မေလလယ်

မေလလယ် ...။
မန္တလေးမှာ ပူသလားလို့ မမေးနှင့်။ ကတ္တရာစေး လမ်းတွေ အရည်ပျော် နေပြီ။ နေ့လယ် နှစ်နာရီခန့် ဆိုတော့ အဆိုးဆုံး။
ဗောဓိကုန်း အေ-လမ်းမကြီးပေါ်မှာ အသွားအလာ မရှိသလောက် ဖြစ်နေတယ်။ ပူလွန်းတော့ အပြင်မထွက်ချင် ကြဘူးပေါ့။ မထွက်ရဲ ကြဘူးပေါ့။ သူသူငါငါ အိမ်ထဲမှာပဲ ယပ်တောင်ကလေးတွေနှင့်၊ ပန်ကာ တတ်နိုင်သူတွေ ကလည်း ပန်ကာနဲ့ပေါ့။ သင့်သလို အပူ သက်သာအောင် လုပ်ပြီး နေကြမှာပေါ့။ လေအေးစက် တတ်နိုင်သူတွေ ကတော့ ရှားပါတယ်။
အဲဒီအချိန်မှာ ပန်းအိုးတွေ တင်လာတဲ့ ပက်လက် ကုန်တင်ကားကြီး တစ်စီး အနောက်က အရှေ့ကို မောင်းလာတယ်။ လမ်းက သိပ်ရှင်းနေတော့ အရှိန်လည်း အတော်များတယ်။ တစ်နေရာ ရောက်တော့ ကားအစွန်မှာ တင်လာတဲ့ ပန်းအိုးတစ်လုံး ရုတ်တရက် ကျကျန်ရစ်တယ်။
မြေပန်းအိုးဟာ ကားလမ်းပေါ်မှာ အစိတ်စိတ် အမြွှာမြွှာ ကွဲသွားတယ်။ အထဲက မြေကြီးတွေကလည်း ဖွာလန်ကြဲ သွားတယ်။
ရွက်လှပင်ပေါက် ကလေးလည်း အမြစ်မှာ ရှိတဲ့ မြေစိုင် မြေခဲတွေပါ ခါထုတ် ခံလိုက်ရသလို ဖြစ်သွားတယ်။
ပန်းအိုး ကျကွဲတဲ့ အသံကြောင့် ကားဒရိုင်ဘာက ဘရိတ်ကို ရုတ်တရက် ဖမ်းအုပ်လိုက်တယ်။ ဘရိတ်အုပ်တဲ့ အသံဟာ ပူပြင်း တိတ်ဆိတ်နေတဲ့ ရပ်ကွက်မှာ အာခေါင်ကို ခြစ်ပြီး အော်ဟစ် လိုက်သလို ဖြစ်သွားတယ်။
လမ်းဘေး ဝဲယာမှာ ရှိတဲ့ အိမ်တွေက လူတချို့ အပြေးအလွှား ထွက်ကြည့် ကြတာပေါ့။
ကားစပယ်ယာက ရှေ့ခန်းက ခုန်ဆင်းပြီး ပန်းအိုးကွဲကို လှမ်းကြည့်တယ်။ ကားကို ချက်ချင်း ဘရိတ်အုပ်တယ် ဆိုပေမယ့် အရှိန်က များတော့ ပန်းအိုးကွဲကလေးဟာ ပေ ငါးဆယ်၊ ခြောက်ဆယ်လောက်မှာ ကျန်ခဲ့ပြီး၊ ဆိုခဲ့တဲ့ အတိုင်း လမ်းပေါ်မှာ တစ်စစီ။ စပယ်ယာက အတော် စိတ်ပျက်သွားတယ်။
သွားမကောက်တော့ဘဲ ဒရိုင်ဘာကို လှမ်းကြည့်တယ်။
"တစ်စစီ ဖြစ်သွားပြီ အာစရိ"
"ဘာပင်လဲကွ၊ အိုးအကြီးလား အသေးလား"
"အသေးပါ၊ ရွက်လှပင် အငယ်လေးပါ"
"ဒါဆို နေပါစေတော့ကွာ၊ ကောက်မနေ ပါနဲ့တော့၊ လာ တက်၊ သွားစို့"
သူတို့လည်း နေက ပူလွန်းတော့ စိတ် သိပ်ရှည်ကြဟန် မတူ။ ကားကို ခပ်ကြမ်းကြမ်းပဲ မောင်းပြီး ထွက်သွားကြတယ်။
လမ်းဘေးအိမ်က လူတွေ အသာငြိမ်ပြီး ကြည့်နေကြတယ်။
လမ်းပေါ်မှာ ပွစာကြဲနေတဲ့ ပန်းအိုးကွဲနဲ့ ရွက်လှပင်ငယ်။
စက်သံ ပြင်းပြင်းနဲ့ မောင်းထွက်သွားတဲ့ ပက်လက် ကုန်တင်ကားကြီးလည်း လမ်းထိပ်ရောက်လို့ ဘယ်ဘက်ကို ကွေ့ပြီး ပျောက်သွားပြီ။
လမ်းဘေးအိမ်က လူတွေ အိမ်ထဲ ပြန်မဝင်ကြသေး။ နေပူပူ ကျောက်လမ်း အလယ်က ရွက်လှပင် အိုးကွဲကို လှမ်းမျှော်ကြည့် နေကြတယ်။ စက္ကန့် အတော် ကြာလာလို့ မိနစ်ပိုင်းကို ရောက်လာတယ်။ ဘယ်သူမှလည်း ထွက်ကောက်မယ့်သူ မရှိ ဖြစ်နေတယ်။
ပန်းအိုး ကျကွဲတဲ့ နေရာနဲ့ ကိုညိုမှိုင်း အိမ်နဲ့က အတော် ဝေးတယ်။ မရှိဘူးဆို အနည်းဆုံး ပေရှစ်ဆယ် တစ်ရာလောက် ဝေးမယ်။
ကိုညိုမှိုင်းလည်း အများနည်းတူ ရွက်လှပင်ကလေးကို လှမ်းကြည့်တယ်။ ပူပြင်းလှတဲ့ နေရောင်အောက်မှာ ရွက်လှပင်ကလေးဟာ သနားစရာ မြင်ရတယ်။ ထွက်ကောက်မယ့် သူလည်း တစ်ယောက်မျှ မရှိပါလား။
ကိုညိုမှိုင်း ခြေလှမ်းမှန်မှန် လှမ်းပြီး နေပူထဲကို ထွက်ခဲ့တယ်။ မှန်မှန်ပါပဲ။ ပြေးကောက်တဲ့ သဘော လုံးဝ မဟုတ်ပါဘူး၊ လမ်းဘေးက လူတွေလည်း လှမ်းကြည့် နေကြမှာပေါ့။
ရွက်လှပင်ကလေးကို ကောက်ယူလိုက်ပြီး မိမိအိမ်ဘက် အပြန် ခြေလှမ်း လေးငါးလှမ်းလောက်ပဲ ရှိဦးမယ်။ ကိုညိုမှိုင်းအတွက် ပြဿနာ စပါတယ်။
"မောင်ညိုမှိုင်း အဲဒီ ရွက်လှပင်လေး အန်တီ့ ပေးပါလားကွယ် နော်"
ဒီမိန်းမကြီးကို ကိုညိုမှိုင်း ကြည့်မရတာ ကြာပြီ၊ ဘာလို့ ပေးရမှာလဲ။
"ပေးနိုင်ပါဘူးဗျာ၊ ကျုပ်လိုချင်လို့ ကောက်ခဲ့တာကို"
အန်တီကြီး နှုတ်ခမ်းစူပြီး ကျန်ခဲ့တယ်။ ဒါပေမယ့် နောက်ထပ် ဆယ်လှမ်းလောက်ပဲ လှမ်းရသေးတယ်။ ဘိလစ်စာရေးကြီး ကိုဝမ်းက ကိုညိုမှိုင်းကို လှမ်းခေါ် တယ်။ ညနေကျရင် အရက်သောက်ဖို့ ပြောမလို့နဲ့ တူတယ်။ ကိုညိုမှိုင်း စာရေးကြီး အိမ်ထဲကို ဝင်ခဲ့တယ်။
"ညိုမှိုင်း မင်း ဒီရွက်လှပင်ကို ဘာလုပ်မလို့လဲ"
ကိုညိုမှိုင်းက စာရေးကြီး မျက်နှာကို ဖျတ်ခနဲ ကြည့်လိုက်တယ်။
"ပြုတ်ပြီး သုပ်စား မလို့လေ"
"ဟာ ... မင်းကလဲ၊ ငါက အကောင်း မေးနေတာပါကွ၊ မင်း မလိုချင်ရင် ငါ့ ပေးပါလားလို့ ပြောမလို့ဟာကို"
"ဟုတ်တယ် ကျွန်တော် မလိုချင်ပါဘူး၊ ကျွန်တော် မလိုချင်လို့ အပင်ပန်းခံပြီး နေပူထဲ ထွက်ကောက် လာတာပေါ့ဗျာ"
"ကိုဝမ်း အဲဒီ လူ့ခွစာနဲ့ အဖက်လုပ် ပြောမနေနဲ့၊ ရွက်လှပင်များ လိုချင်ရင် ကိုယ့်ဟာကိုယ် သွားဝယ်လိုက်ပေါ့၊ ပြည့်လို့"
ကိုဝမ်းမိန်းမကြီးက ထ ‘ကော’ ပါတယ်။ ကိုညိုမှိုင်းလည်း လှည့်ထွက်ခဲ့ပါတယ်။
ဘိလစ်စာရေးကြီး အိမ်က ထွက်ပြီး စက်ဘီးပြင်ဆိုင် ရှေ့လည်း ရောက်ရော ခေါက်ဆွဲစက် တရုတ်ကြီး ကိုလောစံ ကပျာကယာ လမ်းဖြတ်ကူး လာပါတယ်။
"ညိုမှိုင်း အဲဒီ ရွက်လှပင်ကလေး ငါ့ ပေးကွာ"
ရော ... ခက်နေပါပြီ။ စောစောကတော့ ဘယ်သူမှ ထွက်မကောက်ကြဘူး၊ ဒီတိုင်း ကြည့်နေကြတယ်။ သူများ ထွက်ကောက်တော့မှ ဝိုင်းလိုချင် နေကြပြန်ပြီ။ ဘယ်လိုလဲ၊ ဘာဖြစ်တာလဲ။ ကိုညိုမှိုင်းက ကိုလောစံကို ဘာမှ ပြန်မပြောဘဲ ကြည့်ရင်း နှုတ်ခမ်းကို လျှာနဲ့ သပ်တင်လိုက်တယ်။
"ငါ့မှာ ရွက်လှပင်တွေ စုထားတာ အတော် စုံပြီကွ၊ ဒီအမျိုးထဲက မရှိသေးဘူး၊ လုပ်ပါကွာ မင်းအတွက် ဘာထူးမှာလဲ၊ မင်းမှာ ဘာပင်မှလည်း စိုက်ဖူးတာမဟုတ်ဘူး ဆိုတော့"
"အဲဒါပေါ့ဗျ၊ ဘာပင်မှ မစိုက်ဖူးလို့ ခု စိုက်မလို့ ထွက်ကောက် လာတာလေ"
"လုပ်မနေပါနဲ့ ညိုမှိုင်းရာ၊ နှမ်းတစ်လုံးနဲ့ ဆီ မဖြစ်ပါဘူး"
ကိုလောစံကြီးဟာ မြန်မာစကား အတော်တတ်တယ်၊ မလွယ်ဘူး။
"နေစမ်းပါဦး၊ ခင်ဗျား လိုချင်ရင် စောစောက ဘာလို့ ထွက်မကောက်တာလဲ"
"ကောက်မလို့ဘဲကွ၊ ထွက်ကောက်ရမှာ နည်းနည်း ကြောင်သလားလို့ စဉ်းစားနေတုန်း ... မင်းက"
"ဟုတ်ပါ့ဗျာ၊ ထွက်ကောက်ရတာ အတော်ကြောင်တဲ့ အလုပ်ပါ၊ ဒီလို ခပ်ကြောင်ကြောင်နဲ့ ထွက်ကောက် ပြီးမှတော့ လွယ်လွယ်နဲ့ မပေးနိုင်ဘူးဗျာ၊ အို ... မပေးဘူးဗျာ၊ ကျုပ်ဟာ ကျုပ်ပဲ စိုက်တော့မယ်"
ကိုလောစံကြီး စကား မရှည်နိုင်အောင် ပြောပြောထွက်ထွက် ထွက်ခဲ့ရတယ်။
ကိုခန့်က သူ့တိုက်ရှေ့မှာ ရပ်ပြီး ညိုမှိုင်းကို စောင့်နေတယ်။ လာပြန်ပြီ တစ်ယောက်။ ဒီတခါတော့ ကိုညိုမှိုင်းကပဲ ဦးအောင် စပြောလိုက်တယ်။
"ဘာမှန်း မသိဘူးဗျာ၊ စောစောကတော့ ဘယ်သူမှ ထွက်မကောက်ကြဘဲ ကျွန်တော် ထွက်ကောက်တော့မှ သူ့ပေးပါ၊ ငါ့ပေးပါနဲ့ ဝိုင်းတောင်း နေကြတယ်။ တကယ်ဆို ကျွန်တော်နဲ့က အဝေးဆုံး၊ အစကတည်းက သူတို့ဟာ သူတို့တော့ ထွက် မကောက်ကြဘဲနဲ့"
"ဟုတ်တယ်၊ သူများ ကောက်လာမှ အလကား တောင်းနေကြတာ ဘယ်ကောင်းမလဲ၊ ကဲ ပြော၊ ငါ ဝယ်မယ်၊ ငါ့ ရောင်းကွာ"
"ဟင် ခင်ဗျားကလည်း တစ်မျိုးပါလား၊ ဒီမယ် အလကားလည်း မပေးဘူး၊ ရောင်းလည်း မရောင်းဘူး၊ ဇွတ်လုမယ် မကြံနဲ့၊ အသက်နဲ့ လဲပြီး ကာကွယ်မယ်၊ ဒီရွက်လှပင်ကို ကျုပ်ဟာ ကျုပ်ပဲ စိုက်မယ်၊ စိုက်ကို စိုက်မယ်၊ မပေးဘူး၊ မရောင်းဘူး။ ဘယ့်နှယ့်လဲဗျာ"
နေပူပူနဲ့ ညိုမှိုင်း ဘယ်လို ဖြစ်သွားပြီလဲ။ ကိုခန့် လန့်သွားတယ်။ အရာရာကို ပိုက်ဆံနဲ့ ဝယ်ခဲ့ပေါင်း များပါပြီ။ ဒီတစ်ခါ မလွယ်ပါလား။ ကိုခန့် တိုက်ထဲကို ခပ်သွက်သွက်ပင် ဝင်ရောက် ပျောက်ကွယ် သွားတယ်။
ကိုညိုမှိုင်းဟာ သူ့အိမ်ကို ဝင်တော့မယ် ဆိုတော့ လမ်း ဟိုဘက်ကနေ မတင်ကြည်တို့ သားအမိ လှမ်းကြည့် နေတာကို သတိပြုမိသေးတယ်။ မတင်ကြည် ဆိုတာက အတော် စိတ်ကြီးတဲ့ မိန်းမ။ သူ့သားလေးကလည်း မအေတူပဲ။ စိတ်ကြီးတာကို ပြောတာပါ။ ဘာရှိဦးမှာလဲ။ ရှိလှ ငါးနှစ် ခြောက်နှစ်ပေါ့။
ကိုညိုမှိုင်း သူ့အိမ်ထဲကို မြန်မြန် ဝင်ခဲ့တယ်။ အလုပ်ကို အကြွေး မထားဘူး။ အိမ်နောက်ဖေးကို တောက်လျှောက် ဝင်ခဲ့ပြီး သံပုံးဟောင်းကလေး တစ်ခုထဲမှာ မြေကြီးထည့်ပြီး ရွက်လှပင်ကလေးကို ပြန်စိုက်၊ ရေလောင်း စသည်ဖြင့်ပေါ့လေ။ စိတ်ဝင်တစား လုပ်ပစ်လိုက်တယ်။
အဲဒီလို လုပ်နေတုန်း မတင်ကြည်တို့ အိမ်နောက်ဖေး ဘက်ဆီက မတင်ကြည်ရဲ့ သားလေး ဖိုးစံ ငိုသံ သဲ့သဲ့ကိုတော့ နည်းနည်း ကြားမိသား။
ညနေ လေးနာရီလောက်မှာ ကိုညိုမှိုင်း ရေချိုးပြီး ဆိုင်ကယ်နဲ့ ရုံတော်ကြီးဘက် ထွက်ခဲ့တယ်။ အိမ်ကအထွက် မတင်ကြည်တို့ အိမ်ရှေ့မှာ ဒေါက်တာ တင်မောင်မောင်ရဲ့ လင့်ရိုဗာကား ရပ်ထားတာကိုလည်း မြင်မိသား။
ညရှစ်နာရီ လောက်မှာ ကိုညိုမှိုင်း အိမ်ကို မူးပြီး ပြန်ရောက်လာတယ်။ ကိုတင်ထွန်းတို့၊ ကိုစိန်မြင့်တို့နဲ့ တွေ့ရင် ဒီလိုပဲ နည်းနည်းတော့ လွန်လွန် သွားတတ်တယ်။ အိမ်ပြန်ရောက်တော့ အိပ်ရာထဲ မြန်မြန်ရောက်ဖို့ လောက်ပဲ ကြိုးစား ရတော့တယ်။ အတော် မူးနေပြီလေ။ အိပ်ခါနီးမှာ မတင်ကြည်တို့ အိမ်ဘက်က ဖိုးစံရဲ့ ငိုသံ သဲ့သဲ့တော့ ကြားမိသား။
မနက် သုံးနာရီလောက်မှာ ရင်ပူလွန်းလို့ ကိုညိုမှိုင်း လန့်နိုးသွားတယ်။ အိပ်ရာက ထပြီး ရေနှစ်ခွက်လောက် ဆင့်သောက် လိုက်ရတယ်။ ဒီတုန်းက မတင်ကြည်တို့ အိမ်ဘက်မှာ မီးလင်းနေပြီး ဖိုးစံ ငိုသံ သဲ့သဲ့လည်း ကြားမိသေးတယ်။ ဒါပေမဲ့ နောက်ဖေးဘက် ပြေးပြီး အိမ်သာ တက်ဖို့က အရေးကြီးနေလို့ သိပ်စဉ်းစား မနေနိုင်ပါဘူး။ အိမ်သာကိစ္စ ပြီးပြန်တော့လည်း အိပ်ရာထဲ ပြန်ဝင်ပြီး နှပ်ရပြန်တာပဲပေါ့။
မနက် ခုနစ်နာရီကျော်မှ နိုးလာတယ်။
ဖိုးစံ ငိုသံကို ကြားနေရ ပြန်တဲ့အတွက် ကိုညိုမှိုင်း နားစိုက်ထောင် မိတယ်။
"ညိုမှိုင်း ... ဟေ့ကောင် ညိုမှိုင်း"
စက်ဘီးပြင်ဆိုင်က ကိုပြား အသံပဲ။
"ဗျာ ... ကိုပြား လာပြီ လာပြီ"
အိပ်ရာက ကပျာကယာ ထပြီး အိမ်ရှေ့ တံခါးကို ဖွင့်ပေးလိုက်တယ် ဆိုရင်ပဲ ...
"ဟေ့ကောင် မင်း ကယ်မှ ဖြစ်တော့မှာပဲ"
"ဘာလဲဗျ၊ ဘာဖြစ်လို့လဲ"
"မင်းကလည်းကွာ၊ တစ်ညလုံး ဖိုးစံ အငို မရပ်တာ မင်း မသိဘူးလား"
"ဟုတ်လား၊ ကြားတော့ ကြားမိသား၊ ဘာဖြစ်လို့လဲ"
"အငို မရပ်ရုံတင် မကဘူး မောင်၊ အဖျားပါ ဝင်လာပြီး ခုတော့ တော်တော့်ကို အခြေအနေ ဆိုးလာပြီး"
"နေစမ်းပါဦး၊ မနေ့ညက ဒေါက်တာ တင်မောင်မောင် လာတာလည်း မြင်ပါတယ်"
"ဟုတ်တယ်လေ၊ သူလည်း ကြိုးစားတာပဲ၊ မရပါဘူးကွာ"
"အိုး အဲဒါ ကျုပ်က ဘယ့်နှယ် လုပ်ရမှာလဲ"
"ဒီမယ် ကလေး ဖျားတာက ရိုးရိုး မဟုတ်ဘူးကွ၊ မနေ့က မင်း လမ်းမှာ ထွက်ကောက် လာခဲ့တဲ့ ရွက်လှပင်ကို လိုချင်တာတဲ့"
"ဗျာ"
"အဲဒါ မတင်ကြည် စိတ်လည်း မင်း သိသားပဲ၊ ကလေးနဲ့ မဆိုင်တာကို ပူရသလား ဆိုပြီး ရိုက်သတဲ့ကွာ၊ ကလေးက ငိုပါလေရော၊ ဖိုးစံ ဆိုတာကလည်း မတင်ကြည်သားလို့ မပြောရဘူး၊ သိပ် စိတ်ကြီးတဲ့ကောင်၊ မင့်ဆီက ရွက်လှပင်မှ မရရင် အသေခံ ငိုမယ်ဆိုတဲ့ ကောင်ပဲ"
"အင်း မလွယ်ပါလားကွာ"
"အဲဒါကြောင့် ပြောတာပေါ့၊ မင်း ကယ်မှပါလို့၊ ကလေးက ငိုလွန်းအား ကြီးပြီး အဖျားကလည်း တက်လာတယ်၊ ဒီကိစ္စက စိတ်ကွ စိတ်၊ ဒီကလေး ရေတိမ်နစ်သွား နိုင်တယ်နော"
ကိုညိုမှိုင်း ငိုင်ကျသွားတယ်။ စဉ်းစားနေချိန် သိပ်မရတော့ပါ။ ဖိုးစံရဲ့ ငိုသံက တဖြည်းဖြည်း အားနည်းဖျော့တော့ လာတာကို ကြားနေရပြီ။
ရွက်လှပင်ကလေးကို ကပျာကယာ ယူပြီး မတင်ကြည်တို့ အိမ်ဘက် ကူးခဲ့ရတယ်။ အိပ်ရာပေါ်မှာ ပက်လက်ကလေး ဖြစ်ပြီး မောနေပြီ ဖြစ်တဲ့ ဖိုးစံရှေ့မှာ ရွက်လှပင်ကလေးကို ချပြလိုက်တယ်။
"ဖိုးစံ သား သားဖို့ ဦးဦး လက်ဆောင်လေကွာ၊ သား လိုချင်တယ်ဆို မငိုနဲ့တော့ ဟုတ်လား၊ သား .. ယူနော်၊ အေး ဒီလိုမှပေါ့ သားရဲ့၊ ကဲ အမောပြေသွားအောင် ရေလေး သောက်လိုက်ဦး၊ အား ဟုတ်ပြီ။ ကဲ ကျေနပ်ပြီ မဟုတ်လား"
ဖိုးစံ အသက်ကို ကယ်လိုက် နိုင်ပါတယ်။ အရေးထဲမှာ အလွန် စိတ်ကြီးတဲ့ မတင်ကြည်က ကိုညိုမှိုင်းကို အားနာစရာ ကောင်းတဲ့ အကြောင်း ဘာညာနဲ့ ပြောနေသေးတယ်။ မလိုပါဘူး။ ဖိုးစံ ရေတိမ်မနစ်ဖို့ အရေးကြီးပါတယ်။
ကိုညိုမှိုင်း မတင်ကြည်တို့ အိမ်က ပြန်လာပြီး ကိုယ့်အိမ်ကိုယ် ပြန်ရောက်တော့ ပက်လက် ကုလားထိုင်ပေါ်မှာ ခြေပစ်လက်ပစ် ထိုင်ချလိုက်မိပါတယ်။
ဒီ အတွေ့အကြုံမျိုးဟာ ကိုညိုမှိုင်းအတွက် ပထမအကြိမ် မဟုတ်ပါဘူး။
တစ်ချိန်ကလည်း ဒီလိုနဲ့ပဲ ချစ်သူ တစ်ယောက်ကို လက်လွှတ် ဆုံးရှုံးခဲ့ရဖူးတယ်။
--------
ဝင်းဖေ
အဏ္ဏဝါ မဂ္ဂဇင်း၊ မေ၊ ၁၉၈၈။
(ဝင်းဖေ၏ ဝတ္ထုတိုများ (၂၀၁၂))