ရွှေတမာ

အကယ်၍သာ သမီးကလေး ခင်မာလာ မွေးဖွား၍ မလာပါလျှင်လည်း ဦးထွန်းအေးတို့အဖို့ ထိုမျှ စိတ်ပူပန်မည် မဟုတ်ပေ။
ယခုမှာမူ သမီးလေးကို မွေးသည့်နေ့မှ စ၍ သူသည် အစဉ် ပူပန်ခဲ့ရသည်။
ယနေ့ညလို အခါမျိုးတွင် အိပ်လို့ပင် မရလောက်အောင် စိတ်မှာ လှုပ်ရှား နေပေသည်။ သူ့သမီးလေးသည် အသက် ၂၀ ပင် ပြည့်တော့မည်။ ထိုအနှစ် ၂၀ ကာလပတ်လုံး သူသည် စိတ်ပင်ပန်းမှု ဝေဒနာကို အစဉ် ခံစား လာခဲ့ရပေသည်။
အိပ်ခန်းမှ ထ၍ ဘေးတံခါးမကြီးမှ သူသည် ခြံတွင်းသို့ ဆင်းလာခဲ့သည်။
မိုးဦးဖြစ်၍ လေထဲတွင် မိုးသက်နံ့သည် ပါလာခဲ့ လေသည်။ အိမ်ထဲတွင် ပူအိုက်သလို ဖြစ်နေပေသည်။ သူသည် စံပယ်ရုံများ ဘေးရှိ ခုံတန်းပေါ်တွင် ထိုင်၍ လေကို မှန်မှန် ရှူ၍ နေသည်။
မိုးသားများ မရှိသေးခင် လသည် ဝင်းပစွာ သာနေသည်။ သူ့မျက်လုံးများသည် စံပယ်ပွင့်များ ပေါ်သို့ ရောက်သွားသည်။ လရောင်ဖြင့် ပွင့်အာ လာကြပြီ ဖြစ်သော စံပယ်၏ ငွေဝတ်လွှာများမှာ ရက်ရက်စက်စက်ပင် လှပ နေပေသည်။ ချိုအေးသော ရနံ့သည် သူ့ဝန်းကျင်ဝယ် သင်းပျံ့နေ၏။ သစ်ရွက်များလည်း ငွေရောင်တောက်၍ ဖြည်းညှင်းစွာ လှုပ်ရှား၍ နေပေသည်။
ထိုကဲ့သို့ လှပသော ညများတွင် သူသည် မခင်သူနှင့် တွေ့ခဲ့သည် မဟုတ်ပါလော။ နူးညံ့ ပြေပြစ်သော၊ ယဉ်ယဉ်လေးနှင့် ချောမွေ့သော မခင်သူ၏ မျက်နှာကို လရောင်အောက်တွင် တွေ့ခဲ့ရလေသည်။
တီးတိုးစွာ နှီးနှော နေကြသည့် ချစ်သူ့ စကားသံတို့မှာ ထိုစဉ်က နှစ်သက်၍ မဆုံးခဲ့ပေ။
ယခုလို စံပယ်ရုံ နားမှာတော့ မဟုတ်ပေ။ သူတို့နှစ်ဦး တွေ့စဉ်က မခင်သူတို့ ခြံထဲရှိ ယုဇနပင် အောက်မှာ ဖြစ်ခဲ့သည်။ လရောင်မှာ ယုဇနရွက်များ ကြားမှ လက်၍ ထင်နေသည်။ ညဥ့်၏လေတွင် ယုဇနပွင့် ရနံ့များသည် သင်းပျံ့လှသည်။ များသောအားဖြင့် သူကချစ်စိတ် မွှန်တတ်သည်။ မခင်သူလေး၏ လိမ္မာမှုကြောင့် သူတို့ ကျူးကျူးလွန်လွန် မဖြစ်ကြ။ ထိန်းသိမ်းနိုင်ခဲ့ ကြသည်။
ငယ်ရွယ်သူ ချစ်သူချင်း ယခုလို တိတ်ဆိတ်သော ညတွင် တွေ့ရသည်မှာ ချမ်းမြေ့ရွှင်လန်းဖွယ် ကောင်းသလောက်၊ ကြောက်စရာ အခြေအနေဆိုး ကိုလည်း ဖန်တီး ပေးနိုင်သည်။
မခင်သူက ဓမ္မဆန်ပေသည်။ များသော အားဖြင့်လည်း ဓမ္မကြောင်းကို ယှဉ်၍ ပြောတတ်၏။
သူသည် မခင်သူ၏ ပါးနုနုလေးကို သူ့ပါးနှင့် အပ်၍ ချစ်စိတ်မွှန်တိုင်း ပြောချင်ရာ ပြောခဲ့သည်။
“မေမေတို့က သဘော မတူလည်း ခင့်ကို မောင်က ရအောင် ယူမှာပဲ။ ခုတောင် နောက် ကောလိပ်မှာ ၃ နှစ်ပဲ နေရတော့မယ်”
သူသည် ဒါတွင်မက ဘယ်လောက် ချစ်ကြောင်းကိုလည်း ဋီကာ ချဲ့တတ်သေးသည်။
သို့သော် မခင်သူကမူ သူ့ရင်ခွင်ထဲတွင် လမင်းကို မော့ကြည့်ရင်းပင် ဓမ္မဆန်ဆန် ပြောတတ်သည်။
“လူတွေတောင်မှ မမြဲကြပါဘူး မောင်၊ အချစ် ဆိုတာလည်း သင်္ခါရ ပါဘဲ။ တစ်ကြိမ် တစ်ခါမှာ မုန်းချင်လည်း မုန်းပေမှာပေါ့။ ဘယ့်နှယ့်လုပ်ပြီး မောင်ဟာ ခင့်ကို တစ်သက်လုံး ချစ်ရမယ်လို့ ခင်က ပြောနိုင်မလဲ။ ပြီးတော့လည်း ခင်နဲ့ မောင်က ခုမှ တွေ့ကြတာ။ မိဘဆိုတာ တစ်သက်လုံး ပြုစု ကျွေးမွေးပြီး စောင့်ရှောက် လာခဲ့တာ။ မိဘစကား ကိုတော့ ဘယ်တော့မှ မလွန်ဆန်နဲ့ပေါ့”
မခင်သူက ထိုသို့များ ပြောလိုက်လျှင် သူသည် ဆတ်ဆတ်ခါ နာတတ်သည်။ သူယောက်ျား ပီသကြောင်း၊ သစ္စာ မဖောက်ကြောင်းကို တသီကြီး ပြောတတ်သည်။
ဒီလို ပြောလျှင်လည်း မခင်သူက ပြုံးပြုံးလေးပင် နေတတ်သည်။
ဒါပေမဲ့ နောက်ပိုင်းတွင် သူသည် မခင်သူအား သစ္စာဖောက် ခဲ့သည်။ မလိမ့်တစ်ပတ် လုပ်၍ စွန့်ပစ်ခဲ့ပြီး နွဲ့နွဲ့ရီကို ယူလိုက်သည်။
အတိတ်များသည် တစ်ခုပြီး တစ်ခု ပေါ်လာတိုင်း သူ့စိတ် လှုပ်ရှားမှုသည် ပြင်းပြလာသည်။
သူပင် ယခု ဦးထွန်းအေး ဖြစ်၍ မခင်သူလည်း ဒေါ်ခင်သူ ဘဝကို ရောက်၍ နေပေသည်။
ပထမတော့ သူသည် မခင်သူ၏ အချစ်ကို ဖောက်ဖျက် လိုက်စဉ်က သစ်ရွက်တစ်ရွက် ခြွေပစ် သလောက်ပင် စိတ်ထဲတွင် အမှတ် မထားခဲ့။
သို့သော် ခင်မာလာ မွေးလာသည့် နေ့တွင် “သမီးလေး” ဆိုလိုက် ကတည်းက ရင်ထဲတွင် ထိန်းခနဲ ဝင်ဆောင့်လိုက်သည်။
“ဘုရား ... ဘုရား-” သူသည် ဘုရားပင် တမိသည်။ မခင်သူ အပေါ်တွင် သစ္စာဖောက် ခဲ့သလို၊ မခင်သူ စိတ်ဆင်းရဲအောင် သူလုပ်ခဲ့သလို၊ သူ့သမီးလေး အပေါ် တစ်စုံတစ်ယောက်က စော်ကားမှာကို သူ အင်မတန်မှ စိုးရိမ်လာသည်။
သူ့မှာ သမီးနှင့် ဖြစ်လာပေပြီ။ သူသည် ယခုတော့ တွေးခေါ်တတ်လာ ရပေမည်။ အခြေအနေက သူ မတွေးရင်လည်း မဖြစ်တော့ပေ။
ခင်မာလာသည် ပန်းလေးလို လှသည်။ သည်လို လှလေလေ သူက စိတ်ပူလွန်းလေ ဖြစ်သည်။
တစ်ခါ တစ်ခါတွင် ဒေါ်နွဲ့နွဲ့(ရီ)အား သမီးအတွက် စိုးရိမ်ကြောင်းကို ပြောပြတတ်သည်။
“ဪ ... ဒက်ဒီနှယ် သမီးလေးက လိမ္မာပါတယ်”
သူ့ဇနီးမှာ ခေတ်ဆန်သူပီပီ သူ့ကို ဒက်ဒီဟု ခေါ်သည်။ သူ့ရင်ထဲတွင် ပိုဆိုးသွားသည်။ မခင်သူ သည်လည်း လိမ်လိမ်မာမာနှင့် ရိုးရိုးသားသားပင် ဖြစ်သည်။
လရောင်မှာ အနည်းငယ် မှိန်သွား၍ သူ့အတွေးကို ရပ်နားလိုက်ကာ ကောင်းကင်ကို မော့ကြည့် လိုက်သည်။ မိုးသားများ တက်လာ၍ မိုးဖွဲလေးများပင် တစ်ပေါက် နှစ်ပေါက် ကျလာသည်။ ထိုင်နေရာမှ ထရင်းပင် သူ မချစ်တော့ပြီ ဖြစ်သော မခင်သူကို သတိရနေ ပြန်သည်။ သူသည် မိုးစိုမှာ စိုး၍ မခင်သူကို ယုဇနပင် အောက်မှာ ထွေးနေတတ်သေးသည် မဟုတ်ပါလော။
သူသည် တဖြည်းဖြည်း သူဝင်ခဲ့သော ဘေးတံခါးမကြီးမှာ ရပ်၍ မှေးမှိန်နေသော လရောင်နှင့် ပြင်ပကို လှမ်း၍ ကြည့်နေမိ ပြန်သည်။
“ဟင်” သူ့ အသံများပင် ထွက်သွားသည်။ သူ မြင်ရသည်မှာ တကယ်မှပင် ဟုတ်ပါလေစ။ တကယ်တော့ တကယ်ပဲ ဖြစ်သည်။
ပိတောက်ပင် အောက်တွင် ယောက်ျားလေးနှင့် မိန်းမလေး နှစ်ယောက် မတ်တတ်ရပ်၍ ဖက်ထားသည်။ တဖက်မှ ဝင်နေသော လရောင်ဖြင့် မိန်းကလေးကို သူကောင်းစွာ မြင်ရသည်။ မိန်းကလေးမှာ သူ့သမီး ခင်မာလာ ဖြစ်သည်။ ယောက်ျားပျိုသည် သူ့သမီးကို ယုယစွာ နမ်း၍ အပြင်သို့ ထွက်သွားသည်။ မကြာခင်ပင် သမီးလေး ခင်မာလာမှာ မှောင်ရိပ်တွင် ပျောက်ကွယ် သွားတော့သည်။
သူသည် ကြိုးစား၍ အိပ်ရာခန်းသို့ ရောက်အောင် လာရသည်။ ပြီးလျှင် အိပ်ပျော်အောင် မနည်း လုပ်နေရသည်။ သရဲခြောက် ခံနေရသလို ဖြစ်နေတော့သည်။
သူ့ကိုယ်သူ ဝဋ်လည်ပြီဟု ထင်နေသည်။
“ဘုရား သိကြားမလို့ မခင်သူ အပေါ် ငါစော်ကား မိတာတွေဟာ သမီးလေး အပေါ် မကျရောက် ပါစေနဲ့”
သူသည် ကတုန်ကယင်ပင် ဆုတောင်း နေမိသည်။
* * *
ဒေါ်ခင်သူ၏ ခင်ပွန်းမှာ ဦးအောင်ကျော် ဖြစ်သည်။ Collective Farming ကို ပုံဖော်နိုင်ရန် အတွက် ဦးအောင်ကျော်မှာ သူငယ်ချင်းများနှင့် စုပေါင်း၍ လုပ်ငန်းတစ်ခုကို တည်ထောင်ထားသူ ဖြစ်သည်။
ပြည်သူ့ ကောက်ပဲသီးနှံ ရောင်းဝယ်ရေး လီမိတက်တွင် မန်နေဂျာ ဖြစ်ပေသည်။ သူတို့သည် ဆန်စပါးတွင်မက ကြက်ဌက် မွေးမြူရေးနှင့် ရှမ်းပြည်နယ်တွင် စည်သွတ်ဘူး လုပ်ငန်းများ လုပ်ကိုင်ရာတွင် အတော် တိုးတက်လာ ပေသည်။ သူသည် လယ်သမား တွေနှင့်လည်း ရောနှောနေသည်။ ကျွဲနွား တွေနှင့်လည်း နေတတ်သည်။
ယနေ့နံနက်မှာ တနင်္ဂနွေနေ့ ဖြစ်သော်လည်း ဦးအောင်ကျော်သည် အစည်းအဝေး တစ်ခုအတွက် မနက်အစောကြီးပင် သွားစရာ ရှိလေသည်။
သူအဝတ်အစား လဲနေစဉ်ပင် ဒေါ်ခင်သူသည် အနီးသို့ ရောက်လာလေသည်။
ဒေါ်ခင်သူ မျက်နှာ ကြည့်ရသည်မှာ နွမ်းနေပုံ ရသည်။
“ခင် ညတုန်းက အိပ်လို့ မရဘူးလား”
ဒေါ်ခင်သူမှာ ညက တကယ်ပင် အိပ်၍ မရပေ။
"ဟုတ်တယ် အစ်ကိုကြီး သားအကြောင်း စဉ်းစားမိလို့ပါ"
“ခင်ကလည်းကွာ သားက မငယ်တော့ပါဘူး။ သူ့ သူငယ်ချင်းအိမ်မှာ အိပ်မယ်ဆိုရင် အိပ်မယ့် အကောင်ပါ။ ညက လည်မှာ မဟုတ်ပါဘူး။ သူပြန်လာလို့ အိပ်ချင်နေသေးရင်လဲ နေပါစေ့။ မအိပ်ရင်တော့ ၉ နာရီလောက် ကျရင် ကားနဲ့ အစ်ကိုကြီးဆီ လွှတ်လိုက်နော်။ အစ်ကိုကြီး ခုတော့ လမ်းလျှေက်သွားမယ်”
ဦးအောင်ကျော်သည် အဝတ်အစား လဲပြီး ထွက်သွားတော့သည်။ ဒေါ်ခင်သူမှာ ခြံအတွင်း လမ်းလျှောက်ရင်းပင် သား အကြောင်းကို စဉ်းစားနေမိသည်။ အထူးသဖြင့် ညက ဦးထွန်းအေးကို တစ်ညလုံး သတိရနေသည် ဆိုလျှင် ပိုမို၍ မှန်ပေလိမ့်မည်။
“ခင်ရာ တစ်ခါတော့ အတွေ့ခံစမ်းပါ။ မောင့်သူငယ်ချင်း အိမ်မှာ ဘုန်းကြီးဆွမ်းကျွေး ရှိတယ်ဆိုပြီး မောင် ညဘက် သူငယ်ချင်းအိမ်မှာ အိပ်ရင်း ခင်နဲ့ လာတွေ့မယ်”
ဦးထွန်အေးသည် သူ့ကို ဒီလိုပဲ ပြောခဲ့သည်။ မိဘများကိုလည်း ဆွမ်းကျွေးကို အကြောင်းပြ၍ အိမ်မှ ထွက်လာတတ်သည်။ သူ့သားလေးရော ညကများ သူ့ချစ်သူဆီ သွားနေမည်လား။
ဦထွန်းအေး၏ သစ္စာဖောက်မှုကြောင့် ဦးထွန်းအေးအား ကြိုးစား၍ မေ့ဖျောက်ပစ်ပေမယ့် ဒေါ်ခင်သူ အဖို့မှာ တသက်သက်ပင် ဖြစ်နေလေသည်။
သားဦးကပင် အသက် ၂၄ ကျော်ခဲ့၍ ယခုနှစ်ဆိုလျှင် B.sc အောင်တော့မည်။ သူကတော့ ဦးထွန်းအေးကို မမေ့နိုင်ပေ။ ဒေါ်ခင်သူမှာ တစ်နည်းအားဖြင့် ကံကောင်းသူဟု ဆိုရပေမည်။
ဦးအောင်ကျော်က သူ့အား ငုံထားမတတ် ချစ်ရှာသည်။ မခင်သူ အပေါ်မှာ သစ္စာရှိပေသည်။ တကယ် ယောက်ျားပီသ ပေသည်။
“ခင်ရယ် ကိုယ့်ကိုမှ သူက မချစ်တော့ဘဲဟာ သိပ်စိတ်ဆင်းရဲ မခံပါနဲ့ကွ” ဒေါ်ခင်သူက တစ်ခါတလေ ငိုင်၍နေလျှင် ဒီလိုပဲ ဦးအောင်ကျော်က ပြောတတ်သည်။ ဦးအောင်ကျော်သည် ဒေါ်ခင်သူ ဖြစ်ခဲ့သမျှကို အားလုံးသိသူ ဖြစ်သည်။
"မေမေ"
သားခေါ်သံ ကြား၍ အတွေးရပ်ကာ ဒေါ်ခင်သူမှာ ခြဝသို့ လှမ်းကြည့်လိုက်၏။
"ဟော .. သား ပြန်လာပြီလား"
ဒေါ်ခင်သူသည် ရှေ့သို့တိုး၍ သားကို ဖက်လိုက်သည်။
"ဖေဖေရော မေမေ၊ ကိုအေးဖေတို့ သားကို လိုက်ပို့တယ်။ ခြံဝကပဲ ပြန်လွှတ်လိုက်တယ်။ သူတို့ ဧည့်သည်တွေ ပြန်ပို့ရဦးမယ်" စကားပြောနေသော သားမျက်နှာကို ဒေါ်ခင်သူက အကဲခတ်သလို ကြည့်၏။
"ဖေဖေ အစည်းအဝေး သွားတယ်။ ဒီနေ့ မေမေ နို့ထမင်း ကျိုထားတယ်။ ကဲ ... ကဲ ... လာ"
ဒေါ်ခင်သူသည် သားကို ထမင်းစားခန်းသို့ ခေါ်သွားသည်။ နို့ထမင်းနှင့် ကော်ဖီ ပြင်ခိုင်း၍ သူ့သား အနီးမှာ ထိုင်နေသည်။
နံနက်ခင်း၏ နေရောင်ခြည်မှာ ပြတင်းမှ ဝင်၍ အခန်းထဲတွင် လင်းနေသည်။
နံနက်၏ နေရောင်ခြည်သစ်လို သူ့သား မျက်နှာသည် နုပျိုလတ်ဆတ် နေသည်ဟု သူက ထင်သည်။
စားပွဲပေါ်မှ နှင်းဆီဖြူကဲ့သို့ သူ့သား မျက်နှာသည် နုပျိုလတ်ဆတ် နေသည်ဟု သူက ထင်သည်။
ကျော်သူသည် နို့ထမင်း သောက်ရင်း တစ်ချက်မျှ သမ်းလိုက်သည်။
"သား ညက ကောင်းကောင်း မအိပ်ရဘူး ထင်တယ်" ဒေါ်ခင်သူ မေးလျှင် ကျော်သူသည် ရုတ်တရက် မျက်နှာ ပျက်သွားရာမှ ဣ​နြေ္ဒဆည်ကာ ပြန်ပြော၏။
"အိပ်ရပါတယ် မေမေ။ မနက်က ၄ နာရီလောက် ထရလို့ပါ"
ဒေါ်ခင်သူ့ စိတ်ထဲ ထင့်သွားတော့သည်။ ဟုတ်ပါသည်။ ညက သူ့သား အိပ်ရမည် မဟုတ်ပေ။
"ခင်နဲ့ တွေ့တဲ့ညဆို နောက်နေ့မနက် သိပ်အိပ်ချင်တာပဲ။ ဒါပေမဲ့ မောင့်မှာ တစ်နေ့လုံး ဟန်ဆောင် နေရတယ်။ နေ့ခင်းအိပ်ရင် မေမေတို့က ညက အိပ်ပျက်လား၊ ဘာလား စစ်မှာစိုးလို့"
ဦထွန်းအေးနှင့် သူတုန်းက ဒီလိုပဲ ဖြစ်ခဲ့သည်။ ခေတ်များ ပြောင်းလဲသည်နှင့်အမျှ ဝတ်စားတန်ဆာ အနုပညာ ဂီတများ ပြောင်းလဲ သွားကြမည် ဖြစ်ပေသည်။
ချစ်ခြင်း ဆိုသည်မှာ ပြောင်းလဲပေလိမ့်မည် မဟုတ်။ ဦးထွန်းအေးနှင့် ဒေါ်ခင်သူ ငယ်စဉ်က ချစ်ခဲ့ကြသလိုပင် ကျော်သူသည်လည်း သူ့ချစ်သူနှင့် ချစ်ပေလိမ့်မည်။
"ကဲပါလေ သား ခဏ မှိန်းလိုက်ရင် ကောင်းမယ်။ မေမေတော့ မင့်ဖေဖေဆီ ကားနဲ့ သွားကြိုဖို့ ဝင်းမောင်ကို ပြောလိုက်ဦးမယ်"
ဒေါ်ခင်သူသည် နောက်ဘက် လှေကားမှ ခြံထဲသို့ ဆင်းသွားသည်။ "ညက သိပ်လှတာ၊ လကလည်း ဝင်းနေတာ သားမှာတော့ ချစ်သူ ရှိနေပြီလေ" ဒေါ်ခင်သူ တစ်ယောက်တည်း တွေးနေတော့သည်။ ကားလွှတ်ပြီး အိမ်ထဲသို့ ပြန်လာ၏။
သူ့သား အိပ်နေသော အခန်းထဲသို့ ဝင်သွားမိသည်။ ကျော်သူသည် မအိပ်သေး စောင်ခြုံ၍ ပက်လက် လှန်နေသည်။ ပြတင်းမှ လေအေးများသည် အထဲသို့ ဝင်လာနေသည်။
ညက ခင်မာလာနှင့် တွေ့ခဲ့သော အချိန်များသည် နှလုံးသားကို ရိုက်ခတ်နေသည်။ မျက်စိ မှိတ်လိုက်တိုင်း ခင်မာလာ ပါးပြင်နုနုလေးများ မွှေးခဲ့ရသည်ကို ထင်ထင်ရှာရှား ပေါ်လာသည်။ သူသည် စောင်ကို လှစ်၍ မျက်လုံး ဖွင့်လိုက်သည်။
"မေမေ" သူ လန့်သွားသလို အော်လိုက်၏။ ဒေါ်ခင်သူမှာ သူ့ဘေးတွင် မားမားကြီး ရပ်နေသည်။
"သားတော့ အိပ်နိုင်မှာ မဟုတ်ပါဘူးကွယ်"
ဒေါ်ခင်သူက ပြုံး၍ ပြောလိုက်သည်။
ကျော်သူ မလုံတော့ပေ။ မျက်နှာလည်း မထားတတ်သလို ဖြစ်လာတော့၏။ မော့ကြည့်လိုက်တိုင်း မေမေ၏ ပြုံးပြုံးကြီး ဖြစ်နေသော မျက်နှာမှာ "သား ညက ဘာလုပ်သလဲ ဆိုတာ မေမေ သိပါတယ်" ဟု ပြောသလို ဖြစ်နေတော့သည်။ သူသည် ငုတ်တုတ် ထိုင်လိုက်၏။
"မေမေ"
သူ့ဘေးတွင် ဒေါ်ခင်သူမှာ ထိုင်နေသည်။
"သားမှာ ချစ်သူ ရှိနေပြီ"
ဒေါ်ခင်သူ မတုန်လှုပ်ပါ။ နဂိုကပင် ရိပ်မိပြီး ဖြစ်သည်။
"အေးပေါ့ ဘယ်သူလဲ၊ ရှေ့နှစ်ဆို သားလည်း ကျောင်းထွက်ရမှာပဲ"
"သား ယူမယ့် မိန်းမက ခင်မာလာတဲ့။ လယ်ဝန် ဦးထွန်းအေး သမီးပဲ"
"ကိုထွန်းအေးသမီး ဟုတ်လား"
ဒေါ်ခင်သူမှာ ဒီတခါတော့ အတော် တုန်လှုပ်သွားသည်။ ယခု ဘဝတွင် တစ်ဖန်ပြန်၍ မျက်နှာချင်း ဆိုင်သော်မှ မဆိုင်လိုတော့ပြီ ဖြစ်သော ကိုထွန်းအေး သမီးကိုမှ သူ့သားက သွား၍ ချစ်မိပေသည်။
“သားဖေဖေ လာတော့ တိုင်ပင်သေးတာပေါ့”
ဒေါ်ခင်သူသည် အခန်းတွင်းမှ ထွက်လာသည်။
ဦးအောင်ကျော် ပြန်လာ၍ ထမင်းကျွေး နေသော်လည်း သူ စိတ်မပါလှပေ။ ထမင်းစား ပြီးပြီးချင်း သူ့အိပ်ခန်းကို တက်လာတော့သည်။
ဦးအောင်ကျော်မှာ နောက်မှ ဝင်လာ၍ ဒေါ်ခင်သူနှင့် အတူ ခုတင်ပေါ်မှာ ထိုင်နေသည်။
“ခင် နေမကောင်း ပြန်ဘူးလား”
“ကောင်းပါတယ်၊ အိပ်ချင်လို့”
“ခင်က သားကို အစိုးရိမ်လွန်တာကိုး သား အိပ်ပြီလား”
“ဟုတ်တယ်”
ဒေါ်ခင်သူသည် စောင်တစ်ထည်ကို ခြုံကာ လှဲအိပ်ရင်း ပြတင်းဘက်ကို ငေးနေသည်။
“သားမှာ ချစ်သူရှိပြီ အကိုကြီးရဲ့။ သူ ရှေ့နှစ်ဆန်းမှာ လက်ထပ်ချင်တယ် ထင်ပါရဲ့။ ညက ခင် ပြောတာ မမှန်ဘူးလား။ သူ မအိပ်ဘူး”
“ဘာကွဲ့ သားက မအိပ်ဘူး”
ဦးအောင်ကျော်သည် ဒေါ်ခင်သူ ပခုံးကို ဆွဲ၍ မေးလိုက်သည်။
“ဟုတ်တယ်၊ ဒါလောက်လှတဲ့ ညမှာ သားဟာ ခင်မာလာကို သွားတွေ့တာပေါ့။ ခင်မာလာက ကိုထွန်းအေး သမီးတဲ့။ ခင်တော့ဖြင့် ကလေးတွေကိုလည်း သနားတယ်။ ကိုထွန်းအေး ကိုတော့ မျက်နှာချင်း မဆိုင်ချင်တော့ဘူး”
ဦးအောင်ကျော်သည် အတန်ကြာ ငြိမ်သက်နေရာမှ သူ့ဇနီးကို ဆွဲယူပွေ့ရင်း ...
“ခင်မာလာကို အစ်ကိုကြီး မြင်ဖူးပါတယ်။ ပညာလည်း တော်သားပဲ။ လိမ္မာပါတယ်တဲ့။ သတင်းတော့ ကြားဖူးပါတယ်။ သားက မေတ္တာ ရှိနေပြီပဲကွယ်။ ခင်ရယ် တစ်ခု စဉ်းစားစမ်းပါ။ ကိုထွန်းအေးက ခင့်ကို သစ္စာဖောက်ပြီး နွဲ့နွဲ့ရီကို ယူသွားတုန်းက ခင်ဘယ်လောက် စိတ်ဆင်းရဲ ရသလဲ။ သူ့မိဘတွေဘက် လိုက်သွားတာပဲ မဟုတ်လား။ ခုလည်း သားကများ မယူရင် ခင်မာလာ ဘယ်လောက် စိတ်ဆင်းရဲ ရမလဲ။ ခင် စဉ်းစားလေ။ တို့များ တရားမျှတဲ့ မိဘဖြစ်အောင် ကြိုးစားရမှာပဲ ခင်”
ဒေါ်ခင်သူသည် ငြိမ်သက်၍ပင် နေ၏။
* * *
ဦးထွန်းအေး၏ ဂနာမငြိမ် ရောဂါမှာ အိပ်ရာထဲကပင် ထ၍ မရပေ။ နေ့ခင်း ၁၂ နာရီ ထိုးလေပြီ။ သူ့ အမိန့်အတိုင်း ဒေါ်နွဲ့နွဲ့ရီမှာ သမီးကို စစ်ဆေးနေသည်။ မကြာခင်ပင် သူ့ဇနီးသည် အခန်းထဲသို့ ဓာတ်ပုံ တစ်ခုကို ကိုင်ရင်း ဝင်လာသည်။
“ကဲ ဒက်ဒီရယ်၊ စိတ် သိပ်ပူ မနေပါနဲ့။ ထစမ်းပါဦး”
ဦးထွန်းအေးကို အိပ်ရာမှ အသာ ဆွဲထူလိုက်သည်။
“ဒီမှာ ဒက်ဒီ သမက်လောင်းကို ကြည့်စမ်း။ မာမီ အကုန်စုံစမ်း ပြီးပြီ။ မန်နေဂျာ သူဌေးကလေး ဦးအောင်ကျော်၊ ဒေါ်ခင်သူရဲ့ သားပေါ့”
ဦးထွန်းအေးသည် ဓာတ်ပုံကို ကိုင်ရင်း တုန်သွားသည်။ မေးရိုးကားကား နားရွက်ကြီးကြီးနှင့် မျက်လုံးမျက်ဖန် ကောင်းသည်။ အမေတူသားပင် ဖြစ်သည်။
“ကောင်လေးက သူ့မိဘတွေကို ရှေ့နှစ်ဆန်းမှာ လက်ထပ်ဖို့ ပြောမယ်တဲ့။ ဒက်ဒီ မပူနဲ့တော့။ ဒီကောင်လေး ရိုးတာ၊ တော်တာ-၊ ပိုက်ဆံ ရှိတာတွေဟာ အန်တီမြင့် စာရင်းထဲမှာ ရှိပြီးသားပါ”
အန်တီမြင့် ဆိုသော အဒေါ်ကြီးမှာ လူကုံထံ မုဆိုးမ ဖြစ်သည်။ အထက်တန်းလွှာ သားသမီးများကို စာရင်းလုပ်၍ ဖလှယ်နေသော မိန်းမကြီး ဖြစ်သည်။ B.C.S Class (1), Class (2) များကိုလည်း သူ့စာရင်းထဲတွင် တွေ့နိုင်လေသည်။
ဦးထွန်းအေးသည် ယခုထိ လှုပ်မရ။ သို့သော် စိတ်အနည်းငယ်တော့ အေးသွားလေသည်။ သူ့လို စော်ကားမည့်သူ မဟုတ်သည်ကိုပင် ဝမ်းထဲမှာ ကျိတ်၍ ဝမ်းသာမိသည်။
“အေးလေ ဦးအောင်ကျော်နဲ့လည်း ဒက်ဒီနဲ့ ခင်သားပဲ။ စုံစမ်း သေးတာပေါ့ မာမီ”
“အံမယ် ဒက်ဒီရယ် အန်တီမြင့်လက် လွှဲလိုက်ရင် ပြီးတဲ့ ကိစ္စပါ”
(ဦးထွန်းအေးကမူ လက်ထဲမှ ဓာတ်ပုံကို ခုထိ မချသေးပေ။)
“မခင်သူနဲ့ တူလိုက်လေကွယ်”
သူသည် သူ့ဇနီးကိုပင် ပြောနေလေသည်။
* * *
ဒေါ်ခင်သူတို့က ဆင်းရဲသူများ မဟုတ်ပေ။ ခင်မာလာနှင့် မောင်ကျော်သူ လက်ထပ်ရေးမှာ ချောမော၍ လာလေသည်။
ယနေ့ စေ့စပ်သည့်နေ့ ဖြစ်လေသည်။ ပရိသတ်များ အသီးသီး ထပြန် သွားကြလေပြီ။ ဦးအောင်ကျော် မှာလည်း ဒေါ်နွဲ့နွဲ့ရီနှင့် စကားလက်ဆုံ ကျနေလေသည်။
ဒေါ်ခင်သူသည် ယွန်းသေတ္တာငယ် တစ်ခုနှင့် စာတစ်အိတ်ကို ဦးထွန်းအေးအား ပေးခဲ့၍ နှုတ်ဆက်ကာ ထွက်လာခဲ့သည်။
“ကဲ အစ်ကိုကြီးရေ ခင်တို့ ပြန်ကြဦးစို့။ ခွင့်ပြုပါဦး ဒေါ်နွဲ့နွဲ့ရီ”
ဒေါ်နွဲ့နွဲ့ရီမှာ ပြုံး၍ ကျန်ရစ်သည်။ ဦးထွန်းအေးသည် ကားပေါ်သို့ တက်သွားသော ဒေါ်ခင်သူ ဇနီးမောင်နှံကို ငေးနေသည်။
ဦးအောင်ကျော်၏ မေတ္တာစစ်ကို ခိုလှုံရသော ဒေါ်ခင်သူမှာ လန်းဆတ် နုပျိုလျက် ရှိသေးသည်။
ရိုးသားသော အလှသည် ဘယ်တော့မှ မရိုး ဆိုသလိုပင် ဒေါ်ခင်သူသည် မရိုးသော အလှဖြင့် လှနေပေသေးသည်။
ဦးထွန်းအေးသည် အိပ်ခန်းသို့ ဝင်လာ၍ သေတ္တာလေးကို ဖွင့်လိုက်သည်။ အထဲတွင် စာများ ဖိုင်တွဲလျက် တွေ့ရသည်။ ငယ်စဉ်က သူရေးခဲ့သော “ချစ်သမျှကို” စာများ ဖြစ်လေသည်။ တော်ပေသည်။ သူကတော့ မခင်သူ စာများကို မီးမြိုက် ပစ်ခဲ့လေသည်။ စာများအောက်မှ သူ လူပျိုတုန်းက ဓာတ်ပုံ ဖြစ်သည်။
သူသည် နောက်ဆုံး လက်ထဲရှိ စာအိတ်ကို ဖောက်၍ ဖတ်လိုက်သည်။ စာရွက်ပေါ်တွင်ကား ဒေါ်ခင်သူ လက်ရေးဖြင့်
မဲဇလီ ပင်ပျိုအောက်
ပေါက်လာတဲ့ ရွှေတမာ
ခါးချက်ကနာ
ရေစီးရယ်တစ်ခါ
ရေသာရယ်တစလှည့်
သူများလို တို့မရိုင်းတယ်
တိုင်းသိပါရဲ့။
ထိုကဗျာ ကလေးပဲ ပါလာလေသည်။
“ရေးတော့ မခင်သူ ရေးတော့။ ရေးနိုင်ပါတယ် မောင်က ခါးခဲ့မိပေတာကို”
သူသည် ကြေကွဲစွာပင် ပြောလိုက်ပါသည်။
-----------
ခင်နှင်းယု
ဧပြီ၊ ၁၉၅၃။