ချစ်-ကြည့်

ချစ်-ကြည့်
----------------------
(၁)
ချယ်ရီ မဂ္ဂဇင်းတိုက်တွင် ဆရာအောင်ပြည့်၊ ဆရာမောင်ကိုယု၊ ဆရာအောင်သောင်း (သင်္ချာ) တို့နှင့် စာပေနှင့် မအပ်စပ်သော စကားများကို ထိုင်၍ ဝိုင်းဖွဲ့ စကားပြောနေစဉ် ကာလတွင် ဖြစ်ပါသည်။
တိုက်အပေါက်ဝ ဆီမှ နဖူးပြောင်ပြောင် လူဝကြီးတယောက် ဝင်လာပါသည်။ ထိုလူသည် ယခင်တချိန်က စာလုံး အနု အရွကလေးများဖြင့် ပရိသတ်ကို ကိုင်လှုပ်ခဲ့ဖူးသူ၊ ယခုတော့ အင်းလေးတွင် အေးချမ်းစွာ နေထိုင်ယင်း စာရေးကျဲပါးကာ စာဖတ်သူ သက်သက်နီးပါး ဖြစ်နေသူ ဆရာ သိန်းသန်းထွန်းပင် ဖြစ်ပါသည်။
ကျွန်တော်တို့ စာရေးဆရာ လေးဦးသားသည် သူ ဝင်လာသည်ကို မြင်လိုက်ကတည်းက မတိုင်ပင်ပဲလျက် ပြိုင်တူဆိုသလိုပင် ထိုင်ရာမှ ထရပ်လိုက်ကြ မိပါသည်၊ သူ့အား နေရာပေးရန် ဂါဝရပြုရန်ကား လုံးဝ မဟုတ်ကြပါ။ အားလုံး သူနှင့် ကင်းရာ ဝေးရာသို့ ထွက်ပြေးကြရန်သာ ဖြစ်ပါသည်။
သို့ရာတွင် သူက တိုက်ပေါက်ဝမှ ဝင်လာသူ ဖြစ်ပြီး ကျွန်တော်တို့ ထွက်ပြေးရန်မှာလည်း နောက်ဖေးဘက် အိမ်သာ ရှိရာသာလျှင် ဖြစ်နေသောကြောင့် မတတ်သာသည့်အဆုံး မချိသွားဖြဲဖြင့် သူ့ကို နှုတ်ဆက်လိုက်ကြရပါသည်။
“ဘယ်တုန်းက ရောက်သလဲ အစ်ကို” ဟု ကျွန်တော်ကအငယ်ဆုံး ပီပီ နှုတ်ခွန်း စတင်ရပါသည်။
တော်တော်နှင့် မဖြေသေးပဲ “တရက် နှစ်ရက်ပဲကွ” ဟု ပြောပြောဆိုဆို ကုလားထိုင်လွတ် တလုံးတွင် အိကနဲ ဝင်ထိုင်ပါသည်။
သူ့မျက်နှာသည် ဝေဒနာ တခုခု ခံစားနေရသလို ရှိပါသည်။ လက်ကိုင်ပဝါကို ထုတ်လျက် နှပ်ချေးညှစ်သကဲ့သို့ မကြာမကြာ လုပ်နေပါသည်။
ဆရာအောင်ပြည့်က ...
“အစ်ကို နေမကောင်းဘူးလား”
“အေးကွာ၊ ရှမ်းပြည်လောက် မအေးဘူး ထင်လို့၊ ရောက်ရောက်ချင်း ညက တံခါးတွေဖွင့်ပြီး အိပ်မိတာ အအေးမိသွားတယ်၊ ခု ထမင်းတောင် ကောင်းကောင်း စားလို့ မရသေးဘူး”
သည်တွင် ဆရာအောင်ပြည့်သည် ဝမ်းသာအားရသော ရယ်မောသံကို ထိန်းမရအောင်ကို ဟစ်ထုတ် လိုက်ပါတော့သည်။
ဤသည်ပင်လျှင် ကျွန်တော်တို့ လေးယောက် စောစောက သူဝင်အလာ ထွက်ပြေးရန် ကြံစည်မိကြခြင်းပင် ဖြစ်ပါတော့သည်။ ဆရာ သိန်းသန်းထွန်းသည် ဝသလောက် အရုပ်ဆိုးပြီး သူ့ပုံသဏ္ဌာန်နှင့် လိုက်ဖက်စွာ အစားပုပ်သူ ဖြစ်ပါသည်။ ဆရာအောင်ပြည့် အဆိုအရ အောင်ကြီး ယိုညှပ် ပေါင်မုန့်ကလေးများကို တထိုင်တည်း အလုံးနှစ်ဆယ် စားပစ်ဖူးကြောင်း၊ ထမင်း ငါးပန်းကန် စားနိုင်ကြောင်း၊ တထွာလောက် ရှိသော ငါးခူကျော် ငါးကောင်ကိုပင် အမြည်း စားလိုက်တတ်သေးကြောင်း စသဖြင့် ဖြစ်ပါသည်။
ဆရာ သိန်းသန်းထွန်းသည် လူ့ပုံပန်း ကြည့်ပျော်ရှုပျော်မျှ အဆင့်ပင် မရှိသော်လည်း ရုပ်နှင့် မလိုက်ဖက်သော အရာကား စာရေးရာတွင် အလွန် ညက်ခြင်းပင် ဖြစ်သည်။ အထူးသဖြင့် အချစ်အကြောင်း၊ စကားလုံး အသုံးအနှုန်း၊ သူနှင့် ဆရာ မောင်သာရသည် ခပ်ဆင်ဆင် တူပါသည်။
တခါက ရှုမဝ မဂ္ဂဇင်းတိုက်ရှေ့တွင် ဆရာ သိန်းသန်းထွန်းနှင့် ဆရာ မောင်သာရတို့ မျက်နှာချင်းဆိုင် ရပ်လျက် စကားပြောနေသည်ကို နံဘေးတိုက် အနေအထားမှ နေ၍ ကျွန်တော် ကြည့်မိသည်တွင် ကျွန်တော့် မျက်စိထဲ၌ ဂျပန် နပမ်းသမားကြီး နှစ်ဦး နဖူးချင်း ယှဉ်တိုက်ပြီး နွှဲရန် ဟန်ပြင်နေသကဲ့သို့ ထင်မြင်မိခဲ့ဖူးပါသည်။ မည်သို့ပင် ရှိစေ ...။
(၂)
စာရေးဆရာများ စုမိလျှင် လက်ဖက်ရည်ဆိုင် ထိုင်ကြရိုးထုံးစံ ရှိကြောင်း လူများစုက သိရှိယုံကြည်ထားပြီး ဖြစ်ပါသည်။
စောစောက ပြောသလို ကျွန်တော်နှင့် ကျွန်တော့်ထက် ဂုဏဝုဍ္ဎိ ဝရဝုဍ္ဎိ ကြီးမြင့်သော ဆရာများ စုစုပေါင်း ငါးယောက်တို့သည် ချယ်ရီတိုက်နှင့် မလှမ်းမကမ်းတွင် ရှိသော ပလက်ဖောင်း လက်ဖက်ရည်ဆိုင်တွင် ထိုင်ကြပါသည်။ လက်ဖက်ရည် ခြောက်ခွက် မှာပါသည်။ ဆရာ သိန်းသန်းထွန်းအတွက် တခွက် အပိုမှာကြောင်း ပြောရန် လိုမည် မထင်ပါ။
ကျွန်တော်တို့ စာရေးဆရာ များသည် (ကျွန်တော့်ကိုယ် ကျွန်တော် ဆရာကြီးများနှင့် တန်းတူ သုံးနှုန်းခြင်းကို ခွင့်လွှတ်တန်ရာ ပါသည်။) ထုံးစံအတိုင်းပင် စာပေနှင့် ပတ်သက်သော စကားများ၊ ယောက်ျား ပီသသော အတင်း အဖျင်းများကို ဆက်လက် ပြောကြားနေကြပါသည်။
ထိုစဉ် ဆရာ သိန်းသန်းထွန်းက ကျွန်တော့်အား နှစ်ကိုယ်ကြား စကားတစ်ခွန်း ဆိုပါသည်။ ဆိုင်းမဆင့် ဗုံမဆင့်။
“ကိုယ်တို့ မြို့နယ် မဂ္ဂဇင်းအတွက် ကိုယ် တာဝန်တခု ယူထားတယ်”
သူ့စကား မဆုံးခင် ...
“ကျွန်တော် တတ်နိုင်သမျှ တိုတို ရေးပေးပါ့မယ်၊ အစ်ကို ဘယ်လောက် အချိန် ပေးနိုင်မလဲ”
“ကိုယ့်အတွက် သန်ဘက်ခါ အိပ်ခန်း ရထားလက်မှတ် တစောင်လဲ မောင်ရင့် မျက်နှာနဲ့ လုပ်ပေး”
သူ့စကားသည် အဆက်အစပ် မရှိသလိုလိုနှင့် ဆက်စပ်နိုင်လွန်း လှပါသည်။ မနက်ဖြန် ဝတ္ထုတစ်ပုဒ် အပြီး ပေးရမည်။ ပြီးတော့ ခက်ခဲလှသော ရထားလက်မှတ်။ အစားကြီးသလို အအိပ်ကြီးသောကြောင့် အိပ်ခန်း။ အားလုံးကို ကျွန်တော် နားလည်လိုက်ပါသည်။ “ဟုတ်ကဲ့ပါ အစ်ကို” လိုက်ပါသည်။
တကယ်လည်း ကျွန်တော့်တွင် ယခုတလော စာအလွန် ရေးချင်သော ရောဂါ ဖိစီးနေပါသည်။ ရေးဖြစ်နေသည်ကိုလည်း ကျွန်တော့် စာဖတ်ပရိသတ်များ သိပါသည်။ အထူးသဖြင့် မဂ္ဂဇင်းတိုင်း လိုလိုတွင် အလှည့်ကျ ဖြစ်ဖြစ် တလ တပုဒ် နှစ်ပုဒ်တော့ ပါဖြစ်သည်။
ပြီးတော့ စိတ်ကူးတခုက လွန်ခဲ့သော သုံးလေးနှစ်က စပြီး ရှိနေနှင့်ခဲ့သည်။ ဝတ္ထု ပီသ မပီသကိုကား ဆရာ့ ဆရာများ၊ စာဖတ်သက် ရင့်သူများက ဆုံးဖြတ်ကြပါလိမ့်မည်။
ကျွန်တော့် အနေနှင့်ကား ကျွန်တော့် ပတ်ဝန်းကျင် (အလွန် ကျဉ်းမြောင်းပါ သေးသည်။ လူးကြားသူကြားကို သွားချင်တိုင်း မသွားသင့်၊ မသွားအပ်သော သမိုင်းပေးတာဝန် ရုပ်ရှင်မင်းသား အဆိုတော်) မှ ရတတ်သမျှသော လူ့သဘာဝကလေးများကို ဖတ်ချင့်စဖွယ် ရေးသားခဲ့ပါသည်။
မှတ်မှတ်ရရ သည်စိတ် ဝင်ခဲ့သည်မှာ ကျွန်တော့်သမီး တသက်ထက် ဆယ်လကျော်ကပင် ဖြစ်ပါသည်။ ဆိုလိုသည်မှာ ကျွန်တော့် ဇနီးသည် သူ့တွင် ကိုယ်ဝန် ရှိနေပါပြီဟု ဆိုခဲ့သော အချိန်က စခဲ့ပါသည် ဟူ၍ ဖြစါပါသည်။
တကယ်တော့ ကျွန်တော်သည် “အချစ်” အမည်ရှိ အချစ်ဝတ္ထုဖြင့် နာမည်ရလာခဲ့သူ “အချစ်စာရေးဆရာ” ဟု ကနဦး ကတည်းက အဆုံးအဖြတ် ခံခဲ့ရသူ မဟုတ်ပါလား။
(၃)
ဆရာ သိန်းသန်းထွန်းသည် အတန်ကြာ စဉ်းစားပြီး ကျွန်တော့်အား လေးလေးနက်နက် ကြည့်ယင်း နှိုက်နှိုက်နှဲနှဲ စကားဆက်ပါသည်။
“ဟေ့ကောင်၊ သုမောင်ပဲ လိုချင်တာနော်”
ကျွန်တော် ချက်ချင်း သဘောပေါက်လိုက်ပါသည်။
အထက်တွင် ဆိုခဲ့သလို ဘဝဆန်သော ဝတ္ထုတိုများ ငါးနှစ်ဆက်တိုက် ရေးလာခဲ့သည်များကို သူ ဖတ်မိဟန် တူပါသည်။ ထို့ကြောင့် “သုမောင်ပဲ လိုချင်တာနော်” ဟု ဆိုခြင်းသည် ကျွန်တော်၏ စာရေးဆရာ ဖူးစသစ် ဘဝက အချစ်အကြောင်း၊ အချစ် အရေးအဖွဲ့၊ နုနွဲ့သော ချစ်စဖွယ် ငေါ့တတ်သော စကားလုံးများကို လိုချင်ကြောင်း ပြောလိုမှန်း ကျွန်တော် သိလိုက်ပါသည်။
“ကျွန်တော် ကြိုးစားပါမယ်” ဟု ထပ်မံ ကတိပေးလိုက် သော်လည်း ယခုအချိန်တွင် ကျွန်တော် အချစ်အကြောင်း ဘယ်ကဲ့သို့ ရုတ်တရက် စိတ်ကူးရပါမည်နည်း။ အယင်က လူပျို လူလွတ်၊ ဘယ်မိန်းမမျိုးကို မဆို ရိုးသားစွာ စိတ်ကူးယဉ်၍ ရနိုင်သည်။ ယခု ကျွန်တော်သည် ကလေးနှစ်ယောက် အဖေ။
သည်တော့ ဇာတ်လမ်းတပုဒ် ရေးမည်ဆိုလျှင် ကျွန်တော် ဇွတ်ဖန်တီး ယူရမည် ဖြစ်သည်။ မည်ကဲ့သို့ပင် ရှိစေ ဆရာ သိန်းသန်းထွန်း ဖြစ်နေသည့်အတွက် ကျွန်တော် ဇွတ်ဖန်တီး ရပါတော့မည်။
သူ့ကို ကတိပေး ပြီးပြီးချင်းပင် စတင်၍ ကျွန်တော် စဉ်းစားရပြီ ဖြစ်ကြောင်း ဆရာ သိန်းသန်းထွန်း သိလျှင် ကျွန်တော့်ကို သူ မည်မျှ ချီးကျူးပါလိမ့် မည်နည်း။
(၄)
စောစောက ပြောသလို ကျွန်တော်တို့ ငါးဦးအား လွတ်လပ်စွာ စကားပြောနေခိုက် အမှတ်မထင် ဆိုသလို မိန်းမပျိုတဦး ကျွန်တော်တို့ အနီးမှ ဖြတ်လျှောက် သွားသည်ကို အားလုံး ဂရုစိုက်လိုက် မိကြပါသည်။ ဒါကိုလည်း တယောက်ကို တယောက် သိလိုက်ကြပါသည်။
ရယ်စရာ သဘောနှင့်ပင် (ဆရာ သော်တာဆွေ၏ စကားအရ) ဂေါ်ခန်း ဖွင့်မိကြပါသည်။ တကယ် စိတ်ရင်းမှာ မပါကြောင်းကိုကား အသက် အငယ်ဆုံး ကျွန်တော်ကိုယ်တိုင် ဝန်ခံရဲပါသည်။ သည်ကိစ္စမျိုးမှာ ကင်းရှင်းသောကြောင့်လည်း ယခုလို ရယ်ပွဲဖွဲ့ နိုင်ကြခြင်း ဖြစ်ပါသည်။ ကျွန်တော်တို့ စာရေးဆရာများသည် စရိုက် သဘာဝချင်း မတူလျှင် ကွယ်ရာမှာရော ရှေ့တင်မှာပါ ဖက်လှဲတကင်း မရှိတတ်ကြပါ။ ဟန်လုပ်ပြုံးသော အပြုံးမျိုးကို စာဖြင့်သာ ပြုံးတတ်ပါသည်။ ထားပါ။ အရေးကြီးသည့် ကိစ္စ။
ခုနက အမျိုးသမီးပျို၏ ကိစ္စ။
ဆရာကိုယုက စတင်၍ ရှေ့နေပီသစွာ မှတ်ချက် ချပါသည်။
“ဖိုးတွမ်တီးနဲ့ လိမ်ပြီး ဟန်လုပ်လျှောက်တာ မဖြစ်နိုင်ဘူး၊ ရိုးရိုး လမ်းလျှောက် သွားတာပဲ၊ ဒါပေမယ့် ကြည့်ကောင်းတယ်”
ဆရာအောင်သောင်း (သင်္ချာ) ကတော့ ...
“ဆရာယု မှားပြီဗျ ... သူတို့က လေ့ကျင့်ထားတာ၊ မျဉ်းတကြောင်းကို မြေပြင်ညီမှာ တည့်တည့်သားပြီးမှ လေ့ကျင့်ခန်းယူ လျှောက်တာဗျ”
ဆရာ သိန်းသန်းထွန်းကမူ အင်းလေးသား ဖြစ်နေသူ ပီပီ ...
“တို့ အင်းသူတွေကတော့ ခြေတဘက်တည်းနဲ့ လှော်တက်ကို ခတ်လို့လားတော့ မသိဘူး၊ လမ်းလျှောက်ယင် တဘက်က ပိုလှသကွ”
ဆရာအောင်ပြည့် ကတော့ မြန်မာစာ ဆရာ၊ မြန်မာမှ မြန်မာ ...။
“ဒေါက်မြင့်ဖိနပ် မစီးပေမယ့် ဘိုမတွေလိုပဲ လမ်းလျှောက်လှတာပါပဲဗျာ”
ကိုင်း ကျွန်တော့် အလှည့်။
ကျွန်တော် ဘာမျှ မပြောပါ။ မပြောနိုင်ပါဟု ဆိုလျှင် ပိုမှန်ပါသည်။
(၅)
ဆရာကြီး ဗန်းမော်တင်အောင်သည် သူ့ခေတ်တွင် အချစ်နှင့် ပတ်သက်၍ “ဘုန်းမောင် တယောက်တည်းရယ်” ဝတ္ထုတွင် စာဖတ်ပရိသတ်၌ “တော့၊ ကာ၊ သာ၊ ပဲ၊ ရယ်၊ နှင့်” စကားလုံးများ ထပ်တလဲလဲ သုံးပြီး တွင်ကျန်ရစ်စေပါသည်။
ဆရာ သိန်းသန်းထွန်းသည် သူ့ခေတ် သူ့အချစ်နှင့် ပတ်သက်၍ “မပန်ပါနဲ့ ကြွေချင်တယ်” ဝတ္ထုတွင် စာဖတ်ပရိသတ်၌ ကွယ်၊ ရယ်၊ မယ်၊ တယ်၊ စကားလုံးများ ထပ်တလဲလဲ သုံးပြီး တွင်ကျန်ရစ်စေခဲ့ပါသည်။
ကျွန်တော်၏ “အချစ်” မည်သော ပထမဆုံး အချစ်ဝတ္ထုနှင့် ပတ်သက်၍ “သိတယ် မှုတ်လား” စကားလုံးများ ထပ်တလဲလဲ သုံးပြီး လူငယ် တော်တော်များများထံ တွင်ကျန်ရစ်စေခဲ့ ဖူးပါသည်။
သို့သော် ယခုအချိန်တွင် ဆရာ သိန်းသန်းထွန်းရော ကျွန်တော်ပါ “ကွယ် နိုင်၊ ရယ် နိုင်၊ သိတယ်မှုတ်လား နိုင်” တော့သော အခြေအနေ မဟုတ်တော့ကြပြီကို ဆရာ သိပါသည်။ ဆရာ ဗန်းမော်တင်အောင်ကား ကွယ်လွန်ရှာပြီမို့ ပြောရန် မလိုတော့ပါ။
(၆)
ဆရာ သိန်းသန်းထွန်း ခင်ဗျား ...။
ဆရာ လိုချင်သော ဝတ္ထု ကျွန်တော် ရေးပါတော့မည်။
စောစောက မိန်းကလေး လမ်းလျှောက်ပုံနှင့် ပတ်သက်၍ ကျွန်တော် မှတ်ချက် မချနိုင်ခဲ့ပါ။
အကြောင်းမှာ ဆရာတို့ မမြင်ခင်ကပင် ထိုမိန်းကလေး၏ ခြေထောက်ကလေးကို ကျွန်တော် အလျင်ဆုံး သတိထားမိခဲ့ခြင်း ကြောင့်ပါ။
သူ့ခြေထောက်ကလေး ဟာလေ ကျွန်တော် ငယ်ငယ်က စွဲလမ်းခဲ့ရတဲ့ အိပ်မက်၌ပင် စွဲမက်မြင်ခဲ့ရတဲ့ ခြေထောက်ကလေးနဲ့ တူနေလို့ပါ ဆရာရယ်။
ခြေညှိုးနှင့် ခြေခလယ်က နည်းနည်းရှည်ပြီး ခြေသူကြွယ်နှင့် ခြေသန်းကလေးက နည်းနည်းတိုနေတာကို ခုထိ ကျွန်တော် မေ့မရ မှတ်မိနေဆဲပါ။
ကျွန်တော့်ရင်မှာ လှပ်ခနဲ တချက် ဖြစ်သွားရပါသည် ဆရာရယ် ... သိတယ် မဟုတ်လား။
--------
သုမောင်
၁-၂-၈၅
ညောင်ရွှေ မဂ္ဂဇင်း၊ ၁၉၈၅။