မိန်းကလေးတစ်ယောက် နေတဲ့ နေရာ

မိန်းကလေးတစ်ယောက် နေတဲ့ နေရာ
----------------------------------------------
ပါဝင်သော ဇာတ်ကောင်များ
မီမီ။ ။ အသက် ၂၅ နှစ်၊ ချောမောလှပသူ အလှအပ မက်မောသူ၊ လှပအောင် ပြင်ဆင်တတ်သူ၊ အသိဥာဏ်ရှိသော်လည်း ဘဝကို ရေစုန်မှာ သက်သက်သာသာ မျှော၍ လိုက်လိုသူ။
စမ်းစမ်း။ ။ အသက် ၂၅ နှစ်၊ ရိုးသားတည်ငြိမ်သော ကျောင်းဆရာမလေး၊ မီမီနှင့် ငယ်သူငယ်ချင်း၊ အင်္ကျီအဖြူနှင့် လုံချည်စိမ်း (ကျောင်းဝတ်စုံ) ကို ဝတ်ဆင်သည်။
ကိုလတ်။ ။ အသက် ၂၅ နှစ်၊ ရိုးသားကြိုးစားသော ဘွဲ့ရလူငယ်တစ်ဦး။
ပြဇာတ်နေရာ
မိမိ နေထိုင်သော ရန်ကုန်မြို့ရှိ အလယ်အလတ်စား တိုက်ခန်းတစ်ခုနှင့် စမ်းစမ်း အလုပ်လုပ်သော နယ်မြို့ကလေး တစ်မြို့ရှိ ကျောင်းစာသင်ခန်း တစ်ခု။
ပြဇာတ်အချိန်
လက်ရှိ အချိန်ကာလ။
* * *
အခန်း (၁)
မတူညီသော နေရာနှစ်ခုကို ဇာတ်ခုံပေါ်တွင် တစ်ပြိုင်တည်း ပြရန်။
မီမီသည် သူမနေထိုင် သောတိုက်ခန်းမှာ ပန်းနုရောင် ဇာလွှာကွန်ချာဖြင့် ဖုံးကွယ်လျက် အတွင်းမှာ ရပ်နေသည်။ အချင်း ငါးပေ, ခြောက်ပေရှိသော ကြိမ်ကွင်းတစ်ခုတွင် ပန်းနုရောင် ခြင်ထောင်ဇာစကို စွပ်လျက် ကွင်းအပေါ်မှ ဇာစကို စုချည်ကာ မျက်နှာကြက်တွင် ကြိုးဖြင့် ဆွဲထား နိုင်သည်။ ဇာနံရံပတ်လည် ဝိုင်းထားသည့် အခန်းကလေးသဖွယ် ဖြစ်သွားသည့် ကွန်ချာထဲတွင် မီမီသည် လမ်းလျှောက်နိုင်သည်။ ရပ်နိုင်သည်။ ထိုင်နိုင်သည်။ ပရိသတ်သည် သူမအား ဇာလွှာစ ဖြတ်လျက်သား မြင်တွေ့နိုင်သည်။ အဝတ်အစားကို ဂရုစိုက်သူပီပီ အထက်အောက် ဆင်တူဝတ်စုံ ခပ်ပွပွ ဝတ်ထားသည်။
စမ်းစမ်းသည် သူမ အလုပ်လုပ်ရာ အစိုးရအထက်တန်းကျောင်း စာသင်ခန်း အတွင်းမှာ မတ်တပ်ရပ်နေသည်။ လက်တစ်ဖက်မှာ နဝမတန်း အင်္ဂလိပ်စာ ဖတ်စာ စာအုပ်၊ အခြားဖက်မှာ မြေဖြူခဲရှည်ရှည် တစ်တောင့် ကိုင်ထားသည်။
မီမီ။ ။ (ပန်းနုရောင် ဇာလွှာစ အတွင်းမှာ ကိုယ်ဟန်ပြမယ်ပမာ လမ်းလျှောက်ကျင့်နေရာမှ တစ်ကိုယ်တည်း စကားပြော) သိပ်ခက်တဲ့ လူပဲနော်၊ လိပ်စာကို မသိစေချင်ခါမှပဲ လူကို တကောက်ကောက် လိုက်ကြည့်နေတော့တာပဲ။ ရုပ်ကတော့ ခပ်ဖြောင့်ဖြောင့်၊ ပုံစံက သားသားနားနား မွန်မွန်ရည်ရည်ပဲ။ (အနည်းငယ် ကျေနပ်နှစ်သိမ့်စွာ ပြုံး၍ ပရိသတ်ဘက် လှည့်ပြော) ကျွန်မကို မြင်ကတည်းက သူ့ရင်ထဲမှာ စွဲငြိသွားတော့တာပဲတဲ့။ (ခဏကြာမှ) အို ဘယ်တတ်နိုင်မလဲကွယ်။ ဟိုက သိသွားရင် မိုးမီးလောင်မှာ ဥစ္စာ။
စမ်းစမ်း။ ။ သူငယ်ချင်း မီမီ၊ ဒီနေ့ နင့်ကို သိပ်သတိရတာပဲ။ ဒီနေ့ ငါ့ကျောင်းသားတွေကို အင်္ဂလိပ်စာ စာစီစာကုံး ရေးခိုင်းတယ်လေ။ My Hobby ဆိုတဲ့ ခေါင်းစဉ်နဲ့ပေါ့။ ကျောင်းသူလေး တစ်ယောက် ရေးထားတဲ့ စာစီစာကုံးကို ဖတ်ရပြီး နင့်ကိုငါ သတိရသွားတော့တယ်။ (ငယ်ဘဝကို ပြန်လည်တွေးမိသည့် အပြုံးရေးရေးဖြင့်) သူက လိပ်ပြာလေးတွေ၊ ပုစဉ်းလေးတွေ ဖမ်းပြီး ဖန်ဘူးထဲ ထည့်ရတာကို ဝါသနာပါသတဲ့ မီမီရယ်၊ နင် ငယ်ငယ်ကလိုပဲနော်။
မီမီ။ ။ ဒီနေ့ညနေ ရလာတဲ့အင်္ကျီတွေကဖြင့် တစ်ထည်မှ ဝတ်လို့ အဆင်ပြေမယ့်ပုံ မပေါ်ပါဘူး။ အဖြူရောင် ဇာအင်္ကျီကလေးက ခါးကျပ်နေတယ်။ အဝါရောင် အပွင့်အင်္ကျီက ကြယ်သီးပေါက်တွေ ကျယ်နေတယ်။ ခရမ်းရောင်က ခါးနည်းနည်း တိုနေတယ်။ (ပင့်သက်ရှိုက်) ဘယ့်နှယ် လုပ်ရမလဲ။ မနက်ဖြန် ကပွဲခန်းမကို သွားတဲ့အခါ ဘာဝတ်ရမှာလဲ။
စမ်းစမ်း။ ။ (ပြတင်းပေါက်မှ လှမ်းမျှော်ကြည့်သည့် ဟန်ဖြင့်) ငါတို့ကျောင်းရဲ့ ရှေ့က ဘောလုံးကွင်းကျယ်ကြီးရဲ့ အလွန်မှာ တော်တော် စိမ်းစိုတဲ့ တောအုပ်ကလေး ရှိတယ်။ မီမီရဲ့၊ အဲဒီတောအုပ် အစပ်က ခြံဝိုင်းထဲမှာ ဒန်းလေးတစ်ခု တွေ့တယ်။ အဲဒီဒန်းလေးကို မြင်တိုင်းလဲ နင့်ကို သတိရတယ်။ နင်နဲ့ငါနဲ့ အိမ်ကလေးတစ်လုံး ငှားနေမယ်ဆိုရင် ဒန်းလေးပါတဲ့ အိမ်ကို ရှာကြရအောင်လို့ နင်ပြောတယ် မဟုတ်လား။
မီမီ။ ။ (စိတ်တိုဟန်ဖြင့်) လူတွေဟာ တော်တော် စိတ်ပျက်ဖို့ ကောင်းတာပဲ။ ကိုယ့်ထမင်း ကိုယ်စားပြီး သူများ ကိုယ်ရေးကိုယ်တာကို လိုက်စပ်စုကြတယ်။ ကျွန်မတို့နှစ်ယောက် ဘာတော်တော်၊ ဒါ သူတို့ ကိစ္စလား၊ ကျွန်မကြောင့် ပတ်ဝန်းကျင် အိမ်နီးချင်း အနှောင့်အယှက် မဖြစ်စေရဘူး။ သူများ အခန်းလို အချိန်မဟုတ် အခါမဟုတ် သီချင်းတွေ အကျယ်ကြီး ဖွင့်ပြီး အော်ကြီးဟစ်ကျယ် ရန်သတ် နေတာမှ မဟုတ်ဘဲ။
စမ်းစမ်း။ ။ ဒီနေ့ အတန်းထဲမှာ လူတော်တော် နည်းတယ်။ ဘာဖြစ်လို့လဲ သိလား။ အခန်းထဲက ကျောင်းသားလေးတွေ ကျောင်းမတက်ကြလို့ပေါ့။ ဆော့ချင် ကစားချင်စိတ်နဲ့ ကျောင်းလစ်တာ မဟုတ်တော့လဲ အပြစ်တင်ရ ခက်သားပဲ သူငယ်ချင်းရယ်၊ လယ်တွေ ရိတ်ကုန်ပြီလေ။ ဒီလိုအချိန်မျိုးမှာ မိဘတွေ အလုပ်ရှုပ်နေသလို အသက်နည်းနည်း ကြီးတဲ့ ကလေးတွေခမျာ မိဘတွေနဲ့အတူ လယ်ထဲဆင်းပြီး အလုပ်လုပ်ရတယ်။ ဒီတော့ ကလေးတွေ ကျောင်းပျက်ကြတာပေါ့။
မီမီ။ ။ ကျွန်မတို့နှစ်ယောက် ကားထဲက ဆင်းလာတာမြင်တော့ မိန်းမတွေ မိန်းမတွေ ဖြစ်သွား လိုက်ကြတဲ့ မျက်နှာတွေ၊ မေးဦးလေ ... ဘယ်မှာ အလုပ် လုပ်တာလဲတို့၊ လခ ဘယ်လောက် ရသလဲတို့ မေးဦးလေ။ ၂ခ Mark II ကားနဲ့ အိမ်ပြန်လာတော့ သူတို့ ဘာပြောစရာ ရှိဦးမှာလဲ။ ပါးစပ် အဟောင်းသားနဲ့ ငေးနေရုံပဲပေါ့။
စမ်းစမ်း။ ။ လခထုတ်တယ် ဆိုတာလဲ နာမည်ခံပါပဲ။ ဆန်ဖိုးဖြတ်၊ ဘာကြေးညာကြေး ဖြတ်နဲ့ နောက်ဆုံးကျန်တော့ လေးထောင် မပြည့်တော့ဘူး။ ဒီလေးထောင်ကို တစ်လစာ စားစရိတ် လောက်အောင် ခြိုးခြံချွေတာရဦးမှာ။ နင်ကတော့ ကုမ္ပဏီမှာ အလုပ်လုပ်တာဆိုတော့ လခ ရှစ်ထောင်, တစ်သောင်း ရနေရော့မယ်။ သူတို့က ပေးထားတဲ့ လစာနဲ့ တန်အောင် မညှာမတာ ခိုင်းတာတဲ့။ ငါကြားဖူးတယ်။ နင်ရော အလုပ်လုပ်ရတာ အဆင်ပြေရဲ့လား။
မီမီ။ ။ ဘယ်သူတွေ ဘာပြောပြော သေချာတာ တစ်ခုကတော့ (လက်ဖျောက်တစ်ချက် တီးလျက်) မီမီ လက်ဖျောက်တစ်ချက် တီးလိုက်တာနဲ့ ဟောဒီတိုက်ခန်းဟာ မီမီ နာမည်နဲ့ ဖြစ်သွားမှာပဲ။ (အနည်းငယ် တွေသွား) အင်း စိတ်ရှည်ရှည် သည်းညည်းခံဖို့တော့ လိုမှာပေါ့လေ။ တချို့တချို့သော အနိုင်ကျင့်မှုကို သည်းခံဖို့၊ တချို့တချို့သော လိုအင်ဆန္ဒတွေကို သည်းခံဖို့ ပတ်ဝန်းကျင်ရဲ့မျက်လုံးတွေကို ဂရုမစိုက်ဖို့ ပတ်ဝန်းကျင် ဆိုတာက ကိုယ့်ကို ထမင်းကျွေးနေတဲ့သူ မဟုတ်ဘူး။
စမ်းစမ်း။ ။ သူငယ်ချင်း မီမီ နင့်သတင်းကို ငါ ဘာမှ မကြားရဘူး။ ငါ့စာတွေ နင့်ဆီရောက်မှ ရောက်ရဲ့လား။ နင် အရင်အဆောင်မှာ မနေတော့ဘူးလား။ ငါ့စာတွေကို ရတယ်ဆိုရင်တော့ နင် ဘယ်နည်းနဲ့မဆို ငါ့ဆီ စာပြန်မှာပဲ မဟုတ်လား။
မီမီ။ ။ ကျွန်မ လိုချင်တာ ဘာလဲ၊ ကျွန်မဘဝမှာ ကျွန်မက ဘာကို လိုချင်နေတာလဲ၊ သူတို့ မျက်လုံးတွေက မေးနေကြတယ်။ ကျွန်မ ပြောလိုက်မယ်။ ကျွန်မ လိုအပ်သမျှက လူတန်းစေ့နေနိုင်ဖို့ သေသပ်လုံခြုံတဲ့ တိုက်ခန်းလေး တစ်ခုပါပဲ။ လိုအပ်တဲ့သူနဲ့ ပေးတဲ့သူရဲ့ ကြားမှာ နားလည်မှုတွေ ရှိတယ်။ စောင့်စည်းရမယ့် ကတိတွေ ရှိတယ်။ လိုက်နာရမယ့် စည်းကမ်းတွေ ရှိတယ်။
စမ်းစမ်း။ ။ မီမီရေ (စကားသံ နူးညံ့သွား) ငါ သိပ်မကြာခင်မှာ လက်ထပ်ဖြစ်မလား မသိဘူး။ အချစ်ဟာ ဘဝမှာ အရေးမကြီးဘူးလို့ ငါထင်ခဲ့ဖူးတယ်။ ဒါပေမဲ့ အဲဒါ မှားတယ် မီမီရေ။ အချစ်ဟာ လူ့ဘဝကို ပိုပြီး နေပျော်အောင် ဖန်ဆင်းပေးနိုင်တယ် သိလား။ အခု ငါ့ဘဝလေးဟာ အဓိပ္ပါယ် အပြည့် ရှိသွားပြီ။ ဘဝကို တပ်မက်အောင်လဲ အချစ်ကပဲ ပြုပြင်ပေးခဲ့တယ်။ (ခဏနားလျက်) နင်ရော တစ်ယောက်ယောက်ကို ချစ်တတ်ခဲ့ပြီလားကွယ်။
မီမီ။ ။ အချစ်ဟာ မိန်းမတစ်ယောက်အတွက် ကြီးကျယ်တဲ့အရာ ဖြစ်ချင်ဖြစ်နိုင်မယ်၊ လုံခြုံမှုလောက်တော့ အရေးမကြီးဘူး။ ကျွန်မကတော့ အချစ်နဲ့ လုံခြုံမှုကို ရွေးယူရမယ်ဆိုရင် လုံခြုံမှုကိုပဲ ရွေးမယ်။
စမ်းစမ်း။ ။ ငါတို့နှစ်ယောက် လက်ထပ်တဲ့အခါ အနားမှာ နင်ရှိနေရင် ဘယ်လောက်ကောင်းမလဲ။
မီမီ။ ။ ဟောဒီ ရန်ကုန်မြို့တော်ကြီးမှာ မိန်းမသား တစ်ယောက်အတွက် လိုအပ်တဲ့ ဘဝလုံခြုံမှုဟာ သိပ်ဈေးကြီးပါတယ်။
စမ်းစမ်း။ ။ ငါလက်ထပ်မယ့် ငါ့ချစ်သူကို နင်သိရရင် နင် အံ့သြတကြီး ရယ်လိုက်မိမှာ သေချာတယ်။
မီမီ။ ။ ချစ်သော သူငယ်ချင်း စမ်းစမ်းရေ၊ နင့်စာတွေကို အခုမှပဲ အားလုံး ဖတ်ရတယ်။ ငါက အဆောင်မှာ မနေတော့ဘူးလေ။ တစ်နေ့ကမှ အဆောင်ကို ခဏရောက်လို့ နင့်စာတွေကို ရခဲ့တာ။ ငါအခုနေတဲ့ နေရာကို ဘယ်သူမှမသိလို့ သူတို့ အကြောင်းမကြား ပေးနိုင်ဘူးပေါ့။ နင့်စာတွေကို ဖတ်ရတော့ ငါတို့ရဲ့ ငယ်ဘဝလေးကို ပြန်လွမ်းမိတယ်။
စမ်းစမ်း။ ။ (အံ့ဩဝမ်းသာစွာ) အို ဒီလိုဆိုတော့ မီမီက တိုက်ခန်းနဲ့ အေးအေးဆေးဆေး သီးသန့်နေနိုင်တဲ့ ဘဝကို ရောက်သွားပြီပေါ့။ လစာကောင်းကောင်း ရလို့ ဖြစ်မှာပေါ့။ ဝမ်းသာစရာပဲ မီမီရယ်။
မီမီ။ ။ အကောင်းဆုံးလို့ ကိုယ်ယူဆတဲ့ အရာတွေကို ကိုယ်လုပ်ကြတာချည်း ပါပဲ။ ငါ တစ်ခုခု လုပ်တယ်ဆိုရင် အဲဒါဟာ ငါလုပ်ရမယ့် အလုပ်လို့ ယူဆလို့ပါပဲ။ အမှားတွေ အမှန်တွေ ပြောနေလို့လဲ လည်ပတ်နေတဲ့ ဘဝကြီးက ရပ်မှမသွားတာ။
စမ်းစမ်း။ ။ (ဇဝေဇဝါ) မီမီ နင်မပျော်ဘူးလား။
မီမီ။ ။ (ပခုံးအသာတွန့်လျက်) ပျော်ရွှင်မှုဆိုတာ တစ်ခါသုံးပစ္စည်းပါပဲ။
စမ်းစမ်း။ ။ (အနည်းငယ် စိုးရိမ်ပူပန်စွာ) မီမီရေ လောကကြီးမှာ ကိုယ်လုပ်လို့ မရတဲ့အရာတော့ အများကြီးရှိတယ်။ ကိုယ်မနိုင်နိုင်တဲ့ စစ်ပွဲတွေလဲ အများကြီး ရှိတယ်နော်။ လိုချင်တာ ဘယ်လောက်ပဲ များများ ရနိုင်တာက နည်နည်းလေးရယ်။
မီမီ။ ။ (ပင့်သက်တစ်ချက်ရှိုက်) ကျွန်မသူငယ်ချင်း စမ်းစမ်းဟာ ငယ်ငယ်ကတည်းက ဘာလုပ်လုပ် တွန့်တွန့်ဆုတ်ဆုတ်နဲ့၊ တစ်ခုခု လုပ်တော့မယ်ကြံရင် ဘယ်တော့မှ မဖြစ်လာဘူး။ ဒါကြောင့် ဘဝမှာ သူတစ်ခါမှလဲ မမှားဖူးဘူး။ တစ်ခါမှ မမှားတာကိုပဲ သူက ဂုဏ်ယူတတ်တယ်။ သူ ဘာမှ ဖြစ်မလာတာကို သူစိတ်မပျက်တတ်ဘူး။
စမ်းစမ်း။ ။ မီမီရေ၊ ငါသိချင်လိုက်တာ၊ နင်ဘဝကို ဘယ်လို ချဉ်းကပ်ချင်တာလဲ၊ ပျော်ရွှင်မှုကို ဘယ်လိုရှုထောင့်ကနေ မြင်တတ်တာလဲ။ နင့်ရဲ့ ပန်းတိုင်ဟာ ဝေးသလား၊ နီးသလား။ ပန်းတိုင်ဟာ မြေပြင်ညီမှာ ရှိတာလား၊ တောင်ကုန်းပေါ်မှာ ရှိတာလား၊ ခဏခိုနားစရာ အရိပ်အာဝါသင်္ကျီ ရွေးတဲ့အခါ ဘယ်လိုစံနှုန်းတွေနဲ့ ရွေးမှာလဲ။ အဲဒီအရိပ်ဆီ ရောက်ဖို့ နင်ခြေလှမ်း ဘယ်နှစ်လှမ်း လှမ်းဖို့ လိုသလဲ။ ခြေလှမ်း ဘယ်နှစ်လှမ်းဟာ မှန်ပြီး ဘယ်နှစ်လှမ်းက မှားနေခဲ့ပြီလဲ။ ငါသိချင်လိုက်တာ။ ဒီဇင်ဘာ ကျောင်းပိတ်ရက်ကျရင် နင့်ဆီကို ငါလာခဲ့မယ်နော်။
မီမီ စကား ဆွံ့အသွားကာ ခေါင်းကိုသာ ခပ်ဖြည်းဖြည်း ယမ်းနေသည်။
စမ်းစမ်း။ ။ သူငယ်ချင်း မီမီရေ ... (မီမီက မျက်လုံးအသာ မှိုတ်ကာ ပင့်သက်ရှိုက်၍ ခေါင်းယမ်း နေသည်။) မီမီရေ ...
[အခန်းကူးပြောင်း ဂီတနှင့်အတူ မီးအလင်းရောင် မှိုန်လာ၊ မီးရောင် ပျောက်ကာ ဇာတ်ခုံ တစ်ခုလုံး မှောင်ကျသွား။]
* * *
အခန်းစဉ် (၂)
မီမီ၏ တိုက်ခန်း၊ မီမီသည် ဇာလွှာကွန်ချာ၏ အတွင်းမှာ ရှိပြီး တစ်စုံတစ်ခုကို မကျေနပ်ဟန် ဖြင့် ခေါက်တုံ့ခေါက်ပြန် လမ်းလျှောက်နေသည်။
မီမီ။ ။ နေစမ်းပါဦး။ ကျွန်မကို အဖက်မတန်သလို အချိုးမျိုးနဲ့ ကြည့်ရအောင် သူက ဘယ်လောက် ချမ်းသာပြီး ဘယ်လောက် ဂုဏ်သရေတွေ အရည်အချင်းတွေ ရှိနေလို့လဲ။ (နှုတ်ခမ်းကို မဲ့၍) သူ့ယောက်ျား မယားငယ် ယူထားတာ ဟောဒီ တိုက်ခန်းအားလုံး သိပြီးသား။ ဘာကြောင့် မယားငယ် ယူတယ် ဆိုတာလဲ အားလုံး ရိပ်မိပြီးသား၊ ယူမှာပေါ့ သူက ရုပ်ရည်က ငါးမူးသုံးမတ်တန်မှာ စကားပြောက ဆိုးလိုက်သေးတယ်။ ယောက်ျားကို စကားပြောရင် မယုံသင်္ကာ လေသံနဲ့၊ ခနဲ့တဲ့တဲ့ လေသံနဲ့ ယောက်ျားစိတ်ညစ်အောင် ပူညံပူညံ လုပ်လိုက်သေးတယ်။ ဘယ်ယောက်ျားက သည်းခံ ချင်မှာလဲ။ ယောက်ျားဆိုတာမျိုးက (တစ်စုံတစ်ခုကို သဘောပေါက်သွားဟန်ဖြင့်) ဪ လက်စသတ်တော့ ဒီမိန်းမ ကျွန်မကို မနာလို ဖြစ်နေတာပါလား။ (သူ့ကိုယ်သူ တစ်ချက်ငုံ့ကြည့်ကာ လက်ဖြန့်၍ ဟန်ပါပါ ပြလျက်) ဒီလို ရုပ်ရည်မျိုး၊ ဒီလို ခန္ဓာကိုယ်မျိုးကိုမှ ယောက်ျားတွေ မက်မော တတ်တာကိုး။ ကျွန်မကို သူ့ယောက်ျား ဂရုစိုက်မိသွားမှာ စိုးရိမ်ရှာတယ် ထင်ပါရဲ့။ (တစ်ချက် ခပ်လှောင်လှောင် ရယ်မော) စိတ်ချ စိတ်ချ၊ မီမီတို့က အဲဒီအဆင့်မျိုး မဟုတ်ဘူး။ ဒီလောက်နဲ့တော့ မီမီ့ဆီ မလာခဲ့နဲ့။
ထိုအချိန်တွင် ဇာတ်ခုံအပြင်ဘက်မှ ကလေးမလေး တစ်ယောက်၏ ရယ်မောသံ ထွက်လာသည်။ အသက် သုံးလေးနှစ်အရွယ် ကလေးမလေး၏ ရယ်သံ၊ စကားသံ ဖြစ်သည်။ ထိုအသံကြောင့် မီမီ ရုတ်တရက် မျက်နှာထား နူးညံ့ပျော့ပျောင်း သွားသည်။ မီမီသည် ကလေးမလေး၏ အသံလာရာဆီသို့ (ပရိသတ်ဆီသို့) တစ်လှမ်း နှစ်လှမ်း ချဉ်းကပ်လာ၊ ဇာလွှာနှင့် မျက်နှာအပ်လျက် ပရိသတ်ဘက်သို့ (ပြတင်းပေါက်မှ ငုံ့ကြည့်ဟန်ဖြင့်) ငုံ့ကြည့်သည်။ ကလေးမလေးကို မြင်သွားကာ ကြည်နူးစွာ ပြုံးလိုက်သည်။
မီမီ။ ။ ဟော ကလေးမလေးတောင် သူ့အမေနဲ့ လမ်းလျှောက် ထွက်နေပြီ။ ကြည့်စမ်း သွက်လိုက်တဲ့ ကလေး၊ အသားဖြူဖြူလေးက ဂါဝန်အဝါလေးနဲ့ ထင်းနေတာပဲ။ ချစ်စရာ ကောင်းလိုက်တာ။ (နောက်ပြန်ဆုတ်၍ လက်မှနာရီကို ငုံ့ကြည့်) ပုံမှန်အချိန်ပဲ။ သူတို့သားအမိ လမ်းလျှောက်ထွက်တာ နေ့တိုင်း ဒီအချိန်ပဲ။ (အားကျဟန်ဖြင့်) ဒီလို ကလေးလေး တစ်ယောက်ရဲ့ အမေဖြစ်ရတာ တော်တော် ကြည်နူးစရာ ကောင်းမှာပဲ။ (အတွေးထဲ ခဏနစ်မျောသွား) ကျွန်မမှာ အဲဒီလို ချစ်စရာကောင်းတဲ့ သမီးကလေးတစ်ယောက်ရှိရင် ဘယ်လောက် ကောင်းမလဲနော်။ (ခဏ ငြိမ်သက်သွားပြီးနောက် ဝမ်းနည်းစိတ် အားငယ်ဟန်ဖြင့်) ဘယ်တော့မှ ဖြစ်နိုင်မှာ မဟုတ်ပါဘူး။ သူက ကျွန်မကို ကလေးမရှိစေနဲ့တဲ့။ အင်း သူပြောတာ အဲဒီစကား မဟုတ်ပါဘူး။ သူပြောပုံက အင်း ကလေးနဲ့ငါ့ကို ကြိုးချည်ဖို့ ကြိုးစားမယ် မကြံနဲ့တဲ့။ ကလေးဟာ တို့နှစ်ယောက်ရဲ့ ဆက်သွယ်မှုကို ပိုပြီး ခိုင်မြဲမလာစေတဲ့ အပြင် ပိုပြီး ယိုယွင်းပျက်စီး သွားစေလိမ့်မယ်တဲ့။ သူက ကလေး မချစ်တတ်ဘူးလား။ သိပ်ချစ်တတ်တာပေါ့။ ဒါပေမဲ့ သူ့မှာ သားသမီးတွေ ရှိပြီးသားလေ။ သူ့သမီး အငယ်ဆုံးတောင် လေးတန်း ရောက်နေပြီ။ အဲဒီသမီးကို သူငုံထားမတတ် ချစ်တာ။ သူ နောက်ထပ် ကလေးမလိုချင်ဘူး။ မဟုတ်ဘူး။ သူ နောက်ထပ် ကလေးမလိုချင်တာ ဟုတ်ပုံ မရဘူး။ ကျွန်မကိုသာ ကလေးမယူစေချင်တာ။ ဘာကြောင့်လဲ။
(ခြေလှမ်း နှစ်လှမ်း သုံးလှမ်း လမ်းလျှောက်နေပြီးမှ) ဘာကြောင့်လဲ ... ဘာကြောင့်လဲဆိုတော့ ကျွန်မ အလှပျက်သွားမှာစိုးလို့။ (ချက်ချင်းပင် ခါးသီးစွာရယ်မော) မဟုတ်ဘူး။ အဲဒီလို မဟုတ်ဘူး။ ကျွန်မ မလှရင် ကျွန်မထက်လှတဲ့သူ တစ်ယောက် သူ့အနား ရောက်လာမှာပဲ ဥစ္စာ၊ ကျွန်မကို ကလေးမယူစေတာက သူ့ကိုချည်ဖို့ ကြိုးစားမှာစိုးလို့၊ တာဝန်ယူမှုတွေ ရှုပ်ထွေးကုန်မှာ စိုးလို့၊ ဒါပါပဲ။ ဒါကြောင့် ကျွန်မ ကလေးမယူရဘူး။
(နက်နက်နဲနဲ စဉ်းစားနေပြီးနောက်) တကယ်လို့ ကျွန်မ ကလေးယူလိုက်မယ် ဆိုရင် ဘာဖြစ်လာမလဲ။ ဟုတ်တယ်။ ကျွန်မ သိချင်လိုက်တာ။ ကျွန်မ ကလေးယူလိုက်ရင် သူ ဘယ်လိုတုံ့ပြန်မလဲ။
(ခြေလှမ်းအနည်းငယ် လမ်းလျှောက်နေပြီးမှ) ကလေးကို သူ သံယောဇဉ် တွယ်လာမှာ ပါပဲနော်။ အဲဒီအခါကျရင် သူနဲ့ကျွန်မကို ကြိုးချည်ပြီးသား ဖြစ်သွားနိုင်မလား။ လက်ထပ်ဖို့ စိတ်ပါသွား လေမလား။ ဒါမှမဟုတ် ...။
ဇာတ်စင် ဘယ်ဘက်ထောင့်ဆီမှ တံခါးခေါက်သံတစ်ခု ထွက်ပေါ်လာသည်။
မီမီ။ ။ (တံခါးဆီသို့ ဖျတ်ခနဲ လှည့်ကြည့်) သူ ဒီနေ့လာတာ စောလိုက်တာ။
ဇာတ်စင် ဘယ်ဘက်မှ စမ်းစမ်း ဝင်လာသည်။ လက်ထဲတွင် ခရီးဆောင်အိတ်တစ်ခု ဆွဲထားသည်။ စမ်းစမ်းသည် မီမီ၏ ဇာလွှာကွန်ချာ နောက်ကွယ်ကာ အဖြစ်ကို ဂရုမပြုရ။
မီမီ။ ။ (မျှော်လင့်မထားသူကို တွေ့လိုက်ရသဖြင့် အံ့ဩတုန်လှုပ်သွား) အို စမ်းစမ်း ပါလား။
စမ်းစမ်း။ ။ မီမီ ကြည့်စမ်း၊ နင် အရင်ကထက်တောင် ချောလို့၊ ငါဟယ် နင်နဲ့ တွေ့မှ တွေ့ရပါ့မလား စိုးရိမ်လိုက်ရတာ။ (မီမီက ပြုံးနေသည်။)
စမ်းစမ်း။ ။ (အခန်း ပတ်ပတ်လည်ကို တအံ့တဩ လှည့်ပတ်ကြည့်ရှုရင်း) နင် တစ်ယောက်တည်းလား၊ နင့်မိဘတွေရော။ (အိတ်ကို ကြမ်းပြင်ပေါ် ချလိုက်သည်။)
မီမီ။ ။ ဖေဖေက ဆုံးသွားတာ တစ်နှစ်ခွဲလောက် ရှိပြီလေ။ မေမေက ...
စမ်းစမ်း။ ။ (မျက်နှာမကောင်းဘဲ တောင်းပန်) ဟုတ်လား။ စိတ်မကောင်းစရာဟယ်။ ဆောရီးနော် မီမီ၊ ငါ ဘာမှမသိရဘူးလေ။ မီမီ။ ။ အို ကိစ္စမရှိပါဘူး။ အားလုံး ကောင်းသွားမှာပါ။ ငါခံနိုင်ရည် ရှိသွားပြီလေ။ မေမေကတော့ နယ်မှာပဲ နေတယ်။
စမ်းစမ်း။ ။ ဪ ဒါဖြင့် ဒီမှာ နင်တစ်ယောက်တည်းပေါ့။
မီမီ။ ။ တစ်ယောက်တည်းလား ဆိုတော့ အင်း တစ်ယောက်တည်းပဲ ဆိုပါတော့။ (တံခါးဘက်သို့ စိုးရိမ်တကြီး လှမ်းမျှော်ကြည့်သည်။)
စမ်းစမ်း။ ။ အတော်ပဲ။ ဒါဖြင့် ငါ ဒီမှာ တည်းလို့ ရမှာပေါ့နော်။
မီမီ။ ။ (ကပျာကယာ) အို မဖြစ်နိုင်ဘူး ထင်တယ် စမ်းစမ်းရယ်။
စမ်းစမ်း။ ။ (နားမလည်ဟန်ဖြင့် ဟိုဟိုသည်သည်ကြည့်) ဘာဖြစ်လို့လဲ မီမီရဲ့။
မီမီ။ ။ တိုက်ခန်းပိုင်ရှင် ဆီမှာ ခွင့်တောင်းရဦးမှာ၊ သူက လူပိုခွင့်ပြုမှာ မဟုတ်ဘူး။
စမ်းစမ်း။ ။ (အနည်းငယ် မျက်မှောင်ကြုတ်) ဒီအခန်းက နင်ပိုင်တာ မဟုတ်ဘူးလား။
မီမီ။ ။ ဒါ ငှားထားတဲ့အခန်းလေ။ (စိုးရိမ်ပူပန်ဟန် မျက်နှာထားဖြင့် တံခါးဘက်သို့ နောက်တစ်ကြိမ် လှမ်းကြည့်)
စမ်းစမ်း။ ။ ဟုတ်ပြီလေ၊ နင် ငှားထားတာ မဟုတ်ဘူးလား။ ကိုယ်ငှားထားတဲ့ အခန်းမှာ ကိုယ့်သူငယ်ချင်းကို လေးငါးရက် တည်းခိုခွင့်ပေးဖို့ နင်က ဘယ်သူ့ဆီ ခွင့်တောင်းရမှာလဲ။
မီမီ။ ။ (ဘယ်လိုရှင်းရမှန်း မသိတော့သည့် အူကြောင်ကြောင် အပြုံးဖြင့်) ဒီလိုဟာ ဒီအခန်းကို ငှားတဲ့သူက ငါ့မိတ်ဆွေတစ်ယောက် ဆိုပါတော့။ သူက ဒီမှာ အမြဲတမ်း မနေဘူး။ တစ်ခါတစ်ခါ လာတယ်။ သူက ငါ့ကို ကူညီတဲ့အနေနဲ့ ဒီမှာ နေခွင့်ပေးထားတာ ဆိုတော့ သူမသိဘဲ တခြားသူ တစ်ယောက်ကို နေဖို့ ငါက ခွင့်ပြုလို့ မကောင်းဘူးလေ။ နင့်ကို မကူညီနိုင်တဲ့အတွက် ငါ့ကို စိတ်မဆိုးပါနဲ့ စမ်းစမ်းရယ်။ ဘယ်လိုမှ မဖြစ်နိုင်လို့ပါ။
စမ်းစမ်း။ ။ (စိတ်ညစ်သွားသည်ကို ဟန်ဆောင်ပြုံးရယ်လျက်) အို ရပါတယ် မီမီရယ်၊ နင်အဆင် မပြေရင် နေပါစေ။
မီမီ။ ။ (စိတ်အေးသွားဟန်) အေးအေး နင် ငါ့ကို နားလည်ပေးတဲ့အတွက် ကျေးဇူးတင်ပါတယ်ဟာ။ (ခဏနား) ဒါဖြင့် နင်တည်းခိုဖို့ နေရာတစ်ခုခု ရှာရမှာပေါ့။ အချိန်နောက်မကျခင် သွားရှာ ထားဦးလေ။ (ပရိသတ်ဘက်လှည့်) အရေးကြီးတာက စမ်းစမ်း သူနဲ့မဆုံမိဖို့ပဲ၊ ဘုရား ဘုရား ကယ်တော်မူပါ။
စမ်းစမ်း။ ။ (ပြုံးရယ်လျက် နှစ်သိမ့်) စိတ်မပူပါနဲ့ကွယ်၊ ဝိုင်ဒဗလျူစီအေမှာ တည်းလို့ရမှာပါ။ နောက်ဆုံးကွယ် ဝိုင်ဒဗလျူစီအေမှာ တည်းစရာ မရှိရင်တောင် ဘုန်းကြီးအသိရှိတဲ့ ဘုန်းကြီးကျောင်းမှာ တည်းမှာပေါ့။ ကိုလတ်တောင် ဘုန်းကြီးကျောင်းမှာ နေနေတာပဲ။ ကိုလတ်ကို နင် မှတ်မိလား။
မီမီက အခန်းတံခါးဆီသို့ စိုးရိမ်ပူပန်စွာ အာရုံရောက်နေသည်။
စမ်းစမ်း။ ။ ကိုလတ်လေ မီမီ။
မီမီ။ ။ (စမ်းစမ်း၏ စကားကို ပြန်အာရုံစိုက်) ဘာ ...
စမ်းစမ်း။ ။ ကိုလတ်လေ၊ တို့ကျောင်းမှာတုန်းက တို့နဲ့မတည့်တဲ့ ဝတုတ်တို့ အုပ်စုထဲက ...
မီမီ။ ။ (ဇဝေဇဝါ) ဝတုတ်တို့ အုပ်စုထဲက ဘယ်တစ်ယောက်လဲ၊ (ပရိသတ်ဘက်လှည့်) မတော်တဆ အခုအချိန်များ သူရောက်လာလိုက်ရင် ...။
စမ်းစမ်း။ ။ အသားညိုညို အရပ်ရှည်ရှည်နဲ့ တစ်ယောက်လေ။ လွယ်အိတ်ကြိုးကို တိုအောင် ပခုံးထက်မှာ ထုံးပြီး လွယ်တဲ့လူ။
မီမီ။ ။ (အာရုံထဲမှာ ပုံဖော်၍မရ) ဟင့်အင်း ... မသိဘူး။ အဲဒီလူ ဘာဖြစ်လို့လဲ။
စမ်းစမ်း။ ။ (စိတ်ကိုလျှော့ကာ သက်ပြင်းချ) ဪ ဘာမှမဖြစ်ပါဘူးဟာ၊ သူလဲ ဘုန်းကြီးကျောင်းမှာ နေပြီး အလုပ်လုပ်နေတာလို့ ပြောမလို့ပါ။
မီမီ။ ။ (စိတ်မပါ့တပါ) ဪ ...
စမ်းစမ်း။ ။ ဒါနဲ့ နင်အလုပ်လုပ်တဲ့ ရုံးက ဝေးလား။
မီမီ။ ။ ငါ အလုပ်လုပ်တဲ့ ရုံး ... (ပရိသတ်ဘက် လှည့်၍ တိုးတိုး) ကျွန်မ အလုပ်လုပ်တဲ့ ရုံး ... တဲ့။ (စမ်းစမ်းဘက် ပြန်လှည့်ပြော) အင်း ရုံးက သိပ်မဝေးပါဘူး။
စမ်းစမ်း။ ။ အလုပ်ပင်ပန်း သလားဟင်၊ ဘာတွေ လုပ်ရသလဲ။
မီမီ။ ။ (အဖြေကို ကမန်းကတန်း စဉ်းစားပြီး) အဲ အလုပ်လား၊ အလုပ်က သိပ်မပင်ပန်းပါဘူး။
စမ်းစမ်း။ ။ နင့်ကို ငါမြင်ရသလောက်တော့ နင့်ရဲ့ လွတ်လပ်မှုတွေ ပေါ့ပါးမှုတွေ ပျောက်ကွယ် သွားသလိုပဲ မီမီ၊ နင့်အတောင်ပံတွေကို ဘယ်သူက ဘယ်အရာက ချိုးဖြတ်ထားလိုက်သလဲ။
မီမီ။ ။ (ဇာလွှာကွန်ချာထဲတွင် စိတ်မတည်ငြိမ်ဟန် လမ်းလျှောက်ရင်း) ငါ့အတောင်ပံတွေ ငါ့ အတောင်ပံတွေ ...
စမ်းစမ်း။ ။ (မီမီ၏ ဇာကွန်ချာကို လှည့်ပတ်၍ မီမီကို အားမလိုအားမရ ကြည့်ရင်း) နောက်ပြီး နင်ဟာ အရင်တုန်းက မီမီ မဟုတ်သလိုပဲ၊ နင်နဲ့ ငါ့ကြားမှာ တစ်ခုခုက ခြားသွားပြီ၊ ဘာလဲတော့ ငါမသိဘူး မီမီ။
မီမီ။ ။ (လမ်းလျှောက်ရာမှ ချက်ချင်းရပ်ကာ စမ်းစမ်းဘက်သို့ ဆတ်ခနဲ လှည့်ကြည့်) ငါ အရင်က မီမီပဲ။ နင်နဲ့ငါ့ရဲ့ကြားမှာ တစ်ခုခုက ခြားထားတယ်ဆိုရင် အဲဒါဟာ စည်းစိမ်းဥစ္စာပဲ ဖြစ်လိမ့်မယ်။ တို့နှစ်ယောက်ဟာ ပိုင်ဆိုင်မှုချင်း မတူကြဘူး။ စမ်းစမ်း။ ။ (စဉ်းစဉ်းစားစားကြည့်) နင့်ကိုယ်ခန္ဓာက အလင်းရောင်ဟာ ဟိုတုန်းကထက် မှေးမှိုန် နေသလိုပဲ။ ဟိုတုန်းက နင့်ကိုယ်ခန္ဓာက အလင်းရောင် သိပ်တောက်ပခဲ့တယ်။
မီမီ။ ။ (စိတ်မတည်ငြိမ်ဟန် လမ်းလျှောက်ပြန်) အလင်းရောင် ... အလင်းရောင် ... ကျွန်မကိုယ်ခန္ဓာက အလင်းရောင် ... စမ်းစမ်း။ ။ (စိုးရိမ်ပူပန်ဟန်) နင်ဘာတွေ ဖြစ်နေသလဲ မီမီ၊ ဘာပြဿနာတွေ ဖြစ်နေသလဲ။
မီမီ။ ။ (လမ်းလျှောက်ရင်း) ကျွန်မ ဘာဖြစ်နေသလဲ ... ကျွန်မ ဘာဖြစ်နေသလဲ။
စမ်းစမ်း။ ။ (မီမီ ဇာလွှာနှင့် ထိကပ်လုနီးပါး တိုးကပ်လာ) မီမီ ဘာဖြစ်နေသလဲ။
ထိုအချိန်တွင် ဇာတ်ခုံဘယ်ဘက်ထောင့်ဆီမှ တံခါးခေါက်သံ ကြားရသည်။ တံခါးခေါက်သံကြောင့် မီမီ တုန်လှုပ်သွားသည်။ သူမ၏ ရင်ညွှန့်အား လက်ဖြင့် အသာဖိလိုက်သည်။
မီမီ။ ။ အဲ သွားပြီး။ (တံခါးဆီသို့ အားတင်း၍ လှမ်းကြည့်လိုက်သည်။)
သို့သော် မည်သူမျှ ဝင်မလာ။ စမ်းစမ်းသည် မီမီ့ အဖြစ်အား နားမလည်နိုင်သလို ကြည့်သည်။ ထို့နောက် ခေါင်းယမ်းကာ အနီးမှထွက်ခွာ၊ ဟိုဟိုသည်သည် လျှောက်ကြည့်သည်။
စမ်းစမ်း။ ။ (တစ်ကိုယ်တည်းပြော) မီမီ တစ်ခုခုကို ဖုံးကွယ်ထားတယ်။ အခန်းကတော့ တော်တော် ကောင်းတာပဲ။ အလို ယောက်ျားအသုံးအဆောင် ပစ္စည်းတွေလဲ အများကြီးပါလား။ လေ့ကျင့်ခန်းယူတဲ့ ပစ္စည်းတွေရော၊ ရေမွှေး၊ ခေါင်းလျှော်ရည်၊ ဇိမ်ခံပစ္စည်းတွေ၊ ဟိုဟာက ဘာပါလိမ့်။ (စပ်စုစိတ်ကို ပြန်ထိန်းချုပ်) အို ... မီမီ မသိစေချင်တဲ့ အရာတွေ ဒီအခန်းထဲမှာ အများကြီး ကျန်ဦးမှာပါ။ မီမီဟာ ဘယ်လိုဘဝမှာ အသက်ရှင်နေတာပါလိမ့်။ (မီမီ့ဆီ လျှောက်သွား) မီမီ နင် ဘာပြဿနာတွေနဲ့ ရင်ဆိုင်ရသလဲဟင်။
မီမီ။ ။ (အားတင်း၍ ခေါင်းကိုမော့) ငါ ဘာမှ မဖြစ်ပါဘူး။
စမ်းစမ်း။ ။ သေချာရဲ့လားဟင်။
မီမီ။ ။ သေချာပါတယ်။
စမ်းစမ်း။ ။ နင် ငါ့ကို ပြောချင်တာ တစ်ခုခုရှိရင် ပြောလိုက်ပါ မီမီ၊ နင်သိပါတယ်၊ ငါဟာ နင့် သောကတွေကို မင်စုပ်စက္ကူတစ်ချပ်လိုပဲ အမြဲ စုပ်ယူလက်ခံနေခဲ့တာပါ။ နင်ဘာတွေ ခံစားနေရသလဲ။
မီမီ။ ။ ဘာမှ မခံစားရဘူး။
စမ်းစမ်း။ ။ နင် ဝမ်းနည်းနေခဲ့ရင် ...
မီမီ။ ။ ဝမ်းမနည်းပါဘူး၊ ငါ့ရုပ်က ဝမ်းနည်းနေတဲ့ရုပ် ဖြစ်နေသလား။
စမ်းစမ်း။ ။ နာကြည်းနေခဲ့ရင် (မီမီ ငြိမ်သက်နေသည်) အားငယ်နေခဲ့ရင် (မီမီ တစ်ဖက်သို့ မျက်နှာ လွှဲသွားသည်) ပတ်ဝန်းကျင်ရဲ့ ကဲ့ရဲ့မှုကို ခံစားနေခဲ့ရရင် (မီမီ အံကြိတ်လိုက်သည်) တစ်ယောက်ယောက်ရဲ့ စော်ကားမှုကို ခံခဲ့ရရင် ...
မီမီ။ ။ (ဒေါသဖြင့် စမ်းစမ်းအား လှည့်ကြည့်) တော်တော့ ...။
(ဇာကွန်ချာထဲတွင် မငြိမ်မသက် လမ်းလျှောက်) နင်တို့ သိထားရမှာက မီမီဟာ သူများ ခင်ပွန်းတစ်ယောက်ရဲ့ စိတ်အပန်းဖြေစရာ ကိုယ် အညောင်းဖြေစရာ လေ့ကျင့်ခန်းပစ္စည်း ကိရိယာ တစ်ခု မဟုတ်ဘူး။
စမ်းစမ်း။ ။ အို ... (စိုးရိမ်ထိတ်လန့်စွာ ယောင်ယမ်း၍ ကိုယ့်ပါးစပ်ကိုယ့် လက်ဖဝါးဖြင့်ပိတ်)
မီမီ။ ။ ငါ့ကိုယ်ခန္ဓာပေါ်က အလှအပတွေဟာ ဘယ်တော့မှ ပျက်စီးမသွားဘူး။
စမ်းစမ်း။ ။ ဘုရားရေး ...
မီမီ။ ။ ငါ့နေရာမှာ နောက်ထပ်တစ်ယောက်ကို ဘယ်တော့မှ အစားထိုးလို့ရမှာ မဟုတ်ဘူး။
စမ်းစမ်း။ ။ ဘယ်သူက အစားထိုးမှာလဲ။
မီမီ။ ။ ငါဟာ ယောက်ျားတွေ သဘောကျတတ်တဲ့ ကစားစရာ အရုပ်တစ်ရုပ် မဟုတ်ဘူး ... မဟုတ်ဘူး။
စမ်းစမ်း။ ။ ကိုယ်တို့ မိန်းမတွေဟာ သက်ရှိလူသားတွေပါ မီမီ၊ ယောက်ျားတွေလိုပဲ သွေးသားနဲ့ ခံစားတတ်၊ ဦးနှောက်နဲ့ ဆင်ခြင်တတ်၊ ဥာဏ်ရည်နဲ့ ဆုံးဖြတ်တတ်၊ အရည်အချင်းနဲ့ ပြုမူလှုပ်ရှား တတ်တဲ့ လူသားတွေပါ။ တို့ကို မြင့်မားတဲ့ လူသားအဆင့်ကနေ ရုပ်ဝတ္ထုပစ္စည်း အဆင့်ထိရောက်အောင် ယောက်ျားတွေက နှိမ့်ချပစ်မှာကို တော်လှန်ယူရမှာ။
မီမီ။ ။ ငါဟာ ပျက်စီးသွားတဲ့ အရုပ်တစ်ရုပ်လို အမှိုက်ပုံထဲ ဘယ်တော့မှ အရောက်မခံနိုင်ဘူး။
စမ်းစမ်း။ ။ ဟင့်အင်း၊ ဘယ်အမှိုက်ပုံထဲမှ နင်မရောက်နိုင်ပါဘူး။
မီမီ။ ။ (တွေးရင်း တွေးရင်း ဝမ်းနည်းလာကာ မျက်နှာကို လက်ဖဝါးနှစ်ဖက်ဖြင့် အုပ်၍ ခပ်တိုးတိုး) ဘုရားရေ ... ကျွန်မ ဘာတွေ လုပ်ခဲ့မိပြီလဲ။
မီမီသည် တဖြည်းဖြည်း တုန်လှုပ်စွာ ဒူးထောက်လျက်သား ကျသွားသည်။
စမ်းစမ်းက မီမီဆီသို့ သတိဖြင့် ချည်းကပ်လာ။ ဇာလွှာနှင့် ထိလုနီးပါး ဖြစ်သည့်အခါ ဒူးထောက် ထိုင်ချလိုက်သည်။
စမ်းစမ်း။ ။ (ခပ်တိုးတိုး) မီမီ ...
မီမီ။ ။ (လက်ဖဝါးများကို ဖယ်ကာ စမ်းစမ်းအား ကြည့်) ငါ ဒီစစ်ပွဲကို နိုင်အောင်တိုက်မှ ဖြစ်မယ်။
စမ်းစမ်း။ ။ စစ်ပွဲ ဘယ်သူနဲ့ စစ်ပွဲလဲ။
မီမီ။ ။ ပတ်ဝန်းကျင်နဲ့။
စမ်းစမ်း။ ။ အို ...
မီမီ။ ။ နောက်ပြီး သူ့ဇနီးနဲ့။
စမ်းစမ်း။ ။ ဘုရား ... ဘုရား။
မီမီ။ ။ အသေအကျေ တိုက်ရမယ်။
စမ်းစမ်း။ ။ ဘယ်လို တိုက်မှာလဲ။
မီမီ။ ။ (တစ်ခဏ ငြိမ်သွားပြီးနောက် သွေးရူးသွေးတမ်း) ငါ့ကို သူ လက်ထပ်ဖြစ်အောင် အစွမ်းကုန် ကြိုးစားရမယ်။
စမ်းစမ်း။ ။ (လန့်ဖျပ်သွား) ဘုရားရေ ... သူဆိုတာ ... သူဆိုတာ နင့်ချစ်သူလား။
မီမီ။ ။ ချစ်သူ ချစ်သူဆိုတာ ဘာလဲ။
စမ်းစမ်း။ ။ ချစ်သူဆိုတာ ကိုယ့်မှာရှိတဲ့ ပျော်ရွှင်မှု၊ စည်းစိမ်ဥစ္စာ၊ အောင်မြင်မှု အစစအရာရာ ကိုတောင် စွန့်လွှတ်ရဲတဲ့ သတ္တိနဲ့ ကောင်းတူဆိုးဖက် မျှဝေခံစားပြီး တာဝန်ယူရမယ့် တစ်ယောက်ယောက်ကို ခေါ်တယ်။
မီမီ။ ။ အမြင့်ကို ပျံသန်းချင်သူ တစ်ယောက်အတွက် ချစ်သူဟာ အတောင်ပံတစ်စုံ ဖြစ်သလား။
စမ်းစမ်း။ ။ အတောင်ပံတစ်စုံ ဟုတ်မဟုတ်တော့ မသေချာဘူး။ သေချာတာ တစ်ခုက ချစ်သူဆိုတာ အမြင့်ကနေ ပြုတ်ကျလာသူ တစ်ယောက်အတွက် အောက်ကနေ ခံပေးတဲ့ ပိုက်ကွန်တစ်ခုပဲ။
မီမီ။ ။ အိုး အချစ်ဟာ ဘာအသုံးကျမလဲ။ အချစ်ကို စည်းစိမ်ချမ်းသာနဲ့ ဝယ်ယူလို့ရတယ်။ စည်းစိမ်ချမ်းသာကို အချစ်နဲ့ ဝယ်ယူလို့ မရဘူး။
စမ်းစမ်း။ ။ အချစ်ဆိုတာ ပေးလို့ယူလို့ ရတဲ့ပစ္စည်း မဟုတ်ဘူး။ အချစ်ဆိုတာ တာဝန်ယူမှု တစ်ခုပဲ။
မီမီ။ ။ အချစ်နဲ့ ဘဝလုံခြုံမှု နှစ်မျိုးမှာ ငါကတော့ ဘ၀လုံခြုံမှုကိုပဲ ရွေးမယ်။
စမ်းစမ်း။ ။ ဘဝလုံခြုံမှု အစစ်ကိုတော့ ခွဲခြားသိတတ်ဖို့ လိုမှာပေါ့။
မီမီ။ ။ ဘဝလုံခြုံမှု အစစ်ဆိုတာ ဘာလဲ။
စမ်းစမ်း။ ။ စီးပွားရေး၊ ငွေကြေးဆိုင်ရာ လုံခြုံမှုသာမက လူမှုရေးဆိုင်ရာ ကိုယ်ကျင့်သိက္ခာဆိုင်ရာ လုံခြုံမှုပါ ပေါင်းစပ်မှ တကယ့် လုံခြုံမှုအစစ် ဖြစ်တယ်။
မီမီ။ ။ အချစ်နဲ့ ဘဝလုံခြုံမှု နှစ်မျိုးထဲက တစ်မျိုး ရွေးမယ်ဆိုရင် ဘဝလုံခြုံမှုကိုပဲ ရွေးမယ်။
စမ်းစမ်း။ ။ ဘာကြောင့် နှစ်မျိုးထဲက တစ်မျိုးလို့ စဉ်းစားသလဲ၊ နှစ်မျိုးလုံး တစ်ပြိုင်တည်းရဖို့ ဘာလို့ မစဉ်းစားတာလဲ။ အချစ်ရော ဘဝလုံခြုံမှုရောလေ။
မီမီ။ ။ အချစ်ရော၊ လုံခြုံမှုရော နှစ်မျိုးလုံး။ အို အဲဒီလိုသာဆိုရင် ဘဝဟာ ဘယ်လောက်များ ပြီးပြည့်စုံလိုက်မလဲကွယ်။
စမ်းစမ်း။ ။ ဟုတ်တယ်။ အချစ်ကြောင့် ကမ်းတဲ့လက်ဟာ ခိုင်မြဲတယ်။ နွေးထွေးတယ်။
မီမီ။ ။ (ကြည်နူးစွာပြုံး) ခိုင်မြဲတယ်။ နွေးထွေးတယ်။
စမ်းစမ်း။ ။အချစ်မှာ အနိုင်ကျင့်တာတွေ ကျရှုံးတာတွေ မရှိဘူး။ တူညီစွာ မျှဝေခံစားမှုပဲ ရှိတယ်။
မီမီ။ ။ (တိုးတိတ်စွာ ရေရွတ်) တူညီစွာ မျှဝေခံစားမှု။
[အခန်းကူးပြောင်း ဂီတ၊ အလင်းရောင် တဖြည်းဖြည်း မှိုန်ကျပြီး စင်တစ်ခုလုံး မှောင်သွား]
* * *
အခန်းစဉ် (၃)
မီမီသည် ဇာလွှာကွန်ချာထဲတွင် အနောက်တိုင်းဂီတသံ တစ်ခုနှင့်အတူ က,နေသည်။ ခဏအကြာတွင် တံခါးခေါက်သံတစ်ခု ထွက်ပေါ်လာသည်။ ရုတ်တရက် မီမီက မကြား။ ဂီတသံနှင့် အကထဲတွင် အာရုံနစ်မျော နေသည်။ တံခါးခေါက်သံ ဒုတိယတစ်ကြိမ် ခပ်ကျယ်ကျယ် ပေါ်ထွက် လာသည်။ ထိုအခါ မီမီ ကြားသွားပြီး တံခါးဆီသို့ လှည့်ကြည့်သည်။ ထိုအချိန်မှာ မီမီက ကက်ဆက်ခလုတ်ကို ပိတ်လိုက်သည့် သဘောဖြင့် ဂီတသံ ရပ်သွားသည်။
မီမီ။ ။ ဘယ်သူလဲ ...
ကိုလတ်။ ။ (အသံသက်သက်) ကျွန်တော်တို့ သုခ ဆောက်လုပ်ရေး ကုမ္ပဏီကပါ။ ဒီအခန်းကို မွမ်းမံပြင်ဆင်ဖို့ ဦးသိန်းဦးက အလုပ်အပ်ထားလို့ပါ ခင်ဗျာ။
မီမီ။ ။ (ကျေနပ်စွာ ပြုံးလျက်) ဝင်ခဲ့ပါ။
ဇာတ်စင်ထောင့်မှ ကိုလတ် ဝင်လာသည်။
မီမီ။ ။ (အံ့ဩဟန်ဖြင့် ပရိသတ်ဘက် လှည့်ပြုံး) ကြည့်စမ်း ... သူ ကျွန်မကို လက်ထပ်ယူတော့မယ် ထင်တယ်။ ဒီအတိုင်းဆို စစ်ပွဲမှာ ကျွန်မ မရှုံးတော့ဘူးပေါ့ ...။
ကိုလတ်။ ။ (မီမီရှိရာသို့ လျှောက်လာ) ကျွန်တော့်နာမည် ဇော်လတ်ပါ ခင်ဗျာ။ သုခ ဆောက်လုပ် ရေးကုမ္ပဏီက ဝန်ထမ်းပါ။
မီမီ။ ။ (ကိုလတ်အား ခပ်စိုက်စိုက် ငေးကြည့်) ဪ ဟုတ်ကဲ့။
(ပရိသတ်ဘက်လှည့်) သူ့မျက်လုံးတွေဟာ ကျွန်မနဲ့ ရင်းနှီးနေသလိုပဲ။ ဒီမျက်လုံးတွေကို ကျွန်မ သိနေတယ်။
ကိုလတ်။ ။ ကျွန်တော်တို့ ဒီတိုက်ခန်းကို ဆေးအသစ်သုတ်မယ်။ လျှပ်စစ်မီးကြိုးတွေ မီးအလှ ပန်းဆိုင်းတွေ ပြင်မယ်။ လေအေးစက်တွေ တပ်ရပါမယ်။
(ပရိသတ်ဘက်လှည့်) ဒီအမျိုးသမီး တော်တော် လှတာပါလား။ သူ့မျက်လုံးတွေဟာ ကျွန်တော့် ရင်ထဲထိအောင် ထိုးဖောက်စူးဝင် သွားတော့တာပဲ။ မဖြစ်ဘူး၊ ကိုယ့်အလုပ်ကိုယ်ပဲ အာရုံ စိုက်တာ ကောင်းပါတယ်။
(ဇာတ်စင်နောက်ခံ ပိတ်ကားဘက်လှည့်) ကဲ ကိုယ့်လူတို့ ဆေးအဟောင်းတွေကို စပြီး ဖျက်ပေတော့။
ကိုလတ်သည် အလုပ်သမားများရှိရာသို့ သွားဟန်ဖြင့် လျှောက်သွားသည်။
မီမီ။ ။ (ဇာကွန်ချာထဲတွင် တစ်စုံတစ်ခုကို ကျေနပ်နှစ်သိမ့်ဟန်ဖြင့် ပြုံးလျက် လမ်းလျှောက်နေရာမှ) ဪ ဒီမှာရှင့်၊ ဒီအခန်းကို ပန်းနုရောင် ဖျော့ဖျော့လေး သုတ်ပေးပါနော်။
ကိုလတ်။ ။ (အားနာဟန်လှည့်ကြည့်) ကျွန်တော့်ကို ဦးသိန်းဦးက အဖြူရောင် သုတ်ပေးဖို့ မှာ ထားပါတယ် ခင်ဗျာ။
မီမီ မျက်နှာညိုသွားသည်။
[ဂီတသံဖြင့် အချိန်ပြောင်းလဲပေးရန်။]
ကိုလတ်သည် ဇာတ်ခုံနောက်ဘက် ပိတ်ကားနားတွင် ဆေးသုတ်သူများအား ကြီးကြပ်သည့်ဟန်ဖြင့် ဟန်ပါပါ ခါးထောက်၍ ရပ်ကြည့်နေသည်။ မီမီက သူမ၏ ဇာကွန်ချာထဲတွင် ကနွဲ့ကလျ ရပ်၍ ကိုလတ် ရှိရာသို့ ကြည့်နေသည်။
မီမီ။ ။ ကျေးဇူးတင်ပါတယ် ကိုလတ်ရယ်၊ အခုမှပဲ အခန်းလေးဟာ ချစ်စရာကောင်းလိုက်တာ၊ နံရံကပ် မီးပွင့်လေးတွေကလဲ လှလိုက်တာနော်။
(ပရိသတ်ဘက်လှည့်) သူ့မျက်လုံးလေးတွေက အဲဒီ မီးပွင့်ကလေးတွေထက် လှတယ်။ အဲဒီ မျက်ဝန်းလေးတွေဟာ ကျွန်မနှလုံးသားကို ဆွဲထုတ်ယူသွားတော့မှာပါ။
(ကိုလတ်ဘက်ပြန်လှည့်) ခဏနားပြီး ကော်ဖီလေး သောက်လိုက်ပါဦးကွယ်။
ကိုလတ်။ ။ (မီမီဘက်ကို လှည့်ပြုံး) ကျေးဇူးတင်ပါတယ် မီ။
(ပရိသတ်ဘက် လျှောက်လာပြီး ပရိသတ်အားပြော) သူ့အကြင်နာတွေပါ ထည့်ထားလို့လား မသိဘူး၊ ကော်ဖီက သိပ်ကောင်းတာပဲ။
မီမီ။ ။ ကိုလတ်က အလုပ် သိပ်ကြိုးစားတာပဲနော်။ အစစအရာရာ စနစ်လဲ ကျတယ်။ (ကိုလတ်ကို အဓိပ္ပါယ်ပါပါ စိုက်ကြည့်) ကိုလတ်ကို လက်ထပ်ရတဲ့ မိန်းကလေးတော့ သိပ်ကံကောင်းမှာပဲ။
ကိုလတ်။ ။ ကျေးဇူးတင်ပါတယ်။
မီမီ။ ။ (ပရိသတ်ဘက်လှည့်) အချစ်ဆိုတာ ကိုလတ်ရဲ့ အနက်ရောင် မျက်ဝန်းတွေလားဟင်။ ဒါဆိုရင် အချစ်ရဲ့ ဆွဲငင်အားကို ကျွန်မ သိပြီ။
ကိုလတ်။ ။ ကျွန်တော် ကော်ဖီကြောင့်လား မသိဘူး။ ကျွန်တော့် ရင်တွေ ခုန်နေတယ်။
မီမီက ကိုလတ်ရှိရာသို့ လက်များ ဆန့်တန်းလိုက်သောအခါ ဇာလွှာစနှင့် သူမလက်ဖျားများ ထိမိသွားသည်။ ကိုလတ်က မီမီအား ဝေးစိုက်ကြည့်နေသည်။
မီမီ။ ။ (ပရိသတ်ဘက်လှည့်) အချစ်ဆိုတာ ချွေးစို့နေတဲ့ အေးစက်စက် နဖူးပြင်လေးလားဟင်။
ကိုလတ်။ ။ ကော်ဖီ ကော်ဖီကြောင့် ထင်တယ်။ ကျွန်တော့်သွေးတွေ နွေးလာတယ်။ အသည်းနှလုံး ကလဲ နွေးနေတယ်။ ကျွန်တော့် နှုတ်ခမ်းတွေလဲ နွေးနေတယ်။
ကိုလတ်သည် သူ့ညာလက်ကို နှုတ်ခမ်းဆီသို့ အသာအယာ ထိလိုက်သည်။ ထို့နောက် လက်ကို ဆန့်လိုက်သည်။ ဇာလွှာစဆီသို့ ခပ်ဖြည်းဖြည်း ဆန့်တန်း၍ တိုးသွားသည်။ မီမီ၏ လက်ဖျားနှင့် ကိုလတ်၏ လက်ဖျားများ ထိလုထိခင် ဖြစ်သွားသည်။ နှစ်ယောက်လုံး သိမ့်ခနဲ တုန်သွားပြီး တစ်ယောက်ကိုတစ်ယောက် ချစ်မြတ်နိုးစွာ ငေးကြည့်နေကြသည်။
မီမီ။ ။ အချစ်ကြောင့် ကမ်းတဲ့လက်ဟာ ခိုင်မြဲတယ်၊ နွေးထွေးတယ်။
ကိုလတ်။ ။ အချစ်ကြောင့် ကမ်းတဲ့လက်ဟာ ခိုင်မြဲတယ်။ နွေးထွေးတယ်။
ကိုလတ်သည် မီမီနှင့် လက်ဖျားချင်း ထိလုထိခင် အနေအထားဖြင့် ဇာကွန်ချာကို လှည့်ပတ်လျက် လျှောက်ရာ မီမီသည် ဇာလွှာအတွင်းမှာ လိုက်လံလှည့်ပတ်နေသည်။
မီမီ။ ။ အချစ်မှာ အနိုင်ကျင့်တာတွေ ကျရှုံးတာတွေ မရှိဘူး။
ကိုလတ်။ ။ အချစ်မှာ အနိုင်ကျင့်တာတွေ ကျရှုံးတာတွေ မရှိဘူး။
ထိုအချိန်တွင် တံခါးခေါက်သံ တိုးတိုး ထွက်ပေါ်လာသည်။ ကိုလတ်ရော မီမီရော မကြားကြ။ ထိုခဏတွင် တံခါးဆီမှ စမ်းစမ်း ခပ်သွက်သွက် ဝင်လာသည်။ စမ်းစမ်းသည် ကိုလတ်နှင့် မီမီအား လှမ်းမြင်လိုက်သောအခါ ခြေလှမ်း တုံ့ခနဲ ရပ်သွားပြီး အံ့ဩဝမ်းနည်းသော မျက်နှာထားဖြင့် ငေးစိုက်ကြည့်နေသည်။
စမ်းစမ်း။ ။(တိုးတိတ်စွာ လွှတ်ခဲ ရေရွတ်) ကိုလတ် ... (ထို့နောက် ကပျာကယာ မိမိ၏ နှုတ်ခမ်းကို လက်ဖြင့် ဖိအုပ်ထားလိုက်သည်။ သို့သော် ကိုလတ်က ကြားသွားပြီး နောက်သို့ လှည့်ကြည့်သည်။ စမ်းစမ်းကို မြင်သောအခါ ရုတ်တရက် အံ့ဩစွာ စိတ်ထိခိုက်သွားပြီး ဇာလွှာမှ နောက်သို့ ဆုတ်လိုက်သည်။
မီမီ။ ။ (စမ်းစမ်း ရောက်လာသည်ကို မသိဘဲ ပရိသတ်ဘက် လှည့်၍ စကားပြော) ကျွန်မ ကိုလတ်ကို ချစ်တယ်။
ထိုအချိန်တွင် နောက်ခံဂီတအဖြစ် မြို့မငြိမ်း၏ သီချင်းဖွင့်ထားနိုင်သည်။ တူနှစ်ကိုယ် တဲအိုပျက်မှာ နေရ၊ ရွှေဘုံပေါ်မှာစံရ၊ ချစ်တာ ချစ်တာ ပဓာနလို့ ဆိုချင်တယ် မောင်ရယ်၊ ချစ်တာ ချစ်တာ ပဓာနလို့ ဆိုချင်တယ် မောင်ရယ်။
ကိုလတ်။ ။ (စမ်းစမ်းဆီသို့ အံ့ဩတုန်လှုပ်စွာ ရောက်သွား) စမ်းစမ်း ကိုယ့်ရဲ့ စမ်းပါလား။ ဘယ်လိုဖြစ်ပြီး ဒီကို ရောက်နေတာလဲ။ (စမ်းစမ်းအား လက်ဖျားထွေးဆုပ်ရန် ကြံရွယ်ပြီးမှ နောင်တရဟန်ဖြင့် နောက်သို့ ဆုတ်လိုက်သည်။)
ကိုလတ်။ ။ (မချိတင်ကဲ) ကိုယ် မှားလိုက်တာနော်။ ကိုယ်ဟာ မီမီရဲ့ အလှကွန်ရက်မှာ နစ်မျော သွားခဲ့မိတယ်။ ကိုယ် မင်းကို သစ္စာဖောက်မိခဲ့ပြီ။
စမ်းစမ်း။ ။ (မချိပြုံးဖြင့်) ဪ ကိုလတ်ရယ်၊ ကျွန်မ ချစ်ရတဲ့ ကိုလတ်ဟာ ကျွန်မ ကွယ်ရာမှာ ကျွန်မ သူငယ်ချင်းနဲ့ အို ဘယ်လို ကံကြမ္မာမျိုးပါလိမ့်နော်။ (မီမီ့အား နာကြည်းစွာ တစ်ချက် လှမ်းကြည့်)
မီမီသည် အချစ်ဖြင့် ပျော်ရွှင်သော မျက်နှာဖြင့် ဇာလွှာကွန်ချာထဲတွင် ဖြည်းညင်းစွာ လှည့်ပတ် ကြည်နူးလျက် ရှိသည်။ စမ်းစမ်းသည် မီမီ့ ပျော်ရွှင်မှုကို သတိလက်လွတ် ငေးကြည့်နေသည်။ ထို့နောက် ကိုလတ်အား မော့ကြည့်သည်။
စမ်းစမ်း။ ။ (အသံကို ထိန်းချုပ်၍) ကဲ အခု ကိုလတ် ဘာလုပ်မလဲ။
ကိုလတ်။ ။ စမ်း ဘယ်လို ဖြစ်စေချင်သလဲ။ (မျက်နှာအောက်ငုံ့လျက်) စမ်း ဖြစ်စေချင်သလို ကိုယ်လုပ်မယ်။
စမ်းစမ်း။ ။ ဒါကို ကိုလတ်က ဆုံးဖြတ်ရမှာပေါ့။ ကိုလတ်ရဲ့ ဆုံးဖြတ်မှုကို ကျွန်မခံမယ်။ ဘာကြောင့်လဲ ဆိုတော့ အချစ်မပါဘဲ ကတိသစ္စာကြောင့် လက်ထပ်ရတဲ့ အိမ်ထောင်ရေးဟာ ကျွန်မ ဘဝအတွက် ကျိန်စာတစ်ခု ဖြစ်သွားမှာ။ ဘယ်တော့မှ ပျက်ပြယ်မသွားမယ့် ကျိန်စာတစ်ခု ဖြစ်နေပါလိမ့်မယ်။ (ဝမ်းနည်းစွာ ခေါင်းငုံ့ချ) အဲဒီကျိန်စာကြီးနဲ့ အဲဒီဆင်းရဲဒုက္ခကြီးနဲ့ ကျွန်မ အသက်မရှင်ချင်ဘူး ကိုလတ်ရယ်။ ကိုလတ်ပဲ ဆုံးဖြတ်ပါ၊ ကိုလတ်ရဲ့ နှလုံးသားနဲ့ ဆုံးဖြတ်ပါ။
ကိုလတ်။ ။ (ဝေခွဲမရသော မျက်နှာဖြင့် ဇာတ်စင်အလယ်သို့ လျှောက်လာသည်။ ပရိသတ်ဘက် လှည့်) ကျွန်တော် စမ်းကို ချစ်တယ်၊ လေးစားတဲ့စိတ်နဲ့ ချစ်တယ်။ စမ်းဟာ ချစ်သူသက်တမ်း သုံးနှစ်အတွင်းမှာ ဆင်းရဲဒုက္ခကို ကျွန်တော် ရင်ဆိုင်နေရတဲ့ တစ်ချိန်လုံး ကျွန်တော့်ဘေးမှာ အားပေးဖော် မျှဝေခံစားဖော် ဖြစ်ခဲ့တယ်။ စမ်းဟာ ကျွန်တော့် ဘဝအတွက် အရေးအကြီးဆုံး မိန်းကလေး ဖြစ်တယ်။ (မျက်နှာထား တည်ကြည်စွာ) စမ်းကိုသာ ကျွန်တော့် ဘဝအဖော် အဖြစ် ရွေးလိုက်ပါတယ်။
(ထို့နောက် စမ်းစမ်း ရှိရာသို့ ခြေလှမ်း နှစ်လှမ်း သုံးလှမ်း လျှောက်သွားသည်။ စမ်းစမ်းက ကြည်နူးစွာ လက်ကမ်း ကြိုဆိုသည်။ သို့သော် ကိုလတ်သည် ခြေလှမ်း တုံ့သွားပြီး မီမှီဘက် လှည့်ကြည့်သည်။)
မီ့ကိုလဲ ကျွန်တော် ချစ်တယ်။ လမ်းမှားကို လျှောက်နေမိတဲ့ သနားစရာ မိန်းကလေးတစ်ဦး အဖြစ် ကျွန်တော် ချစ်တယ်။ မီ့ရဲ့ ဘဝကို ကျွန်တော် ကယ်တင်ပေးနိုင်လိမ့်မယ်လို့ ထင်တယ်။
(စမ်းစမ်းဘက်သို့ လှည့်ကြည့်ပြီးမှ ပရိသတ်ဘက် ပြန်လှည့်) စမ်းစမ်းဟာ သူ့ဘဝကို သူ ကောင်းကောင်း တည်ဆောက် ထားနိုင်ခဲ့ပြီ၊ သူဟာ ယုံကြည်ချက် ပြင်းပြတဲ့ မိန်းကလေး၊ ကိုယ်ကျင့်တရား တည်ကြည်တဲ့ မိန်းကလေး၊ ကျွန်တော့်ကို သူ လိုအပ်တယ်ဆိုရင် အချစ်သက်သက်နဲ့ အချစ်အတွက်ပဲ လိုအပ်မှာပါ။
(မီမီ့ဘက်သို့ လှည့်ကြည့်ပြီးမှ ပရိသတ်ဘက် ပြန်လှည့်) မီမီကတော့ ယိမ်းယိုင်လွယ်တယ်။ ကိုယ့်စိတ်ကို ကိုယ်တိုင် မထိန်းချုပ်နိုင်ဘူး။ သူ့ကို အသုံးချတဲ့ ယောက်ျားတွေကိုသာ သူ တွေ့ကြုံခဲ့တယ်။ အချစ်ကို အခုမှ သူ့ဘဝမှာ ကြုံရတာ။ သူ့ဘဝဟာ အခုမှ အဓိပ္ပါယ် ရှိလာတာ။ သူ ကျွန်တော့်ကို လိုအပ်တယ်၊ အချစ်အတွက်လဲ လိုအပ်တယ်၊ ဘဝမှာ လမ်းညွှန်သူ ဦးဆောင်သူ အဖြစ်လဲ လိုအပ်တယ်။
(ဆုံးဖြတ်ချက် ချလိုက်ဟန်ဖြင့် သက်ပြင်းချ) ကျွန်တော် မီမီ့ကိုပဲ ရွေးချယ်သင့်တယ်။
ကိုလတ်သည် မီမီ့ဆီသို့ လျှောက်သွားသည်။ စမ်းစမ်းသည် ထိုအဖြစ်ကို ကြေကွဲစွာ ကြည့်နေပြီး နားလည်စွာ ပြုံးလိုက်ကာ နောက်သို့ ဆုတ်၍ ခပ်ကွယ်ကွယ် မတ်တပ်ရပ်နေသည်။ ထိုအချိန် စမ်းစမ်းသည် အခြားဇာတ်ကောင် နှစ်ယောက်အား စောင့်ကြည့်ရုံသာ ဖြစ်သည်။
ကိုလတ်။ ။ မီ ... ကိုယ် မီ့ကို လက်ထပ်မယ်၊ မီ ကိုယ့်နောက်ကို လိုက်ဖို့ အသင့်ပြင်တော့။
မီမီ။ ။ (ပျော်ရွှင်စွာ) ဟုတ်တယ်။ မီတို့ လက်ထပ်ကြမယ်။ (ပရိသတ်ဘက်လှည့်) စမ်းစမ်းပြောတာ သိပ်မှန်တာပဲ၊ အချစ်ရော လုံခြုံမှုရော တစ်ပြိုင်တည်း ရနိုင်ပါတယ်။
မီမီသည် ကိုလတ်ရှိရာ လိုက်ရန် ဇာလွှာ၏ အပြင်သို့ထွက်ဖို့ ဟန်ပြင်သည်။ သို့သော် သူမ၏ ဇာကွန်ချာကလေးကို နောက်ဆံတင်းနေသည်။ ဇာလွှာရုံထဲတွင် လှည့်ပတ်ကြည့်ရင်း နှမြောတွယ်တာစွာ ခေါင်းယမ်းနေသည်။
မီမီ။ ။ ကိုလတ် မီတို့ လက်ထပ်ပြီးရင် ဘယ်မှာနေကြမှာလဲဟင်။
ကိုလတ်။ ။ (တက်ကြွစွာ) ဆင်ခြေဖုံးရပ်ကွက် တစ်ခုမှာ ခပ်ကုပ်ကုပ် အိမ်ကလေး ငှားနေမှာပေါ့ မီ။
မီမီ။ ။ (စိတ်ပျက်သွားသည်ကို အပြုံးဖြင့် ဖုံးကွယ်လျက်) ဟုတ်လား ကိုလတ်ရဲ့ ဝင်ငွေနဲ့ နိုင်တဲ့ အိမ်ကလေး တစ်လုံးပေါ့နော်။
ကိုလတ်။ ။ (ရိုးသားစွာပြုံး) ဟုတ်တာပေါ့။ ကိုယ်က တစ်လကို နှစ်သောင်း ရတယ်လေ မီ။ (မီမီ့ အပြုံးက လျော့သွားသည်။) ကိုယ့်လက်ထဲမှာ နှစ်သိန်းလောက် စုမိနေပြီ။ ကိုယ်လက်ထပ်ဖို့ ရွယ်ချက်နဲ့ ငွေစုခဲ့တာ။ (မလုံမလဲဟန်ဖြင့် စမ်းစမ်းအား လှမ်းကြည့်သည်။)
စမ်းစမ်းက ခပ်ဝေးဝေငေး ပြုံးနေပြီး သဘောထားကြီးစွာ ခေါင်းညိတ်ပြသည်။
မီမီ။ ။ (ပရိသတ်ဘက်လှည့်) ကျွန်မက အမြင့်ကိုသာ ပျံသန်းချင်တာ ...။
(ကိုလတ်ဘက် လှည့်ကြည့်ပြီးမှ) အင်း စီးပွားရေး လုံခြုံမှုနဲ့ လူမှုရေး လုံခြုံမှုတဲ့ ဘယ်လုံခြုံမှုက ပိုပြီး အရေးကြီးပါလိမ့်။
(ပရိသတ်ဘက်လှည့်) ကျွန်မ ဘာလုပ်ရမလဲ။ သူ ခရီးက ပြန်လာရင် ကျွန်မကို လက်ထပ်ဖို့ စီစဉ်မယ်တဲ့။ အဲဒီအခွင့်အရေးကို ကျွန်မ လက်လွှတ်လိုက်ရတော့မယ်။ ဒီအခွင့်အရေးဟာ ကျွန်မ နှစ်နှစ်တိတိ စောင့်ခဲ့ရတဲ့ အခွင့်အရေး။ ဒါကို ကျွန်မ စွန့်လွှတ်လိုက်ရတော့ မှာလား။
(ကိုလတ်ဘက် လှည့်ကြည့်) အချစ် ...၊ အချစ်ဟာ ဘာဝကို အဓိပ္ပါယ်ရှိအောင် မွမ်းမံပြုပြင် ပေးတဲ့ စွမ်းအင်တစ်ခုပဲတဲ့။ (စိတ်ပြောင်းသွားဟန် ခေါင်းခါယမ်း) ဟိုး ဆင်ခြေဖုံးရပ်ကွက်က အိမ်ကုပ်ကုပ်ကလေး တစ်ခုထဲမှာ အချစ်ဟာ ကြာရှည် တည်တံ့နိုင်ပါ့မလား။
(ဇာကွန်ချာကို ချီးကျူးစွာ လှည့်ပတ်ကြည့်) ကျွန်မရဲ့ ကောင်းကင်၊ ကျွန်မအတွက် ခမ်းနား လှပတဲ့ တောအုပ် ...။
ကိုလတ်။ ။ ကိုယ်တို့ရဲ့ အနာဂတ်ဟာ တစ်ဆင့်ပြီးတစ်ဆင့် မြင့်လာမယ့် ဥာဏ်ရည်နဲ့ ပညာ၊ အဲဒီပညာကို အသုံးချပြီး ရလာတဲ့ ထိုက်တန်တဲ့ အသက်မွေးကျောင်း အလုပ်နဲ့ ဂုဏ်သိက္ခာ။
မီမီ။ ။ ငွေဟာ ဂုဏ်သိက္ခာပဲ၊ ငွေများရင် ဂုဏ်သိက္ခာ များတာပဲ။ ဂုဏ်သိက္ခာကို ငွေနဲ့ ဝယ်လို့ ရတယ်။
ကိုလတ်။ ။ ပညာနဲ့ ဥာဏ်ရည်က ဂုဏ်သိက္ခာပဲ။
မီမီ။ ။ ငွေ ... ငွေ ... ငွေ။ ငွေနဲ့ခေါ်ရင် အားလုံး လာတယ်။ ငွေနဲ့ဖုံးရင် အားလုံးပျောက်တယ်။ ငွေနဲ့ဖျက်ရင် အားလုံးပျက်တယ်။ ငွေ ... ငွေ ... ငွေ ...။
ကိုလတ်။ ။ ငွေကြေးဆိုတာ အရာဝတ္ထုတွေကို ဖလှယ်ရာမှာ လွယ်ကူချောမွေ့အောင် ဖန်တီးထားတဲ့ ကြားခံပစ္စည်း တစ်ခုပဲ ဖြစ်သင့်တယ်။ ငွေဆိုတာ အရည်အချင်း မဟုတ်ဘူး။ မဟုတ်ရဘူး။
[အချိန်ကာလ ကျော်လွန်မှုကို ဂီတဖြင့် ဖော်ပြရန်။]
ကိုလတ်။ ။ (လက်ကမ်းလျက်) မီ မခိုင်မြဲတဲ့ ခမ်းနားမှုထဲကနေ ထွက်ခဲ့ပါ။
မီမီ။ ။ ကိုလတ် ခမ်းနားလှပတဲ့ မီ့တောအုပ်ထဲကို ဝင်ခဲ့ပါ။
ကိုလတ်။ ။ (နောက်သို့ တစ်လှမ်းဆုတ်) မီ ... အလှအပဆိုတာ ထာဝရ တည်မြဲတဲ့ အရည်အချင်း မဟုတ်ဘူး။
မီမီ။ ။ ကိုလတ် ခဏစောင့်ပါ။ မီ ငွေတွေ အများကြီး ရလာစရာ ရှိပါတယ်။
ကိုလတ်။ ။ (နောက်သို့ တစ်လှမ်းဆုတ်) မီ ပူလောင်တဲ့ ငွေကြေးဟာ နှလုံးသားတွေကို ညှိုးနွမ်း စေလိမ့်မယ်။
မီမီ။ ။ အချစ်ဟာ အရာရာကို အေးမြစေတယ်။
ကိုလတ်။ ။ အချစ်ဟာ ငွေပူကိုတော့ မအေးစေနိုင်ဘူး။
ကိုလတ်သည် နောက်သို့ လှည့်ထွက်လာပြီး ဇာတ်စင် ဘယ်ဘက်ထောင့်မှ ထွက်သွား၊ စမ်းစမ်းက ကိုလတ်နောက်သို့ လိုက်သွားရင်း မီမီအား တစ်ချက် စိတ်မချသလိုကြည့်၊ ထို့နောက် ဇာတ်စင် ဘယ်ဘက်ထောင့်မှ ထွက်သွား။
မီမီက ဇာလွှာကွန်ချာထဲတွင် တွေဝေစွာ ရပ်ကျန်ခဲ့သည်။
ခဏကြာအောင် ရပ်နေပြီးနာက် အခန်းပတ်လည်ကို ကျေနပ်စွာ ကြည့်နေသည်။ ကြည့်ရင်း ကြည့်ရင်းကပင် မီမီမျက်နှာမှာ နားမလည်နိုင်သည့်ဟန် ပေါ်ပေါက်လာသည်။
မီမီ။ ။ အို အခန်းဟာ အိမ်ခန်းတစ်ခုနဲ့ မတူဘဲ ရုံးခန်းတစ်ခုနဲ့ တူနေပါလား။ ဘာဖြစ်လို့လဲ ရုံးစားပွဲတွေရော၊ ဖိုင်ကက်ဘိနက်တွေရော၊ ဒါဘယ်လို ဖြစ်တာလဲ။
ပတ်ပတ်လည်ကို ငေးမောကြည့်နေပြီးနောက် စိုးရိမ်ပူပန်ဟန်။ ထိုမှတစ်ဆင့် ထိတ်လန့် တုန်လှုပ်ဟန်သို့ ပြောင်းလာသည်။
မီမီ။ ။ ဒီအခန်းဟာ ဘာအခန်းလဲ၊ ဒါ ဘယ်သူ့အခန်းလဲ။ ဒါ အစ်ကိုကြီး အခန်းမှ ဟုတ်သေးရဲ့လား။
ပူပန်သောကဖြင့် ပတ်ပတ်လည် လှည့်ကြည့်နေပြီးနောက် သူမကိုယ်သူမ ပြန်ငုံ့ကြည့်ရာမှ မယုံကြည်နိုင်သလို ဟန်အမူအရာ ဖြစ်လာသည်။
မီမီ။ ။ (အသံတိုးတိမ်စွာ) ကျွန်မ ဘယ်သူလဲ။ (ခဏ တွေဝေစွာ စဉ်းစား) ကျွန်မဟာ လူ တစ်ယောက်လား၊ ဒါမှမဟုတ် အသုံးကျတဲ့ ပစ္စည်းလေး တစ်ခုလား ...။
မီမီသည် လက်ဖဝါးများကို ဖြန့်ကြည့်သည်။ မိမိကိုယ်မိမိ မှန်ထဲတွင် ကြည့်သလို ဟန်မူရာဖြင့် စူးစမ်းစွာကြည့်ရင်း တဖြည်းဖြည်း ကျေနပ်လာသည်။ မိမိ၏ ပါးပြင်များ လည်ပင်းများကို ကိုင်တွယ်ပွတ်သပ်ပြီး ကျေနပ်စွာ ပြုံးလိုက်သည်။
မီမီ။ ။ ကျွန်မဟာ လှပတဲ့ တန်ဖိုးကြီးတဲ့ အရုပ်ကလေးတစ်ခု ဖြစ်ပါတယ် ...။
ထို့နောက် ကိုယ့်ကိုယ်ကို ဂုဏ်ယူဝင့်ကြွားစွာ မော့၍ ပြုံးလိုက်သည်။
[အခန်းကူးပြောင်း ဂီတ၊ မီးအလင်းများ မှေးမှိုန်ကာ မှောင်ကျ။ ကန့်လန့်ကာချ]။ ။
--------
ဂျူး
စံပယ်ဖြူ၊ မတ်၊ ၂၀၀၁။