကသွားရုံပဲ။ ဒီရွာ ကမယ့် အိမ်ကုန်တော့ နောက်တစ်ရွာပြောင်း၊ တစ်ပွဲကို ရှစ်ထောင်ပဲ၊ ဆိုင်းဖိုး၊ ဓာတ်ဆီဖိုး၊ တပည့်တပန်းပေး၊ ဘာညာ သုံးထောင်နုတ်၊ တစ်ပွဲ ငါးထောင်ကျန်၊ ပင်တော့ ပင်ပန်းတာပေါ့။ တောတွေ ရက်ဆက်လျှောက်သွား၊ ခုန်ပေါက်ကရနဲ့ မပင်ပန်းဘဲ ရှိမလား၊ ဒါပေမဲ့ အင်းပိတ်ချိန် ဒီ​နွေတစ်ရာသီဆို ပွဲခုနစ်ဆယ်လောက် ရတာ၊ ငါးပိ၊ ငါးခြောက်လည်း တစ်မိုးတွင်းစာ ဖူလုံရော့။
ငါးခြောက်က "ကျွဲဆွဲ" တဲ့ စုံတွဲတွေဆီက ရတာလေ။ ကနားတဲ အလယ်ကောင်မှာ ခေါင်ဖောက်ပြီး ကျွဲစင် လုပ်ထားပါကောလား၊ အဲဒီ ကျွဲစင်မှာ ငါးခြောက်ပြားလေးတွေ စီပြီး ချိတ်လို့၊ တကယ်တော့ နယ်ဆိုင်ရာပိုင်ရာ နံကရိုင်း မယ်တော်ကြီးနဲ့ သားတော် အဿကုမ္မာ မင်းသားတို့ကို ပူဇော်ပသထားတာပေါ့ (ပွဲပြီးရင်တော့ ဒီငါးခြောက်က နတ်ကတော် ပိုင်တာပေါ့) လေ။
"ကျွဲဆွဲ" တယ် ဆိုတာကလည်း ဆိုင်တဲ့ ယောက်ျားလေး၊ မိန်းကလေး အိမ်ထောင်ပြုပြီးရင် နယ်ဆိုင်ရာပိုင်ရာ နံကရိုင်း မယ်တော်ကြီးနဲ့ သားတော် အဿကုမ္မာ တို့ကို ဆွေတော်မျိုးတော် စာရင်းသွင်းဖို့ အပ်နှံတာ၊ ပြသတာပဲ။ လွမ်းတင်းပါ ဘုရား၊ နံကရိုင်း မယ်တော်ကြီးက ကျွဲမကြီးဆိုတော့ "ကျွဲဆွဲ" တယ်လို့ ခေါ်တာပေါ့။ အိမ်တွေမှာ မိန်းကလေး ရှိတဲ့အိမ်က အိမ်ထောင်ပြုရင် ကျွဲဆွဲရတယ်၊ ယောက်ျားလေး ရှိတဲ့ အိမ်ကတော့ ကျွဲမဆွဲရဘူး၊ ပျော်ပွဲပေးရုံပဲ။
မြို့ပွဲမှာ ကျွဲဆွဲရင်တော့ တခမ်းတနားတွေ ဘာတွေလုပ်ကြတာပေါ့၊ ကျွဲ ဆွဲမယ့် စုံတွဲအတွက် ပါရတဲ့ ခန်းဝင်ပစ္စည်း ထမင်းအိုး၊ ဟင်းအိုး၊ ပန်းကန်ခွက်ယောက် ပေါ့လေ (ဒါတွေကို မြေအိုးတို့၊ ပလတ်စတစ်တို့နဲ့ လုပ်လည်း ရပါတယ်)၊ အဲဒါတွေကို ခုခေတ်ပေါ်တဲ့ ဘာတဲ့၊ အမယ်မင်း ဆိုလား၊ မယ်လမင်း ဆိုလား ဈေးကြီးပြီး လှကလှနဲ့၊ ပေါ့ပေါ့လေးတွေ၊ ဖိုက်ဘာ ခွက်လေးတွေနဲ့ လုပ်ကြတယ်၊ ကနားတဲထဲမှာ "အခါတော်ပေးတာက ..." တွေ ဘာတွေနဲ့ နတ်ကတော်က လက်ထပ် ပေးရသေးတယ်။ နံကရိုင်း မယ်တော်ကြီးနဲ့ သားတော်ကို ပူဇော်ကန်တော့ ထားတာတွေကလည်း မုန့်ပုံးတို့၊ ကွင်းဖျော်ရည်တို့ပေါ့။
အို ... ဒီတောပွဲမှာတော့ ဘာ အမယ်မင်း ... မယ်လမင်းတွေ လုပ်မနေနဲ့၊ မြေအိုး ပဲ၊ မြေပန်းကန် ပဲ၊ ဆွဲမယ့် စုံတွဲကလည်း တစ်တွဲတည်းများ မမှတ်နဲ့၊ အစုလိုက် အပြုံလိုက်၊ တစ်နှစ်လုံး မင်္ဂလာဆောင်ထားသမျှ အတွဲတွေ အကုန်လုံး၊ အင်းပိတ်ချိန် နတ်ကန်တော့မှ စုပြီး ဆွဲကြတာ၊ ငါးခြောက်ပြားတွေ ကိုယ်စီနဲ့ လာကြစမ်း၊ ကန်တော့ကြေးက စုံတွဲတစ်တွဲ သုံးဆယ့်ခုနစ်ကျပ် (အဲဒါ တစ်ခုကတော့ ကိုက်တယ်၊ မဆိုးဘူး၊ တစ်ပွဲ လေးငါးရာ၊ ကနားကြေး ရှစ်ထောင်နဲ့ မဆိုင်ဘဲ ရတာ ) ပဲ။ အဲဒါတွေ အဲဒါတွေကို ညည်းတို့ နောက်တက်မယ့် ဟာတွေ သိစေချင်တာ၊ တတ်စေချင်တာဟဲ့။ ဪ ... ပြောရင်းဆိုရင်း အမယ်ကြီးအိုမ၊ နတ်ကတော် လုပ်စားမယ့် ကောင်မက ထိုင်မသိမ်း ချိတ်ထိုးတာတောင် သောက်ဖြစ်ရှိအောင် မထိုးနိုင်ပါလား၊ အံ့တာပဲ၊ ဟဲ့ ... ဘီးဆံပတ်မ၊ ရှေ့သွားကြည့်စမ်း၊ တစ်ရွာလုံးက နတ်ဝင်သည်တွေ မကုန်သေးဘူးလား၊ ဒီနယ်တွေလောက် နတ်ယဉ်တာများ တွေ့ဖူးပေါင်တော်၊ အဘိုးကြီး၊ အဘွားကြီး၊ အပျို၊ အအို၊ လူပျို၊ လူအို၊ ကလေးက စပြီး ယဉ်လိုက်တဲ့ နတ်၊ ဝင်လိုက်တဲ့နတ်၊ ကလိုက်တဲ့နတ်၊ အင်းပိတ်ချိန် ဒီနတ်ပွဲတွေဟာ သူတို့ရွာရဲ့ ဒန့်စ်ကတဲ့ ပါတီပွဲများကျလို့၊ နတ်ပုံတော်နဲ့ ဆိုင်း သူတို့လက် အပ်ပြီး နတ်ကတော် ထိုင်သာ နေလိုက်တော့။ နတ်ပေါင်းကလည်း စုံပါ့ ...၊ သေတဲ့ ဆွေမျိုးမှန်သမျှ နတ်ဖြစ်တဲ့ အရပ်လေ။ လူသေရင် သေတဲ့သူရဲ့ ပုဆိုး၊ ထဘီတွေ သိမ်းထားကြပြီး နတ်ပွဲကျရင် အဲဒီ ပုဆိုး၊ ထဘီတွေ အခေါက်လိုက်၊ အထပ်လိုက်ကြီးကို ပစ်ချ၊ နတ်ကတော်တွေက တွေ့ရာ ထဘီတွေ ဆွဲဝတ်ပြီး နတ်ဝင် ရတယ်။ သူတို့ ဆွေမျိုးတွေက မေးရင် ဘယ်သူဘယ်ဝါ ဆိုတာ မှန်အောင် ပြောနိုင်ရတယ်။ အဲဒီတော့ နတ်ကတော်မှာ ဘယ်လို လုပ်ရတယ် မှတ်လဲ။
အို- ပွဲမဝင်ခင် ပြင်ကကျင်းပေါ့၊ ရောက်တာနဲ့ ဒီအိမ်မှာ ဘယ်သူ သေဖူးတုံး၊ နာမည် ဘယ့်နှယ် ခေါ်တုံး၊ ဘယ်လို ထဘီအင်္ကျီ အဆင်မျိုး ကြိုက်တတ်တုံးပေါ့၊ ထောက်လှမ်းရေး အရင်ဝင်ထားရတာ ပေါ့လို့။ သောက်ရှက်တွေ ကွဲပြီးပြီလေ၊ ဒီနယ်အကြော နားမလည်တဲ့ မိန်းမလျာ တပည့်တစ်ယောက်ပေါ့၊ ဂျက်စီမ၊ နတ်ပွဲမှာ ထဘီထုပ်ကြီး ပစ်ချပေးတော့ တခြား နတ်ကတော် မိန်းမလျာမတွေက ထဘီတွေ ကောက်ဆွဲ ဝတ်တဲ့ပြီး နတ်ဝင်ကြတာပေါ့။
ကနားရှင်တွေက ဘယ်သူလဲဆို "မအေးစိန်တော့် မအေးစိန်" ပေါ့၊ "မလှရီတော့် မလှရီ" ပေါ့၊ အဲဒါကို ဂျက်စီမက နားမလည် ပါးမလည်နဲ့ ထတဲ့ပြီး ထဘီတစ်ထည် ဆွဲဝတ်ကတော့ မေးတာပေါ့ "ဘယ်သူလဲ" လို့ဆိုတော့ သူ မဖြေတတ်တော့ဘူး။ အဲဒီတင် ရှက်ရှက်နဲ့ ဖြေချလိုက်တယ်လေ၊ "မေဝင်းမောင်တော့် မေဝင်းမောင်" တဲ့၊ ကဲ- သောက်ရှက်က လှလှကြီး ကွဲတော့တာပေါ့။
ဟဲ့- ကဲ၊ ဘီးဆံပတ်မရေ၊ ဘယ့်နှယ်လဲ၊ နတ်တွေ မကုန်သေးဘူးလား၊ မဖြစ်ပါဘူး၊ ငါကိုယ်တိုင် ထွက်ဖြတ်မှ ပြတ်မှာ၊ ငါ့ဆိုင်းသမားတွေလည်း လက်အန် သေပြီး ဆိုင်းတီးရင်း နတ်ဖြစ်လိမ့်မယ်၊ ငါလည်း ပုပ္ပားရော၊ ပခန်းရော ဆင်းလိုက်ရမှာ မဟုတ်တော့ဘူး၊ အမယ်ကြီးအိုမ၊ ဒေါင်းတောင်တွေ၊ ပုပ္ပား စားတော်စာတွေ အဆင်သင့် လုပ်ထားဟေ့။
"ကဲ- ကဲ- နတ်အပေါင်းတို့ ပျော်ပါ၊ ပျော်ပါ၊ တစ်နှစ်တစ်ခါ ပျော်ရတာ ၊ ပျော်တာလည်းပျော်၊ ကျွဲစင်ကိုလည်း သိပ်မဆွဲနဲ့၊ ကျွဲစင်ကြီး ပြိုကျလာဦးမယ်၊ ဟော ဟော ဝင်လာပြန်ပြီ နှစ်ယောက်၊ ကဲ- ပြော ပြော ဘာနတ်လဲ၊ မပြောနိုင်ရင် နတ်စည်းဝိုင်းထဲ ဝင်မလာနဲ့"
"အိုင် လပ်ဖ်ယူ မိုးသန်း အိုင်ကဲန်ဆေး"
"ဟဲ့ ဘိုကတော် ဘိုမင်းဟဲ့၊ ဘိုကတော် ဘိုမင်းနတ်၊ ကာဖီရေ ဆက်၊ ကာဖီရေ ယူခဲ့ ယူခဲ့ ဘယ်မလဲ"
ကဲ- တီးလိုက်ပါဦး ရွာစားရေ၊ ဘိုသံလေး။ စုံတယ် နတ်တွေကတော့၊ ဟိုတုန်းက ချောင်းထဲမှာ သင်္ဘောနစ်သေတဲ့ ဘိုလင်မယားစုံတွဲ နတ်ဖြစ်တာတဲ့။ ဟော- တွေ့လား ဘိုနတ် ဝင်နေလိုက်တာ၊ ငါးဖမ်းစားတဲ့ နှစ်ယောက်က ဘိုက ကနေလိုက်တာများ အကျ၊ ဟဲ့- ဘီးဆံပတ်မ ကြည့်စမ်း၊ ဟိုမယ် အရပ်သူ အရပ်သားတွေ လိမ်နေတာ ဘယ်လောက် ပိရိတုန်း၊ ဘယ်လောက် သပ်ရပ်တုန်း၊ ညည်းတို့ လုပ်စားတဲ့ ဟာမတွေထက် အများကြီး သာတယ်။ အဲဒါကြောင့် ငါ "က" ရင်၊ ငါ "ပြ" ရင် သေချာကြည့်၊ သေချာမှတ် ဆိုတာ၊ ဟင်း- အသက်ကြီးသွားလို့နော်၊ ငါ လိမ်ပြလိုက်ချင်တယ်၊ ကိုယ့်ခေါင်းစွဲနတ် ဘယ်လောက်ထက်ထက်၊ မုသားမပါ လင်္ကာမချောဘူး ဟဲ့၊ ဒီလို ဗဟုသုတမရှိ၊ ဘာမရှိ၊ ရိုးရိုးအအ နယ်မျိုး၊ တစ်နယ်လောက်ကို လှည့်နေတတ်လို့ကတော့အေ၊ ညည်းတို့ တစ်သက်စားရော့ပဲဟဲ့ နားလည်လား။
"ကဲ ကဲ နတ်သစ်တွေ ရှိသေးလား၊ ရှိသေးရင် ထွက်၊ ထွက်၊ အေး၊ ဘယ်သူ ဘယ်ဝါဆိုတာ နာမည်ပြောနိုင်မှလည်း ထွက်၊ မဟုတ်လို့ကတော့ တုန်တောင် မလာနဲ့ဟေ့"
ဪ ဒါလောက် အော်ထားတာတောင်၊ "နဂါးသိုက်" ဆိုပြီး မိန်းမနှစ်ယောက် လှိမ့်ဝင်လာသေး၊ "မိန်းမတို့အကြိုက် နဂါးသိုက်" လို့တောင် အော်ရမလို ကျနေပြီ။ သိုက်ဆက်ရှိတဲ့ သူတိုင်း "နဂါးသိုက်" ဆိုပြီး အချိန်မရွေး ထဝင်လိုက်လို့ ရတာကိုး။ လက်နှစ်ဖက်ပူး၊ အပေါ်​မြှောက် တွန့်လိမ်ပြီး တစ်ကိုယ်လုံးသာ တွန့်လိုက်၊ လိမ်လိုက် နဂါးသိုက်၊ နဂါးသိုက်ပဲ၊ ဟိုမယ်ကြည့်လေ မိန်းမနှစ်ယောက်၊ အမယ်လေး အတတ် အတတ်၊ နဂါးအရှင်ထက်တောင် သူတို့က တွန့်လိမ်နေ သေးတယ်။ မြို့ပေါ်က ဆွေမျိုးနီးစပ် တူမတစ်ယောက်ဆို တွန့်လိမ်ရုံတင် မဟုတ်ဘူး ဖျာပေါ်မှာ တစ်ကိုယ်လုံး နှစ်ပတ် သုံးပတ် လှိမ့်နေလို့။
"ဪ ညည်းတို့မလည်း အံ့တာပဲ၊ အပျိုလေးတန်မဲ့နဲ့ အလူးတွေ အလှိမ့်တွေတောင် လုပ်တတ်၊ ဟုတ်လား" ဆိုတော့ "အို- မာမီကလည်း မာမီ နာမည်ကြီးအောင်လို့ လုပ်ပေးရတာ ဥစ္စာ" တဲ့လေ၊ ကဲ။
"ထထ မေမြို့ထ သို့မဟုတ် ပြင်ဦးလွင် ထထ မြူခိုးလေးများ အုံ့ဆိုင်းပါလို့ပင် ထထ ပန်းကမ္ဘာမျှော်စင် ထ"
ဟောတော် ဝင်ကြပြန်ပြီ၊ တရုတ်နတ်။ အမယ်လေး သူတို့က သီချင်းတွေတောင် ရနေပြီ။ ကိုယ်တောင် မပြောလိုက်ရဘူး၊ တုံချမ်းချမ်းနဲ့ မေမြို့ သို့မဟုတ် ပြင်ဦးလွင်ဟာ တရုတ် နတ်ချော့သီချင်း ဆိုတာ သင်းတို့က ကျွမ်းနေပါကောလား။ ကဲ- ဝင်ကြစမ်း ဝင်ကြစမ်း။
"ဟဲ့- ဘာလဲ၊ ထဘီကို မဆွဲနဲ့လေ၊ ဪ- ဘယ်သူလဲလို့၊ တော်ကိုး၊ ကျုပ်က အမူးသမား ကောင်လေးတွေ မှတ်လို့၊ ရယ်မနေနဲ့ မဟိုဒင်းကြီး၊ ပြော၊ ဒီနှစ် ဘာကိစ္စ တော်က နတ်မကရတာတုံး"
"မကနိုင်ဘူး၊ ပိုက်ဆံ မရှိဘူး"
"အမယ်လေး အင်းပိုင်၊ ကွင်းပိုင်တွေကများ၊ မညည်းနဲ့ နိမိတ် မရှိဘူး"
"အဟုတ်ပြောတာ ရှိလို့ကတော့ ကျုပ်အကြောင်း တော်သိသား၊ ငယ်တုန်းက နှစ်ပွဲဆက်တောင် ကခဲ့သေးတာ"
"ဒါဖြင့် နောက်နှစ်၊ နောက်နှစ် ကမှာလား ပြော"
"အဆင်ပြေရင်ပေါ့၊ အဆင်ပြေရင် ကမှာပေါ့"
"ပြောပြန်ပြီ၊ နိမိတ်မရှိ၊ နမာမရှိ၊ ပြော၊ ကမှာလား"
"အေးပါ ကပါ့မယ်၊ ကပါ့မယ် ကဲ"
"လာခဲ့ ရိုက်၊ လက်ဝါးချင်း"
သေချာသွားပြီ၊ နောက်နှစ်အတွက် တစ်ပွဲ၊ ဒီလိုတွေကလည်း လုပ်ရတယ်လေ၊ ပွဲများမှ ပိုက်ဆံရမှ၊ အိုစာမင်းစာလေး စုရ၊ ဆောင်းရမှာ။ အသက်ကြီးပြီ နောက်လေးငါးနှစ်ဆို ဒီတောပွဲတွေ ဘယ် လျှောက်လာနိုင်တော့မတုန်း။ ကိုယ်သေရင်လည်း ကုသိုလ် ရိက္ခာထုပ်ကလေးက ပါသွားဦးမှ။ ငရဲအိုးနှုတ်ခမ်း ပတ်ပြေးနေရတဲ့ နတ်ကတော် ဘဝ။ "သတ်စေ" အမိန့်ချခဲ့ရတဲ့ ကြက်တွေ၊ ငါးတွေလည်း နည်းရော့လား၊ ပြောချင်ရာတွေလည်း လျှောက်ပြော။ ညကျမှ ပုတီးကြီး တဂျောက်ဂျောက် လုပ်နေလို့ကလည်း တယ်မဟုတ်သေးဘူး။ ဇာတိရွာလေးမှာ ကျောင်းလေးတစ်ဆောင် ဆောက်လှူပြီး ဝိပဿနာနဲ့ အရိုးထုတ်ချင်တယ်။ တကယ် တကယ်၊ ဘုရားစူးရစေရဲ့၊ လင်စိတ်သားစိတ်လည်း ကုန်ပါပြီ။
အို- ဟဲ့ ဟဲ့၊ ဒီနတ်တွေက ဘာတုံး၊ အမူးသမားနတ်တွေ၊ ထွက် ထွက်၊ အကုန်ဆွဲထုတ်ဟေ့၊ ဖေကြီးကျော်တောင် မသောက်ရသေးဘူး၊ နင်တို့က မူးလို့ ဖြစ်မလား၊ ဟဲ့- အမယ်ကြီးအိုမ၊ စားတော်စာတွေ မြန်မြန်ပြင်၊ ဒေါင်းတောင် ယူခဲ့၊ သူတို့နတ်တွေ ကုန်အောင် စောင့်နေလို့ကတော့ ငါကို ကလိုက်ရမှာ မဟုတ်ဘူး။ ဒီမှာ ပုပ္ပားမယ်တော်က ယမုံနာနဲ့ ငါးဖမ်းပိုက် ကူဆွဲပေးရင်း အင်းသူကြီးဆီက တောင်ပြုံးတက် ပွဲစာ ပုဆိုးတစ်အုပ် ကြော်ရ လှော်ရဦးမယ်ဟဲ့။
------------------
နုနုရည် (အင်းဝ)
ရွှေအမြုတေ၊ ဇန်နဝါရီ၊ ၁၉၉၇။

ကြက်ခြေခတ်ကလေးများ

ကြက်ခြေခတ်ကလေးများ
===================
“အေးလွင်ရေ …”
ငိုသံပါ အသံဆိုးကြီးနဲ့ အိမ်ရှေ့က ရုတ်တရက် အော်လိုက်သံ ကြားရတော့ စာဖတ်နေတဲ့ ကျွန်မ အရမ်းလန့်မိတယ်။ ထင်တဲ့ အတိုင်းပါပဲ၊ မျက်လုံး နီနီ၊ မျက်နှာ ဖောသွပ်သွပ်၊ ဒယီးဒယိုင် ခန္ဓာကိုယ်နဲ့ ပုဆိုးမနိုင်၊ ပဝါမနိုင်၊ လူပျိုပေါက် တစ်ယောက်ဟာ တစ်ဖက်က ကြာဆံကြော်၊ ခေါက်ဆွဲကြော်ထုပ်ကလေး ကိုင်၊ တစ်ဖက်က ကျွန်မတို့ အိမ်ဝင်းထရံကို အားပြုမှီပြီး မနည်း ကိုယ့်ကိုယ်ကို ထိန်းရပ်နေရတဲ့ အဖြစ်ကို တွေ့လိုက်ရတယ်။ သေချာတာပေါ့။ ကျွန်မတို့နဲ့ တစ်အိမ်ကျော်က အေးလွင် ဆိုတဲ့သူနဲ့ အသက်တူ၊ အရွယ်တူ ကောင်လေး တစ်ယောက်။ သူငယ်ချင်းနေမှာ၊ အေးလွင်ဆီ လာတာ နေမှာလို့ ကျွန်မ ချက်ချင်း သိလိုက်တယ်။ အင်း …
“ကလေး ... ဒီအိမ်က အေးလွင်အိမ် မဟုတ်ဘူးကွဲ့၊ အေးလွင်အိမ်က တစ်အိမ်ကျော်မှာ”
ကျွန်မ အသံ ကြားရတော့ ဝင်းထရံတိုင်ကို အားပြု ကိုင်ထားရာက ကျိုးနေတဲ့ ဇက်ကို မနည်းမော့ပြီး ကျွန်မကို မျက်ထောင့်နီကြီးနဲ့ လှမ်းကြည့်တယ်။ အို … ဒီကလေးရဲ့ မျက်လုံးထဲမှာ မျက်ရည်တွေ ရွှဲလို့ပါလား။
“ဆရာမ … ဟီး … ဆရာမ၊ ကျွန်တော် အေးလွင်အိမ်ကို မသိတော့ဘူး၊ မသွားတတ်တော့ဘူး ဆရာမ … ဟီး”
ပြောပြောဆိုဆို ငိုချလိုက်တဲ့ ကောင်လေးကို ကြည့်ပြီး ဪ ... ဒုက္ခပါပဲလို့ စိတ်ထဲက ညည်းမိတယ်။ သူ့ကိုယ်သူ လဲကျ မသွားအောင် ဝင်းထရံတိုင်ကို ခြေကန် ဆွဲထားရတာ စိတ်ပျက်လက်ပျက် ကြည့်ပြီး …
“အေးလွင်တို့ အိမ်က တစ်ယောက်ယောက် ဒီမှာ လာခေါ်ပါဦးဟေ့၊ မလာနိုင်လို့တဲ့ … ငိုနေတယ်” လို့ အသံမြှင့်ပြီး အော်ခေါ်လိုက်တော့မှ အေးလွင် အမေက ပြေးထွက်လာပြီး ကောင်လေးကို တွဲခေါ်သွားတယ်။
ကောင်လေးက ခေါင်းတရမ်းရမ်းနဲ့ လိုက်သွားရင်း “ဟောဒီမှာ အေးလွင်ဖို့ ဝယ်လာတယ်၊ ခါတိုင်း ဒီအချိန်ဆို ကျွန်တော်နဲ့ နှစ်ယောက်အတူ ကြာဆံကြော် စားနေကျဗျ ဟီး” ဆိုပြီး တငိုငို တရယ်ရယ် ပါသွား ပါလေရော။
ကျွန်မလည်း သူ ထွက်သွားတော့မှ ရင်တုန်ပန်းတုန် ဖြစ်လာပြီး ကုလားထိုင် တစ်လုံးပေါ်ကို ဖြည်းဖြည်းလေး ထိုင်ချလိုက်ရတယ်။ သူ့သူငယ်ချင်း အေးလွင်ဆီက လွန်ခဲ့တဲ့ နာရီဝက် လောက်ကမှ ကျွန်မ လူမမာမေး ပြန်ရောက်လာတာ။ သေချာတယ်။ သူ ဝယ်လာတဲ့ ကြာဆံကြော်ကို ထစားနိုင်တဲ့ အခြေအနေ ဘယ်နည်းနဲ့မှ အေးလွင်မှာ မရှိတော့ဘူး။ ကျွန်မ သွားတော့ကို ချွဲတွေ တဂီးဂီး ဆို့ပြီး ဖုတ်လှိုက် ဖုတ်လှိုက်ကို အသက်ရှူ နေရတာလေး ကြည့်ရင်း ကြည့်ရင်း စိတ်မကောင်း ဖြစ်လာလို့ လှည့်ထွက်လာတော့ အိမ်နီးချင်း တစ်ယောက်က “ညနေ စောင်းမယ် မထင်တော့ဘူး” လို့ ပြောရင်း နောက်က လိုက်ထွက် လာခဲ့ကြတာ။ လူတွေ၊ အမျိုးတွေ ဝိုင်းအုံနေတဲ့ ကြားက အေးလွင်ကို ကြည့်ပြီး ရင်ထဲမှာ မကောင်းလိုက်တာ။ ပြန်တွေးရင် အသားဖြူဖြူ၊ မျက်နှာချိုချို၊ ကိုယ်လုံး ပြည့်ပြည့်နဲ့ အမြဲတမ်း ပြုံးနေပြီး ဖိနပ်မပါဘဲ လမ်းလျှောက် နေတတ်တဲ့ ကျန်းမာတုန်းက အေးလွင်ကို ပြန်မြင်ယောင် နေမိတယ်။
“ဆရာမ၊ အမေနု နှိပ်မလားဟင်၊ ကျွန်တော် နှိပ်ပေးမယ်”
ကျွန်မ လေဖြတ်ပြီး နေကောင်းစ နေ့လယ်နေ့ခင်း တစ်ရေးတစ်မော အိပ်တဲ့အချိန် အိမ်တံခါးဝ အေးလွင် ပေါ်လာတယ်။ ကျွန်မကို ဆရာမလို့လည်း ခေါ်တယ်၊ တစ်ခါတလေ အမေနု တဲ့။ အိမ်ထောင်မရှိတဲ့ ကြုံရာကျပန်း လုပ်စားနေတဲ့ ရိုးရိုးသားသား လူငယ်လေး၊ ကင်းစောင့် ရမလား၊ ချုံရှင်း ရမလား ရတယ်၊ အမှိုက်ကျုံး ရမလား ရတယ်။ သစ်ပင် ခုတ်ရဦးမလား၊ အားကောင်း မောင်းသန် အေးလွင်တို့က မမှုဘူး။ အိမ်ကလည်း တစ်အိမ်ကျော်၊ သူ့မိဘများနဲ့လည်း ရင်းနှီးနေတော့ တူသား အရင်းလို ဖြစ်နေပြီ။
ဒီရပ်ကွက်ကလေးက ကလေးမတွေကလည်း ကျွန်မ နေမကောင်းနေတာ သိတော့ တစ်ယောက်တစ်လက် ကြုံရာ ကောက်လုပ် သွားကြတာပဲ။ အခုပဲ အေးလွင်လည်း သူတတ်ထားတဲ့ လက်နှိပ်ပညာနဲ့ ကျွန်မကို ကူညီနေတာ ခြေတွေ၊ လက်တွေ၊ ခါးတွေ စိတ်ရှည်လက်ရှည် အကြောဖြေပြီးတော့ ကျွန်မက ဘယ်လောက် ပေးရမလဲလို့ မေးရင် အေးလွင်က “သုံးဆယ်” လို့ ထုံးစံအတိုင်း ဖြေတယ်။ ပိုပေးလည်း မယူဘူး၊ ကျွန်မဆီက သုံးဆယ် ရပြီးတာနဲ့ တန်းပြီး ပုဂံကို သွားတော့တာပဲ။ သူက တစ်ခါသောက်ရင် သုံးဆယ်ဖိုးပဲ သောက်တာ။ ဘယ်နှခါ သောက်လဲလို့ မေးကြည့်၊ မရေတွက်နိုင်အောင် တစ်နေကုန် သောက်နေတာတဲ့။ ကောင်းကြရော။
ရပ်ကွက်ထဲမှာ အအေး အပူ အဖျော်ယမကာဆိုင် လေး ငါးဆိုင်ရှိတဲ့ အထဲက ဒီပုဂံဆိုတဲ့ ဆိုင်ကလေးက နည်းနည်း ထူးခြားတယ်။ ချောင်ကျကျ ရပ်ကွက် အရှေ့ဖျား၊ ကန်စွန်းပင်တွေ ဝိုင်းနေတဲ့ နေရာမှာ သီးသီးသန့်သန့် ရှိနေပြီး တိတ်ဆိတ် အေးချမ်းနေတယ်။ ဆိုင်ရှင် ကိုဝင်းညွန့်ကလည်း သဘောကောင်းတယ်။ သီချင်းဖွင့်တာကိုတောင်မှ အေးအေးငြိမ့်ငြိမ့် သီချင်းလေးတွေ ရွေးဖွင့်တာ ။ အခါကြီး ရက်ကြီးတွေမှာ သူ့ဆိုင်က ဖောက်သည်တွေကို အပျော် ကံစမ်းမဲ ဖောက်တာတို့၊ ဘုရားဖူး လိုက်ပို့တာတို့ လုပ်တတ်သေးတယ်။
ဆိုင်နံရံမှာ ချိတ်ဆွဲထားတဲ့ ပိတ်ချင်းမြောင်တို့၊ ပေါ်တော်မူတို့၊ သမ္ဗုဒ္ဓေတို့ သွားတုန်းက အုပ်စုလိုက် တပျော်တပါး ရိုက်ထားတဲ့ ဓာတ်ပုံတွေထဲမှာ အေးလွင်တို့ ဟန်ပေး၊ ဂိုက်ပေး ကြမ်းနေကြတာတွေ တွေ့နေရတာပေါ့။ အချင်းချင်းလည်း အရမ်းခင်ကြတော့ အခုလို သေငယ်ဇော မြောနေတဲ့အချိန်မှာ သူငယ်ချင်းတွေ ခံစားကြရရှာမှာပဲ။
ခဏလေး ကြာတော့ အေးလွင်တို့ အိမ်ဘက်က စီခနဲ ငိုသံတွေ ဆူဆူညံညံ ကြားရတယ်။ သွားရှာပြီပေါ့လို့ ကျွန်မ စိတ်မကောင်း ဖြစ်နေတဲ့အချိန် ပုဆိုးမနိုင် ပဝါမနိုင် တဟီးဟီးငိုပြီး ထွက်လာတဲ့ ကောင်လေး တစ်ယောက်က “ငါက ခါတိုင်း သောက်နေကျ အချိန်ပဲကွာ၊ သောက်ဦးဆိုပြီး ပါးစပ်ထဲကို အရက်တွေ လောင်းထည့်လိုက်တာကွ၊ ဒီတော့မှ ဒီကောင် ကျေနပ်ပြီး ထွက်သွားတော့တာ” လို့ ဗလုံးဗထွေး ပြောနေတာနဲ့ ကျွန်မမှာ ပြုံးရမလို၊ မဲ့ရမလို ဖြစ်ရသေးတယ်။ အသက်ငင်နေတဲ့ လူမမာရဲ့ ပါးစပ်ထဲကို အရက်တွေ လောင်းထည့်သတဲ့၊ သီးပြီး သွားရှာတာ နေမှာလို့ တိတ်တိတ်ကလေး တွေးမိတယ်။ အင်း …။
အသုဘပို့တဲ့ အချိန်ကျတော့လည်း မျက်လုံးတွေ နီရဲပြီး မျက်နှာတွေ ထူအမ်း၊ အနံ့ တထောင်းထောင်း ထွက်နေတဲ့ လူတွေက “အေးလွင်အတွက် ကုသိုလ်ပါ ခင်ဗျာ” ဆိုပြီး ခေါင်းလျှော်ရည်ထုပ်တွေ၊ ဆပ်ပြာမှုန့်တွေ ကမ်းကြတယ်။ အဲဒီ နောက်ပိုင်း ညညမှာ ခွေးတွေ တဝုန်းဝုန်း ဆူရင်တောင် ရပ်ကွက်ထဲက ဒီအချိန် အေးလွင် ကင်းလှည့်တဲ့ အချိန်ပဲလို့ ပြောစမှတ် ပြုကြတယ်။ ဒါပေမယ့် သေပြီးတဲ့သူလေ။ ကြာတော့လည်း မေ့သလောက် ဖြစ်လာတာပေါ့။ ကိုယ့်လူမှုရေးနဲ့ကိုယ် မဟုတ်လား။
“ဆရာမ ပိတောက်ပင်က ကိုင်းတွေ ခြောက်နေပြီ၊ ကျွန်တော်တို့ ထင်းကလေး လိုလို့ ချိုင်ချင်လို့ပါ”
အိမ်ပေါ် တက်လာပြီး ပိတောက်ကိုင်းခြောက် တောင်းနေတဲ့လူက ဟိုတစ်ခါက အေးလွင် သူငယ်ချင်းလေးလေ။ ကျွန်မလည်း ခြံထဲဆင်းပြီး ပိတောက်ပင် အောက်မှာ သူတို့ လေး၊ ငါးယောက် ချိုင်တာကြည့်ရင်း ဘာလုပ်ဖို့လဲလို့ စပ်စုကြည့်မိတယ်။
“ဆရာမ မသိသေးဘူးလား၊ ကျွန်တော်တို့ ပုဂံက အပေါင်းအသင်း အုပ်စုတွေက အခုမနက်တိုင်း ဘုံဆွမ်း လောင်းနေကြတယ်လေ။ ကျွန်တော်တို့၊ အောင်မိုးထူးတို့ အိမ်မှာ ချက်နေတယ်။ ကိုဦးတို့၊ ကိုသန်းထွန်းတို့က ဆန်၊ ကိုနောင်နောင်က ဆန်နဲ့ဆီ၊ ရန်နိုင်ဦးတို့၊ ဝင်းနိုင်တို့က ထင်း၊ ကိုနိုင်ဝင်းက ခရမ်းချဉ်သီး၊ ကိုခင်ဝင်းတို့၊ ထိန်လင်းအောင်တို့၊ စိန်သံမဏိ၊ သေးတာ၊ ကိုတိုး၊ ဦးခင်အောင် သူတို့လည်း တတ်နိုင်တဲ့ငွေ ထည့်ကြတယ်။ မနက်တိုင်း ကိုဦးနဲ့ ညီထွေးတို့ ညီအစ်ကိုက နိဗ္ဗာန်ဆော် တာဝန်ယူပြီး တစ်အိမ်တက်ဆင်း နှိုးလို့ လူအေးတို့နဲ့ စုပြီး ချက်ကြတယ်။ ဆရာမရယ် သံဃာတော်တွေကို ရွှေတချောင်း မြောင်းထောင့်မှာ စုပေါင်း လောင်းကြတယ်” လို့ အားရပါးရ ရှင်းပြပါလေရော။
ကျွန်မနားကို ကျွန်မ မယုံမိဘူး။ တအံ့တဩနဲ့ ပြောနေတဲ့ ကိုဦးကို ငေးကြည့်နေမိတယ်။
“အဲဒါ ဆွမ်းချက်ဖို့ ထင်းလိုလို့ ဆရာမ ပိတောက်ပင်ကို တောင်းနေတာပါ ဆရာမရယ်။ ကျွန်တော်တို့ ဆွမ်းလောင်းခါစက အရက်သမားတွေ သေမှာကြောက်လို့ သွေးရူးသွေးတန်းနဲ့ လုပ်နေတာပါကွာ၊ တစ်ရက်နှစ်ရက်နဲ့ ပြီးသွားမှာပါလို့ ကဲ့ရဲ့ကြတယ်။ ကျွန်တော်တို့က တကယ် လောင်းကြတော့ အခုဆို ထင်းပေါင်းတဲ့လူနဲ့ ဆန်ပေါင်းတဲ့လူနဲ့ ရပ်ကွက်ပါ ဝင်လာတယ်”
“ညနေစောင်းဆို ဆရာမ မြင်စေချင်တယ်။ ကျွန်တော်တို့ ပုဂံကို သွားကြရင်လေ ဆီပုလင်းလေး ဆွဲတဲ့သူနဲ့၊ ဆန်ထုပ်ကလေး ဆွဲတဲ့သူနဲ့ နောက်ပြီး ဆိုင်ရောက်ရင်လည်း အရင်က နှစ်ရာဖိုး ပါရင် နှစ်ရာဖိုးလုံး သောက်ဖြစ်ကြတာ။ အခု တစ်ရာလောက်တော့ ဆွမ်းလောင်းဖို့ထဲ ထည့်တော့ ကျွန်တော်တို့ လျှော့သောက်ဖြစ်တယ် ဆရာမ”
ကျွန်မ သူတို့ပြောတဲ့ စကားတွေကို တအံ့တဩ နားထောင်ရင်းက အလုပ်မရှိတဲ့ လူငယ်လေးတွေလည်း မဟုတ်။ လေလွင့် နေကြတာလည်း မဟုတ်။ နေ့လယ်မှာ အလုပ်ကိုယ်စီ လုပ်လို့ တတ်နိုင်သမျှ စီးပွားရှာလို့။ ပြီးတော့ ကုသိုလ်ရေး၊ လူမှုရေးလည်း ဝါသနာ ပါကြတဲ့အပြင် ကိုယ်တိုင်လည်း လက်တွေ့ လုပ်နေကြတဲ့ ကလေးတွေ ဘာဖြစ်လို့များ ဒီယမကာကို စွဲလမ်း တပ်မက်ပြီး မဖြတ်နိုင်၊ မပြတ်နိုင်အောင် ဘ၀ရဲ့ ဘယ်လို စိန်ခေါ်မှုတွေကိုများ သူတို့ မလွန်ဆန်နိုင် ဖြစ်နေကြပါလိမ့်။
“ဆရာမ ဒီမှာ ကြည့်ပါဦး၊ ကျွန်တော်တို့ သူငယ်ချင်းတွေလေ၊ သိပ်ခင်ကြတာ၊ ဒါက ပိတ်ချင်းမြောင်မှာ ရိုက်ထားတာ။ ဒါက သမ္ဗုဒ္ဓေမှာ ရိုက်ထားတာ၊ တွေ့တယ် မဟုတ်လား ဆရာမ၊ ပိတ်ချင်းမြောင်မှာ ရေထဲမှာချည်းပဲ”
တစ်ယောက်က ဓာတ်ပုံကလေးတွေ ထုတ်ပြလို့ ကျွန်မ ယူကြည့်လိုက်ရတယ်။ ကိုးရိုးကားရား မတ်တတ်ရပ်ကြ၊ လက်တွေ မြှောက်ကြ၊ ခေါင်းတွေ စောင်းကြနဲ့ ရိုက်ထားတဲ့ ပျော်မြူးနေကြတဲ့ လူငယ်လူတက် အားကောင်းမောင်းသန် အရွယ်ကလေးတွေထဲက ထူးခြားမှု တစ်ခုကို တွေ့လို့ ကျွန်မ မျက်မှောင်ကုတ် သွားမိတယ်။
“ဟင် … ဒီထဲက တချို့ သုံးလေးယောက်ကို ဘာလို့ မျက်နှာလေးတွေ ကြက်ခြေခတ်ထား ရတာလဲ၊ သူတို့က ဘယ်သူတွေလဲ”
အပ်ကျသံ ကြားရမတတ် အားလုံး တိတ်ဆိတ် နှုတ်ပိတ်သွားကြပြီး တစ်ယောက်မျက်နှာ တစ်ယောက် အပြန်အလှန် ကြည့်နေကြတဲ့ သူတို့ဟာ ငိုတော့မလို၊ ပြိုတော့မလို ပုံစံလေးတွေ ချက်ချင်း ဖြစ်သွားလိုက်ကြတာ။ ပြီးမှ တစ်ယောက်က တိုးတိုးလေး အသံမပွင့်တပွင့်နဲ့ …
“အဲဒါတွေက ကျွန်တော်တို့ထဲက ဆုံးသွားကြတဲ့ သူတွေပါ ဆရာမ။ သူတို့ မရှိကြတော့ပါဘူး”
“အို”
ကျွန်မရင်ထဲမှာ ဆို့နစ်ပြီး ဘာစကားမျှ မပြောနိုင်တော့ဘူး။ ပတ်ဝန်းကျင် တစ်ခုလုံးက ကြောက်စရာ ကောင်းလောက်အောင် တိတ်ဆိတ်သွားတယ်။ သူတို့လည်း ဘာစကားမျှ ဆက်မပြောနိုင်တော့ဘဲ ထင်းတွေကို သယ်ပြီး သွားကြဖို့ ခြေလှမ်းပြင်ကြတယ်။ ကျွန်မ နှုတ်ခမ်းတွေ တဆတ်ဆတ် တုန်နေရာက အပြောချင်ဆုံး စကားတစ်ခွန်းကို သူတို့ နာခံလိုသည် ဖြစ်စေ၊ မနာခံလိုသည် ဖြစ်စေ ဇွတ်မှိတ်ပြီး ပြောချလိုက်တယ်။
“ဒီမယ် တစ်ခုတော့ မှာပါရစေကွယ်၊ လျှော့ဖြစ်အောင် လျှော့ကြပါဦး”
သူတို့အားလုံး တညီတညာတည်း တွေတွေဝေဝေ မျက်နှာထားတွေနဲ့ ကျွန်မကို စိုက်ကြည့်ကြပြီး ခေါင်းညိတ် အဖြေပေးလို့ တိတ်တိတ်ဆိတ်ဆိတ်ပဲ ထွက်ခွာသွားကြတယ်။ ကျွန်မကတော့ ဓာတ်ပုံထဲက အေးလွင်တို့လို ကြက်ခြေခတ်ကလေးတွေ ကိုသာ ရင်တနင့်နင့်နဲ့ သတိရရင်း၊ သူတို့ နောက်ကျောကို ငေးကြည့်ရင်း ပိတောက်ပင်ရိပ် အောက်မှာ တစ်ယောက်တည်း ကျန်ရစ်ခဲ့ရ ပါတော့တယ်။
“ဪ … လျှော့ရင်း လျှော့ရင်း လျော့ကုန်ကြမှဖြင့်”
------------------------
ယဉ်ယဉ်နု (မန္တလေး)
စရဏ မဂ္ဂဇင်း၊ မတ်လ၊ ၂၀၀၆။

နှင့်

        နှင့်
===========
မီးသွေးမီး အရှိန်နည်းနေပြီ ဖြစ်သော ထမင်းအိုးက မပွက်ချင် ပွက်ချင်နှင့် ဘွက်ခနဲ ဘွက်ခနဲ ညည်းညည်းညူညူ ပွက်နေသည်။ မစိန်မြကလည်း ထမင်းအိုးကို ပျင်းပျင်းရိရိနှင့် ထိုင်မွှေနေသည်။ မနေ့ညက ကောင်စီရုံးရှေ့တွင် ဖိနပ်ဖင်ခုထိုင်ကာ ကလေးနို့တိုက်ရင်း ကြည့်ခဲ့ရသော မြန်မာကားကို ပြန်လည် မြင်ယောင်နေသည်။
"အမေ"
သားကြီးက ခေါ်လိုက်တော့ မစိန်မြ နည်းနည်း ဇိမ်ပျက်သွားသည်။
"အမေ ကျူရှင် ယူချင်တယ် ''
စင်းမှေးနေသော မစိန်မြ၏ မျက်လုံးသည် အတန်ငယ် ပြူးကျယ်သွားသည်။ တွေးထင် မြင်ယောင်နေသော ကိုညွန့်ဝင်းသည် ရုတ်ခနဲ ပျောက်သွားသည်။ သူ့ရှေ့တွင် နှပ်ချေးတရှုံ့ရှုံ့နှင့် ငုတ်တုတ်ထိုင်နေသော သားကြီး ဩရဿ ဖြစ်သူ မောင်သံချောင်းသည် ကိုညွန့်ဝင်းလောက် ကြည့်မကောင်းလှချေ။
"ကျူရှင် ယူရအောင် နင်က ဘီအေ မို့လား။ ဆယ်တန်း ဖြေရမှာ မို့လား။ ကိုးတန်း တက်ရမှာ မို့လား။ ပြောစမ်းပါဦး ကိုကြက်ချေးတန်းရဲ့"
'' အမေကလည်းဗျာ တစ်တန်းလည်း တစ်တန်းကျူရှင်ပေါ့"
"ဘာ တစ်တန်းကျူရှင်လဲ။ ကျက်ပါလား ကိုယ့်ဟာကိုယ်၊ ဒီလောက် အတန်းပေါက်စန ကလေးကိုများ ကျူရှင် ပေးရမယ်လို့ ကြားဖူးပေါင်"
"အဲဒါဆို အမေ အောက်နေတာပဲ"
"ဘာ အောက်တာလဲ"
မစိန်မြက ယောက်မနှင့် ရွယ်လိုက်သောကြောင့် သားကြီးက လက်လှမ်းမမီသော နေရာကို အလျင်အမြန် ဆုတ်ခွါလိုက်သည်။
"လူတိုင်း လူတိုင်း ကျူရှင် ယူနေကြတာပဲ အမေရဲ့"
"အေး ဒါပေမယ့် ငါတို့က လူတိုင်းလောက် မချမ်းသာဘူး၊ တစ်နေ့ တစ်နေ့ အလျင်မီအောင်တောင် မနည်းလုပ်နေရတာ၊ နင့်အဖေ မဟာစာရေးကြီးရဲ့ လခက ဘယ်လောက်များ ရှိလို့လဲ၊ အလကား သင်ပေးတဲ့ ကျူရှင် ရှိရင်တော့ သွားတက် ဒါပဲ"
မစိန်မြက ဗီတိုအာဏာ သုံးကာ သူ၏ အဆိုကို ပယ်ချလိုက်လေတော့ သားတော်မောင် ငိုမဲ့မဲ့ ဖြစ်သွားသည်။ မီးဖိုချောင် တံခါးဝတွင် ထိုင်နေသော ဖခင်ဖြစ်သူ ကိုရေခဲကို အားကိုးတကြီး လှမ်းကြည့်သည်။
ကိုရေခဲက အလယ်ခန်းတွင် ချိတ်ထားသော ကလေးပုခက်ကြီးကို လှမ်းဆွဲလိုက်၊ ဆေးပေါ့လိပ်တိုလေးကို ဖိဖွာလိုက်နှင့် မမြင်ချင်ယောင် ဆောင်နေသည်။
ဘုစုခရုတို့၏ မယ်တော်၊ နောက်ပြီး သူတို့ အိမ်ထောင်စု၏ ဝန်ကြီးချုပ်လည်း ဖြစ်၊ ဘဏ္ဍာရေးဝန်ကြီးလည်း ဖြစ်၊ ထမင်းချက်လည်း ဖြစ်၊ ခဝါသည်လည်း ဖြစ်၊ သန့်ရှင်းရေး လုပ်သားလည်း ဖြစ်သော သူ၏ မဟေသီ မစိန်မြကို သူ မလွန်ဆန်ရဲကြောင်းကို သားတော်မောင်လည်း သိလိမ့်မည် ထင်ပါသည်။
"ဒီလိုဆို အမေ သင်ပေးမလား ကဲ"
သားက ပြောတော့ မစိန်မြ လန့်သွားသည်။ သူက စာကို ဟုတ္တိပတ္တိ စိတ်ဝင်စားခဲ့သူ မဟုတ်။ အမေ့ကို ဈေးကူရောင်းရင်း တက်တစ်လှည့် ပျက်တစ်လှည့် သင်ခဲ့ရသည်ကလည်း ရှစ်တန်း အထိသာ ဖြစ်သည်။ နောက်ပြီး ယောက်ျား မယူမီကတည်းက ကျောင်းထွက်ခဲ့ရသူမို့ ကျောင်းစာနှင့် ဝေးနေသည်မှာလည်း ကြာလှချေပြီ။
"အင်္ဂလိပ်စာတော့ နင့်အဖေကို သင်ခိုင်း"
မစိန်မြက အကြီးဆုံးသော ရန်သူကို ဘောလီဘော သိုင်းနှင့် ကမန်းကတမ်း ရှောင်တိမ်းလိုက်သည်။
"ရုံးမှာ ခုတစ်လော အိုဗာတိုင်တွေ ရှိမယ်တဲ့"
ကိုရေခဲကလည်း အပြေးအလွှား ရှောင်တိမ်းလိုက်သည်။ မစိန်မြက မျက်စောင်းခဲရင်း ခပ်ဆတ်ဆတ် ပြောသည်။
"အိုဗာတိုင် မရှိတဲ့နေ့ သင်လို့ ရတာပဲ"
ကိုရေခဲက မျက်တောင် တဖျပ်ဖျပ် ခတ်သည်။ ကလေးပုခက်ကြိုးကို လှမ်းဆွဲသည်။ ကြိုးနှင့်တုတ်၍ ပွတ်တိုက်ပြီး "ကျွိအိ ကျွိအိ" ဟု မြည်နေသော အသံကို သူ့နားထဲတွင် "ကျူရှင် ကျူရှင်" ဟု ကြားယောင်လာသည်။
"တစ်ခါတလေတော့လည်း ရုံးအလုပ်တွေ အိမ်ပါချင် ပါလာဦးမှာ"
"မပါတဲ့နေ့ သင်ပေါ့"
"အေးပါကွာ အားတဲ့နေ့ သင်တာပေါ့"
ကိုရေခဲက ခပ်ပျော့ပျော့ ပြောသည်၊ လာမည့်ဘေးကို ရှောင်လွှဲ၍ မရတော့သည်မို့ နောက်ဆုတ် နောက်ဆုတ်နှင့် ရင်ဆိုင်ရန် အားတင်းသည်။
"ဒီလိုဆို အမေက သင်္ချာသင်"
"သင်္ချာ"
စိတ်အေးပြီး စင်းမှေးတော့မည် ဖြစ်သော မစိန်မြ မျက်လုံး အစုံသည် ဆတ်ခနဲ ပြန်ပြူးသွားကြသည်။ ထို့နောက် ကိုရေခဲကို မျက်စောင်းထိုးကာ ရန်စကားဆိုသည်။
"အဲဒီ အောက်တန်းစာရေး ရာထူးကြီးကိုပဲ ဖက်ပြီး ဖင်ကျောက်ချထား သိလား ဦးရေခဲ။ အောက်ဆိုက်လည်း မရှာနဲ့။ ငရဲကြီးတတ်တယ်"
"ဟ ဘာဆိုင်လို့လဲ"
ကိုရေခဲက မစိန်မြကို နားမလည်သလို လှမ်းကြည့်သည်။ ထိုစဉ်တွင် ဆေးလိပ်တိုမှ မီးဖွားများက ပုဆိုးပေါ်သို့ ဖွားကနဲ ကြွေကျကုန်သည်။ နေရာမှ ခုန်ချပြီး မီးဖွားများကို ကမန်းကတန်း ခါချစဉ် နို့ညှာကောင်သည် တဒိုင်းဒိုင်း ပြေးဝင်လာသည်။ ပုခက်ထဲမှ ကလေးက ထငိုသည်။ မစိန်မြက ထမင်းအိုးကို ဆောင့်ကြီးအောင့်ကြီး မွှေသည်။
"ဘာ မဆိုင်ရမှာလဲ။ တော်သာ ဝင်ငွေကောင်းရင် ဒီအကောင်တွေကို ဆရာ ကောင်းကောင်းနဲ့ ကျူရှင် ကောင်းကောင်း ပေးနိုင်မှာပေါ့။ ကျုပ်တို့ သင်စရာ လိုမလား"
"အင်း ... နောက်ဆုံးတော့ ဒီဘူတာ ဆိုက်တာပဲ"
ကိုရေခဲက ညာဘက် နားမှ ဝင်လာသော မစိန်မြ၏ စကားများကို ဘယ်ဘက် နားမှ ပြန်ထုတ်ရန် ကြိုးစားရင်း တွေးလိုက်မိလေသည်။
* * *
"ကဲ ငါး အပေါင်း ရှစ်တဲ့။ ပေါင်းစမ်း"
"ငါးကို စိတ်ထဲမှာထား လက်ရှစ်ချောင်းထောင် ငါးပြီးတော့ ခြောက် - ခုနှစ် - ရှစ် - ကိုး"
"အမေ့ ... အီအီး ..."
"ဪ ... ခက်တော့တာပဲ ကိုရေခဲရေ"
"အေး ... အေး"
ကိုရေခဲ လက်ကြားမှ ဆေးလိပ်တိုကို နို့ဆီခွက်ထဲ လှမ်းထည့်ပြီး နေရာမှ ကမန်းကတန်း ထသည်။ သူ့အမေဘေးတွင် ကုန်းကုန်းကွကွ ရပ်နေသော နို့ညှာကောင်ကို ဆွဲခေါ်လာပြီး ခပ်လိန်လိန် ခပ်ပိန်ပိန် ဖြစ်နေသော ဒန်ထွေးခံပေါ်တွင် ထိုင်ခိုင်းလိုက်သည်။
"ဆယ့်နှစ် ... ဆယ့်သုံး ... ဆယ့်လေး ... ဆယ့်ငါး"
"ဘာ"
မစိန်မြက အော်သည်။ သားတော်မောင်က သူ့ပါးစပ်သူ အလျင်အမြန် ဘရိတ်ဖမ်းလိုက်သော်လည်း ချက်ချင်း မရပ်။ "ဆယ့် - ဆယ့် - ဆယ့်ခြောက်" ဟု အထစ်ထစ်အငေါ့ငေါ့ ဆိုပြီးမှ ရပ်သွားသည်။ ထို့ကြောင့် သစ်သားပေတံနှင့် တစ်ချက် အခေါက်ခံလိုက်ရလေသည်။
"ဘာ ဆယ့်ခြောက်လဲ ... ပြန်ပေါင်းစမ်း"
"ငါးကို စိတ်ထဲမှာ ထား ... လက်ရှစ်ချောင်းထောင်"
သားတော်မောင်က နောက်ဘက်သို့ မသိမသာ တွန်းရွှေ့ထိုင်ရင်း ဒုတိယအကြိမ် ကြိုးစားသည်။
"နင့်ကို ငါ ပြောပေါင်း များလှပြီ။ ပိုကြီးတဲ့ဟာကို စိတ်ထဲမှာ ထားစမ်းပါဆို။ ရှစ်ကို စိတ်ထဲမှာ ထားပြီး လက်ငါးချောင်း ထောင်တာက ပိုပြီး မလွယ်ဘူးလား သံချောင်းရဲ့"
သားတော်မောင် ရွှေ့ရာဘက်သို့ မစိန်မြက လိုက်တိုးသည်။
"ကဲ ... ပြန်ပေါင်းစမ်း။ ကပျက်ကချော် လုပ်မနေနဲ့"
မစိန်မြက ပေတံနှင့် အဆင်သင့် ရွယ်ထားသည်။ သံချောင်းက သက်ပြင်း မသိမသာ ချရင်း ကိုရေခဲအား လှမ်းကြည့်သည်။ ခေါင်းကုတ်သည်။ နှပ်ချေးရှုံ့သည်။
"အင်း ဒီကောင်တော့ ကျူရှင်ဆရာ အရွေးမှားပြီ ဆိုပြီး နောင်တ ရနေပြီ ထင်ပါရဲ့"
ကိုရေခဲက တွေးရင်း ပြုံးမိသည်။ သူ့အလှည့်ကျလျှင်တော့ လွယ်သည်။ "သစ်အစ်(စ်)အေဘွခ်၊ သစ်အစ်(စ်)အင် အက်ပဲလ်" ဆိုတာတွေကို တစ်ခေါက်လောက် ချပေးပြီး "ကဲ အဲဒါတွေကို လက်ရေးလှ ငါးခေါက်ရေးကွာ" ဟု ခိုင်းလိုက်ရုံပင်။ သူလည်း သက်သာ၊ သားကလည်း ကျေနပ်၊ ငြိမ်းချမ်းသာယာမှုအတိ ရှိမည် ဖြစ်လေသည်။
"ဖေဖေ"
နို့ညှာကောင်က ခေါ်သည်။
"ဘာလဲကွ"
"နံနံ"
"နံမှာပေါ့ကွ။ အီးပဲဟာ"
မရှူပဲ နေမရသောကြောင့် ပျံ့လာသော ရနံ့ကို မသက်မသာနှင့် မျဉ်း၍ ရှူသည်။
"ကိုမြတ်ဆွေတ်ို့နဲ့ လိုက်သွားရင် ကောင်းသား။ ဒါဆို ကလေး အီးတယ်နေရမှာ မဟုတ်ဘူး" ဟု စဉ်းစားသည်။ ရုံးက အရာရှိကြီး၏ ဇနီး တိုက်ဖွိုက် ဖြစ်သောကြောင့် ကိုမြတ်ဆွေတို့၊ ကိုအောင်မြင့်တို့ လူစုတွေ အလုပ်များကြသည်။ အားဆေး ရှာသူကရှာ၊ ကြက်ပေါင်းရည် ပို့သူကပို့၊ ဂလူးကို့(စ်) ဝယ်သူကဝယ်၍ လှုပ်လှုပ်ရှားရှား ရှိသော်လည်း ကိုရေခဲကတော့ ထုံးစံအတိုင်း ရေခဲတုံးပင်။ "သူ့မိန်းမ နေမကောင်းတာ ကိုယ့်မိန်းမ နေမကောင်းတာမှ မဟုတ်" ဟု တွေးသည်။ သူ့မိန်းမက ကိုယ့်မိန်းမထက် ပိုပြီး အရေးကြီးသည်ဟု မထင်။ ထို့ကြောင့် မလှုပ်မရှား ငြိမ်နေလိုက်သည်။ အင်း လှုပ်စရာ ရှိလည်း ပိုက်ဆံမှ မရှိပဲကိုး။ ညနေတုန်းကတော့ ကိုမြတ်ဆွေ၊ ကိုအောင်မြင့်နှင့် ခင်လေးဝေတို့ သုံးဦးစုပြီး ဟောလစ် တစ်ပုလင်း ဝယ်သည်။ သတင်း သွားမေးမည် လိုက်ဦးမလားဟု ခေါ်သော်လည်း သူ ခေါင်းခါခဲ့သည်။ ဟောလစ်ပုလင်းတွင် သူ့အစုစပ်ငွေ မပါဘဲ လိုက်ရမည်ကို စိတ်မလုံလှ။ သူတို့သုံးဦးကလည်း ရှေ့တင်သာ လိုက်ပါဟု ခေါ်သော်လည်း ကွယ်ရာကျတော့ ပြန်ပြီး "အတင်း" ပြောချင် ပြောကြဦးမည်မို့ သိပ်မယုံလှ။
"ကဲ မနီတွင် လိမ္မော်သီး ခြောက်လုံး ရှိသည်။ နောက်ထပ် လေးလုံး ထပ်ဝယ်လျှင် လိမ္မ်ာမ္မော်သီးမည်မျှ ရှိမည်နည်းတဲ့။ ကဲ ... ဒါဆို ဘာလုပ်ရမလဲ"
"ပေါင်းရမယ်"
"ဘာနဲ့ ဘာနဲ့ကို ပေါင်းရမှာလဲ"
"ခြောက်နဲ့ လေး"
"အဲ ဟုတ်ပြီ။ ကဲ ... ပေါင်းစမ်း"
"ခြောက်ကို စိတ်ထဲမှာ ထား။ လက် လေးချောင်းကို ထောင်။ ခြောက် ပြီးတော့ ... ခုနစ် ... ရှစ် ... ကိုး ... တစ်ဆယ် ... ဆယ့်တစ်"
"ကဲ ... အဲဒါ ဆယ့်တစ်"
မစိန်မြက ပေတံနှင့် လှမ်းခေါက်ပြန်သည်။ သံချောင်းက ဖင်ရွှေ့ပြီး နောက်ဆုတ် သွားပြန်သည်။
"ခေါင်းကလေးကို သုံးပြီး စဉ်းစဉ်းစားစား ရွတ်စမ်းပါ သံချောင်းရယ်။ လက်ကို ထောင်ချင်တာ ထောင်။ ပါးစပ်ကလည်း ရွတ်ကောင်းသလောက် ရွတ်ပြီး ရွတ်နေတာပဲ။ အေ ... အေ ... ကျွတ် ... ကျွတ် ... အိပ်ပါကွယ်လေ ... အေ အေ ... အေ"
မစိန်မြက ရင်ခွင်ထဲမှ လူးလွန့်လာသော ကလေး၏ တင်ပါးကို ပုတ်သည်။ အင်္ကျီကို ကမန်းကတမ်း ဆွဲလှန်ပြီး ကလေး ပါးစပ်ထဲသို့ နို့ပိန်ကို ထိုးထည့်သည်။ ကလေးက တစ်ချက်နှစ်ချက် စုပ်ပြီး ပြန်ငြိမ်သွား လေသည်။
"တော်ပါသေးရဲ့"
ကိုရေခဲ သက်ပြင်းချသည်။ ဒီကောင် ပြန်မအိပ်လျှင် မစိန်မြက "ကိုရေခဲရေ" ခေါ်ဦးမည် ဖြစ်သည်။ သူကတော့ စာသင်တာကို ရပ်လိမ့်မည် မဟုတ်။
* * *
"ကိုရေခဲရေ"
"ဟော ... ခေါ်ပါပြီဗျာ"
ကိုရေခဲက ဆေးလိပ်တိုကို နို့ဆီခွက်ထဲ ထိုးထည့်လိုက်ရ ပြန်သည်။ မစိန်မြ၏ လက်ထဲမှ အငယ်ကောင်ကို အလိုက်တသိ လှမ်းယူလိုက်ပြီး ပုခုံးပေါ်တွင် မှောက်ကာ သိပ်လိုက်သည်။ တင်ပါး ပြောင်ပြောင်ကလေးကို ပုတ်ရင်း ဆယ့်နှစ်ပေ ကျယ်သော အခန်း၌ ခေါက်တုံ့ ခေါက်ပြန် လမ်းလျှောက်သည်။
"မြှောက်တယ်ဆိုတာ ပေါင်းတာပဲ သံချောင်းရဲ့။ အများကြီး ထပ်ကာထပ်ကာ ပေါင်းနေရရင် ကြာတယ် မဟုတ်လား။ တစ်ခါတည်း မြှောက်လိုက်ရင် အဖြေ တန်းထွက်ရော"
မစိန်မြက သူသိသမျှ ပို့ချသည်။
"ဒါကြောင့် အလီရဖို့ အရေးကြီးတယ် ပြောတာပေါ့။ အလီ မရရင် မြှောက်ကြဖို့ မလွယ်ဘူး"
"အောင်မယ်လေးဟဲ့ ငါ့မိန်းမလည်း ဆရာမကြီးပုံ ဖမ်းနေလိုက်တာ။ အလီရအောင် ကျက်။ မရရင် တီးမယ်လို့ သူပြောနေကျအတိုင်း ပြောလိုက်ရင် ပြီးရော"
ကိုရေခဲက တွေးသည်။ ခုတလော မစိန်မြကို သိပ်ပြီး ကြည့်လို့မရ။ ကိုယ့်သားကိုယ် စာသင်တာကတော့ ဟုတ်ပါရဲ့။ သူလုပ်နေကျ အလုပ်များ ဖြစ်သော အငယ်ကောင် သိပ်ခြင်း၊ နို့ညှာကောင် အီအီးတယ်ခြင်း၊ အလတ်မ မိတ်ကုတ်ပေးခြင်း၊ အလတ်ကောင်၏ ဝဲများကို ဆေးထည့်ပေးခြင်း စသောစသော တောက်တိုမည်ရ အလုပ်များကို ကိုရေခဲအား အကုန်လွှဲအပ် လိုက်သည်ကတော့ ခက်လှသည်။ သူ စာသင်နေတုန်းတော့ ဘယ်သူ ဘာကိစ္စ ပေါ်ပေါ် "ကိုရေခဲရေ" ဟု တစ်ဆင့် လှမ်းခေါ် လိုက်သည်သာ ဖြစ်သည်။
"ငါ့နာမည်ကလည်း ရေခဲကနေ အရည်ပျော်ပြီး သူ့လက်ထက်ကျမှ ရေခဲရေ ဖြစ်နေပြီ"
ကိုရေခဲက မလိုတမာ တွေးသည်။ မိတ်ယားသဖြင့် သူ့ကျောကိုသူ အိမ်တိုင်နှင့် ပွတ်နေသော အလတ်မအား စောင်းကြည့်ပြီး စိတ်မောသွားသည်။ ပုခုံးပေါ်က အကောင် အိပ်သွားလျှင် ခရေပွင့်ခြောက်နှင့် သနပ်ခါးကို ရောသွေးပြီး လူးပေးရန် အမိန့် ကျလာဦးမည်ကို ကြိုပြီး ကြားယောင်နေသည်။ သူက အနည်းငယ် မျက်နှာရှုံ့မိလျှင် "ကဲ ဒီလိုဆို တော်လာပြီး သင်လှည့်။ ဒါမှမဟုတ် ကျူရှင်ခပေးပြီး ကျူရှင်ဆရာဆီ ပို့" ဟု ပြောဦးမည် ဖြစ်လေသည်။
"ကဲ ... ဒီမှာကြည့်။ ပန်းအိုး တစ်အိုးလျှင် ပန်းသုံးပွင့်စီ ရှိသတဲ့။ ပန်းအိုးခြောက်လုံး ဆိုလျှင် ပန်းပွင့် မည်မျှ ရှိမည်နည်းတဲ့"
မစိန်မြက ပန်းအိုးဟု ဆိုလိုက်တော့ ကိုရေခဲသည် ခေါက်တုံ့ခေါက်ပြန် လမ်းလျှောက် နေရင်းမှ ဒေါ်စိန်စိန်ကြည်ကို ဖျတ်ကနဲ သတိရသည်။ ရုံးမှ အပျိုကြီး အရာရှိမ, ဖြစ်သော ဒေါ်စိန်စိန်ကြည်ကို သူတို့တစ်တွေက ကွယ်ရာတွင် "ခင်ခင်ပန်းအိုး" ဟု ခေါ်ကြသည်။ ပန်းအိုးကလေးလို ခါးသေးရင်ချီ သောကြောင့်တော့ မဟုတ်။ ပန်းအိုး ထိုးထားသလို တစ်ခေါင်းလုံး ပန်းတွေ ဝေနေအောင် ပန်တတ်သောကြောင့် ဖြစ်သည်။ အသားညိုညို၊ ဝဝဖိုင့်ဖိုင့်နှင့် ပုံပန်းမကျ လှသော်လည်း ရုံးမှ ထွေးထွေးတို့ ကေသွယ်တို့က "မမစိန်တို့ ကိုယ်လုံးကတော့ တကယ်ကို မိတယ်ဟေ့" ဟု ပြောတတ်ကြသည်။ "မမစိန်ရဲ့ အသားက ညိုပေမယ့် စိုပြီးဝင်း နေတာပဲ" ဟုလည်း ပြောကြသေးသည်။
"အင်း ... လျှာမှာ အရိုးမရှိဘူး ဆိုတာ တယ်ဟုတ်တာပဲ။ ဦးလှအောင်ရဲ့ သားကလေး ဆယ်တန်းကို ဂုဏ်ထူးတစ်ခုနဲ့ အောင်တုန်းကရော၊ တော်လိုက်တာနော်။ မွေးရကျိုး နပ်လိုက်တာနော်။ လိမ္မာလိုက်တာနော်နဲ့ ရင်သပ်ရှုမော လုပ်နေလိုက်ကြတာ။ ဒီခေတ်မှာ ဂုဏ်ထူး တစ်ခုလောက် ရတာကိုများ ထူးထူးဆန်းဆန်း တအံ့တဩ လုပ်လို့"
ကိုရေခဲက အိပ်ပျော်သွားပြီ ဖြစ်သော အငယ်ကောင်ကို အိပ်ရာထဲသို့ ဖြည်းဖြည်းကလေး ချသည်။ နိုးသွားလျှင် နောက်ထပ် နာရီဝက်လောက် ထပ်လျှောက်ရ ဦးမည်မို့ အသက်ကိုပင် ပြင်းပြင်း မရှူရဲချေ။
"သုံးတစ်လီ သုံး၊ သုံးနှစ်လီ ခြောက်၊ သုံးသုံးလီ ကိုး၊ သုံးလေးလီ ဆယ့်တစ်"
"ဘာပြောတယ်။ သုံးလေးလီ ... ဆယ့်တစ် ... ဟုတ်လား"
မစိန်မြက အော်သည်။ ကိုရေခဲသည် အိပ်ရာထဲ ရောက်နေပြီ ဖြစ်သော ကလေးကို လက်မလွှတ်ရဲသေးပဲ ကမန်းကတန်း ပြန်ဖက်ထားသည်။"ရှူး ... ရှူး" ဟု ခပ်တိုးတိုး ပြောလိုက်သော်လည်း မစိန်မြက မကြား။
"ဒါကြောင့် အလီကို ကျေအောင် ကျက်ပါဆို။ စာအုပ်သာ ကျေသွားတယ်။ စာ မကျေဘူး။ အလကားကောင်" ဟု ဆက်၍ အော်ပြန်သည်။ ဒီတစ်ခါတော့ ကိုရေခဲ စိတ်မရှည်တော့။ "တိုးတိုးဟ" ဟု ခပ်ကျယ်ကျယ် အော်လိုက်သည်။ မစိန်မြ အော်စဉ်က မနိုးသော အငယ်ကောင်သည် ကိုရေခဲ၏ အသံကြားမှ ဆတ်ကနဲ လန့်နိုးသည်။ ဗြဲကနဲ အော်လေတော့သည်။
"သွားပါပြီကွာ"
ကိုရေခဲက သားငယ်ကို ပုခုံးပေါ် ပြန်ထမ်းသည်။ ခေါက်တုံ့ခေါက်ပြန် လျှောက်ရပြန်သည်။ ထို့နောက် စိတ်ပျက်လက်ပျက်နှင့် ညည်းသည်။
"မစိန်မြရယ် ညည်းစာသင်တာ ငါ ပင်ပန်းလှတယ်"
"မပင်ပန်းချင်ရင် ကျူရှင်ဆရာဆီ ပို့လိုက်ပေါ့။ လောက်အောင် ရှာပေးပေါ့ အိမ်ဦးနတ်ကြီးရဲ့"
မစိန်မြကလည်း ဇတ်ကနဲ မျက်စောင်းထိုးကာ ဆိုက်နေကျ ဘူတာသို့ ဒိုင်းကနဲ ဆိုက်လိုက်လေသည်။
"ဌာနတွင်း စာမေးပွဲ ဖြေထားရ ပါတယ်ကွ။ ရာထူး တိုးတော့မှာပါ"
"ဒီစကားမျိုး ကြားရတာ များလှပါပြီ။ ကြာလှပါပြီတော်"
မစိန်မြက အယုံအကြည် နည်းဟန်နှင့် ဆိုသည်။
"ဒီတစ်ခါ အားလုံး ဖြေနိုင်တယ်ကွ"
"အရင်တုန်းကရော မဖြေနိုင်လို့လား"
ကိုရေခဲက ဘာမှ ဖြေရှင်းချက် ထုတ်မနေတော့ပဲ ကြမ်းကို မသိမသာ ဆောင့်နင်းသည်။ ဆင့်တွေ ညွတ်နေပြီဖြစ်သော ကြမ်းအိုကြမ်းကျဲက ခြေချလိုက်တိုင်း ကျွိကနဲ မြည်သည်။ ကိုရေခဲကတော့ ထိုအသံကို ဆိုင်းသံလို့ ထင်ပြီး "လူမှာသာ ငွေမရှိရင် လင်ယူမိတာ နာတယ် ထင်တယ် ... ယောက္ခမအိမ်တက် သားမက်မှာ မျက်နှာငယ် ... မျက်နှာငယ်။ ဒါတွေကို ငါသိပြီကွယ် ... အချစ်ဆိုတာ လောကမှာ နားမလည် ... တယ် လောက" ဟူသော သီချင်းကို စိတ်ထဲမှာ အော်ဆိုလိုက်မိသည်။
အဖေနှင့်အမေ စကားကောင်းနေစဉ် အကြီးကောင်က ခဲတံဖင်ကို ကိုက်ကာ ငေးနေသည်။ မျက်လုံးစင်းပြီး ငိုက်နေသည်။
မစိန်မြ မြင်တော့ ပေတံနှင့်ရွယ်ကာ အော်ပြန်သည်။
"ဟဲ့အကောင် ဘာငေးနေတာလဲ။ မြှောက်စမ်းပါလို့ ပြောထားတာ မြှောက်ပါလား"
* * *
နေဝင်ခါနီးနေပြီ။
မိုးရိပ်က နည်းနည်း ညိုနေတော့ နေမင်းသည် ရွှေဝါရောင် လက်တံများနှင့် ကမ္ဘာလောကကြီး တစ်ခုလုံးအား ဖြန့်ကျက် နှုတ်ဆက်ပိုင်စွမ်း မရှိရှာပေ။
"ခဏနေရင် မှောင်တော့မယ်"
ကိုရေခဲက တွေးသည်။ ဆေးလိပ်တိုကို ဖင်စီခံနား ရောက်သည်အထိ ဖိ၍ ဖွာသည်။ အပူငွေ့က အစီခံကို လောင်မြိုက်ကာ နှုတ်ခမ်းဆီသို့ ကူးစက်လာတော့မှ ရပ်လိုက်သည်။
"အစကတည်းက ထင်သားပဲ။ ပါမှာ မဟုတ်ပါဘူးလို့"
မစိန်မြက ခပ်တိုးတိုး ပြောသည်။ ကိုရေခဲကတော့ သက်ပြင်းချသည်။ ရာထူးတိုးရန် စာမေးပွဲ ဖြေရသည်။ သူဖြေသည်။ ဖြေလည်း ဖြေနိုင်သည်။ သို့သော် ယခု စာရင်း ထွက်လာတော့ သူ့အမည် ပါမလာ။ သူ့ထက် လုပ်သက်နုသူတွေ၊ သူ့နောက်မှ အလုပ်ဝင်သူတွေက သူ့ကို ကျော်ပြီး တက်သွားကြသည်။ "သူတို့ ငါ့ထက် ဖြေနိုင်လို့ ထင်ပါရဲ့" ဟု တွေးရုံမှအပ ကိုရေခဲ ဘာမှ မလုပ်တတ်။
"သူကရော အစကတည်းက ထင်သားပဲ ဆိုတာကလွဲလို့ ဘာမှ မပြောတတ်တော့ဘူးလား"
ကိုရေခဲက မစိန်မြကို ဒေါသ ဖြစ်ချင်သည်။ "အလကားမိန်းမ၊ သူကြိုပြီး နိမိတ်ဖတ်နေလို့ ဖြစ်ရတာ" ဟု တွေးသည်။ ခါတိုင်းလို အိမ်ခါးပန်းလေး ခေါင်းအုံးပြီး ဆေးလိပ်ဖွာဖို့ပင် စိတ်မကူးနိုင်။ ရင်ထဲတွင် လေးလံပြီး ညှိုးချုံးနေသည်။
"အမေ"
"အေး"
"ဒီနေ့ အစားသင်တယ်"
"ရရဲ့လား"
"ဟင့်အင်း"
"ပြစမ်း"
သားတော်မောင် မောင်သံချောင်းက သူ၏လေ့ကျင့်ခန်း စာအုပ်ကို တွန့်ဆုတ် တွန့်ဆုတ်နှင့် လှမ်းပေးသည်။ မစိန်မြက စာရွက်များကို တဖျပ်ဖျပ် လှန်ကာ စစ်ဆေးသည်။ ကြက်ခြေခတ်ရာများနှင့် ပြည့်နေသော စာမျက်နှာများကို စိတ်လက်ညစ်ညူးစွာနှင့် စိုက်ကြည့်သည်။ ဆရာညံ့ခြင်းလော၊ တပည့်ညံ့ခြင်းလောဟု တွေးမနေအား။ တပည့်ညံ့ခြင်းသာ ဖြစ်သည်ဟု ချက်ချင်း ဆုံးဖြတ်လိုက်သည်။ ကျောင်းက ဆရာလည်း ညံ့မည်မဟုတ်။ အိမ်က ဆရာလည်း အလွန်တော်သည်ဟု တွေးသည်။
"သား မစားတတ်သေးဘူး အမေ"
သံချောင်းက သူ့အမေ လက်လှမ်းမမှီရာသို့ ဆုတ်ခွါရန် ဟန်ပြင်သော်လည်း မစိန်မြက သူ့ထက် မြန်သည်။ သံချောင်း၏ ဦးစွန်းဖုတ်ကို ဘယ်ဘက်လက်နှင့် ဖျတ်ခနဲ လှမ်းဆွဲသည်။ ခေါင်းက ရှေ့သို့ ငိုက်လာတော့ ညာဘက်လက်နှင့် ကျောပြင်ကို ဖြန်းခနဲ ရိုက်လိုက်သည်။
"အပေါင်းလည်း မတော်၊ အမြှောက်လည်း မတတ်ဘဲနဲ့ စားချိန်ကျမှ စားချင်လို့ ရမလားဟဲ့ အဖေတူသားရဲ့"
မစိန်မြက ဒေါသတကြီး ရေရွတ်သည်။ သံချောင်း ငိုနေသည်။ ကိုရေခဲက ငေးနေသည်။
----------
မစန္ဒာ
မြတ်လေး၊ မေ၊ ၁၉၈၇။