ငယ်ကခူးတဲ့ စံပယ်ဦး (မိုးငြိမ်းဧ)

ငယ်ကခူးတဲ့ စံပယ်ဦး (မိုးငြိမ်းဧ)
=======================
ကျွန်မတို့မှာ အမေ့ဘက်ကစပ်လျှင် တော်သော ဦးကြီးသုံးယောက် ရှိခဲ့ဖူးပါသည်။ ယခုမူ သုံးယောက်လုံးပင် ကွယ်လွန်ကြပါပြီ။
အမေ့အစ်ကိုကြီး ဦးကြီးလွန်းမောင်သည် ကျွန်မတို့ မမွေးမီကပင် ကွယ်လွန်နှင့်ပါသည်။
အလတ် ဦးကြီးထွန်းမောင်သည် ကျွန်မ လေးနှစ်သမီးအရွယ်က ဆုံးသည်ဖြစ်၍ ရေးရေးမျှပင် မမှတ်မိတော့ပါ။
အငယ် ဦးကြီးကွန်းမောင် တစ်ယောက်သာ ကျွန်မတို့ အရွယ်ရောက်ပြီးမှ ဆုံးသဖြင့် ကောင်းစွာ သိရှိလိုက်ပါသည်။
သေသောသူ ကြာလျှင်မေ့ဟု ဆိုရိုးရှိသော်လည်း အမေသည် သူ့အစ်ကိုများကို မကြာကြာ သတိရတတ်ပါသည်။ ထိုအခါ သူ့သားသမီး ကျွန်မတို့ကို ပြန်ပြောင်း ပြောပြလေ့ရှိပါသည်။ ကျွန်မတို့ ဦးကြီးများကား လူဇော်လူကျော်များပင် ဖြစ်ကြပါသည်။
အမေသည် သူတို့၏ တစ်ဦးတည်းသော ညီမဖြစ်သည့်အပြင် ကုသိုလ်ကံကွက်ကျားကာ ငွေကြေးပြည့်စုံသူ ကျွန်မတို့အဖေနှင့် အိမ်ထောင်ကျသဖြင့် သားချင်းများထဲတွင် အချောင်လည်ဆုံး ဖြစ်ခဲ့ပါသည်။ ထိုအခါ အစ်ကိုများ၏ဒဏ်ကို အခံခဲ့ရဆုံးသူလည်း ဖြစ်လာပါသည်။
အမေ မကြာမကြာ ပြန်ပြောင်းသတိရကာ တသသ ပြောပြတတ်သည်မှာလည်း သူ့အစ်ကိုလတ် ကိုကြီးထွန်း၏ အကြောင်းများ ဖြစ်ပါသည်။
ကျွန်မတို့ကား ကိုယ်မမြင်ဖူးလိုက်သော အထက်ဦးကြီး နှစ်ယောက်ကို သံယောဇဉ်မရှိလှပါ။ အမေပြောပြလျှင် ပုံပြင်တစ်ပုဒ်ကို ကြားရသလို ခံစားမှုကင်းစွာ နားစိုက်လိုက်လေ့ ရှိကြပါသည်။
သည်အတွက် ကျွန်မမှာ အခြားမောင်ညီမတွေထက် ပို၍ အပြစ်ရှိကောင်း ရှိပါလိမ့်မည်။ အကြောင်းမှာ ကျွန်မသည် သမီးဦးစနေ ဖြစ်ခဲ့၍ ရှေးထုံးစဉ်လာအတိုင်း သူတစ်ပါးထံ စတိရောင်းခံခဲ့ရာ ဦးကြီးထွန်းက ဆန်တစ်ပြည် ငွေတစ်မတ်နှင့် ကျွန်မတစ်ယောက်ကို ဝယ်ခဲ့သောကြောင့် ဖြစ်သည်။
ဦးကြီးထွန်းကို မွေးစားဖခင်အဖြစ် စတင်သိရစဉ်က စ၍ ကျွန်မ မမှတ်မိနိုင်တော့သော ဦးကြီးကို သံယောဇဉ် တွယ်ဖြစ်ခဲ့သည်ဟု ထင်ပါသည်။ သို့သော် ဦးကြီးထွန်းအကြောင်း ကြားရသမျှ အကောင်း တစ်ခုမှ မပါပါ။
ငယ်စဉ်က ပညာကို ကောင်းစွာမသင်၊ ဆိုးပေသည်။ ရောက်တော့ မည်သည့်အလုပ်ကိုမှ ကောင်းစွာ လက်ကြောတင်းအောင် မလုပ်။ ထန်းရည်သောက်၊ ကြက်တိုက်၊ ဖဲရိုက်၊ အစုံလုပ်ရင်း တေပေလေလွင့် နေခဲ့သည်။ အိမ်ထောင်သုံးဆက် ယူခဲ့သည်။ ပြီး အသက်သုံးဆယ့်ခြောက်နှစ် အရွယ်ကောင်းတုန်းမှာ မသေသင့်ဘဲ သေခဲ့ရလေသည်။
ဦးကြီးထွန်းကို လူပေလူတေဟု အများက ပြောသလို သာမန်သိ သိထားသည်ထက် ပို၍ နားလည်ခဲ့ရသည်မှာ ကျွန်မ အသက်နှစ်ဆယ်ကျော် အရွယ်လောက်ကျတော့မှ ဖြစ်ပါသည်။
သည်တုန်းက ကျွန်မတို့ မိသားစုသည် အမေ့ဇာတိရွာ ငုမြိုင်သို့ ပထမဆုံးအကြိမ် ရောက်ခဲ့ဖူးကြပါသည်။ အမေငယ်စဉ်က အစ်ကိုသုံးယောက် မောင်တစ်ယောက်နှင့် အတူနေထိုင်ခဲ့သော ကျွန်းအိမ်ကြီးမှာ အတော်ပင် ဟောင်းအိုနေပါပြီ။
ကျွန်မ ဆယ်နှစ်သမီးအရွယ်က အဘွားကွယ်လွန်ခဲ့၍ ယခုအခါ ဦးလေးငယ်တို့ မိသားစု နေထိုင်လျက် ရှိပါသည်။
ထိုရွာအိမ်တွင် ကျွန်မ အမှတ်ပြုမိသော အရာနှစ်ခု ရှိပါသည်။ တစ်ခုမှာ အိမ်ခေါင်းရင်းထောင့်ရှိ စံပယ်ရုံအိုကြီးဖြစ်၍ ကျန်တစ်ခုမှာ ဘုရားစင်ရှေ့ရှိ ဆွမ်းကပ်ခုံပေါ်မှ ဇာနားတပ် ပိတ်ဖြူစားပွဲခင်းစပင် ဖြစ်ပါသည်။
စပယ်ရုံကြီးမှာ အတော်ကြီးလှပါသည်။ စိမ်းစိမ်းစိုစို ရှိနေမည့် မိုးရာသီမှာမူ မည်မျှအုံကြီးမည်ကို မခန့်မှန်းတတ်ပါ။
ကျွန်မတို့ ရောက်သွားသော နွေဦးအချိန်မှာ အရွက်များကျ၍ အရိုးချည်း ကျန်နေသည်ကပင် ၅ ပေ ပတ်လည်ခန့်မျှ ရှိပေလိမ့်မည်။ ဦးလေးငယ်က ပြုပြင်ထိန်းသိမ်းထားပုံ ရသည်။ စံပယ်ရုံကိုမြင်တော့ အမေက အတိတ်ကို ပြန်ပြောင်းတမ်းတနေပါသည်။
“အမေတို့ ကလေးဘဝကတည်းက အစ်ကိုထွန်း စိုက်ခဲ့တဲ့ အပင်ပေါ့၊ သုံးလေးနှစ်တစ်ခါ ပြန်ပြန်ပျိုးထားလို့ ခုလောက် အုံကောင်းနေတာ၊ ဘုရားလေးပွဲလှည့်တဲ့ တပေါင်းဆို ပွင့်လိုက်တာ၊ တစ်ရွာလုံးက အပျိုတွေ ပန်ရတယ်၊ မမခင်နွယ်က အစောဆုံး လာခူးတာပဲ၊ အမေတို့ ဆရာကြီး ဦးရွှေခိုင်ရဲ့ သမီးပေါ့”
ကျွန်မကမူ စားပွဲခင်းစကို ပို၍ မျက်စိကျနေမိပါသည်။ ရှေးက ခေတ်စားခဲ့ဖူးသော တက်တင်းခေါ် တစ်ချောင်းထိုး ဇာပန်းများဖြင့် အနား လိုက်ထားသည်။
ဇာပန်းမှာ အဖူး အရိုးနှင့် အရွက် ရောနေသော နှင်းဆီပန်းပုံဖြစ်၍ အလွန်လက်ရာ ကောင်းလှသည်။
အနားထောင့်လေးဖက်တွင်လည်း ချည်မျှင်များထုတ်ကာ သူ့အသားပေါ်တွင် သူ့ချည်နှင့်သူ ရက်ဖောက်ဇာပန်းပွင့်များ ဖော်ထားသေးသည်။ စားပွဲခင်းမှာ ဝါကြန့်ကြန့် အရောင်ထွက်၍ အတော်ပင် ဟောင်းရိနေပါသည်။
သည်တုန်းက ကျွန်မသည် ဇာထိုးပန်းထိုးအတတ်ကို အသေအလဲ ဝါသနာပါနေခိုက်ဖြစ်၍ ယင်းစားပွဲခင်းကို အတော်ပင် စိတ်ဝင်စားခဲ့ပါသည်။
“အဲဒါလည်း အစ်ကိုထွန်း လက်ရာပေါ့”
ကျွန်မသည် အံ့အားသင့်နေခဲ့ပါသည်။ အလုပ်ကို လက်ကြောတင်းအောင် မလုပ်ချင်သူသည် စိတ်လည်းရှည်၊ ဇွဲလည်းရှိရမည့် သည်လို အနုပညာမြောက် အလုပ်မျိုးကို မည်သို့ လုပ်ဖြစ်ခဲ့ပါသနည်း။
သူတို့ပြောပြသလောက်လည်း ဟုတ်မည်မထင်၊ ဒါလောက် လက်ရာကောင်းအောင် ဇာပန်းထိုးတတ်တဲ့ လူဟာ ဘယ်နည်းနဲ့မှ လူညံ့ မဖြစ်နိုင်ဘူးဟုလည်း ဦးကြီးထွန်းကို အထင်ကြီးစ ပြုလာသည်။
“ဦးကြီးထွန်း ထိုးခဲ့တဲ့ အခြားလက်ရာတွေကော ရှိသေးလားဟင်”
“ဒီတစ်ထည်ပဲ ကျန်တော့တာ အစ်ကိုထွန်းက သိပ်ပျင်းတာ၊ ခိုင်းတိုင်းလုပ်တာ မဟုတ်ဘူး၊ ဒါတောင် အမေ ပူဆာလွန်းလို့ ထိုးဖြစတာ”
“ဆရာကြီး ဦးရွှေခိုင်တို့အိမ်မှာတော့ အစ်ကိုထွန်းလက်ရာ ကျန်ဦးမှာပေါ့”
ဦးလေးငယ်က ပြုံးပြ၍ ပြောပြန်ပါသည်။
“ဆရာကြီးသမီး မမခင်နွယ်ကိုတော့ အစ်ကိုထွန်းက ခင်တယ်လေ”
“မမခင်နွယ်ကလည်း အပြောကောင်းတယ် မဟုတ်လား၊ အစ်ကိုထွန်း အိမ်လာလည်ပါဦးဆိုပြီး အတင်းခေါ်သွားတာပဲ၊ ထမင်းပွဲအကျပြင်ပြီး အရင်ကျွေးတာ၊ ပြီးတော့မှ အစ်ကိုထွန်း ခေါင်းအုံးစွပ် ဇာနားကလေး ထိုးပေးပါဦးဆိုပြီး ခိုင်းတာ၊ အစ်ကိုထွန်းလည်း ခြေကိုချုပ်မိသွားတာပဲ၊ ဆရာကြီး မျကနှာကလည်း ရှိတာကိုး”
အမေပြောပုံမှာ လှိုက်လှဲ လိုလားသံတွေ အများကြီး ပါလာသည်ဟု ထင်ရသည်။
ကျွန်မကမူ ထိုခဏမှာပင် မခင်နွယ် ဆိုသူကို မနှစ်မြို့ စိတ်ဝင်ခဲ့ပါသည်။
တ်စဆက်တည်းမှာပင် ကိုကြီးထွန်းကိုလည်း စိတ်ကွက်လိုက်ပြန်သည်။ ကိုယ့်အိမ် ကိုယ့်နှမလေးအတွက်တော့ မထိုးဘဲ ထမင်းလေး တစ်နပ်စားရုံနှင့် သူခိုင်းတာ လုပ်ပေးရအောင် မခင်နွယ် ဆိုသူက ဘာမို့လဲ။ အလကား လုပ်အားကို ခေါင်းပုံဖြတ်တာဟု ခပ်စွာစွာ တွေးလိုက်မိသည်။
သို့သော် ထို မခင်နွယ်တို့အဖေ ဦးရွှေခိုင်သည် အမေတို့ငယ်ကြောက် ရွာအလယ်တန်းကျောင်းက ကျောင်းအုပ်ကြီး ဖြစ်သည်သာမက လယ်ပိုင် ယာပိုင်နှင့် ဘုရားဒကာ သိမ်ဒကာ တစ်ယောက်လည်း ဖြစ်ပါသည်။
မခင်နွယ် ကိုယ်တိုင်မှာလည်း အပြောချို၍ အသားဖြူ လုံးကြီးပေါက်လှမို့ ရုပ်ချောရုံသာမကသေး၊ မြို့ ကျောင်းမှာ သွားနေဖူး၍ ဝတ်ပုံစားပုံ အလွန် ခေတ်မီလှသည်ဟု ဆိုပါသည်။
“ရွာက အပျိုတွေဆို မမခင်နွယ် ပြင်ပုံဆင်ပုံကို လိုက်အတုခိုးကြရတာပဲ”
အမေက အားကျသံနှင့်ပြောပြပါသည်။ သူလည်း အတုခိုးခဲ့ပုံ ရပါသည်။ မခင်နွယ်သည် အမေတို့ခေတ်က “ကြယ်ပွင့်” ဖြစ်ပါလိမ့်မည်။
“တို့ရွာမှာ လုပ်ခဲ့ဖူးသမျှ အလှူမင်္ဂလာဆောင်တွေထဲမှာတော့ မမခင်နွယ်တို့ မင်္ဂလာဆောင်က အကြီးအကျယ်ဆုံးပဲ၊ တန်ခူးလကြီးပေါ့၊ မှတ်မှတ်ရရပါပဲ၊ ရွာတောင် ထန်းတောထဲမှာ အစ်ကိုထွန်း မူးရမ်းနေလို့ အမေကြိမ်လုံးတစ်ချောင်းနဲ့ လိုက်ရိုက်တဲ့ နေ့ပေါ့”
ကျွန်မတို့ အဘွားလည်း အလွန်ထက်ပါသည်။ အသက် ၃၀ မပြည့်ခင် မုဆိုးမဖြစ်ခဲ့၍ သားတွေကို လူပျိုကြီးဖားဖား ဖြစ်သည်အထိ ကြိမ်တစ်ချောင်းနှင့် အုပ်ချုပ်ကာ ရုန်းကန် ကျွေးမွေးသည်ဟု ဆိုပါသည်။
မခင်နွယ်ကား သူ့အစ်ကို ကောလိပ်ကျောင်းသားက အိမ်အလည် ခေါ်လာသော ကောလိပ်ကျောင်းထွက် ဘီ၊ အိုင်၊ အေ စစ်ဗိုလ်ကလေး ဗိုလ်ရန်ကျော်နှင့် ဖူးစာဆုံကာ ဂျပန်ခေတ်ကပင် အိမ်ထောင်ကျသွားခဲ့ပါသည်။ ယခု ဗိုလ်ကြီးကတော် ခင်နွယ်ကျော်ဖြစ်၍ နေပါပြီ။
ကျွန်မသည် မင်္ဂလာပွဲတွင် သတို့သမီး၏ ဆံထုံးပေါ်မှ စံပယ်ပွင့်များသည် ဦးကြီးထွန်း၏ ပွင့်ဦးစံပယ်တွေများ ဖြစ်နေလေမည်လား၊ အိပ်ရာခမ်းနားမှ ဖဲခေါင်းစွပ်၏ အနားပန်းများတွင် ဦးကြီးထွန်း၏ လက်ရာများ ပါဝင်လေမည်လားဟု တွေးတောနေမိသည်။
ထို့ပြင် သူ အလွန်ခင်သော မခင်နွယ်၏ မင်္ဂလာပွဲမှာ ဝေယျာဝစ္စ လုပ်ကိုင်ပေးရမည့် အချိန်မျိုးမှာ ဦးကြီးထွန်းသည် အဘယ်ကြောင့် ထန်းတောထဲသို့ ရောက်နေပါသနည်းဟု မေးခွန်းထုတ်ကြည့်နေမိ ပြန်ပါသည်။
အမေ့ကို ဖွင့်ဟ၍ မေးဖြစ်သောအခါ အမေက “ဟ တောက်တီး တောက်တဲ့” ဟု ထအော်ပါသည်။
“ကြံကြီးစီရာတော်၊ မမခင်နွယ်က ဆရာကြီးသမီး ရွာကွမ်းတောင်ကိုင်ပဲ၊ အစ်ကိုထွန်းက ရွာရိုးကိုးပေါက် လျှောက်ပြီး ကြက်တိုက်နေတဲ့လူ၊ ဘယ်လိုလုပ် ကြိုက်မိကြမှာလဲ၊ ပြီးတော့ အစ်ကိုထွန်းက မိန်းမသုံးယောက်သာ ယူခဲ့တာ မိန်းမကိစ္စ မရှုပ်တတ်ဘူး”
အမေသည် ကျွန်မကို ပြစ်မှုကျူးလွန်ထားသည့်ပမာ ကြည်ခဲ့ပါသည်။ သူ့ အစ်ကို ကျွန်မဦးကြီးလိုလူနှင့်မှ မသင်္ကာ ဖြစ်ရပါမည်လားဟု သူတို့ကြယ်ပွင့်ဘက်က လိုက်၍ နာခဲ့ဟန် တူပါသည်။ အမေ့ကွယ်ရာတွင် ဦးလေးငယ်ကို မေးကြည့်သေးရာ သူလည်း ထိုအချိန်က ကလေးအရွယ်သာ ဖြစ်၍ သေချာဂန သိပုံမရပါ။
မခင်နွယ်တို့ တစ်အိမ်သားလုံးနှင့် ဦးကြီးထွန်း ကျွမ်းဝင်ခဲ့ပုံကိုသာ အခိုင်အလုံပြောပြနိုင်ပါသည်။ ကျွန်မကား ဦးကြီးထွန်းသည် မခင်နွယ်သာမက တစ်အိမ်လုံး၏ “ခိုင်းဖတ်”ပင် ဖြစ်ခဲ့လေသလားဟု အဆိုးမြင် ရှုထောင့်မှ တွေးကြည့်လိုက်ပါသေးသည်။
အမေကတော့ သူတို့ မိသားစုသည် ဦးကြီးထွန်း၏ “ကျေးဇူးရှင်” ဟုပင် ဆိုပ်သည်။ ဦးကြီးထွန်းကို ဆရာကြီး၏ ညီတစ်ဦးပိုင်သော ဖျာပုံမြို့မှ ဆန်စက်တစ်ခုတွင် တာလီစာရေး ခန့်ခဲ့ဖူးသောကြောင့် ဖြစ်ပါသည်။
“အေးပေါ့ သူ ပထမမိန်းမ အဲဒီတုန်းက တွေ့တာပေါ့”
“အဲဒီတုန်းက ခင်နွယ် ယောက်ျားရပြီလား”
“ရပြီးပြီထင်တယ်၊ ရွာမှာ အစ်ကိုထွန်း ဆိုးလွန်းလို့ အမေက အကူအညီ သွားတောင်းတာနဲ့ ဆရာကြီးက သူ့ ညီကို ချက်ချင်းပြောပေးတာပဲ”
အမေက ကျေးဇူးမမေ့သော လေသံနှင့်ပြောနေပါသည်။ ကျွန်မကမူ “မဖွင့်ဟနိုင်သော အချစ်” များထဲတွင် ဂုဏ်နိမ့်သူတို့၏ အချစ်လည်း ပါဝင်လိမ့်မည်လားဟု ကိုယ့်ဘက်ကိုယ်ယက်ကာ တွေးတောနေမိသည်။
ကျွန်မတို့မြို့ အိမ်သို့ ရောက်သောအခါ ဦးကြီးထွန်း အလွမ်းပြေအဖြစ် စပယ်ပင်တစ်ပင် စိုက်ထားလိုက်ပါသည်။
ကျွန်မတတ်ချင်သော ဇာပန်းထိုးနည်းကိုမူ ယနေ့ထိ မည်သူမျှ ကျွန်မအား သင်မပေးနိုင်ခဲ့ကြပါချေ။ ကျွန်မသည် ဦးကြီးထွန်းကို များစွာ တမ်းတနေမိပါသည်။
ကျွန်မနည်းတူ ဦးကြီးထွန်းအား တမ်းတတတ်သူ တစ်ယောက်ကို ကျွန်မ အသက် ၁၄ နှစ် ၁၅ နှစ်အရွယ်လောက်တွင် တစ်ကြိမ်တည်းသာ တွေ့ခဲ့ဖူးပါသည်။
တစ်နေ့တွင် အိမ်ခန်း၌ အမေနှင့်အတူ ထိုင်စကားပြောနေသော ဧည့်သည် မိန်းမကြီးတစ်ယောက်ကို ကျွန်မမြင်လိုက်ရပါသည်။ ရုပ်ရည်က သိပ်အချောကြီးမဟုတ်ဘဲ ကြည့်ပျော်ရုံသာ ရှိလိမ့်မည်ဟု ထင်ပါသည်။
အဖိုးတန် အဝတ်အစားများနှင့် တောက်တောက်ပြောင်ပြောင် ရှိလှသည်။ အသက်အရွယ်နှင့်စာလျှင် များစွာ ခေတ်ဆန်နေသည်ဟုလည်း ထင်မိခဲ့ပါသေးသည်။ အမေနှင့်မူ သိဟောင်းကျွမ်းဟောင်းများလို စကားပြောကြပါသည်။
“အထွန်းတို့ကော နေကောင်းကြရဲ့လား”
အမေမျက်နှာ ကွက်ခနဲ ပျက်သွားသည်ကို မှတ်မိနေပါသေးသည်။ အမေသည် သူစိတ်ကျဉ်းကျပ်လာလျှင် လုပ်မြဲအတိုင်း ခေါင်းကို အောက်သို့ ငုံ့ကာ လက်ချောင်းချင်း ပွတ်တိုက်နေပြီးမှ မပွင့်တပွင့် ပြန်ပြောခဲ့ပါသည်။
“အစ်ကိုကြီးဆုံးသွားပြီ မမနွဲ့ ”
ကျွန်မ သိသမျှ ဦးကြီးထွန်းကို အထွန်းဟု ထိုမိန်းမတစ်ယောက်သာ ခေါ်ဖူးသောကြောင့် များစွာ စိတ်ဝင်စားသွားသည်။ ထိုစဉ်က ဦးကြီးထွန်း ကွယ်လွန်ခဲ့သည်မှာ ၉ နှစ် ၁၀ နှစ်မျှပင် ရှိခဲ့ပါပြီ။
“ဘယ်လိုဖြစ်တာလဲ ညီမလေးရယ်၊ မမနွဲ့ ဘာမှမသိရပါလား၊ မမနွဲ့ဆီ ဘာလို့ အကြောင်းမကြားလဲဟင်၊ နေနိုင်ကြပါပေရဲ့”
ထိုမိန်းမ၏ မျက်နှာမှိုင်ကာ အညှိုးကြီးညှိုးကျသွားပုံ၊ အသံတွေ တုန်ယင် ကြေကွဲလာပုံ၊ မျက်ရည်တွေ ပိုးပိုးပေါက်ပေါက် ကျလာပုံတို့ကို နှစ်ကာလ အတန်ကြာသည်အထိ ကျွန်မ မေ့ပျောက်၍ မရနိုင်ခဲ့ပါ။
အခု အသက်အရွယ်မှာပင် ရုပ်ရှင်တွေထဲမှာ မင်းသမီးကြီး ဒေါ်မေနွဲ့၏ လွမ်းခန်းကို ကြည့်မိတိုင်း မဆီမဆိုင် ထိုမိန်းမ၏ အလွမ်းကို ပြန်လည်မြင်ယောင် နေမိပါသေးသည်။
ထိုမိန်းမသည် အမေက တုံ့ဆိုင်းတုံ့ဆိုင်း ရှင်းပြနေသည်ကို မျက်ရည်တွေကြားမှ ဆုံးသည်အထိ နားထောင်ပါသည်။
ပြီးလျှင် မျက်ရည်ကိုသုတ် နှပ်ညှစ်ကာ သူ့ကိုယ်သူ ထိန်းလိုက်ပါသည်။ အမေ့ကို နှုတ်ဆက်၍ ပြန်ရန်ပြင်သောအခါ အမေက အိမ်ဝအထိ လိုက်ပို့လိုက်ပါသည်။
ခွဲခွာကြခါနီးမှာမူ သူသည် တံခါးဝကို ခေါင်းမှီကာ “အထွန်းရေ အထွန်းရဲ့ .... အမျှကွယ် အမျှ အမျှ” ဟု အမျှဝေခဲ့ရှာပါသည်။ အမေလည်း မျက်ရည်စတွေနှင့် ကျန်ရစ်ခဲ့ပါသည်။
“အဲဒါ အစ်ကိုထွန်းရဲ့ ပထမမိန်းမ မနွဲ့ရီ ဆိုတာပေါ့၊ အရောင်းအဝယ်ကိစ္စနဲ့ ဖျာပုံကနေ ရန်ကုန်ခဏလာရင်း ဝင်လာတာ”
ဟု အမေက ပြောပြခဲ့ပါသည်။
“ဦးကြီးထွန်း ဆုံးတုန်းက ဒေါ်ကြီးနွဲ့ရီဆီ အမေတို့ ဘာလို့ အကြောင်းမကြားတာလဲ”
ကျွန်မက ခုမှပင် ဇာတ်ကြောင်းပြန်လှန်ကာ အမေ့ကို မေးမိပါသည်။
“ဘာလုပ်တော့မှာလဲ သမီးရယ်၊ ဘဝချင်းခြားကုန်ကြပြီပဲ၊ သူက တစ်မြို့တစ်ရွာမှာ၊ ပြီးတော့လည်း နောက်အိမ်ထောင်နဲ့”
ကျွန်မကမူ မိမိတွင် အိမ်ထောင်သစ် ရှိနေသည့်တိုင် တစ်ချိန်က ကြင်နာခဲ့ဖူးသူအတွက် မျက်ရည်စက်တွေ ချန်ထားနိုင်သေးသော
ထိုမိန်းမသည် ထိုချစ်ကြင်သူအား မည်သို့သော အင်အားမျိုးဖြင့် ခွဲခွာနိုင်ခဲ့ပါသနည်းဟု တွေးမိလာပြန်ပါသည်။
“သူတို့ ဘာဖြစ်လို့ ကွဲကြတာလဲအမေ”
အမေသည် မပြောတတ်သလို တွေးနေခဲ့ပြီးမှ မဆီမဆိုင် ဖြေပါသည်။
“သူတို့ ကွဲကြပုံလေးက သိပ်ကောင်းတာပဲ”
“အမေ့နှယ် လင်မယားကွဲတာပဲ ကောင်းတယ်ရှိသေးလား” “ဟဲ့ တခြားလင်မယားတွေလို ဆဲကြဆိုကြ၊ ရိုက်ကြပုတ်ကြ၊ ရုံးရောက်ဂါတ်ရောက်နဲ့ ကွဲကြပုံမျိုးမှ မဟုတ်ဘဲ၊ အေးအေးဆေးဆေး အချစ်အခင်မပျက် လမ်းခွဲကြတာ။
“ဖျာပုံမှာ သူတို့အကြောင်းပါပြီး မကြာခင်ရွာမှာ အမေတို့နဲ့အတူ ပြန်လာနေကြတယ်၊ အစ်ကိုထွန်းက ခဏလောက် လယ်လုပ်သေးတယ်၊ နောက်တော့လည်း ထုံးစံအတိုင်း ထန်းတောထဲ ရောက်ပြန်တာပေါ့။
“မမနွဲ့တို့က ကုန်သည်မျိုးရိုး ရောင်းတတ်ဝယ်တတ်နဲ့ ချက်ချက်ချာချာ ရှိတယ်၊ တို့အမေကဆို သူ့ချွေးမကို သိပ်သဘောကျတာ။
“တစ်နေ့တော့ သူအဝတ်အစားလေးတွေ ထုပ်ပိုးပြီး ကောင်းကောင်းမွန်မွန်ပဲ တို့အမေကို ကန်တော့တယ်၊ ပြီးတော့ တို့ရှေ့မှာပဲ သူ့ယောက်ျားကို ပြောတယ်၊ အထွန်းတဲ့၊ ဖျာပုံကို လိုက်ခဲ့ပါတဲ့၊ ဟိုမှာက ကိုယ့်မြို့ကိုယ့်ရွာမို့ သူလုပ်ကိုင်စားတတ်ပါတယ်တဲ့၊ အထွန်း အလုပ်မလုပ်ချင်နေ၊ သူလုပ်ကျွေးပါ့မယ်တဲ့၊ ဒီမှာတော့ သူ့ အနေနဲ့ ရောင်းဝယ်လုပ်ကိုင်လည်း မစားတတ်၊ မုဆိုးမ အမေအိုကြီးရဲ့ လုပ်စာကိုလည်း ကူမစားရက်ဘူးတဲ့”
“ဒါပေမဲ့ ဦးကြီးထွန်းက မလိုက်ဖူး မဟုတ်လား”
“အေးပေါ့၊ ဒါကြောင့် ကွဲတာပေါ့၊ တို့အမေကတော့ ကိုယ့်သားက တာဝန်မကျေလို့ ချွေးမ ပြန်သွားရတဲ့အဖြစ်မျိုး ဘယ်ဖြစ်စေချင်မလဲ၊ တို့နဲ့ပဲ ဆက်နေဖို့ ဇွတ်တားသေးတယ်၊ သူ ဘယ်လိုမှ မနေနိုင်တော့ဘူးတဲ့”
“ဘယ်လိုမှ မနေနိုင်တော့ဘူး” ဟူသော စကားကို ကျွန်မ တွေးကြည့်နေမိပါသည်။ ယောက္ခမ၊ ယောက်မတွေနှင့် ပဋိပက္ခမဖြစ်ဘဲ ထိုမိန်းမ၏ မာနသည် အဘယ်သို့ ပေါ်ခဲ့ပါသနည်း။ လင့်တစ်မျက်နှာကို အဘယ်ကြောင့် တစ်ရွာမထင်နိုင်ပါသနည်း။ ယောက္ခမလုပ်စာ သူမစားချင်သည့် စိတ်ဓာတ်ကလေးကိုမူ ချီးကျူးမိပါသည်။
“အစ်ကိုထွန်းက မလိုက်တော့ မှာခဲ့တယ်လေ၊ နွဲ့ကတော့ အစ်ကိုထွန်းကို ဖျာပုံကနေ စောင့်နေမှာပဲတဲ့၊ ဒါပေမဲ့ အထွန်း နောက်အိမ်ထောင်ပြုချင်လည်း ပြုနိုင်တယ်တဲ့၊ အဲဒီအခါ ကျရင်သာ နွဲ့ကို အကြောင်းကြားပါတဲ့၊ နောက် သူ့မြို့သူ ပြန်သွားတာပဲ”
“ဒါနဲ့ ဦးကြီးထွန်းကလည်း ဒေါ်ကြီးစန်းမေကို ယူလိုက်ရောလား”
ဒေါ်ကြီးစန်းမေသည် ဦးကြီးထွန်း၏ ဒုတိယဇနီး ဖြစ်ပါသည်။ ထိုဇနီးနှင့် သားသမီးနှစ်ယောက် ရခဲ့ပါသည်။
“ချက်ချင်း မဟုတ်ပါဘူး၊ တစ်နှစ်လောက် ကြာမှပါ၊ နောက်ထပ် လေးငါးနှစ်လောက်ကြာမှ မမနွဲ့လည်း နောက်အိမ်ထောင်ပြုတာ၊ မမနွဲ့ အိမ်ထောင်ကျပြီးမှ သူတို့တစ်ခါနှစ်ခါ ပြန်တွေ့ကြသေးတယ်၊ တစ်ယောက်ကလည်း အထွန်းတဲ့၊ တစ်ယောက်ကလည်း အနွဲ့တဲ့၊ အခေါ်အပြော မပျက်ကြဘူး၊ ဒါကြောင့် သူတို့ကွဲပုံကောင်းတယ်လို့ ပြောတာ”
“သူတို့ တစ်ခါမှ ရန်မဖြစ်ကြဘူးလား”
“ဟင့်အင်း မဖြစ်ပါဘူး”
“သေသေချာချာ စဉ်းစားပါဦး အမေရယ်၊ နည်းနည်းပါးပါးကလေးတောင် စကားမများကြဘူးလား”
“ဩော် ... ဒီကောင်မကလေး ခက်တော့တာပဲ၊ ဘာကြောင့် ဒီလောက် စပ်စုနေရတာလဲ”
“မဟုတ်ပါဘူး အမေရာ၊ ဦးကြီးထွန်း လူဆိုးလို့ ပြောကြတာကို မခံချင်လို့ပါ”
“အမလေး မခံချင်မရှိပါနဲ့၊ ကျုပ်ရဲ့ အစ်ကိုတွေအကြောင်း ကျုပ် အသိဆုံး၊ ကျုပ်ယောက်မတွေများ ကံဆိုးလွန်းလို့ ဒီလိုယောက်ျားတွေနဲ့ ရကြတာ”
အမေသည် သူ့ယောက်မ ခြောက်ယောက်လုံးနှင့် တည့်အောင် ပေါင်းနိုင်ခဲ့သူ ဖြစ်ပါသည်။
“အစ်ကိုထွန်းကတော့ အဆိုးဆုံးပေါ့၊ တစ်ခါတလေ မမူးဘဲနဲ့တောင် ဆိုးချင်တာ၊ မမနွဲ့က အင်မတန် သည်းခံရှာပါတယ်၊ တစ်ခါကပေါ့ မမနွဲ့က ဖျားနေတယ်၊ နေမကောင်းတုန်းဆိုတော့ ယောက်ျားက အနားမှာနေပြီး ဆေးတွေဘာတွေ ကိုယ်တိုင်တိုက်တာကို ခံချင်မှာပေါ့၊ ညည်း ဦးကြီးထွန်းက တစ်နေ့လုံး ရွာထဲလျှောက်နေတာပဲ၊ ညမိုးကြီးချုပ်မှ အိမ်ပြန်လာတော့ မယားကို ဘယ့်နှယ်နေသေးလဲလို့ အရင်မေးဖော်မရဘူး၊ စံပယ်ပင်ကိုတော့ ရေသွားလောင်းနေသတဲ့၊ ငါ့ကို သူ့စံပယ်ပင်လောက်တောင် မတွယ်တာပါဘူးလို့ မမနွဲ့က မျက်ရည်စမ်းစမ်းနဲ့ ပြောတယ်၊ ဒီလောက်ပါပဲအေ၊ ရန်တော့မဖြစ်ပါဘူး”
ဦးကြီးထွန်း၏ ဇာတ်သိမ်းခန်းမှာ ကြေကွဲဖွယ်ပင် ဖြစ်ပါသည်။
ဒုတိယဇနီး တစ်ရွာတည်းသူ ဒေါ်ကြီးစန်းမေနှင့် ကလေးနှစ်ယောက်ရပြီး ကွဲကြပြန်ပါသည်။ ဒေါ်ကြီးစန်းမေသည်လည်း ပျိုးနုတ် ကောက်စိုက်စသော အလုပ်ကို အလွန်ကျွမ်းကျင်လှသူ ဖြစ်ပါသည်။
လယ်သူမျိုးရိုး ဆွေမျိုးအင်အားလည်း တောင့်သူဖြစ်ရာ သူတို့လင်မယား၏ ပဋိပက္ခတွင် နှစ်ဖက်ဆွေမျိုးစု၏ တွန်းအားများလည်း ပါခဲ့လေသည်လား မသိပါ။ ပါခဲ့သည်ဆိုတောင်မှ ဒေါ်ကြီးစန်းမေတို့ဘက်က မလွန်ဟု ကျွန်မကပါ ယူဆလာနိုင်ပြီ ဖြစ်ပါသည်။
ဒေါ်ကြီးစန်းမေသည် ဦးကြီးထွန်း ဆုံးပြီးနောက် ၇ နှစ် ၈ နှစ်အကြာ သူကွယ်လွန်သည်အထိ အမေတို့မိသားစုနှင့် နီးနီးကပ်ကပ် ရှိခဲ့ပါသည်။ ကျွန်မ၏ ဝမ်းကွဲအစ်ကို နှစ်ယောက်ကမူ သူတို့အဖေ ကျွန်မဦးကြီးအကြောင်းကို ယနေ့တိုင် ပြန်လည် ပြောပြတတ်ခြင်း မရှိတော့ပါ။
ဒေါ်ကြီးစန်းမေနှင့် ကွဲပြီး ဦးကြီးထွန်းသည် ရွာမှထွက်ခဲ့ပြန်ကာ ကမာရွတ် ကွမ်းခြံတွင် ခြံစိုက်နေရင်း မလှသီဆိုသူနှင့် တတိယအိမ်ထောင် ထူပြန်သည်။
ထိုတတိယဇနီးကို အမေပင် သိပ်တွေ့ဆုံဖူးခဲ့ဟန် မတူပါ။ ရိုးရိုးအေးအေး ထုံထုံအအ ဆင်းရဲနွမ်းပါးသူ တစ်ယောက်ဖြစ်ကြောင်း သာမန်မျှလောက်သာ အမေက ပြန်ပြောနိုင်ပါသည်။
မလှသီသည် ဦးကြီးထွန်းနှင့် သားသမီး မကျန်ရစ်ဘဲ မရှေးမနှောင်းမှာပင် ကွယ်လွန်ခဲ့သည်ဟု ဆိုပါသည်။
“အစ်ကိုထွန်းမှာ ကောင်းတာတစ်ခုက တို့အမေက ဘယ်လောက်ပဲ ဆူဆူဆဲဆဲ ရိုက်ရိုက် ဘာတစ်ခွန်းမှ ပြန်မပြောဘူး ငုံ့ခံနေတာပဲ၊ နောက်တော့လည်း သူလုပ်ချင်ရာ လုပ်တာပဲ၊ အလုပ်တော့ မရွေးဘူး၊ ကျရာလုပ်တယ်၊ စွဲစွဲမြဲမြဲ မလုပ်တာ တစ်ခုပဲ၊ မရှိလည်း ဗိုက်မှောက်နေတယ်၊ သူများဆီက အချေးအငှား အတောင်းအရမ်း မလုပ်တတ်ဘူး၊ အမေ့ဆီကတောင် သူတစ်ခါပဲ တောင်းဖူးတယ်၊ တစ်ခါတည်းပါပဲ”
အမေ့မျက်လုံးအိမ်တွင် မျက်ရည်တွေ လည်လာပါသည်။
“အဲဒီတုန်းက မလှသီနဲ့ ကွမ်းခြံမှာနေကြတယ်၊ သီတင်းကျွတ်ခါနီးပေါ့၊ ညီမကလေး အစ်ကို့ကို ငွေတစ်ဆယ်လောက် ပေးပါတဲ့၊ သီတင်းကျွတ်မှာ မီးပုံးချိုးပြီး ရောင်းမလို့တဲ့၊ ဝါးနဲ့ စက္ကူဝယ်ဖို့ဆိုလား၊ နောက်မကြာခင်ဘဲ မြေပေါက်ရင်း ခြေထောက်မှာ နည်းနည်းခိုက်မိသွားတယ်၊ အနာက သေးသေးပါ၊ ကျက်တောင်သွားပြီ၊ သုံးလေးလလောက်ကြာမှ တို့မြန်မာလို ငန်းမန်းလိုက်တယ် ခေါ်မှာပေါ့”
မေးခိုင်ပိုး ဝင်သွားခြင်းပင် ဖြစ်ပါလိမ့်မည်။
“အမေတို့ မကုကြဘူးလား”
“နေမလား သမီးရယ်၊ ညည်းအဖေကဆို တို့ကြည့်မြင်တိုင်မှာ အဲဒီအချိန်တုန်းက နာမည်အကြီးဆုံး ဆရာဝန်ကြီး ဦးဖေကို ပင့်တာပေါ့၊ နှစ်ပတ်လောက်ပဲ ခံလိုက်ပါတယ်၊ သူ့မိန်းမ မလှသီနဲ့ ညည်းအဘွား လက်ပေါ်မှာပဲ ဆုံးတယ်”
မိခင်လက်ပေါ်မှာ သေဆုံးခွင့်ရသည့်အတွက် နောက်ဆုံးအကြိမ်အဖြစ် ဦးကြီး ကံကောင်းခဲ့ပါသည်။
သို့သော် ကျွန်မတို့ ဆွေမျိုးများကမူ “ထွန်းမောင်တို့များ သေတဲ့အထိ အဘွားကြီးကို ဒုက္ခပေးခဲ့တာ” ဟု ယနေ့တိုင် ပြောဆိုနေကြဆဲပင် ဖြစ်ပါသည်။
ဦးကြီးထွန်း အလွမ်းပြေအဖြစ် ကျွန်မစိုက်ထားခဲ့သော အိမ်ရှေ့မှ စံပယ်ရုံမှာလည်း တဖြည်းဖြည်း အုံကောင်းလာပါပြီ။ တပေါင်းလရောက်ပြီဆိုလျှင် စတင်ဖူးပွင့်တတ်ပါသည်။
ယခုနှစ်တွင် အပွင့်တစ်ထောင်ကျော်မျှပင် ရရာ ဆယ်ပွင့်တစ်ကုံး သီကုံးပြီး ရှေ့အိမ်နောက်အိမ်များသို့ပင် ဝေငှရပါသည်။
ညစဉ်ပင် လရောင်အောက်၌ မွှေးထုံပွင့်အာစ ပြုလာသော စံပယ်ပွင့်ဖြူများကို ခူးဆွတ်ရင်း ကျွန်မသည် တစ်သက်တွင် တစ်ကြိမ်သာ မြင်လိုက်ဖူး၍ ယခုအချိန်မှာ သေသည်ရှင်သည်ပင် မသိရတော့သော ကျွန်မ၏ ဒေါ်ကြီးဟောင်း ဒေါ်နွဲ့ရီကို များစွာ သတိရနေမိပါသည်။
သူ၏ အလွမ်းနှင့် အမျှဝေခန်းကိုကား ယနေ့တိုင် ပြန်လည်မြင်ယောင်နေမိဆဲ ဖြစ်ပါသည်။
ဒေါ်ကြီးနွဲ့ရီ ရှိနေသေးသည် ဆိုပါလျှင် ခုချိန်တွင် အသက်ခြောက်ဆယ် ကျော်ပေရော့မည်။
ကျွန်မသည် ကျွန်မ၏ စံပယ်ရုံမှ တစ်ကုံးစာမျှသော စံပယ်ဖြူပွင့်တို့ကို ခူးဆွတ်ကာ ဒေါ်ကြီး၏ ဆွတ်ဆွတ်ဖြူနေတော့မည်ဖြစ်သော ဆံပင်များပေါ်တွင် တစ်ကြိမ်တစ်ခါမျှဖြစ်စေ ကိုယ်တိုင်ကိုယ်ကျ ပန်ဆင်ပေးချင်ပါသေးသည်။
--------
မိုးငြိမ်းဧ
မိသားစုဝိုင်း မဂ္ဂဇင်း၊ ၁၉၇၈။