မြို့ မ၏ ချစ်ကြည်သံ

သက္ကရာဇ် ၁၂၄၇ ခု ပါတော်မူပြီးနောက် ထီးကျိုးစည်ပေါက်ဖြစ်ပြီး တစ်စုတစ်စည်းတည်းသော အနုပညာရှင်များ ရေဝေးကြာပမာ ဖြစ်ကြရသည်။ ထို့ကြောင့် ရေကြည်ရာမြက်နုရာဆိုသလို ထက်အောက် စုန်ဆန်လွင့်ပါးကြရတော့၏။ အစုအစည်းပြေပျက်၊ အထိန်းအကွပ်မဲ့ပြီး အားပေးချီးမြှင့် သူလည်း မရှိဖြစ်ကာ တစ်ဘက်ကလည်း အုပ်စိုးသူ လူမျိုးခြား၏ ယဉ်ကျေးမှုများက လွှမ်းမိုးလာလေတော့ မြန်မာအနုပညာရှင်များသည် ကိုယ့်ပညာကို ရင်ဝယ် သိမ်းသိမ်းထုပ်ထုပ် ပြုလုပ်ရုံကလွဲပြီး မတတ်နိုင်ကြတော့ပေ။ ရောက်ရာနေရာဒေသမှာ ကျားကုတ်ကျားခဲ ရပ်တည်ပြီး ကိုယ့်အနုပညာ မပျက်အောင် မနည်း ထိန်းသိမ်းနေကြရသည့် ကာလများပဲဖြစ်သည်။ မန်္တလေး၌ ကျန်ရစ်သော ၀က်မစွပ်ဝန်ထောက်မင်း၊ လှေသင်း အတွင်းဝန်မင်း စသည်ဖြင့် ပုဂ်္ဂိုလ်ကြီးများက မြင်တွေ့မှတ်ကြား တတ်သိထားသမျှ မပျောက်မပျက်ရအောင် ရေးချွတ်ထိန်းသိမ်းထားကြရသည်။
ထိုစဉ်က မဟာဂီတကိုလိုက်စား သီဆိုတီးခတ်ကြသော လမ်းဘေးအပျော်တမ်းတီးဝိုင်းလေးများ မန္တလေးမြို့၏ ပြတိုက်မှာ အနှံ့အပြားရှိခဲ့သည်။ တရုတ်တန်းမှာ ပဲပုပ်တန်း မှာ၊ သင်္ကန်းတန်းမှာ၊ ဆိုင်တန်းများ။ ထို့နောက် ထိုတီးဝိုင်းလေးတွေ အပြန်အလှန်လည်ပတ် ပေါင်းစုတီးမှုတ်ကြရင်း မန္တလေးဈေးချို၊ အနောက်ဘက် ဆိုင်တန်းရပ်ရှိ ဧရာဝတီစာရေးကြီး ကိုမြသိန်းနေအိမ်၌ ၁၉၂၅ခုနှစ်တွင် အပျော်တမ်းတီးဝိုင်းလေးတစ်ဝိုင်း စုစုစည်းစည်း တည်ထောင် လိုက်ကြတော့၏။ ကိုဘသက်၊ ကိုဘ အုန်း၊ ကိုဘငွေ၊ ကိုသန့်၊ ကိုလှဒင်၊ ကိုမြသိန်း၊ ကိုဘငြိမ်းစသူတို့ စတင်တည် ခဲ့ကြသည့် တီးဝိုင်းလေးကို မောင်ကျော်ညိန်း(ဝါ)ကိုဘငြိမ်းက 'ဗုဒ္ဓဝေယျာ ဝစ္စမြို့မအပျော်တမ်း တူရိယာအသင်း'ဟု စတင်အမည်ပေးခဲ့သည်။
ဈေးချိုအနောက်ဘက် 'ဆိုင်ဒူးခန်း'လက်ဖက်ရည်ဆိုင်လေးမှာ မြို့မတူရိယာအသင်းသား တွေ ချိန်းချက်စုဝေးကြသည်။ အသင်းတည်ရာ ကိုမြသိန်းအိမ်နီချင်းမှ အပေါင်ဆိုင်ပိုင်ရှင် ဦးတော်လုံက အပေါင်ဆုံးအနောက်တိုင်းလေမှုတ် တူရိယာ ပစ္စည်းများနှင့်အတူ အခြားလေမှုတ် ခေါ်ပေါ်တူရိယာပစ္စည်းများ ဝယ်ယူရန် ငွေကြေးများလည်း လှူဒါန်းသည်။ ဤသို့ဖြင့် စည်းမျဉ်းစည်းကမ်းများ စနစ်တကျရေးဆွဲကာ 'မြို့မတူရိယာအသင်း'အဖြစ် ၁၉၂၈ခုနှစ်တွင် စနစ်တကျ ဖွဲ့စည်းလိုက်တော့သည်။
ထိုအချိန်မှစ၍ အနောက်တိုင်းတူရိယာပစ္စည်းများကို ကျွမ်းကျင်ပိုင်နိုင်စွာ တီးမှုတ်နိုင်ရန်အတွက် အနောက်တိုင်းတူရိယာများနှင့် ကမ္ဘာ့ဂီတ သင်္ကေတနည်းပညာများကို ကျွမ်းကျင်တတ်မြောက်ခဲ့သော ကိုဘငြိမ်းသည် ဓားတန်းရပ်မှ ကိုသန့်နှင့်အတူ ပူးပေါင်းဦးဆောင်ကာ အသင်းသားများအား အနောက်တိုင်းဂီတပညာများ လေ့ကျင့်သင်ကြားပေးခဲ့သည်။
ထို့ပြင် ဥရောပတေးကြီးဘွဲ့ကြီး ဓာတ်ပြားများကို နားထောင်ရင်း ဓာတ်ပြားအယ်လဘမ်အဖုံး၌ ရိုက်နှိပ်ထားသော ရှင်းလင်းဖွင့်ဆိုချက်များကို ဖတ်သူဖတ်၊ ရှင်းပြသူရှင်းပြ၊ တေးသွားအားပြန်လည်ဖွင့်ရင်း နားစိုက်မှတ်သားသူက မှတ်သားကြရင်း ကိုဘငြိမ်း အပါအ၀င် မြို့မအသင်းသားများသည် ဓားတန်းကိုသန်းတိုက်တွင် စုကာ အနောက်တိုင်းဂီတအးလေ့လာကြ၏။ ခံစားကြ၏။ ရယူကြ၏။ ဗီသိုဘင်၏ ဆင်ဖိုနီဓာတ်ပြားများက ကိုသန့် ၊ ကိုငြိမ်းတို့၏ နှလုံးသားထဲ၌ ပူးဝင်သွား ခဲ့ပြီ။ သည်ကတည်းက-
'' . . . ရွာအုံစေ၊ တိမ်မြေမြနယ်ဆိုင်းလို့လေ . . .။
အို ရှုတိုင်း ထွေလှတယ်၊ ရွှေသည်းဆွတ်လွတ်ဖွယ် ဟူသော 'ဘုံပျံနေနန်း'အစချီ ရာသီဘွဲ့သီချင်းခံကြီးကို ဆင်ဖိုနီသြဂတ်စတြာပုံစံဖြင့် တင်ပြချင်သည့် အာသီသလည်း သူတို့၏ ရင်၌ စတင်အမြုတေစုခဲ့သည်။
ထိုအချိန်ထိုကာလ ၁၉၃ဝ-၁၉၃၁ခုနှစ်များက မန္တလေးမှာ ရွှေနန်းသုံးမဟာဂီတကို ပြန်လည်အမွှမ်းတင် ဖော်ထုတ်ခြင်းနှင့် နန်းတွင်းမူမြန်မာ သီချင်းကြီး သီချင်းခံများ လေ့လာလိုက်စားမှုအားကောင်းနေသော ကာလဟု ဆိုရပေမည်။ မန္တလေး၌ မဟာဂီတတက္ကသိုလ်အဖွဲ့ကြီးပေါ်ပေါက်လာ၏။ ဘီလစ်ကြီးဦးထင်ဥက္ကဋ္ဌအဖြစ် ဆောင်ရွက်ပြီး ဦးမောင်မောင်လတ်၊ စိန်ဗေဒါ၊ ဒေါ်စောမြအေးကြည်၊ လှကလေးစိန်၊ ဦးခင်မောင်ဒွေး၊ ဒေါ်ခင်မေ၊ ဆရာ ထာ၊ ဆရာဘကြီး၊ ဦးဘသင်၊ ဦးစံဝင်း၊ နန်းတော်ရှေ့ဆရာတင်၊ ဦးထွန်းအိုင်၊ ဦးတုတ်၊ ဆရာနွဲ့၊ ဆရာဘကလေးအစရှိသော မဟာဂီတအစုအဝေးကြီး ကလည်း အားကောင်းခိုင်မြဲနေသည်။
ထိုအချိန်တွင် ကိုငြိမ်းပါဝင်စုစည်းခဲ့ကြသည့် မြို့မတူရိယာအသင်းကလည်း...
(က) မြန်မာသီချင်းကြီးများ ဆည်းပူးပျံ့ပွားရေး။
(ခ) ကမ္ဘာသုံးတူရိယာများ လေ့လာသင်ကြားတတ်မြောက်ရေး။
(ဂ) Music Note အမှတ်အသားပညာဖြင့် ရေးသားထားသော တူရိယာပညာကို ဆည်းပူးလေ့လာရန်။
(ဃ) ကမ္ဘာ့ခေတ်မီ တူရိယာဝိုင်းကြီး ဖြစ်မြောက်ရေး။
(င) ရှေးမြန်မာ သီချင်းကြီးများကို ကျွမ်းကျင်သူများနှင့် ညှိနှိုင်း၍ ကမ္ဘာသုံးဖြစ်သော ကျြငခ သြအန ပညာဖြင့် ကူးပြောင်း လေ့လာရန်။
(စ) မြန်မာနိုင်ငံတော်အတွင်း တူရိယာအသင်းများက ဆက်သွယ်ပါလျှင် တတ်အားသမျှ အားပေးကူညီရန်။
ဟူသော ရည်ရွယ်ချက်များ ချမှတ်ခဲ့သည့်အတွက် မြန်မာသီချင်းကြီးများအား ခေတ်မီအနောက်တိုင်း တူရိယာပစ္စည်းများဖြင့် ဂီတသင်္ကေတပညာ အသုံးပြုကာ တီးမှုတ်ရေးမှာ ဧရာမ ကနဦး စွန့်စားမှုကြီးတစ်ခု ဖြစ်ခဲ့ပါသည်။
ဤထိုးဖောက်စွန့်စားမှုကြီးအား ကနဦးစပ်းသပ်မှုအဖြစ် ၁၉၃ဝ ခုနှစ်တွင် အနောက်တောင်ကျုံးထောင့်အနီး သီပေါရုပ်ရှင်ရုံ(ယခုမစိုးရိမ် ရုပ်ရှင်ရုံ)တွင် ကျင်းပသော အမျိုးသမီးသားဖွားမှု ရန်ပုံငွေအလှူပွဲ၌ 'တောမြိုင်ခြေလမ်း' ယိုးဒယားသီချင်းကြီးကို ဆိုက်ဆိုဖုန်း၊ ကလယ်ရီနက်၊ ထရမ်းပက်၊ ထရန်ဘုန်းစသော အနောက်တိုင်းတူရိယာ ပစ္စည်းများဖြင့် ကမ္ဘာ့ဂီတသင်္ကေတ အသုံးပြုကာ တီးမှုတ်ပြသခဲ့သည်။
၁၉၃၀ ၀န်းကျင်တွင် “မဟာဂီတအသင်းကြီး” ကို ဖွဲ့ပြီး စနစ်တကျ ထိန်းသိမ်းကြ၏။ ထိုအချိန်တွင် အနောက်နိုင်ငံတေးသွားနှင့် တူရိယာပစ်္စည်းများက တွင်ကျယ်နေပြီ။ မြန်မာလူငယ်တွေမျက်စိကျ သွားရည်ယိုနေကြပြီ။ သို့သော် မန်္တလေးတွင် မြန်မာ့အနုပညာ အသွေးအသား အဆီ အနှစ်က ဖိန့်ဖိန့်တုန်အောင် အားကောင်းခသောကြောင့် ထိုအရသာက ခေတ်လူငယ်များ နှလုံးသားထဲ စွဲထင်ကာ တစ်သွေးတည်း တစ်သားတည်း ဖြစ်နေပြီ။ ထို့ကြောင့် ကိုဘသက်၊ ကိုညိန်း၊ ကိုသန့် စသော ခေတ်ပညာတတ်လူငယ်များ၏ ဂီတသစ်ကို ချဉ်းကပ် သင်ယူ ဖန်တီးကြမူမှာ မြန်မာ့ဂီတသနေ်္ဓက ခိုင်မာပြီးသား ဖြစ်နေသောကြောင့် မျက်စိမှိတ်ပုံတူကူးတာမျိုး မဟုတ်ခဲ့ပေ။ ထို့ကြောင့်လည်း ဒီကနေ့အထိ မြို့မငြိမ်း၊ ဓားတန်းဦးသန်နှင့် မြို့မတူရိယာအသင်း ဟူသည် ခိုင်မာစွာ တည်ရှိနေခြင်း ဖြစ်သည်။ ဂီတသစ်ကို ဖန်တီးသော လူငယ်များဖြစ်သော်ငြား ကိုဘသက်တို့၊ ကိုညိန်းတို့၊ ကိုသန့်တို့၏ မြို့မတူရိယာအသင်းက စိန်ဗေဒါနှင့် အိမ်နီးချင်းတွေ၊ လက်ရင်း တပည့်တွေ၊ စိန်ဗေဒါညှော်ကို တစ်ဝကြီးမိခဲ့ကြသောသူတွေ ဖြစ်ခဲ့သည်။
ရှေးရှေးက မဟာဂီတသီချင်းများကို သီဆိုကြသော ဆရာကြီး ဆရာမကြီးများ၏ ဆိုဟန်ဆိုပေါက်များက အငေါက်အငန်းတွေနဲ့ တောက်တောက်ခါးခါး ပြတ်ပြတ်သားသား ရှိကြရသည်။ ထိုကဲ့သို့မျိုးဆက်မျိုးက ပေါက်ဖွားကြီးပြင်း ခဲ့ကြသူများ၏ ဂီတနှင့် ဆိုဟန်ဆိုပေါက်က “ဟန်”နှင့် “မာန်”နှင့် “ဌာန်”နှင့်ဟု ပြောလေ့ရှိသည်။ ရှေးရှေးမဟာဂီတသီချင်းများကို တီးမှုတ်ကြသော ဆရာ့ဆရာကြီးများကလည်း သူတို့ တီးလုံး တီးကွက်တွေမှာ ဟန်တွေ၊ မာန်တွေ၊ အဆို့တွေ၊ အပိတ်တွေ၊ အဆစ်တွေ၊ အသွားတွေ ပါသည်။ “မြို့မ”၏ ထီးချက်စောင့် နတ်ကြီးများကလည်း ရွာစားကြီးစိန်ဗေဒါဆိုင်းရှိရာ တစ်ကောက်ကောက် လိုက်ပြီး မဟာဂီတတီလုံးတီးကွက် စိန်ဗေဒါကြီး၏ ခေတ်ဆန်းတီးလုံးတီးကွက်၊ အဆို့အပိတ်၊ အဆစ်၊ အသွားများကို နာယူပြီး “မြို့မ”၏ တီးလုံးတီးကွက် များအဖြစ် အသက်သွင်းကြသည်။ သည်တော့ မြို့မ၏ လက်ဟောင်းတေးများဖြစ်သော “လက်ရေတပြင်တည်း”တို့၊ ”ကြားဖူးကြရဲ့လားဗျို့” တို့တွင် ဤသို့သော တီးလုံးတီးကွက်များနှင့် ၀ိုင်းဖွဲ့ထား၏။ ဤသို့သော သီချင်းကို မဟာဂီတ ဆိုဟန်ဆိုပေါက်နှင့် ရှေးက အဆိုတော်ကြီးများ သီဆိုလိုက်တော့ “နေခြည်နဲ့ အသား၊ ရွှေစီတဲ့ ပတ်္တမြား၊ ပနံစားတယ်”ဖြစ်သွား တော့သည်။ မြို့မမှာ အလားတူ အပီအပြင် ဆိုရမယ့် အခြားသီချင်းများလည်းရှိပါ၏။ ပဉ်္စသိင်္ခ၊ လက်ဝဲသုန်္ဒရ၊ အောင်ပင်လယ်၊ ရွှေမိုးညို၊ ရှုမ၀လူပျိုသိုး၊ အိုလံပစ်၊ ရွှေဗဟိုစည်သံ၊ မြန်မာ့ဂုဏ်ရည်၊ လှောင်၊ တကြိုက်တည်းကြိုက် စသည့် သီချင်းများဖြစ်သည်။ တကယ်တော့ မြို့မ၏ မြန်မာသံသီချင်းတိုင်းလိုလိုက မဟာဂီတနှင့် ကင်းတာမဟုတ်ခဲ့။ ထို့ကြောင့် ဟန်တွေ၊ မာန်တွေ၊ အဆို့တွေ၊ အပိတ်တွေ၊ အဆစ်တွေ၊ အသွားတွေနှင့်လည်း မကင်းခဲ့။
ထို့ကြောင့် .. ဒီတီးလုံး၊ ဒီအဆိုတော်၊ ဒီသီချင်းတွေနဲ့ “မြို့မ” သည် မြန်မာများ၏ နားသောတမှာ “ချိုအီ၊ ချိုအီ”ဖြစ်ပြီး စွဲမက်ခဲ့ကြ ခြင်းလည်း ဖြစ်သည်။ “တီးလုံးဆန်းရဲ့ ပါရဂူ၊ မြို့မကြီးရဲ့ အတီး ကို နှစ်သက်သူ”တွေ ဖြစ်ကြတော့သည်။ ထိုဂီတသည်ပင် ..မြို့မဟန်၊ မြို့မမူဖြစ်ခဲ့သည်။
ဤသို့ဖြင့် မြန်မာသီချင်းကြီးများအား ဤသို့ဝိုင်းဖွဲ့မှုပုံစံဖြင့် တီးမှုတ်ခြင်းနှင့်အတူ ခေတ်ပေါ် သံဆန်း မြန်မာသီချင်းများအား ကမ္ဘာ့ဂီတ သင်္ကေတနည်းစနစ် သုံးပြီး တီးမှုတ်မှုက ၁၉၃၂ခုနှစ်ရောက်သောအခါ မြို့မတူရိယာအသင်း၏ ဥက္ကဋ္ဌဖြစ်သူ ဦးတော်လုံ၏သား ရှင်ပြုအလှူပွဲမှာ ရန်ကုန်မြို့ ဂျူဗလီဟောထိ သွားရောက် ဧည့်ခံဖျော်ဖြေခြင်းဖြင့် ကျယ်ပြန့်တွင်ကျယ်စေခဲ့ပါသည်။ ထို့နောက် ၁၉၅၀ခုနှစ်တွင် ငြိမ်းချမ်းရေးသင်္ကြန် အဖြစ် မြို့မက မြို့မငြိမ်းဦးဆောင်မှုနှင့်အတူ ရန်ကုန်သင်္ကြန်ကို ရွှေမန်းရေယာဉ်နှင့် ဆင်နွဲခဲ့ပြန်သည်။ ၁၉၅၂ခုနှစ်တွင် ဖ.ဆ.ပ.လ အစိုးရ၏ ပြည်တော်သာညီလာခံသို့ မန္တလေးအနုပညာရှင်များနှင့်အတူ မြို့မတစ်သင်းလုံးလိုက်ပါပြီး ဖျော်ဖြေခဲ့ရာ မြို့မငြိမ်း၏ ယနေ့တိုင်ခေတ်မီ နာည်ကျော်ဆဲဖြစ်သော “လူချွန်လူကောင်း”သီချင်းကို အမျိုးသားမွေအနှစ်အဖြစ် ချန်ထားရစ်နိုင်ခဲ့သည်။ ၁၉၅၃ခုနှစ် တရုတ်ပြည် ပီကင်း (ယခုဘီဂျင်း)၌ ကျင်းပသည့် ပစိဖိတ်ဒေသဆိုင်ရာ ကမ္ဘာ့ငြိမ်းချမ်းရေးညီလာခံအတွက် ရေးစပ်ပေးခဲ့သော မြို့မငြိမ်း၏ “ကမ္ဘာ့ငြိမ်းချမ်းရေး” သီချင်းကို ညီလာခံအကြိုအဖြစ် ရန်ကုန်မှာကျင်းပတော့လည်း အသင်းကမလိုက်ပါခဲ့ငြား ထိုသီချင်းဖြင့် ဖွင့်လှစ်နိုင်ခဲ့၏။
တကယ်တော့ ဂီတဟူသည် နယ်မြေအပိုင်းအခြားမရှိ။ ဒေသစွဲမရှိ။ ကာလအကန့်အသတ် မရှိအပ်ပေ။ မေတ္တာ၊ စေတနာ၊ မုဒိတာတို့သာ ရှိအပ်သည် မဟုတ်ပါလား။ ၁၉၅၂ခုနှစ် ပြည်တော်သာညီလာခံအတွက် ရန်ကုန်ရောက်ခိုက် မြို့မငြိမ်းရေးစပ်ကာ မြို့မကသီဆို တီးမှုတ် ဖျော်ဖြေခဲ့သည့် “ချစ်ကြည်သံ” သီချင်းကဲ့သို့
“…. သင်ဆရာ မြင်ဆရာ ကြားဆရာတို့အား လေးစားပါလို့၊
တူရိယာသံ ရွှင်မြူးသာယာ၊ တေးအနုသုခုမ ဘ၀တူညီအစ်ကိုများ
သဒ္ဓါသုခိ ခပ်သိမ်းသောခါ လိုရာပြည့်ဝကိုယ်စိတ်ချမ်းသာ၊
ဘ၀န္တုဖြစ်စေ ဘုရားတွေဖူးလို့ မေတ္တာသံညပိုင် ကူးလှယ်ကာ။
မောင်မယ် နေပြည်တော် ရွှေဂုံနေတို့အား
မြို့မ မရောက်ခင်က ကြိုတင် ပို့ပါတယ် မေတ္တာ၊
ခင်မင်တယ်မာပါစေ မန်းနေများရဲ့ ချစ်ဖွယ် စကားမင်္ဂလာ
လက်ဆောင်ကောင်းလည်းပါ။” ဟု ဆိုရပေမည်။

ယခုလည်း မြို့မက ရွှေဂုံမြေဆီ “ ချစ်ကြည်သံ” ဖြင့် “ငြိမ်းချမ်းရေး” မေတ္တာပို့ဖို့ အရောက်လာချေပါဦးမည်။
ဆူးငှက်